NUMEITE

~Kattie Mawite

Nitaklam khat, kou inn mei pailou ahihman in ka innkhangte uh inn a phone charge din ka hohsuk hi. TV ah Life OK a Savdhaan India ana et laitak uh ahi. Kenle kava en cheuh a, sau bel ka enkei. Huaia ana suak chet chu hichidan ahi: Nupa a om ua, apasal in azi midang kiang ah zuak zel a, asumte kipahpih mahmah in ut dandan in zang hi. Ka etzoh un inteekpa'n, "numei khawng kiphasak lona uchia, hichi maimah nahi uh" hon chi hi.

Ka lungtang tawng a deng pah. Vaite lak kia ahikei. Eilak mahmah ah le numeite bawlsiatna leh nuaisiahna uang mahmah hi. Numei ahihchiang in I nopneh bawl pah mawk uhi. Ahihleh, bangziaka numeite ki nuaisiah se ahia? Bangziaka numeite'n bawlsiatna leh soisakna thuak nak uh hiam? Bangziaka numei tunga I ngaihdan leh lungput uh diklou khanak ahi dia?Awle, numeite hihna leh dinmun bangzah hiam I ensuk ding.1. I GAM DAN AH: I gam India dan ah numei leh pasal dinmun kikim a, numei hi in pasal hileh, mi piching in vote khat chiat I neih ban ah, dikna(right) I nei chiat uhi. Mi tengteng I manphatdan kibangvek suak hi. Huaibanah, numei tunga tatse te gawt theihna dan om zomah hi.2. SIMLEIVAI (POLITICS) AH: Simleivai ah numei thupi taktak I muthei hi.

India gamsunga vaihawmna sangpen President tanpha tungthei numei piangta mawk hi. Eilak mahmah ah leng numeite maimai nawnlou a, I District sung mahmah ah leng numei vaihawmna nuai ah kum bangzah hiam ina om uhi. Banah, makaitu numei hunkhoptak inei hi. 3. TUALSUNG AH: I khotang leuleu ah numei pen pasal sanga niamzaw in kingaihtuah hi. Numei sualluihna thu lah vangkim a zak di aom sek hi. Numei tunga tatsiatna uang mahmah a theih in om hi. Tangvalte'n nungak siangthou I deih bang in nungak tenle tangval siangthou deihlou tuanlou hi. Numei-pasal kala mawhna a om chiangin numei pen kimuneu in ki mohsa diak bang hi.

Himahleh, Pathian' mai ah a moh zaw a omkeia, kibang veve hi. Numei na simmohbawl a na ngaihneu sungteng nangle a dik na hituankei ding hi. 4. SIAMSINNA AH: Siamsinna lam ah numeite sang tung mahmah ua, himahleh I khotang ah agahsuah muh di tamlua omlou hi. Bangziak ahi dia? Pasal ten siamsin a poimoh zahzah in numeite'n leng poimoh uhi. School leh college tuamtuam I et vengveng leh, class a 1na, 2na, 3na ana late atamzaw numei himawk hi. Siamsinna inn bangzah hiam te NUMEI head na nuai ah om nalai hi. Civil Service Examination(CSE) result, july4,2015 a asuahna ah asiampen lina (4na) tan numei ngen in la hi. Akhatna nu ngial houh, SCOLIOSIS kichi natna aneih ziaka anungguh kul(tang lou) ahizomah hi. Hiai in numeite siamsinna lam ah kivan mahmah uh ahihdan hon langchiangsak hi. Eilak mahmah ah leng numei tallang leh mi theihphak hunkhop tak om hi. 5. INNSUNG AH: Innsung I etnawn leuleu chiangin numeite a HEAD ahihlouh ding ahi.

Innsunga papen om nawnlou ahihle bel gentheihlouh ahi a, numei vaihawmna nuai ah omkhathei hi. Himahleh, papen om gegu a nupen in vaihawmna tuh louh ding ahi. Inteeknu' phalna a inteekpa'n vai hon hawm chiangin innsung buai nuam mahmah hi. Hiaimun tak ah numeite'n ihina theih kul hi. Papen inleng numeite nuaisiah bawl theih tuanlouh hi. Pasal' sung apan piang kuamah a omkeia, numei sunga piang ngen ihi uh. Huaiziak in numei leh pasal kal ah kizahtaktuahna dik aom ngai hi. Zi leh pasal kal adik chiangin tate'n hon nopneh thei tuankei ding uhi. Atomzawng a gen in, numei in apasal a zahtak siam leh innsung nuam piang mai ahi.6. PATHIAN' DAN AH: Pathian' bawldan in numei' lutang pasal hi a, pasal' lutang Khrist ahi. Pathian in numei abawl in pasal' lu apan sahiang la in bawllou a, akhe apan sahiangte apan inle bawl tuanlou hi. Pasal' nakguh, apumpi laizang apan mah in bawl hi. Hiai in a gennop tuh, numei pen pasal tunga thunei ding hilou a, pasal in a nuaisiah ding leng hituanlou hi. Pasal panpihtu di, alang a pang di ahilel hi.

Pasal khenkhat in a zite uh ut dandan a soisak theih, a lungkim kei uleh vuaktheih peuh sa mawk uhi. Bible sung koimah ah, 'na zi a thuman keia, ahoihkei leh vua in' chih omlou hi. Pasal diktak in numeite vuaktak le sa vetlou uhi. Zite vuavua pasal bel mi DAWILOK tawpkhawk ahi ka chi hi. Huaiban ah, kipasalsak a, zileta dam gegu a nungak dang ngaih dile BIBLE ah kigelh lou hi. Paunakte 5:18 ah, na tuailai zi ah kipak in, chi in ana kigelh hi. Tuabang mah in, numeite'n leng angkawm phalna koihmah ah ngahlou uhi.THUKHITNA: Numeite pen ei hon hingkhe tute hi ua, simmohbawl di ahikei uhi. Numeite na muhsit a, na simmohbawl laiteng nang ah akisam a om chihna ahimai hi. Paunak ah, 'numei zaw bel kitambaih ahi' ana kichi hi. Pasalte'n numeite duattak leh hawmthoh taka I kep kul hi. Huchi kawmkal ah, numeite'n leng I pasalte zahtak dan siam kisam hi. Na dinmun asang a, sepna hoihtak neia, innsung vaaktu na hihial zong in, na pasal pen na tunga na koih veve a, na zahtaak a, na mai-et veve ding ahi. Ka hithei maw, innkuan vaaktu kahi maw, chi a, na pasal tunga leen na sawm sungteng innsung nuam leh innsung kituak na bawlkhe ngeikei ding hi. Numeite ziakin innsung nuam in thoveng theia, numeite ziak mah in innsung kisegawp dimdem thei hi.

Huaiziakin, numei, na hihna thei in. Kiniamkhiak dinga siam nahi.

©SIAMSINNA LEH VAKIANGBU