DAWN DING TUI OMLOU

By ~ Lun Khuptong

Leitung hinna nei tengteng in a poimoh uh leh hinna ding ua poimoh masapente lak ua khat tuh tui ahi. Leitung hinna nei teng lak a tui nelou a hing chih hi tuchiang in zak in om naita dihlou hi’n ka thei hi. Khovel ah melmuh-tawngsan leh thu kizakna tuamtuam te apan in leitung mun tuamtuam ah tui taksapna leh tasam a hinkhua haksapi a na zang bang om ahi chih i thei gige hi. Hiai thute ka gen chiang in ; Nikhat ka ofis uah tui dawn ding a hong kitasam a, ka filtration machine uh a siat ziak in. Huai siat thu tuh sunitum in ka sepna muh uah gen leh sak in a om hi. Huai bawlhoih tu ding sampah mah le uh a siat nakluat ziak in dakkal sagih ding khong tui siangthou dawn ding neilou in ka om uhi. Dang tak lawten kua hiam sawl in pawlam dawr ah lei ding in ka sawl uh hi.

Tua bang thiltung a om lai in kei ka ofis uh a tunglam ah ka va vial vakvak leh. House keeping nasemte lak a khat migi mahmah in tui khitsianglouh tap a kai dawn dek lai ka va mu hi. Ken leng huai tui na dawn leh hong damlou ngeingei ding neiveh chi’n ka et thoh lel hi.

Tampi petmah dawnta ahihman in, a tawptawp in ka va naih phei a . Bang a chia na dawn a hiam? Ka chihleh a leina ding sum ka neihlouh man a, huai tui dawn mai ahih dan ahon hilh hi. Aw, eimah veh chi in ka taisan lel hi. A zingchiang in huaipa vun natna chikhat nei ahih ziak a hong kailou ahih lam a hon hilh u hi. Ka lungsim in huai tuinin a dawn ziak a om hi ngeingei ding ahi chih tuh ka thei hi.

Ni bangzah hiam zoh a ofis a hong kai non tak in, Bang ziak a nithum paita sung a ofis hong kailou na hiam? chia ka dot leh aman vun natna ka neih ziak a hong kailou ka hi. Huai zanlam a tuinin ka dawn ziak ahi chih doctol in chi ahi, chi’n a hon dawng hi.

Huai ni a nitaklam in, huai ka sepna mun a damloupa’n tuinin a dawnlai mu ing a ; huai tui dawn leh damlou ding ahi chih lam leng ka thei hi a, panpih thei a ka omlai a bang ziak a va panpih lou ka hi deh aw ! ? chi’n saimlouh ka kitan mahmah mai hi. Poisa mahmah leng le kikhelta ahihman maimah hi. Panpih thei ding a om hinapi leh ka panpih kei leh dawmlouhna leng thuak ding ahi chih ka theih hinapi in leng ka na panpih nuam kei ahi him hi. Ka kisik mahmah mai hi, lah bawl theih ahi non kei hi.

Hiai thu in nitak pumlum ihmu theilou in ahon koih hi. Huai hun a ka ngaihtuahna a hong suak tuh hiai ahi hi. Panpih thei ding leh panpihtu dia hitheih ding a theina I neihlai a, mi va panpihlouh in thil poi a sukkhakdan ka zilkhia hi.

Hiai ka thil tuah apan panpih thei ding a I omlai a kiphasak mailou a, I hih theihna zahzah toh mi I panpih ding ahi chih hi kon gennop leh kum nuam ahi hi. Panpihna khut kha thei ding leh panpihna na semthei lai ding a I omsung teng tuh kimansa a I om gige poimoh ahi chih tuh hiai a tung a thu a apan sinlai ka na muh suah ahi hi. Hiai dinmun a ding khata bang I om ding a, ding kha nailou bang leng I om tham ding uhi. Hiai panpitu ding dinmun a I om khak hun in meltheih louhte himahleh, panpih louh a koih mai ding hilou ahi hi. Panpih ngeingei ding ahi chih tuh ka hon thukhah nop ahi.

 

Note : “Nang thil neuchik a mi na va panpih ziak a, a tunung hinkhua ding uh kikheng thei ahi”.

 

©Siamsinna leh Vakiangbu