HON GEELSAM IN

~Kattie Mawite

Ngeina bang in kanu'n kanau tegel school kaidin akha a, keileng inn apan uniform silhsa in ka pawtkhia hi. Himahleh school ka tungkei. Tuni a school kai dia kuan a school ka tunlouh tuh a khatveina ahikei. Keia din ka chiindan leh ka DAILY ROUTINE le ahimai.

Tuniin tuh nidanga ka paizelna lam ah kapaikei a, hohna di geelsa nei hikei mahleng, Pearson khokhung lam ah ka paitoutou a, Lamka khosung hoihdeuh a akimuhtheihna munkhat ah kakhawl hi. Mittang phelou zen in Lamka tuh ka gaal et vengveng hi.

Huchia ka gaal et lai in ka lungsim ah thil tampi honglut zungzung maI. 'Kou innsung banga innsung buai leh innsung nangh bangzah a om de aw?? Kou innsung bangbang a zugim in a zelhsuak inn bangzah a om de aw??' Chi in keile kei ka kidong a, naupangchik himahleng innsung nangh tak apan khangkhia kahihman in ka ngaihtuahna in saupi a baan a, CHALAK PIL le ka beithei huntawk!!

Ka omdan ahoihkei chih kathei. Himahleh lampi dang a omkei. Sunday school a ka heutute gen apan mahni kithat te vangam kailou uh ahi chih katheihman in ka hinna adia lauhthawnghuai din bangmah kahih ngamkei. Sunday school a ka heutute hon sinsakdan toh ka innsung ua ka omdan uh a kibangkei tel mai. Sunday school a thumdan hon zilsakte uh a zatna di ka theikei!! Ka innsung utuh KHRIST' GIM anam keia, ZU GIM ngen anam hi. Pathian' pahtak innkuan hilou in, setan' pahtak innkuan kana hi maimah uhi.

Kapa ahihleh office nna sem ahi a, kanu nasep ahihleh, kou unau hon etkol leh kapa' maipha zon ahimai. Kanu'n zingkal ann ahuanzoh chiang in ann kane ua, huaizoh chiangin school kai din hon kisasak a, kanaute school ah ava kha zel hi. Kei bel kalawmte toh ka kuanzel hi. Kou kuankhiak khit chiangin kapa le office kaidin kuanzel hi. Nitaklam ahihchiang in kapa zukhamsa in ahongtung gige. Zu akham chiang in a sinse mahmah a,hehna di, haan na di kia a zongzong mai. A khutthak siakna di peuh in kou, atate hon zat hun atam mahmah. 'Ba mutlawng lehkoih?' Chite toh a kilamdanna a omkei.

Ahang chiangin kanun ninglua ahihman in ana dawng khasek a, huai chiangin vuak athuak zel. Kapa chihlouh ka innkuan ua kakah hun uh leng atam mahmah. Innvengte adia mitsiip huai leh ninghuai mahmah din ka kigingta. Kou unau lah school kai ngen, naupang chikchik himahle ung, nitak chianga laisim chih a om ngeikei. Simthei dinmun ah le ka dingkei uh!! Lai theilou ngen a kuan, homework le gelh ngeilou kahihman in school ah gawtna ka tuak gige. Ka hinkhua ahaksa tel mai. Mi innkuan kituak dialdial leh ki-it takte kamuh chiang in ka engthei mahmah. Mi tate ka en a, kipahna leh lungnopna ziak in amel uh avak singseng. Himahleh ken bel kipahna leh lungnopna mulou kahihman in ka maimial a, ka maisuah le a taang zoukei.

Ka teacher te'n homework ka gelh louh ziak leh lai ka theih ngeilouh ziak hon dot chiang un ka innsung dinmun uh gen di haksa kasa mahmah, lah huaiziak ahi ngal si. Gen di tuh thil zumhuai tak le ahi. Gen ngamlou kahihman in suanlam tuamtuam ka bawl angai zel a, inn ka tunkiik chiangin school a ka thuakna te gen ngamlou kahihman in 'homework neilou, simdi neilou' ka chi gige hi.ZUAU GEN ka siamloh ve!!

Tuadana hinkhua haksa pi zang gige kahihman in suahtakna di lampi kon ngaihtuah ta hi. School kai di kakuan a, himahleh school ka tungkei. Huchia kahihleh gawtna apan ka suakta a, nuamsa in ka kipak mahmah. School tawp hun in inn ah ka paikiik zel a, huchiin kahih zel hi.

Kaalkhat bang tuadan a ka om nung in ka class teacher pa'n damlouhna ahihkeileh buaina liantak nei hi dia hon gingta in, phone tungtawn in kanu houpihta hi. Kanun lah nitenga school kai dia kuan kahihdan ana gen tuh ahi ngei ding. Hong kitheikhia tuh ahita ve. Keilah a kihouna uh bangmah theilou in, school kai tawp hun in inn ka tung nawn hi.

Inn katun phet in tai leh zep ka thuak ngal. Himahleh paulou hial in kathuak. Gen dile ka theikei. Kua moh a, kua dik ahia chihle ka theikei. Hiai hun in zuau le gen ka sawmkei. Kathuak lele thuaktaak mah hi in ka kithei a, 'ka phutawk gawtna tang kahi' Chi in paulou phunlou in kathuak hi. Himahleh kapa hongpai di hun ka ngaingam kei. Hon vuak didan leh hon haangsan didan ka ngaihtuah a, hon gawtna ka thuak mualsuah zoh leh ahampha himai didan in ka kikoih hi.

Nitaklam in kapa hong tungta ngei. Nidanga bang mah in, kham milmial sa in ahongtung. Ka thuak di maban a om ahihdan ka haihkei. Himahleh, hiai hun tuh ka lunggimna leh haksatna teng genkhiatna hunlemchang a zat ka sawmta hi.

Kanu'n kapa kiang ah ka omdan leh bangkim a hilh a, huaitak in kapa' mittang hong gaau pah. Lauh huai lua himahleh kihangsansak in kei leng thatheih in kana kisakhol hi. Ka gingtak bang geih in kapa'n tuh haang toh zeep hon thuaha, tawphun theilou bangmai in ahehna sousangtak tuh ahon sungkhe ziahziah hi. Keituh paulou phunlou in ka sialpi vuahthuak mai ve. A nakei chihna di vual a omkei. Ka chipum teng a dup gai. Ka vangphatna mahmah tuh, ka lulam bangmah hon loh khakei.

Kapa'n ahih ut leh agen ut teng azoh in, awlawl in ka lungsima kavei leh ka puaknat teng kon genkheta hi.

"Pa aw, hiai leitunga, nang bangbang a mihing khat ka hong suahtheihna dinga poimoh masapen tuh NANG nahi. Tuisik kahih apan mihing bukim kahong suahtheihna din na hihthei dandan in nahon enkol chih kathei. Kahong piang a, ka pianni a na kipah didan kei na ta in ka ngaihtuah ban kei. Endih pa! Ka hamphat dan maw..... Mite'n nek-le-tak haksa leh khosak haksa asak lai un, ken huaibang dinmun ka palkha keia, silh-le-teen, kaduh-kadeih te na hon guanzou. Sepna hoihtak nanei a, kanu leh kou unau tuh nek-le-tak a lunggimlou, duh-le-deih a lunggimlou din non koih. Pa, na thupi lua. Siamna sangtak naneia, huaiziakin na nektak zonna ah nuamdeuh in na zongthei chih naupangchik himahleng ka haih hetkei. Na naupang laia ka pipi leh pupu in laisimna di hunhoih hon pia ahi mah di uh chih ka ngaihtuah chiangin ka pipi leh pupute ka ngaisang tuntun. Huchituk a nu-le-pa hoih naneih a, pilna siamna sangtak naneih lai in kou na tate hon ngaihtuah mahdih Pa. Nang' nu-le-pa leh kou' nu-le-pa a kibangkei ngei maw? Nang panlakna ziak liauliau in pawl 6 bang kasim samta. Himahleh neek a ching naikeia, na makaihna manphatak ka poimoh petmah.

I maw Pa, kalawmte innkuan kituak dialdiala, nuihmai siausiau a hun zangte ka engtheih dan... 'koule bangchik chiah huchibang in ka om di ua aw....'chi a ka ngaihtuah nalama zan ka ihmutlouh hun leng atam mahmah. Pa, sunday school a thumdan, thuman didan leh gamtat hoih didan ka zilte azatna di ka theikeia, azat didan le ka theikei. Pathianni zingkal chiangin innsakte'n khuang tum in la khawng asa zel ua, keile huchidan te ka uttheih dan. I maw Pa, kalawmte'n BIBLE chang khawng etlouh a genthei unchin, ken khatle gen di thei ngeilou inga azumhuai theih dan.

School kakai chiangua le kei laithei a tu ngeilou inga zep thuakthuak mai. Dena non zepna sanga chu nalou thei zaw. Kei maw, kalawmte'n LAISIAMLOU PA khawng hon chizel uh. Pa, ahihtheih leh zu zaw hon dawn nawndah mai ve maw?? A namsiatsiat toh!! Khamsa a nongtun chianga kou lauh a hon lauthei mai. Na kitom chianga lah lai khawng kisim theilou. Kanu mahmah le hehpih huai eive. Nangtuh na tunna di tan na tungkhinta a, pilna siamna sangtak nei in na khosata. Himahleh, innsung hichi ningneng kawmkal ah kou bang kasuak di ua? Nang bang in pilna siamna ah mi ka phazou di uam? Gual toh tanbang ka kimna ding ua hon makaiha, hon lamhilhtu di nang hilou nahiam Pa? Pa aw, ka tan ding uh HON GEEL SAM IN....."

©SIAMSINNA LEH VAKIANGBU