LENGVAN TULLIIM LUNGZUAN

By ~ Vz Vualnam

(Phamsa ngalliamte’ a dia phuahsak)

Singta’n lengvan vangkhua a nuam chi e
Ngaihtamsial zingdai bang a thenna chi
Ngalliam kei a’n zingdai bang theng tuamlou e
Zolei sialching sunchin vullai ve’ng e

Zolei a’n ka laukha laan bang nga’ng e
Lailung muang in lengvan ka zuan ding sa’ng
Gua bang hinna tulta liimliap nuai ah
Ngaihsial mel a ma’n ka heita ding sa’ng

Hinna siktui in ka niang zong a aw
Lelliang zolei ngilhna nailou lai e
Gua bang hinna tulliim ah tutkhawl ve’ng
Sanggah zolei galkhua dondon lai ve’ng

Hing taleng, pham taleng zolei ngaihsial
Chikleh lentual khiatni a om diam chi’ng
Simlei ah bual leng, lengvan ah khawl leng
Lenpuan bang paih ni tunglah ngawn hi e

Simlei a bualte suihlung muanna di’n
Lengvan a heite ngaihsial baanna di’n
Phunghuai zolei banzaal a kaite aw
Sinlai phualgia bang hong tang ve ua aw

Phungpi huai dia pheiphung suan nihthumte’n
Eimah khankhua khual masakei ni e
Zomi-zota khankhua khual masa in
Lelliang-daipam lou bang khual zaw ni e

Sesum mu bang ngai masakei ni e
Pupa’ gamlei zuun masa ve ni e
Nunkhuanuam ngai masakei dih ni e
Tukawl tawi in mazaam masa ni e

Saumang liimlian suang masakei ni e
Gamlei ei a’n bawl masa ve ni e
Ningzu-aisa’n niang masakei ni e
Khing-an kawm dialdial masa ve ni e

Gamlei git bang hong haam bang huai le hang
I huai zolei sil bang hong paal ding a
Nunnuam a mi zata’n paak bang tawi dia
Zata’n sakmin haithei bang lou ding aw

Saumang nunnuam ei mah a ding hi e
Sesum lamtam ei mah a ding hi e
Siahtung-siahphei a zata’n sum bang bia’n
I pahtang ah lii bang ching ding hi e

Gia bang tangkim zaitha thohkim chiat le’ng
Tung Sianmang zong ma hong zaam ding a aw
Zata’ lungtup khuamual hon suahpih in
Nunnop kawlni hong suak thong ding hi e

Phamsate’ ngaihtamsial baanna ding in
Gua bang hingte’ nunkhonopna ding in
Tuunnu zolei sil bang hong paal hen aw
Si leh hingte tut in khawlta hen aw

©Siamsinna leh Vakiangbu