VAPHUAL NUTA LEH SAKHI NOU

~ChinZa Vualnam

Zogam mihing te'n aluah ma un, Zogam kichi gammang (forest) sahtak in anatuam dim a, huai gammang sahtak lak ah, Gamsa te lungmuangtak in na khosa uhi.

Huainung in mihing te'n ihon luah nawn uhiGamsa tampi omkhawm telak ah, vaphual nupa ana om ua, amau tanu meelhoih tak khat nei in, Singhawm khat a innsuang in lungmuang tak in khawsa uhi.

Nikhat Vaphual te pa in, azi leh atanu inn a nusia in Gamlak a ann zong ding in kuankhiak san hi.Nitaklam hon hih in, vaphual Nuta te agil uh hon kialta ahih man in, apa uh hon kileh kiik hun diing ngak in aomna uh singhawm akipan ana gal etet maita uhi. Nitum kuan hong hita a, vaphual te pa zong azi ata te nek ding lungnou leh Theigah limchi tak2 te pua in hon kileh kiik ta a aleen kawm a 'viiikkkk...viiikkk...' chia hon haam ging azaak un azi leh atanu kipaak in a omna uh singhawm akipan ana gal et ua, a omna uh hon naih hiai2 ta, lungnuamtak a hon leng diai2 lai in, thakhat in a omna nuailam ua kipan thilging ngaih mahmah khat hon ging a huai toh kiton in a ittmahmah apa uh leitual ah kesuk ta hi.

A omna uh singdawn sangtak akipan anuailam uh hon et ua leh,Gamsa hileh kilawm lungneem mel mah2 khe nih nei ten apa uh, khenlum in apua ua inn lam ah apaipih ta uhi.Huaitak in Vaphualnou in anu kiang ah "Nu huaite bang hihiam? Amel uh a Nunnem tuak2 maizen utoh bangziak a kapa huchi bawltel uh ahi diam aw" chin hon dong ta a, anun le Lauh aw tak in "Bawi amaute igaalte ahi, en amau a di'n poikhoih kei mahle hang amau isa ne in hon that2 mai ua, napi leh napu zong, honthahsak ua tu in napa le hon thahsak lai uh, AMEL UAH GITLOUH MEL KEI MAHLE UH A LUNGTANG UH LEH A DUHGAWL DAN UH, SAHANG TOH KIBANG AHI amau te namuh chiang in kihem khe zel in amau ahih leh MIHING kichi te ahi" chia a gen zoh in Vaphual nou kiang ah'Eile i omna hon theile uh hon that ding ua isa ne ding uh ahi, kisa in i omna kisuan ni' chi'n, apa uh lamsa a innlum uh beel ngamlou in zanmial nuai ah ata hon pawt khiak pih a, kawlhawm khat ah a ompih ta hi. Vaphualte nuta zong, apa uh Mihingten thahsak ta ahihman in, Dah mahmah ua zan khawmial nuai ah kapkap maita uhi.Mihingte ziak a amah meithai hi ta Vaphualnou lah tagah suakmaimah chia hon ngaihtuah in Anu zong khase mah2 hi.

Zingkhua hongvak ta a, nisuak vak singseng in a omna uh kawlhawm hon sal vakta a, amau zong thoukhia in adaak khiak ualeh a omna uh kong a Sakhinou dah mahmah a kap kawm a om honmuta uhi. Vaphualpi zong akiang a vapai in bangziak a kap nahiam? Chia adot leh sakhi nou in "mihingte'n kapa hon thahsak ua, keikia a kakhawsak angaita hi" chi'n kapkawm in dawng a, aman zong samlut in avek un hon khawsa khawmta uhi.Vaphualpi in anek ding uh ann zong in, Gilvah tak in pe zel a,Sakhinou leh vaphualnou zong ki ngai mah2 ua, sun chiang a kimawl in nuamsa mahmah uhi.

Nuamsa tak a hunsawt khop hon khosak khawm nung un, vaphual zong hon Nungak Panta a Sakhi zong honTangval ta hi.Nikhat vaphualPi hon ki ngaihtuah a, "Ka tate Sakhi leh Vaphual lah Nungak Tangval dekta ua, MIHING ten mule uh Limchi sa in hon thahsak nawn kha duh" chih lau in, atanu honsam in akiang ah "Ei le gaalmuang gam a pai ding hihang, pai inla nalawmpa mangpha vakhak in" chi in sawlta hi.Vaphualnou zong vapai a a ngaihmahmah sakhi kiang ah"Lawmsakhi aw, kou vasa te lak a vasa mai2 kahi kei ua,Himah leh huai theilou in MIHING ten kapu leh kapi hon thahsak nung un kapa athat lai uhi.

Keile Nungak dekta kahih man in hon mule uh hon that nawn ding ua, ka chiman ding uh, Huai ziak in Galmuang gam a kaki hepmang uh angai ta.. Sakhi nou aw, kon ngailua himahleh nang leng theilou nahih man in iki ton theikei, Nangle Mihing te khut a silou di'n pilvang tak in hon om in. Nikhat ni chiang in Hiai gam a Mihing omte zong honpil deuh ding ua, Vasa te leh Gamsa te Manphat dan hon theih chiang un itung uah ahuham nawn kei ding uh. Huai hunchiang in hiai Gam le, ei a di'n Gaalmuang Gam hon suak dia, Ka om na uapan kon ki leh kiik ding uhi.. Lawm Sakhinou aw, Lungkham ken huaihun chiang a kimu nawn ding ihi..... Mangpha" chi'n mangpha kikhak ua, ki ngai mahmah kawm in hon kikhen ta ua, Vaphual Nuta te ahih leh Zogam nusia in gamthak Gaalmuang gam zuan in aleeng mang ua, Sakhi ahih leh Zogam ah a om den ta hi.Tuni tan in SakhiNou leh Vaphualnou ki ngai mahmah te kimuh ut in, Zogam a Gamsa leh Vasa te kepbit dan Mihingte'n itheih hun ding uh ngaaklah tak in ngaak den lai uhi.Gamsa te khoiching a, kep bit dan, isiam Chiang un Vaphual te zong hon kileh kiik nawn diing uhi.

©SIAMSINNA LEH VAKIANGBU