DIKTATNA MAHMAH

By ~ Khupding Ngaihte

Tutung innlam kapai ka va hampha mahmah cih ding ahi dia,mi a tedan bang zoukei mahleh phone thak khat kava neihloh hithet hi. Eikhawng in phone thak I neihtheih nadia chu I phone neihlai pen asiat hiam ahihkeileh amang phot ngai se hiveh aw. Hucidan chet ahimai, ka phone va sumang nemnum se kahi ve. Felhuailou,lah fellouh luatman le hikhollou maithei. Ahoihlam kipe zual taleng, a mutupen fellouh ziak hizaw cihtheih hi. A mutupen in a diktatlouh lam ana kitheih sam a ahoh-avakna peuh ah kizephawk giauguau leh lemloutak a ana om ding zaw deihsak hial khang. Amah bel a neulai a abil ana kivut khalou ahih mel le I theihlouh ahi. Mawhpaih motmot nuam hitaleng le kuapen mohpaih zaw ding ihi diam? Bilvuhlouh a om pen maw? Ahihkeileh abil ana vuhsaklou amah kemtute maw? Kuapen mawhzaw cih ah zaw ngaihdan kikelki fingfeng pawl bang le ki-om maithei. I ngaihdante khawng bang le a kibatlouh I hamphat nakhat uh himai ahi.

Hiai thu mawk nutsiat di’n pammaih kasa. I tenna khawvel ah mahni angsung khualna a lian mahmah ta a,utkei le’ng le sapte’n ‘individualism’ acihpen uh paipih simciat hita hang. ‘Kei’ sang a poimohzaw kei adin khawvel ah bangmah dang omkei cih I ngaihdan uh himai lou hia maw? Huci hitaleh ei I mawhkhak lechu eimah in a mawhteng I kipuak ding hileh kilawmtak. Khawvel ah thil hi in thu khatpeuhpeuh hitaleh hoihsuakvek/hoihbucing (perfect) cih ding vang mahmah ahihna kawmkal ah Individualism bang le hoihkhin khollou ding hi. Himahleh ei mawh eimah in I kipuak pen hoih kasak mahmah khat ahi. A tapa a mawhziak a apa sukminsiat a om cihdante tawmdeuh ta di’n lamethuai hi. Himahleh hiai lampang ah zaw mi khenkhatte’n hunlem amuh liainak uleh a innkuan, a beh aihkeileh a minam tanpha a sukminsiatna di’n mi khat khelhna pen vanzat zangkhai in nei uhi. A tup uh asang a,hucibang kawmkal ah thusia vek haksalou ahi ngei dia,lohcing zel uhi. Lohchinna lauhuai tak khat chu ahi ve. Ken le kei mawh ka kipuak dia, nou le nou mawh ciat kipuak mai unla adangteng ah zaw kipanpih tuah siausiau lai lehang maw..??

“Kuamah le diktat taktak nawn tuankei”,aihkeileh “Kei kia lou le…” cihdante kha ngaihdan lauhuaitak ahi uh. I ngaihdan tangpi uh zaw ahi zawzen samkei nadia, utlou pipi a I pomsuk gawpzel uh leh khemna a hon piluttu ahi nak hi. Khawvel kinohta cih suanlam a thil khatpeuhpeuh I hihsukgawp zel gige nalam a lampi dik lam le zongman nawnlou ihi ta maidiam? Khawvel a utleh kinohta ve,I lampi encian manlou pi in delhsuk gawpkei zaw leng I kha adi’n hoihzaw ding hi. Den a ngaihdan nih I gente kha a hoihlouh kia hilou a, ngaihdan dik le hilou himhim ahi. Hicibang a ngaihdan dikloupi I neih in siam hon tangsak zoulou ding;huaiziak a I diktatkei vetleh chu mahni kisiamtan sawm a panlak vetlouh ding himai hi. Houcik in gen taleng na hihna khatpeuh ah na diktatkei leh bel mi diktatlou pa/nu na himai. Himahleh na gamtatdan nakhek a, kisiamtan nadia gen ding a kilawm cihdan khawng na zontawm/phuahtawm a ngaihkei lechu mi diktat pa/nu na hihziak ahi ding. Laisiangthou a imuh bang in, na minam tawisangtu khat na hong suaktou pah ahi.

I ki-uita veihphawk ziak a kuamah le diktat nawnlou dia I gintak hun omtham mah inteh. Himahleh mi diktat ana omlai thamtham ahi. Innlam mah a thiltung, ka hamphat ziak mah a kava zakkhak khat kon gensawn nawn di awle…..

Nghathalte khat ahi a,a gendan in Dorcas Rd. a koikuam hiamkhat ah sumbawm khat a neitu omlouh ziak a giautau mahmah khat mu hi. A munchet ah va om khakei mahleng a gendan apat in huai sumbawm bel sahsim phitphet zawzen hihtuak hi. Asung etnailouh a le etlahhuai simpah maithei didan ahi khenkhatte adi’n. Aman le a lapah a,asung a et leh sum 4000 valdeuh khawng leh lai poimoh mahmah hidia kilawmtak hunkhop mu hi. ATM card,a lehlam ah a pin number kigelh khat le ana omkha zawmah hi. Kuateng chilphul a buaihuai hial i om uale? Nana phurluat lehzaw i gelhsawm lam toh ki kokalh daih hi di neikha. Vangphathuaitak cih ding ahi dia,huai sumbawm neitu pen phone number kigelhna bang le ana omkha zenzen hi. Mi diktat pa’n phone number a muh pen a call pah a….

Eh! haihuai na e maw lawmlawm? “A sumbawm lah mi hausa khat a hihtuak ngal a, ATM card bang a pin number kigelhsa hizawmah lai,sum drawkhiat na din zang leh zaw….” cihdan khawng i ngaihtuah maimai khadia aw..?? Diktatna zaw haina lel ahi ci a khawvel in a namkip khak ding lauhuai kasa mahmah ahi. Hucibang hun hon tung ngeikei hen,mundang teng ah a pomkip tak uleh le eigam beek ah hikei mai leh..

A call leh ana dawng khat a om ngei a,sumbawm sumang pa’n a sumbawm mukik a himai ve. Himahleh hiai tangthu kha hiciteng a beilou lai ahi. Sumbawm neitu pa kipak law mahmah ahihman in huai sumbawm a sumtang om tengteng sumbawm mutupa kiang ah kipahman dan in pia hi. Hiaiziaktak ahi hiai tangthu ka manghilh ngeilouh ding. Sapte’n cile uh ‘it was all fair and square’ ci ding uhi. A mutu lah diktat, a neitu lah kipahdan siam. Gintak bang haksa deksim zawzen khat a om ahi,lah a taktak hingal.

I DIKTATKEI LEH MEETHUAI ZAW ci lailai ding ihi diam?? ZAWNTAT NILOUH LENG EIMAH,I TATE MAH ZAWNTATNA IN HON NETUM KHONG DING AHI AW…….tuni’a inn hoihtak nalam leh zingciah na tate’n na lamsa inn a humbit zohlai ding uh beek kineemthei ditan in aw..

©Siamsinna leh Vakiangbu