‘SEX’ ZIAK A KHEN IN KA OM MAIMAH...!!

~K Lianthansang

( Real-Life Story )

Ka inkuan khosakna uh zaw haksa mah e.!. Himahleh, kou khomkhom in neek di ka neizel sam ua; meikuang paisuak hial leh ek thak di kibansam hial in ka om ngeikei vanglak uh. Tipaimukh Road in a totkhakna khua-te lak a khat ah ka teeng ua, Paite kampau hikei mahleng, Paite siang sitset lak a khanglian ka hihman in, kou pau bang ka siamkei zawdaih hi. Unau, numei ngen 5 ka pha ua, kou deihteelna ziak a, unau pasal omlou hikei mahle ung, simmohna di’n huaipentak, mi’n hon zatsak sek uhi.

Kum 2012 hi’n ka thei. Ka pa’n taksa hatlouhna tuamtuam hon nei a, Lamka lam ah ki-enkol diing in hon zinsan hi. Kou ka nuta hon un ka kikol ua, haksatna kichi kammal ka zamun mahmah. Huaihun in, kei tunga numei tegel in pasal aneita uhi. Ka pa ki-ensak khin mahleh, check-up zihzeh ngai di ahihdan, Doctor te’n ana gen ziak un, beidong kisasim mahmah hihtuak hi (athugen khenkhat apan ka theihdan in).

Himahleh, innlam a kou naupanghon leh ka nukia(numei hon) om ka hihman un, hon awlmoh mahmah mai a, hongpai sawm teitei hi. Ka lou uh lah taam gawp, akhou di lah gina omlou ka hihman un, buaina khukpi a tawmlut ka bang mai uhi. Ka pa’n leng, huaiteng khawng ngaihtuah a nei vek ahi ngei dia, damlou sasa in hongpai hi.

Ka pa….innlam zuan in hongpai mahleh, innlum hong tungkei.!!. Hongpai ahi chihtan ka thei ua, kou unau bang kipaklua in ka kitawm sauhsauh zozen uhi. Bangmah honpuakzou di’n ka gingta kei. Himahleh, muamkhum(sweets) bangzah hiam bek kinem a, phe sauhsauh ka hilim uhi. Gari hong gin teng bang in, kong ah ka kivual dendan ua, ka pa’ meel muhkhak in a om ngeikei.

Nitum kuan in, gari khat hongtai nawn a, lam-en tak in ka na en uhi. Ahihhang in, ka pa’ sakmel di himhim mulou in, gari in hon tai liamsan vengveng mai hi. Innsung a lut dia ka kisak laitak un, ka khawte uh khat hongpai a, amel ah kipahna himhim a belh kei. Kintak in hongpai zuauzuau zozen a, apaidan apan in a khedap nuai ah ‘sipiring’ kithuah hileh kilawm abang hial hi.

Huaite’ inn, kou inn khenglam ahih a, lamlianpi zuul leng ahi kei. Tunghak kisalua a hong kinpai hiding a ka koih u’leh, kou kianglam hon naih gulgul tamai hi. Huaihun tan in leng, thuhoih leh kipahhuai za ngei diing in ka kineem lailai uhi. Ka lam-etlouh bangtak un, thu hongtung a; “na pa uh….lamkal a gari cheetsual ziakin aliamkha a, Lamka lam ah puak in a om…lunghimoh luatna di omkei mahleh, kintak a na delhsuk uh angai diing..!” hong kichita mai zaw…etna di a vaang tel mai. Ka mittui bang apawt zungzung hial hi.

Ka nu’n leng, vaihawm didan tuan theipahkei mahleh, kei inngak a pang dingin hon gen ngal hi. Aman ahihleh, ka sum neih sunsun uh zang a zinsuk pah sawm mahleh, ka naute buaipihlouh theih ahikei uh. Ka naute neu lawlai uh ahihman in, ka nu’n tonpih vek hi. Kei kia inn ah ka om a; achang in singpuak, loukuan, siamgat chihte ka hihkop zelzel hi.

Ka pa’ khutguh teng gawpvek ahihman in, operation louh theih ahikei. Sum lam ah buaina ka tuak ngal ua, himahleh Pathian’ kiang ah ka tai zelzel uhi(thuumna tungtawn in). Sum zontheih nana a zong in, ka pa’ khut chu, operation zoh in omthei a, ka kipak mahmah uhi. Himahleh, mawkmai a damsiang diing ahikei. Damdawi Inn a sawtkuam tak om ngai ahih zawkmah man in, ka lou uh chuh ‘khuul(khoh nawnlouh a koihdap)’ mai angai hial hi.Ken ahihleh, sum zontheih nana a zong in, anntang peuh ka nute’ neek di’n ka leh-khaksuk zel hi. Achaang a mi’ lou peuh a kuan in sum ka zong a, sing-at(cubic lang khawng) peuh pu in 10/20 ka loh hun leng a om. Sanggam pasal ka neihlouh ziak mah un, pasal banga ka gamtat hun leng a om mun mahmah hi. Mi’n hon hehpihthei mahmah mai ua, Biakinn a ‘antangpham’ khawng bang leng hon piak vek ni uh leng omtham hi.

Huchi’a hinkhua ka zatlai in, mundang a om ka khawte uh khat hongpai hi. Ama’n, imphal lamte(eimi) khat hon tonpih a, achaang in kou inn ah hong pawtpih zelzel hi. Imphal tangvalpa ahihleh, Zodawnlam mungeilou ahihman a munuam in, ka khawpa uh hongzui dan ahi. Nitak teng phial a honghoh chiang un, k’ong kimaingal gawpta uhi. Himahleh, aval lua a ka kihoulam uh ka thei kei. Ka pa’ dinmun bang hon dong a, Operation ngainawn di ahihdan ka hilh hi.

Amau leng, ka khua ua sawtlua omlou in hon kiksan nawn pah ua, ka lung bang aleng deksim thepthup. Ka lungsim in, ’lungzuan thelbang thousak diing lel a, bang diing a mel hon mukha se ka hiam…’ ka chi vungvung sek hi. Ahitak a gen in, huai tangvalpa bel amel-apuam a sekei. Mihausa mahmah ahi ua, mi hehnepdan leng asiam bok. Amah ngaihtuah kawm in, na k’on sem bang zaw…gim lamlam leng ka phawk nawn kei.

Hunte hongpai zel in, Chrismass leh Kumthak hunte hongtung hi. Ka sungkuan dangte lah Lamka lam ngen a om ahihman un, kei kia a huaihun-te zatlouh theih ahikei. Lasiam, Nu Vungthiankim in, “Inkuan kim in Christmass zangnuam lai veng…..” chi’a, the-haam bangmai a a-oih ngiahngiah chiang bang in, kei ka na kipiak bawl hi. Aphuaktu’n, alaphuah pen, kei ka na kipiakbawl lam thei leh leng, ‘disciplinary action’ hon laakkhum hial ka gingta kei..!

Lungzuangtak a huai hunbi-te zangzou in; sum zontheih nana ah ka zong nawn hi. Nikhat, siamgan aa kei kia nangawn kisikhop hial a ka buailaitak in, ka kong uh hong ging keuhkeuh hi. Ka Innsung ua lutna ding in, VISA leng apoimoh kei a, Interview a kiat chih leng a omkei. Huaiziakin, luttheihna dia ‘Phalna’ aw ka suahkhiat toh kiton in, kong hong kihong hianhian ngal hi. Kuadang ahikei, tumalam a hon lungzuangsaktu, Imphal tangval melhoih mahmah ana hi maimah hi. Hongtung phet, kou inn a hong dianglut ahihdan ka khawnung theihkhiat sawnsawn hi.

Kou inn ah giah asawm a, kei kia om ka hihman in ka phalkei. Amah kia a hongzin vengveng ahihman in, giahsak di’n hoih mahleh, ‘high tension’ gui bangmai aa sisan hatlai tuak ka hihman un, kisukha le ung ahoihloulam tunkhak di ka lauh ziakin, mundang ah ka sawl hi. Aman leng, thumangtak in, hongzin masak a atunna(alawmte inn) lam anaih ngal a, huai ah ava kinga hi. Suun hun in bel, kou inn ah class hongla zel a, paihun-paiphaat bel aneikei. ‘Remained back’ ahi gige mai. ‘Extra class’ dan in, ka nasepte hon seppih khial ngeikei a, lou ka kuanchiang in leng hon zui gige hi. Ka sepsep hon seppih a, ka nu leh pa toh kitheisa ahih zawkmah man un, itna ka napeta..!

Nikhat, suun hun in siamgat ka sawm a, aman leng agatdan theinuam in ka kiang ah hong tu tiipteep hi. Ka lungkhamdan khawng ka genpih a, aman bel “lungkham ngailou, kei ka om na vele..na haksatna teng uah k’on panpih diing..” chi’n hon hehnem tawmtawm zel hi. Hon genzomzel a, “na pa leng lunghimoh angaikei. Kei ka dam nakleh, hongdam pah mai di ahi. A operation nawn diing leng, lungkham ken aw…ken asumbei teng hon seensak vek diing ka hi..” hon chi a, ka kipak mahmah hi.

Lungkimtak a houlimkhawm a ka omlai un, ‘Sex’ neihpih di’n hon zawn tamai hi. Lamdang bang ka sa zozen a, alehlam ah ahon chiamnuih hidi’n ka gingta zel. Chitakdeuh a hon gen ahi chih ka theihtak in, athilsawm pen, “Mission Impossible” ahihdan ka hilh hi. Huainung in leng, adai tuankei a, hon zawn teitei ahihman in, “nang toh I kiteen chianga ka ‘mouvanken’ thupipen diing ahihman in, tu’n k’on pethei mawk kei. I kiteen chiang a, nang a di mah ahi…ngakzoh hamham sawm mai ve maw?” chi’n ka ngen ngutngut hi.

Aman leng,”na haksatna teng ua hon panpih inga, nang kiang a khatvei sunsun thil k’on nget maw n’on iit di. K’on nget pen hon pelechin, na pa’ ki-etkolna a abeiteng leng hon seensak vek di ka hi..” chi’n, hongen nawn leuleu hi. Ka pa’ damna diing lah ka deih mahmah a, alangkhatlam ah ka siangthouna ka subuah nuamkei. Lungbuaitaka ka omlai in, thagum hon zatkhum tamai hi. Ka pantheihtawp in pang mahleng, panzoh di vual ahikei. Amah atha hatzaw himhim ahih banah, ka it mahmah ahih zawkmah man in, kikoukhiat a..sukzahlak ka utlam ahikei zel.

Mi khenkhat in, “phimvang sunga khawlkhau khumlut abaihlam hetkei..” achih uh zaw dik mah. Himahleh, thagum-thatang zanga, khawphawklou zen a hon khoih nung in bel, huai thu adikna di a-om nawnkei. Phim, taang hetlou sung ah khawlkhau khumlut ahaksa kei hial. Ka khawphawklouh sung a bang thil tung ahia chih ka theikei. Himahleh, ka halhkhiat tak in bel, thil omdan bangkim ka theichian vek a, ka kahkah hang in phatuam nawn di vual ahikei.

Huainung in, ka pa’ ki-etkolna zaw hon seensak mah. Himahleh, lungnopna kiching ka neinawnkei. Huainung sawtlou in, kei leng Lamka lam ah ka zinsuk hi. Lamka a sepna di zok omlou ahihman in, Mumbai lam ah na sem a kiloh diing in ka kuansuak hi. Pau-le-ham ah ka buai ngal a, himahleh ahunsawt dungzul in ka hithei toutou vanglak hi.

Sawtsim mahmah va omkhia ka hihman in, ka tangvalpa’ omdan atuam hiaihiai hi. Aziak di ka dotdot chiangin leng hon gen nuamkei. Himahleh, kapkawm hial a ka dot takin,” mi khatvei ka luppihsa, bangmah di ka chinawn kei. Huaiban-ah, sanggam pasal neilou nahi a, na khosakna uh le aniamlua. Huaikia hileh phave, Class – 10 le zoulou na hi. Ken numei, sepnaneilou leh loh neiloute bangmah di ka chihlouh pi…hon theisiam mai in aw..” hon chihkhum tamai zaw, thuaksiam ahaktel mai. “ ‘Sex’ Ziak A Khen In Ka Om Maimah..” chi’a, kahtam lohlouh ngal, gen didang ka theikei.

Himahleh, akhawnung sawtlou in, Pathian’ kiang ah ka taingal hi. Thuumna ka neinei mai a, akianglam zotna in ka zang zawta hi. Huainung kum khat zoh in, numei lohneilou deihloupa’n zi anei hi (khatvei leng a luppih khaklouh ahi mah diam ah; a zi dia deih hial hiven). Zi aneihnung in leng, nungak dang a saisai lai a, a zi asugenthei ngei mai. Huaihun apan in, Pathian ka muanna akip deuhdeuh mai a, ka hihtheih zahzah in amah ka phat zelzel hi.Pathian in kei adia hon piak ahihlouh ziak in, ka itpen toh ka kiteng kei uh. Aman ka maban di atheihoih khopmai a, huai mipa toh kiteeng himaizen le ung, haksatna ka thuak di teng kim sipsip in ana theikhawl hi. Huaiziakin, ahunlaitak in hon kikhensak a(attunglai in haksasim bang mahleh), kikhenlou hile ung, tua a zi’ thuak bangbang kei thuak di himaimah didan ahi hi. Ka lungsim ah, ‘hon naih un k’on naih diing, ka thuak diing Toupa’n aphal, vuithei ka hikei chih leh, Sianlemgel hinkhua ka tuah-te, sian’ phallouh leh theihpihlouh omlou’ chi’a, la khawng a kisasek-te tuh ka kingakna bulpi ahidenta hi.

Ka thutawpna ahihleh - Kei lemgelna leh ka lungsim bangbang in paileng, genthei law di ka hi. Pathian in, kei adia hoihzaw di atheih ziakin, ahaksa leng hon thuaksak masa phot zozen hi. Pathian in ei adia hoihzaw di naak theihlua ahihman in, haksa ituah hun chiangin leng ‘vui’ mailou a, Pathian’ kianga kipahthu gengen didan ahi. Ahun ngakzou peuh le’ng; ‘vuah azuk leh khawphat di maban, mual a-om leh guam leng om teitei’ chihdan deuh in; ahaksa ituah leh anuam in hon zui diing ahi chih thei ni. Ke’n leng, Pathian’ lemgelna ka na ngakzoh man a, hiaitan tung ka hi, ka chi hi.

Laigelhtu’ Lungsung Pan:

Hiai Tangthu, atak mahmah a thiltung ahi. ‘Sex’ ziaka khen a om nu’n,”ka mangngilh theikei a, hon gelhsak lechin adan a omdeuh dia, midangte’n leng kimuhsuahna leh hinkhawthak patna dia azattheihkhak u’leh..” chi’a hon sawl ziak a, ama’ gelh di dandan a, k’on gelhkhiat sak ahi. Haksatna bangteng ituah hang un, Pathian’ tungah ‘Khase leh Ngui’ mailou in, amah naihna di’n zangchiat ni’u aw…?

1008 – Ka Kipak – 2015

©SIAMSINNA LEH VAKIANGBU