HIAI I HANCHIAMNA HI HEN

By ~ Vz Vualnam

I thate hong tawl a
I taksa a hong bah chia’n;
I mitte a hong vaih a
Kal i suan zoh nawnlouh chia’n;
Hiai i hanchiamna hi hen—
I tate’n henkol khai ding hiam!

I lampi a hong haksat a
Mailam i nawt butloh chia’n;
Khomial in a hon lap a
Zotna ding i theihlouh chia’n;
Hiai i hanchiamna hi hen—
I tate’n henkol khai ding hiam!

Melmate a hong haat ua
Nan na’ng tha i neihlouh chia’n;
Melmate’n hon um bichilh a
Suahtaak na’ng kong a kotlouh chia’n;
Hiai i hanchiamna hi hen—
I tate’n henkol khai ding hiam!

Lungkiatna meipi hong ziing a
Ki-awngsuut ding i geel chia’n;
Lunglelhna tuipi’n hon tuum a
Nungtolh lungput a hong pian chia’n;
Hiai i hanchiamna hi hen—
I tate’n henkol khai ding hiam!

Kisulung nuamlou tuah a
Kitheihsiamlouhna a om chia’n;
Kihuatna a hong dot a
Kilainatna a dau chia’n;
Hiai i hanchiamna hi hen—
I tate’n henkol khai ding hiam!

Pankhawm haatna thei gige a
I tup i delhzel lai in;
Kitaisan-kinusia omlou a
Dialdial a kal i suanlai in;
I hanchiamna hiai hi hen—
I tate’n henkol khai ding hiam!

I lungtupte mualsuah a
Khamuang a i tawldam chia’n;
I sepgim gahte lou a
I tate’n zalenna a ngah chia’n;
Hiai i hanchiamna hihen—
I tute’n henkol khai ding hiam!

©Siamsinna leh Vakiangbu