HEM BIAK DOH AI

~ChinZa Vualnam

True story-

Mi tampi te adia Lungme bang a deihhuai lou hi in, ka tongdam zanlai a thoukang leeng ging vuvu te bang in akhum lou zong in leh lampang ah itt tu diing kanei sam hi. Khawvel a kei hon itt tu leh ka it pen in HEM BIAK DOH-AI a hon bum mai lamdang kasa hi.Nitak December huih vot honnung hiauhiau a, kei zong Linda (minphuah tawm) te inn lam zuan in ka pawt khia a Vengkibang kahih ziak un katung hak kei. Ana khawpi zaw deuh te ah bel Nungak ihel leh zong, light avak nak leh TV hel mah kibang, chidan deuh in ngeina bang in TV ka en ua huchia katut sung un nitak hon sawt hiai2 a, Linda nu ten zong hon lupsan ta uhi.

Gen ding thei zawsam omlou a sawtlou katut nung in Linda in "u Siam ka hinkhua taktak hon thei le chin non deih diam maw" hon chi phut a, Ken ahih leh mak kasa lawmlawm kei aziak bel agen ding katheihsa ahin kholui te zong katheisuak sa nung a ka ngaih ahih ziak in lamdang kasa kei.Himah leh, "Bang ziak e? Na ginom nak leh Hon it den di kahi" chih teng in ka dawng a, mibang a kamsiam ngutngut akihih louh ziak in aban ka gensau nawnkei.Anuai lam en in akuun dedu a, "bang chi ee? Genlel ve" ka chih leh, hichin hon genta hi: "Naupang chik kahih lai in pasal kana nei kha a, kei hon it tu a katheih ka pasal hon itna in sawt adaih kei, Ngaihzawng dang khawng nei in hon om a, akhut lum zong kathuak mun mahmah mai hi. Kei le nuthawi a om diing ka utpen hikei mah leh thuak zou nawnlou kahih man in ta khat kaneih nung in ka nungkik ta hi. Ahih hang in aman zaw akhonung in zi dang anei pah, kei kahih leh khotang hi in saptuam ah hita leh ka na ki hel ut khol kei, mite'n NUTHAWI chia hon simmoh a hon maingal ding uh ka thei hi. Himah leh tu in kakihel panpan ta hi. Huai ziak in nang non it a non ngaih taktak leh ken hon it den ding kahi, hon it taktak lou khat pasal in neikha in nungkik nawn hileng nih vei thawi kuaman hon mimuh nawnlou ding chih kathei huai ziak in ittu diktak ka deih"chih teng in hon dawng aken zong hiai Nuthawi ahih dan katheih sa nung a kangaih ahih ziak in bangmah poi kasa kei, hiai ziak in ka itt na akiam tuankei ka itna a kaankip tu ahi zomah hi.

Ken zong "Nuthawi hih ziak in lungnuam lou leh ki ngaisia in om ken, hiai ziak in ka itna akiam tuan kei di, nungak minpu himah leh siangthou nawnlou siangthou dan a om te sang in a THAWI min nei vet te siangthou kasa zaw, ikhotaang hi in saptuam sung hita leh lengkul leh nuthawi pathawi te maingal bawl in, chiamnuih na in inei ua i muhsit bawl zawmah uhi. Huai ziak tak in mitampi te saptuam hi in khotaang ah hita leh hon kihel ut nawnlou in paisual gaita uhhi Ihai man uh hi in kathei,amaute lamdik a pi leh lawmbawl a kithuah pih ding ka ut gige ahi. Huai ziak in lungke ken hon it den ding kahi aw" Ka chi a..Nitak sawt ta tung a sanapi kikhai in zong sawt natu lawta paita in chia hon hehsan hileh kilawm in hon gingngaih semsem a 12 bang akawk tou veuvau ta hi.Ken zong khelah mah leng innlam zuan in kapai sawm ta a, a gate tan uh honkhaak zoh in Mangpha kikhak in ka paisan ta hi.

Linda ka itna lamdang kasa nidang in ki itpih ki ngaih pih ana nei thou mah leng amah sang bang a ka it kangaih om in ka theikei. Mibang a itna thu vagen siam te hi kei mahleng huaisang in lungsim tak a ki it mah hoihpen in kathei hi.Ka itt luat ziak in a mitmei ka veng gige a, banghiam ka lungsim loulam a a om hun in HEH a aom di ka utlouh ziak in bangmah ka gen ngeikei a kalungsim in kaki deek teitei a atawl huai mahmah.

Hun leh nite hon pailiam zungzung aMibang a nuamsa leh hausa vevu innkuan a kipan khangkhia akihih louh ziak mah in, Akbang anektawm zong, guam a muh te guam ane, mual a muhte mual a ne akihih mai ziak in niteng in nasem in kakuan sek hi.Hiai in khat veivei hon lungkesak tuntun hi. Ahih hang in hiai ziak in Linda ka itna akiam tuankei.Nikhat kanasep na ah sun akhawl Facebook louh na le sawt gawp chi in, kava lut thahah hi. Gintak louh pi in message khat ana om a kenle ka et leh ka kiguih hial in kathei "Linda toh bangchika kingai uh ee? Keitoh kingai kahi ana tawpsan in, munkhat a omkhawm hikei mah le ung niteng in kakihou gige ua, anu leh toh zong kihou gige kahi uh" chih teng ana hi maimah hi.Mak kasa ka gingta theikei, khatvei chiang kanuih bang aza zawzen a, ken le thil omdan hoihtak a ka dot thak leh, ataktak mah ana hi a. Ka lungsim in HEMBIAK DOH AI a bum a omkha kahi maw, kachi a naa kasa.. Katha a zoi a, bangmah loh theih lah kanei nawn kei.. Zawnluat ziak hia? Aihkeh mibang a pil leh siamlouh ziak? Kei kimoh sak na ding ngaihtuah na hon pawt khe zungzung a, lawmte theih ding laukawm in lungsim gimtak in ka om hi. Bangteng hileh Lampaam siik khiallou kuamah omlou kisik a lamdik a painawntheih mah hoih pen hi ve'n kenzong Linda kiang ah thil omdan ka gen dia a ittna kaki nemlai ding chin ka ki hehnem hi.

Nitak hon hi a, ken zong Linda kiang ah thil omdan teng ka hilh vek hi. Ki sik a ngaihdam hon ngen ding kasak lai in.........

Itluat ziak in, Ngaidam ding in ka kiman gige a, himahleh leh lampang ah honpai daih a "ki ngailou" dan a ki gen in aheh ut zawmah hi.

Ka lungsim in kamuang thei nawnkei thil omdan diktak hon hilh hen la Ngaihdam hon ngen in hon ki leh kiik leh zaw ka nawlkhiin kei ding, leh lampang ah alawmpa'n lah hon houpih gige zomah keitoh ka kingaihma pek ua ana ki ngai ua tunitan ki ngai mahmah lai ahih dan khawng uh hon genkhum nilouh hi.

Ka lungsim kisiik na in adim a, Nidang ka kingaih ma uh ka ngaai mahmah. Angailou bang a om ding ut mah leng thil hithei ahi kei.

Akiang a Khen nathu gen mai diing ka lungsim ah om mahleh ItPen te kiang a khenna thu va gen ding chih khoveel ah kei lou in zong haksa sa diing in ka gingta hi.

Mitam pi te a di'n huai zan tawldam tak a ihmut na himah leh kei a di'n lunggim tak a ki ngaihsiat jaan asuak maimah hi, Linda in zong tuzan bangchi'n azang diam maw....! Chih te ngaihtuah kawm in zanhun ka zang a, Zan Khomial te hon theng henla, zingkhua hon vak leh ka lungsim mial zong hon vaak nawn ding in ka gingta..Zingkhua hon vakta a, ka lungsim ah bangmah a omthei tuan kei.. Ahi a lah bangmah gentheih kanei nawn ngalkei aa.Zingkal a vasa haam gingka zak te in, hon thuak pih hileh kilawm hial in kathei a vasa neu ham chiakchiak te'n "Thoukhia inla kisu halh in, na hehpih huailua" hon chi bang in ka thei hial hi.Kei zong thoukhia in, zan ihmut louh na mitsan gilgial toh Baatroom ah ki hah ding in kalut suak ta hi..

Kei kahih leh nidang akipan himhim zong ihmut hailou leh ihmu theilou bang a ommun mahmah kahih ziak in, annkanek lai un ka nu'n hon thei ngaal hi.'Ihmu lou geet neive maw..!' honchi a, kenle HI chih teng a dawng in bangmah a serious lak kholkei.Khat veivei chiang in Pathian in Adam ana hamsiat na kammal ka ngaihtuah chiang in kei tung a hon kibung diak mah bang kasa hi."Nasuante tan in Kho ul luang puappuap in nek ding a zong ding ua..." chia ana hamsiat sa ahih ziak in, Keile Adam khanggui a kipankhia mihing khat akihih sam ziak in, Peih in peih kei taleng sunhun a nasep hon ngai jel..Nasem zou nitak hon hinawn a kalungsim ah bangmah a omtheikei.."Ka itpen Linda in bang ziak a hichi lawmlawm a hon khem ahi diam aw, mibang a neih zohlouh ziak hia? Himahleh itluat ziak in amah mohsak in ka hehsan tuankei, KEI kimohsak na ding ngen ka ngaihtuah a, kamit a kipan khitui hon luang khia hi. Ka itpen Linda toh khawvel a hun zangkhawm nawnlou ding bang a ka kitheih ziak in, Kei a ding in khovel ah kinep na ding bangmah omlou in kathei hial hi.Khovel a kinep na ding bangmah neilou kahih ziak in sih ding kalau kei, kalungsim ah khauhual hon kilang dun2 maita hi.

Sihmai ka ut..

Zan khawmial nuai ah thawmhau tak in ka om a, kamaban ah SIHNA in hon ngaklah mahmah in ka thei hi. Thupuk na la ding in ka thoukhia a, lupna tung a tukawm in ka ki ngaihtuah nilouh hi.Kalungsim in siding in hon phal naikei a, BANG ZIAK A KEIKIA A THUPUK NA LA DIA THOUKHIA KA HIAM? KHOVEL A ANUAM AHAKSA KATUAH HUN A, KA TAI NA DING NU LEH PA NEILAI SAM ING A..KEI MIMAL IN THUPUK NA KILAK MAWK LENG KA LAKHIAL NGEINGEI DING chih te ngaihtuah khiak in ka hon neita hi..Keizong ka Room a kipan thoukhia in, ka Nu te Room a vapai in kava phawng a, ka pa'n hon phawk pah in hon na dawngpah hi.Ken zong thawmhau kahih dan leh ka kiang a lum ding in ka chial ngal a, ka lung buaina te bangmah ka genkei. Ka genlouh ziak in, lungnop louhna banghiam nei kahi chih bel hon thei mahmah. Genkhiak ding ka ut a, ahih hang in ka genkhiak dek chiang in ka genthei mahmah kei hi. Kaneu lai a ka giah nung kumbang zah hiam kihal a ka pichin nung a, pa te toh ka giahkhawm masak nawnna ahih ziak a nuamsa chiahlou zong kahi maithei, Ka kisak sung in, jingkhua hon vak ta a.Kapa ahih leh zinkhiak na ding poimoh aneih ziak in khualgam ah hon zinsan ta a Kanu kiang ah ka buaina dongkhe ding a vaikhak in amah lungnuamlou loutak a zinkhesak kasuak maimah hi.Akhonung in thil omdan kanu'n hon dongdong mai a, ken zong ki dek ngaihna theilou in bangkim kahilh vek ta himidang te hon theihpih louh ka nu hon khamuan na kampau te thupi in manpha kasa hi.

Bangteng hileh kei a ding in ka itpen Linda hon ki lehkik nawnkei ding, gamkeu tui omlouh na mun a khualzin mi ten tui a poimoh bang un Linda poimoh in, Meihol lak a suangmantam bang in etlawm mah leh kei a din AVULSA ROSE ahi ta Itluat Linda aw Mangpha.

Thukup tamlou:*Itna ziak in mi akipaksak a itna in mihing hinkhua suse tu ahi thei chih thei inla itna kichi hou ngaihtuah ken.*Na it taktak te kiang ah KON IT chi inla na it louh te kiang ah NA IT THEIH LOUH DAN kamnem a hilhdan siam pen ITNA DIK ahi zaw*Mi tengteng IT vek sawm inla NGAI vek ken.*Bang hiam buaina haksa tawp natuah hun in, kouh theih ding a Nu leh Pa toh damlai nahih leh amau te toh kikum khawm in, Nu leh Pa toh lou te a din, nang sang a Upa zaw hon deihsak a natheih te kiang ah tai inla nang kia in thupuk na laken aw Kipak

~Beita~

©SIAMSINNA LEH VAKIANGBU