KA NGAIHNOU

By~ Thang Haulai Ffetg

Ka pang toh ka ban kikal ah akhut hon zep phei a, muangtak a om ahi chih haih vual louh di'n hon lenkip hi. Kenle lamdang saksim na toh kipak kahi chih etsak na di'n nuikawm a ka etsuk leh, A biang san tiuteu te leh, mithah siang kilkel zozen te'n hon entou a, bangmah genlou in hon nuihsan heuhau hi.

A besam sandup hiuhiau, alu apan kikhai khia, akawng sukhalou deuhtan a sausuk ngihngiah te'n a etlawmna behlap sawn sawn uhi.

Gen di pen theilou in ka en nilouh hi. 

A mit te ah eyebrow leh eye liner hunchet a nuh in, ngatchik in amit a zeem a, nuihmai kilawmtak te leh amuk sandaang hiuhiau, amel a sisan suak te'n a mel suak susan hiuhiau ua, a nuih chiang' a biangsuum toh a ui ha toh om cheichai a, huai te'n leng a etlawmna piandang sak mahmah a, amelsuak a lungmuan na mel kamuh pen in ka itna khangsak semsem hi . A piandan et mai inle ka lungsim , nopna leh thoven na in hon tan zou mahmah hi.

Kiptak in hon len chinten a, gen ding nei hileh kilawm tak in hon entou kilkel hi. 

Kenle a lungsim a om theinuam kahih man in "nau? Gen nop nei na hi hiam? Hon gen ve hoihtak in kon na ngaihkhiat sak di chi in ka lenkip hi". 

Hong nehnou dek sim mawk a, a mit te khitui in hon pak liliai mawk hi. 

Tomchik paulou in hon omzek a atawp in thathak hon la a, "Usuan, kon gen dia, hehpih tak in hon hehsan kenla ,hon taisan ken aw, ka hindan leh ka thiltuah te nang na theih louh di ka deih kei hi, kon ngailua. A tawntung a nang a di hihlouh khak di laulua kahih man in ka hinkho lui te'n hon lungnuam sak theilou a, hon dal tu pen satkhiak tum in ka tha neih tengteng kaikhawm zozen in, kum 1 vingveng kaki ngaihtuah nung in nakiang a genkhiak mai ka tel zota hi." chi'n mit tui kai niuniau in hon gen a, kenle hehpih lua kahih man in ka awm ah ka koibelh hi.

Sawtlou a khawl nung in, a khut ngawng apan akhut mong dong zuisuak in a khitui kai niuniau te hon nul a hon gen pan nawn hi. 

"Usuan ka neu apan in ah innkuan chidam tak ah khangkhia kana hikei a, banglou teng ka tuaktou hi. kum 15 lak kaphak in ah khatvei ka lawmte'n pawt di'n hon zawn ua, kenle kava zui hi. Theitui khawng dawndawn kaki sak lai un, kei ah ah zu hon na helsak ahi di ua, ka dawn patna ahih man in khamsia in ka om hi, pasal khawng le om a, bangchi gamtat kahi ua chih le ka thei nawnkei, zingkal in ka khekol ah si khawng ana baang hi. Huai nung kei leh kei ki mohsakna in ka dim a, hinkhua normal tak.zangthei di'n le kaki koih nawn kei. Inn sung ah gen lelah, hon tai nuam.di ngen ahih chiang ua hichi'n kana paltou. (kun suk dide kawm in leh khasiatna toh a gen hon sunzom hi). Kei deihtel na a hoh kahih man in kei mohna himai ahi. Kanak khawk thou e maw usuan chikawm in mit tui pak niuniau leh a ki nuul na a eyebrow vom malh khe toh hon entou hi.

Nang toh iki tuah ma, kha thum(3) di khawng in kana piangthak a huai apan hindan pangngai in ka hing nawn theipan hi. Hichibang kahi Usuan, a polam a non muh dan hi mahmah loh kahi. Chikawm in kisuanlah mel tak in hon en a, hon letna bang a khahkol zozen hi.

Tomchik paulou in ka om.a, akhut lenkawm in "nau, na chihtak na, thupi kasa e, bangmah iim neilou a na hindan non genkhiak ngam pen, kei a di'n sanlouh ngam di ahi kei. Na hih na kon theih semsem leh kon itna le a khang semsem a, nang apan mah a na hih na za kahih man in kon muan na aleh sawm(10) bang in a pungzou hi nang bangbang om nawn ken te, om lehle nang mah kon tel lailai di." chikawm in iit tak in ka awm ah kakoi belh a atal ka tawpsak hi.

* Mi khatpeuh iit dia naki sak.chiang in, hinkho paisa (hoih/hoihlou) nei teitei uh ahi chih phawk inla, huaite pen ngaidam dia mansa in om in.

* Na ngaihzawng nu/pa hiam pen nangziak a agentheih na aki behlap ding hilou hi.

* Khat leh khat kizop.na pen hun paisa te ziak a kikaih niamniam theih na dia ki zom hih louh ding ahi. Malam hun a ki hanthawn tuah dia kizop ihih kisam hi.

* Mi nangaih di leh, khat-tang(Lonely)naki sak ziak a naki ngaih pih di ahi kei a. Na ngaih ziak couhcouh a naki ngaihpih di ahi.

* Huchi in hiai thil thumte; GINNA, LAMETNA, IITNA a om gige ding uh. Himahleh hiaite' lak a athupipen tuh IITNA ahi.

1Korinte 13:13.

©Siamsinna Leh Vakiangbu