SELUNG PHAWNG KHUALZINNA…!!

Written By: K Lianthansang

Lawmte khat in,” Japan khawng ah electric a vaakkei leh a ‘fuse’ check pah ua, eigam ah bel invengte’ inn a vaak leh vaaklouh ki-check pah..” chi’a agen, awm ka sa vanglak. July 10 nitaak ngei leng, vuahzuk ziak ahi peuhmah dia, electric a vaak kei. Tumalam zek a, vengsung mipi’n sum kithohkhawm hial a ‘transformer’ sia bawlhoih zou hamham ka hihman un, vuahzuk ziak loungal thildang ngoh di ka theikei..!!

Vuahzu hong theu phet in, electric hong vaak a; munchih-mualchih a om, aneu-alian in kikou awging toh vaidawn vek phial di un ka gingta(kikou ging kiza vengvung ahihman in). Ka TV uh ka ‘on’ ngal a, channel ka kheng kualkual leh; vengsung mipi’n lampi siatna deuhdeuh te abawl lai uh ‘local channel’ ah ana suak hi. Huaihun ah, papi khat in “ vengsung mipi’n sum kithoh khawm a kibawl ahi. Tuikang ngak in, solkal in vengsung lampi hon bawlsak hun di ngak nadan a omkei…ei-le-ei kibawl kei le’ng kuanman hong bawlsak tuanlou di ahi….” chi’n gen hi.

Ka ngaihtuahna ah thil tampi honglut zungzung a; ka lup tanpha in, ka lungsim sungah ka thil ngaihtuahte kibohtuah souhsouh hial hile uh kilawm hi. Ihmu dia lum himah leng, ihmut theih di vual ahikei. 2013 kum a, ka khualzin lai khawng ka phawksuah zungzung hi. TV ah, lampi hoihloute mipi’n abawl souhsouh lai uh mukei mai leng zaw, ihmmuta di hi ve’ng..!.

2013 December kha a, ka khualzin hun in bel; lampi ah suangtum leh leivui tam mahmah hi. Himahleh, 26th June, 2015 a ka khualzin hun in bel; bawngpi’ ek, phiah depdop bangmai in, buannawi in lampi lai ana luahdim hi. Ka khualzinna a ka thiltuah lamdang khenkhat khawng ngaihtuah kha a, ihmuthei zok lou chu ka hipeuhmah ve.

Ka pute veh di chi’n; 26th June, 2015 zingkal beltak in Lamka apan ka kipankhia hi. Zohuihkhi laang hiauhiau-te diik kawm leh Zodawn sing-le-lou hing dipdip-te khawng munuam kawm a zinkhia leng ka hibok hi. Zodawn kilawmnate ka muh ut ziak a, gari neu(bike) a pai ka hihman in, ka kinoh law lawmlawm kei. Lamka apan Singngat zuan in ka pai a, lampi hoihna lailai tot sawm in ka taikawi ngeungeu zozen hi.

Sih-le-hin kal a dakkal bangzah hiam ka pai nung in, Singngat ka tung khongkhong hi. Zodawn sing-le-lou hing dipdip-te munuam mah leng, muh di a omkei..!. Zohuihkhi bang leng, Vaihuihkhi abangta..!. Sawtlou sung Singngat a ka khawl nung in, aminthang Guite Road tawn in k’ong kisawi zomzel a, agimhuai kei chih teitei na dan a-omkei. Gari pei 2 nei a pai himah leng, a chaang a totna di ka theihzohlouh hun a om. Huchihna mun ah, gari pei 3 leh 4 nei te’ naak hehpihhuai na’n chia..!!

Ka paizom zel a; lampi phok law mahmah ahihman in, hip-hop laa khawng bang lungsim ah hongsuah dekdek hun a tam. Lampi kawi ngiungeu na munte ah bel Vai laa peuh lungsim ah hongsuak thepthup hi. Ahitak a gen in; sam khawng saudeuh hileh bel ‘guitarist’ kisakkhak baihlam mahmah di ahihdan ka musuah sawnsawn hi.

Ni(day) sawtlam himahleh, lampi hoihlouh ziak ahi ngei dia….kei’ sanga Ni(sun) paihatzaw abang hial. Kum masalam a ka khualzin lai in bel, leivui a sah mahmah a, nuih ngam di vual le ahikei. Mai a gari dang hong taikhak chiang ngial in, maban paina di a kimuthei kei. Uang gen le’ng, gari light zat ngai hial leh kilawm hi. Himahleh, huaihun a leivui teng tu’n buannawi ana suak a, haksatna genvuallouh ka tuak veve hi.

Ka khualzinna nidang toh a kibang kei. Ka pai lamzang thei mahmah kei a, khomui zul in Lungthul gam ka tungpan hi. Ka paina di kimchiang khawng tungpan ka hihman in, ka lungsim a thawmhau mahmah hi. Lamkal a giahna di lah kithei mawklou ahihman in, ka Pute’ khawtan chu tun teitei sawm in mailam ka nawtzel hi. Lungsim guuk a kinohna toh, kei kia ka hih zawkmah toh ka naak thethu zozen aka.

Khuamial diing in kisata a, Lungthul gam ah ka taam lai. Khawmial siang ma a, Lungthul khua luut man teitei di chi’n, lam-etna lianpi toh ka tai zel hi. Huchia ka tailai in; ka malam ah nungak duangching mahmah khat ka gaal muh hi. Ka muh nu’n ahihleh; Jean khekol teeng a, T-Shirt vom silh hi. Agal ahih banah, khomui zul ahihman in amel ka muchian kei a, asam bel sansim thiuhtheuh zozen dan in ka mu hi.

Akiang ka tun in akhut veilam honna zaak khum a, bangmah bel a genkei. Kei leng akiang ah ka khawl ngal a, ahoupih didan zok ka thei tuankei zel. Houpih dia ka kisak laitak in, “Pu aw…ka pai na di thei nawnlou a beidong gawp ka hihman in, maban a khua tan bek n’on kitonpih thei diam..?” hon chi hi. Ken le,” Tonpih thei tham e, koitan paisawm himhim e?” ka chih leh,”Ka paneu-te’ khua a hohdek ka hi..” chihteng in hon dawng a, ka gari nung ah tuantouh athuah ngal hi.

Huaihun in khua amial hoih mahmah mai a, lampi hoihlouh toh hattai theih le ahikei. Ka gari, a chaang in gik in hong gik a, akhen chiang in bel nuam in nuam heuhheuh hi. Ka nung a tuang, nungaknu’n a phone mekmek mai a, ka houpih buai nuamkei. Maban a ka phaak di uh khua tan tun a ka tunpih naak leh, chi’n ka taipih zomzel hi.

Munkhat ah buannawi ana sah mahmah mai a, ka kitaal pai dek geigei uhi. Ka mi puak nu’n laulua ahi ngei dia,”Nu ei…..ka….” chih teng gen in, hong kikou khe kuau zozen hi. Ka painawn tak un,” Pu aw..kei kum 20 mi di ka hi a, ka pa’ hon hilh dan in hiai Guite Road leng kum 20 khawng a naupang lel ahi. Himahleh, bangziak a hichi lawmlawm tel adia aw. Hiai Guite Road, kei hi ngeingei leng, ka kahkhiat mun didan aw….” Hon chi hi. Ken leng,”bang chidan in e, na gen ka theisiamkei..” ka chih leh “Guite Road hileng, ka kahna aw di te ana ngaikhe lechin, na theisiam mai di…ana ngai in aw Pu aw” chi’n hon dawng hi.

Sawtlou nung in, agawl bang hon khuah phalhphalh masa in,” Guite Road hi ngeingei leng chu; Pu-te aw…hon deihlou leh enkol peihlou himhim na hi uh hia? chi le’ng lah n’on zatnuam pen uh ka hizel a.!. Ka damlouhna na thei hoih mahmah ua, himahleh n’on enkol nuamkei uh. Ka ki-etkolna di sum teng koilam tung a maizen a? Samtan man tamgawp maimah hita hia leh; ka sam n’on hichi hawisau sak tel uh. Alai ah hon khensak hiuhiau le uchin zaw, kilawm law di hi ve’ng. Kei lah zeng(paralyze) bangmai a, khut-le-khe zangthei lou ka hihman in, n’on koih dandan ua ka om mai tuh alou theilou ahi mai.

Vuahzuk zek chiang a, Lamka zaang electric amit demduam khawng lamdang ahikei. Kei’ thuak bang thuak om di’n ka gingta kei. Tuaidawng lai a natna hichi tuk a tam in hon boh hial chiang in zaw kingaihsiat huai vungvung sek hi. Thahat leh melhoih di laitak a, hichibang a ka om mai zaw, lai ah nalua sa’ng e. Ka lawm-le-vual dangte’n zaw, puanvom silhvek ua, etlawm tak-a om zihziah uh hi a, bang doh-ai hiam kei tung a natna hong hichi tam mawk?

Puan-ak silh di gina leng ka nei ngeikei. Huaiziak mah in, khokeu hun in leivui in ka taksa pumpi hon pumtuam a, silkhiat zoh di vual ka hikei. Ka guhte khawng bang leng adawk gemgom zozen a, gawng tak zaw hidi kei ve maw? Huchi pi’n leng n’on zang veve sek uhi. Huai zaw apoilua ahikei. Himahleh, khosiat hun chiangin, ka chipum a leivui omte hong nom(kawt) a, ka vun ah abelh hoih deuhdeuh uhi.

Ka chipum a leivui omte toh tui a kisukkhak chiang un, kei adiing in gu(poison) abang maimah sek. Ka chii ngek mahmah te muatsak in, meima in ka pumdim gige hi. Khawsiat hun chiang a, ka meima-te hon sukdamsak di k’on sak chiang in, na utdan teng un n’on zang zialzial zel ua, ana tel mai. Ka meimatna te athuuk lut deuhdeuh zel a, anai leng atam mahmah hi. Ka meimatna nai te’n hon sukkhak di na lau mahmah ua, himahleh achaang a n’on siik sak zialzial hun uh a om veve.

Ka meimatna mun aa naai tampi omte khawng ka muh chiang in; ka lawmte bang a puan vom hoihtak silh khangei diing in ka kikoih kei. Ka sanggampa - Tipaimukh Road zaw kei bang hial a omlou hiven maw? Tanau haulou zaw hikei ve’ng aw..!. Ka omna mun neite lah; atangpi a Guite hivek phial ua.!. Thunei mahmah bang leng omthou zaw hi ua. Kei, chidam tak in hon koih le uh, mitampite’ hinna sigui himai di hi’ng a, namdangte tanpha in ka zar hong zou di hive un maw?

Kei’ chidamlouh ziakin, Zodawn a migenthei tampi te’n leng ana thuak ban uhi. Chidam mahmah lou ka hihman in, ka lungbang atom mahmah mai a, kei tawn a hongpaite ka dawm tuankei. Huaite ka doplouh chiang in, mizawng-gentheite’ tung a tusuk zel hi. Kei chidam hi mahmah leng zaw; khopi lam kawmtuahte’ a diing in , zaangkhai tuan mahmah diing in ka gingta. Aziak ahihleh; banglam peuh a sumsenna tawm di hilel ven. Apoimoh pen zaw, kei damna di ahi.

Ka natnate ziakin mi tampite’ hinna ka laksakta. Mi’ hinna laksak zaw ka utpen hikei. Himahleh, ahun hongtun chiang in ka kideek zoukei a, laak suk mai angai zel hi. Sap te’n ‘Health is Wealth(Damtheihna tuh hauhsakna ahi)’ achih bang un; kei damthei hi ngeingei leng Bahara leng atawm tuan mahmah diing a, gari-te leng atou tuan mahmah diing. Ka meima te khawng toh gari kingeihlou ahihman a, gari se pahpah hilim eive. Mizawngte’ sum neih sunsun pen damlouh vai ah (bahara tungtawn in) hong kizang zel a, zawn semsemna tun ka suak maimah…” chi’n, ka nung a tuang nungak nu’n hon gen hi.

Ka tai zomzel ua, khosung a kigalmuh kuan in,” Hiai, I Guite Road uh siatluat ziakin gari tuahsia ah ka sungkuan teng in hon sihsan ta ua……kei ngei le’ng….huai hun ah…ka na sikhinta….!.” hon chi hi. Ka dekmul bang athou sungsung zozen a, ka nung etkik leh kuamah muh di ka neinawnkei. Lampi siatluat ziak a; gari in tuahsia tuak in, huai a sikhate’ lak a nungak khat pawkha chu ka hipeuhmah hi. Hiai sikha nungak in hon thilgente adik ngen ahi a, ginlelhna di bangmah a omkei. Diip hawmsa in khawsung ka luut a, hotel khat ah singpi dawn zual in mailam ka nawt a, zaan sawtnung in ka pute khua ka tung hamham hi.

Laigelhtu’ Lungsung Pan:

Hiai tangthu;” Selung Phawng Khualzinna..!!” chih thulu(topic) pansan aa, thu hong kigelhte atak a om ngen ahi. Na theihnuam taktak leh Guite Road tawn in va pai mai in. Thillamdang khat chu ahi a, himahleh Ataktak ahi(Lampi siatdan). Thunei khenkhat ngei leng, hiai thu in aselung uh aphawng a, ihmulou zen a Guite Road’ hoihna di hon suui taktak uh ka deih mahmah hi.

1207 – Ka Kipak – 2015

©Siamsinna Leh Vakiangbu