KA UNIFORM

By ~ ChinZa Vualnam

Laibu khat ah hiai dan a kigelh kasim kha ngei hi "Nikhat Sepaih officer khat in, a Uniform te suahkhia in, nungak helding in vakuan hi, anungaknu ahih leh meelhoih leh ki deihkhop mahmah khat ahih ziak in ana thulaak vakkei a, chiamnuih buuk ana suah maimah hi. Huchi'n sepaih pa zong khase tak in innlam ah aki leh kiikta hi. Hun sawtlou nung in Sepaih pa zong chim kisa ahi ngei dia, nikhat a Uniform toh analh theitawp a kithuam Reprap in ava pawt nawn leuleu hi, huaihun tak inbel ahou nuammahmah mai a, kamsiamtak in ana welcome theita. Anumei nu le kihong petmah chu ahi ngei dia Anitak mah in kiteng ding in kichiamna hon nei ngal uhi.

Kitenni ding hon tung ta a Biakinn ah Pastor leh mipi tamkhop hon paikhawm kheukhou ta ua Mounu ngei leng moupuansilh a nalhthei tawp a kijem in aom ta hi. Ahih hang in moupa ding meelmuh in a om ngeikei a, Sawtkhop angak nung un Pasalkhat puanlom paw kawm biakinn sung ah hon lut lulu mai hi. Pasalpan apuanlom puak pastor kiang ah pia in akileh kikta pastor in lamdang sakawmtak a Puanlom hon etleh lehkhathon khat hon mu a aman zong a simleh hichin na ki gelh hi:

Pastor pa aw, numei nu'n kei hon deih lou a ka Uniform deih ahi, hiai ka Uniform toh ana gawm mai in, chih teng ana ki gelh maimah" chia laibu a kigelh khat kasimkha ngei hi. Phuahtawm hia tawmlouh chih zaw ka thei kei.

SEPPATNI chih min ana phuaktu in phuak kha ngial kasa. Seppatni zingkal anne zouphet, uniform silh a sepna ngeilam manoh a Pheiphung ihon suan zaw, aki thalawp huai lawm2 kei. Mite a uniform uh silh a hon omchiang un min zahna leh Ngaihsang na nei mah le uh kei uniform ziak in mite nuihsan leh muhsit kana hi hi.

Ahih hang in niteng a azu aham kathuak leh honthuakpih, Nisa,vuahzu nuai a ka vun(skin) tungnung a anapang gige ka Uniform niin bimbem leh keknimnem mite a di'n bangmah hikei mahleh kei a di'n puanteng2 lak a puan manpha pen hi in kathei hi.

Mihausa ten a innsung ua tukawm a Remote tawi kawm a TV a utdandan ua a control zatzat bang mai ua, Sunhun teng Control kahih nung un innlam zuan in kapai chiat ta uhi.

Nitak hon hi a Chihsimsim te innlam zuan ding in ka hon kithawi ta hi. Uniform silh suak a nungak vahel lawm2 ding chih lah hingaallou deuh. Kei zongphalbi suukpi lai ahih man in puannak leh khekor neihte bang zah hiam silh/teng thuah reprap in Nenem te innlam kazuan ta hi.

Nenem te in katung ta a amah zong nidangteng sang in ana siam mah2 mai a 'Navangngei,nonpawt jel keidia honki mizz lua a' chia akamsiam kipah huaisimmah leh aban a IKIMUH LOUH ASAWT ZIAK HIA NON THAUSOT NGEI hon chi bang zaw Ka puan/khekor tamsilh tamten ziak eive chih kiphawk khiak in a om phiing a, nuih lah zasim vanui khe mawk leng lah imuk khipi hon kiphen leh anat di theihsa, hoih lou pi kihoihsak achih dante ua imuk bang vakoihkhak theihluat mah ana hi eive.

Nenem kiang ah asungkuante omna ka dotleh Biakinn kai uh ahih dan hon hilh hi kenzong NANG BANGZIAK A NAKAILOUH? chia ka dot thahah leh KEI KAI UTNAWNLOU chin hondawng mawk hi kenle innkuan kilemlouh ziak khawng hinte chin bangmah ka dongtam nawnkei. Sawtlou nung in Nenem in "Tulai kikhopna bangle fashion show na mah bangta, thugen tu khenkhat ten lah Kikhom di analhthei tawp a kizep ding ahihdan a gendeuh zut ua, Aneizoute analhthei tawp in hon kichei ua ei aneilou te adia THADAH huai thou eive khenkhat ten bel SA LAMKIA EN hon chi na ding ua, mihing mah a ki omlai Sa a ki omlai ahih ziak in salam zong ki en khalou theilou ahi. Kikhawm bangle Silhleh ten khat toh uniform bangkhop hial a iva kuan det le nuamlou pi mah ahi. Ineih zohlouh ziak zong hin te, neizou hitawk lengle mite thadah sakzou dingkhop a nalh zaw ka utkei" chihteng in hon dawng hi.

Kenle "Eimahve ipu ipa te un tualpuan silh in ana be thou uh, tunichiang in hiai fashion a ki el na khawvel in ikhawtang gentak louh, Saptuam sung mahmah hon nawk panta a Setan gaalvan muanhuai ahi mai diam chita kahi" chia kaki houlim lai un kikhawm te zong hon tawpta ua, Nungak helding in tangvalnou nih zong hon lut bok hi. Akicheidan vel uh ka et in hon zulsak top, Korea te hi awmtak korea pau thei hileng korea pau a ana houpih mai ding dan kahi. Khatpa bang tuh C.RONALDO ngaisang mahmah ahih ka gingta asam bangle huai Futbol peksiam pa a bang2 in atan hi. Ahih hang in, Komkuva hon hai a Gobuldum hon tep khut latlat chiang un Korea te ahih louh dan kathei khe thak hi. Huaite hon hih kei le uh zaw kenle aki vatna te ziak ua zahtak a ngaisang thou di hing a. Gobuldum leh kom kuva in korea te a sut na uh abeisak hithet hi. Ronaldo ngaisang mah2 football pek zong siamngei dia ka gintak pen zong akhonung a katheih thak leh kerom kap siam ana hi dan eive.

Nahmasa pulh masa achih bang un kei zong inlam zuan ding in ka hon kithawi ta a, Nenem in gate tan hon kha a kei a dia gin om gige ding ahih dan hon gen zoh in, Mangpha kikhak in innsung ah alut ta hi.

"Silhpuan segawp duang a baat, ka buutpi toh, Zolia aw na vaang kon zou ngei diam?" chih faifuk a sa hauh2 kawm in inlam ka zuan ta hi hahaha

©Siamsinna leh Vakiangbu