MIHING BANG IN KAHTAM KA LOU

By ~ Vz Vualnam

A ithuai meel-le-puam hon pia in
Ahihka lelah ka sung a meikuang,
Itna meikuang teen mai in!
Hiai pumpi zaw n’on pekhialkei maw?
Hiai kha kei’ dia bawl ahi na maw?
Khenchiang in hiai ginlelhna ka nei-
Ka pumpi leh ka kha khat dia bawl!
Ka kha lah itna in a pumkuan a,
Ka pumpi’n lah ithuaina a nei ngalkei a!
Ka it kiang ah hiai mei hong de in chi mah leng
A kuanna hiai pumpi a muh in,
Kua’n hiai meikuang a hong de ut mahmah dia!
Hiai itna mei nang’ hon tohsak hia?
Kei leh kei a ka kitoh hia?
Akua-akua toh ana hitaleh leng
Ka it in a hong det tuankei ding leh
Teen mai inla, phelhmit mai in.
Ke’n ka phelhmit zou nawn takei!
A aam leng vutphual se dah mai in.
Chikmah chia’n kuang nawnkei hen!
Ka kha in itna thei nawnkei hen la
Huai a lungngaihna thuak nawnkei hen.
Hiai ka mitte leng mialsak mai in
Ka it kei a dia na bawl tuan ke’h,
Muh leng mumu nawn dah mai uhen!
Hiai ka bilte leng ngong mai uhen,
Ka it kei a dia na phal tuan ke’h,
A tanchin leng zaza nawn dah mai uhen!
N’on piak ka kha lakiik mai inla,
It taaklou hiai pumpi lei ah kiiknawn mai heh!
Ka phunna lah na za chimta ngal a!
It dia n’on bawl minu
Kei a pan na koih gamlaat ngal leh
Kei’ dia hin bang a hia a thamatna!
Kei zaw mihing ka hi a
Nang zaw Pathian na hi a
Mihing bang in kahtam ka lou a
Pathian bang in na ngaikhia hi!

©Siamsinna Leh Vakiangbu