KA INN

By ~ Vz Vualnam

Ka tenna di’n inn ka kilam a
Gawl in hoihtak in ka uum hi.
Kongtual tam dimdem ka kilaai a
Innka nuamtak ka doh hi.
A tung bii in ka khuh zihziah a
Bikhalaap kaai ziilzial ah den chia’n
Phialphiahte’n bu a hong sep ding uh.

A thuk ah mei a lum gige dia
Phalbi ka kihta nawntakei ding.
Vuuk a kia hiam aw, mei a ziing hiam aw,
Tapkotawng ah ka lum veve ding.
Sahou in khindang a lawikei dia
Beem ah leng buh a kiam ngeikei dia
Ka inn ah niang-le-tai in ka khosa ding.

Nipi chiang in pialkhang ka hong dia
Huihvot hiauhiaute hong lutna di’n
Huchi’n nipi kholum ka hawlmang ding.
Gapkhuam ah ka tuibuukthei ka keem dia
Chiklai peuh a ka lungtaina ahi ding.
Ka deih teng inn ka tutna ka kawlzaal
Suutpi ah ka baang ding.

Ka tenna di’n inn ka kilam a
A tuak peuh in hoih a sak ua
A mupeuh in nopchi a sak ding uh.
A sung ah khamuang in ka teeng ding a
Huan hiai ka lunggulh ahi-
Ka hutawp ka laakna mun
Ka innsung a ka dohdan tung hileh!
Ahi, ka ngaihnou’ pheitung ngei ah
Ka kha ka khah nuam hi!

©Siamsinna Leh Vakiangbu