KEIMI TUI' HAMSIA (The curse of Keimi tui): Part 3: Khangthak

By ~ Vz Vualnam

Khangthu mangngilh ahita a, tangthu leng phawk ahi nawn kei. Khanglui lai a a tak a thiltung a kigente tangthu bang in leng a kigen nawn kei. Huailam toh kisai khangthakte’n bangmah a thei nawn kei uh. Bang a thei mah ding ua, khangthak hun hita ve’n! Amau’ khang a thil om silh-le-ten, laisimna, ettheih-ngaihtheih tuamtuamte khawng a houlimta ua, khanglui thu koihdap ahita. Koihdap ahihziak a khanglui thilte bei taktakta hia? 

Lamka tuh a luun mahmahta a, thil teng a kimta hi. Mihoih a tam zahzah in misia leng a tam a, thilhoih hih ding a kidaih zahzah in thilhoih lou hih ding leng a kidaih hi. Poliste’n khopi sung ah thubuai-labuai - guktak-laktak, kipimang, kithah-kimat, kisualluih, khamtheih-guihtheih leh a dangdang toh kisai sukvaiveng ding a neiden uhi. 

Kikim tuh kum sawm-le-guk bang ahita. St. Paul ah pawl sawm a sim lel. Dorcas veng a teng ahi. A zahkai ziak in a pasalte’n a engbawl nuam mahmah ua, himahleh ama’n limsak nuam kei. Pasalte lak ah Goulian a khel diak a, numeite a utut in a bawl nawkkhem hi. Nikhat sunkhawl tawp in pindan ah a hong luut daudau ua, Goulian in Kikim a hon zuiluut a, a sam khawng laihsak in a engbawl hi. Huai kia hun sa lou a a angtuamna gui a laihsak thahahleh Kimboi hehlua in a kihei a, a mai a phuaisak ekek a, huaizoh nakpi a a sawn leh Goulian a hangduai a, naakpi in skul baang a kizepna a, leitual a kidenna a, khophawk lou in a om hi. Mitphiat kal lou a huchia thil a hong om guih leh a lawmte bang a dai zikzik zezen ua, thil omdan a na mu toh, a na mu lou a bang thil tung ahia chih thei lou a hamhaih toh, Kikim in huchi tel a thahatna a neih lamdang sa in a kamka heuhou uhi. Pasal thahatpen in leng huchihzahta a thahatna a nei kei ding. Huchia sawt lou lamdang sa tak a a om heuhou nung un Goulian’ lawmpa Mamang in Goulian a hong en a, a mai tuh vompi’ phuaina mah bang in a keek heekhuuk a, sisan a pawt zezu hi. A sou a zonleh a mu kei a, ‘Lawmpa naak le nak lou a bang. Khat in sir-te va sam zok un,’ a chi hi. Huchih sung in Kikim in a kawlzal a la a, innlam a zuan vengveng hi. Kuama’n a khou kei. 

Sir Lian a hong tung masapen a, Goulian’ luang tuanglai a lum dildel a hong vel a, ‘Kikim hih maw hiai? Tua koi a om e amah?’ chi’n a kan a, paikhin a hihdan a hilh uhi. Heutu dangte leng a hong tungta ua, thil omdan mulkimhuaisa in numei khenkhat bang a kidik susuih uhi. Sawt lou nung in Goulian’ sungte leng a hong tung ua, huihkhua a gik mahmah. Kikim’ pa kiang ah skul a pan phone a hong pai a, kintak a skul lam hon zuan a, Kikim leng hon tonpih ding in a hilh uhi. Himahleh Kikim bel inn a hong tung kei. Kikim’ nu kiah thil omdan a hilh a, a ki-entuah ua, a lauh gige uh thil tung hita ahi chih a theisiam mahmah ua, a lung uh a ziing mahmah hi. Kikim’ pa’n a nu kiang ah, ‘Ke’n skul ka va delh dia, nang Kikim hon ngak inla, a hong tun chia na kutzohleh hon tonpih in. Hoihtak in khem inla, hihheh hetke’n,’ chia vaikhak in amah a diangkhia hi. 

Skul a va tun in a naupangte ana khakhe khinta ua, a heutute un a na muh un thil omdan ana genpih pah ua, ‘Naupang thumangtheitak leh omdan hoihtak hi a, hichi bang in a om ngei kei. A heh a thangpaihlam leng a kithei ngei kei. Tuni a bang hong chiphut mawk hiam kou le ka theisiam kei uh,’ chi in Goulian’ luang a va etpih uhi. A mai a liamna ma a muh in hiahvual louh a a tanu’ gamtatna ahi chih a thei hi. A lungzing mahmah hi. ‘Bachia na tanu hon tonpih lou na hiam?’ chi’n Principalpa’n a na dong a, ‘Inn a hong tung kei. A nu amah ngak a om ahi. Inn a tun chiang in a nu’n a hon tonpih ding,’ chi’n a dawng hi. Goulian’ sungte lah kap leh mau in a luang kiang ah a omden ua, a principalpa uh leng vaihawm dingdan a lungbuai mahmah hi. A skul sung a siluang om lah sukvaiveng louh theih louh ahi zel a. A tawp in Goulian’ pa leh Kikim pa a office ah a samluut a, a houlimpih hi. ‘Tuni in deih in deih keita leng hichi bang i tung ah hong tung ahita a, thutawp bel nougeel tung a kinga ahi. Polis ah pekhia ni in, a sep ding bangbang uh poliste’n sem uhen, na chih uleh nouthu, hikei, khutkhelhna ahih chiang in inndongta’ vai ah suvaiveng ni na chih uleh nou thu hi’n chin, na kithukimna bangbang uh ka hon pompih uh,’ chi’n houlim a pan hi. ‘A mohzaw ka hihman un kam hon ka masa leng,’ Kikim’ pa’n a hon chi a, ‘Goulian pa’n pha a sakleh polis kigolhsak sese lou in inndongta vai in suvaiveng mai leng chih tuh ka hon ngetnop ahi,’ a chi hi. Goulian’ pa’n,‘Vangsia tuh a kihi mai a, hichi bang lungphawng thu zaak a hong om mai tuh. A tung ding teng tungkhin ahita a, akua-akua in leng mohna kinei chiat ahihman in Kikim pa’ nget bang in inndongta’ vai in beisak ni in, hiai thu sau pehsak kei ni,’ a hon chi vanglak a, kuapeuh a hahuai uhi. A houlim zoh un Kikim’ pa’n a a nu a phone a, Kikim’ tun leh tun louh a dong a, tung nai lou a hihdan a hilh hi. ‘Inn hong pai ngam lou a koihiam a baang hi peuhmah ding ahi. A pite khawng na kan theih nana ah na kan in,’ chi’n a hilh a, tutan a Kikim inn tung lou ahihdan a a skulte a theisak hi. 

A denchiang in Goulian’ luang a pokhia ua, Vengnuam a a inn uh a zotpih uhi. Kikim’ pa’n a va zui a, inn a tut un ama’n leng innlam a delh hi. A lawinu’ ki’ah Kikim’ tungtang zaak a nei hiam a kan a, ‘Ka kan theihna teng ka kan a, kuamah a mukha a om kei,’ chi’n mittui kai pipelh in a dawng hi. ‘A hatna koi a kipan a bangchidan ahia chih aman leng a thei nai kei di. Himahleh huchi tuk a hatna a neih in lungbuaisak mahmahh ding a, a kisuanlah leh lamdangsakna toh lungphawnglua ahi di. Awl a hong pai na di ahi,’ chi’n a hehnem hi. A thusa pa uh a houpih a, thil omdan gen in inndongta kikaikhawm ding in a theisak hi. 

Huai nitak in Sir Lian in, ‘Tup thak khat om. Numei. Kum 16 vel. A hatdan tuma a te sa le hatzaw. Lauhhuai mahmah. Naih louh ding. A gal a pan kap ding. A innkuante bel bangmah loh taakdih louh ding,’ chi in Kikim’ lemlak toh thuah in a kizoppih mi tam loute ki’ah a khak hi. 

Khua mial ding in a hong kisa a, Kikim tungtang bel zaak in a om nai kei. A nu-le-pa a lunghimoh mahmah ua, ‘Polis ah hilh le lah tuni a thiltung teng toh hong kikaimat vek dia, en lah a zon na’ng thei lou hang a maw,’ a kichi phet uhi. Nitak in tanau-laina leh innkiim-innkiang a hong pawtkhawm khiukheu uhi. Huchia zankim tan bang a bangmah thuzak a neih louh tak un YPA-te a theisak ua, amau a zon dingdan vai a hon geel uhi. 

A zingkal in, ‘Hong pai in Kim, ka hon ngaidam uh. Lauh ding bangmah a om kei. Hong kiik in,’ chia lai sun in Lamka khodung-khovai ah a taak ua, facebook, whatsap chihte ah a thehzaak uhi. Hinapi in Kikim a hong kilaak himhim kei. ‘Tu nitak chiah ke’n ka va zong mai di,’ a pa’n a nu’ ki’ah a chi a, a nu’n bel, ‘Innkiim-innkiangte’n hon ompih den ua, nang diangkhe le teh kilawm lou ding ahi. Denchiah tuah khat va nei le teh hiaisa uthuai louzaw tuah theih ahi. A om nana ah amah leh amah ki-en kai thei ding in ka gingta,’ a chi hi. ‘Kal nawn a kha liik ding ahi. A tung a bangthil tung ahia chih a theihsiam kei leh ama a dia hoih lou ding ahi. Pom thei keileh ama a dia lauhhuai ding ahi,’ a chi hi. 

A nitak tan in leng bangmah thu a omtuan kei. A zingkal in lungphawnhuai thu a hong thang leuleu hi. New Bazar bus khawlmun ah pasal nih sisa in a mukhia uhi. Kuate hihiam chih a sui uleh tuma a SBI Bank luh a muanmoh a om, a zonzonte’ lak ua mi nih ahi chih a theikhia ua, kua thah hi hiam chih bel a suibun kei uhi. A mai uh kiphuaikeekdan in bel muanmoh a nei ua, himahleh chetna bangmah a om kei. Kikim’ pa’n huai thu a zak tak in thil omdan a theisiam pah a, a nu’ ki’ah, ‘Kikim in a thuguk mukhia a, pom leng pomthei ahi ding. Huchi ahihleh zaw patauhhuai kei. A hoih mai ding. A thil hihkhelh thupha tawina a khotang a dia nahoih sem a kinei a suamhatte tomkhia ahi di. Hilele Keimi bengte’n a beng ding ua, a benkhiat uh zaw ka ging kei, hilele ka lung a nuam kei,’ a chi hi. 

Hi. Keimi. Tuhun tan in leng nidang a kigen Keimi a mangthang nai kei. I lak uah a om ua, a kiseel siam ziak un kua ma’n i thei kei. Himahleh a khenchiang in a gial uh suah in a gamtang khasek ua, huaichiang in mite’n a simtheih uhi. Himahleh a theichian kilkel mi bangzah hiam a om. Amaute’n keimi hi a a theihte uh beng in thatzel ua, thah chimih a tum ua, amau tuh Khisiangte a kichi uhi. Hiaiziak in keimi leh a khisiangte’ kikal ah gal bei thei lou a omden hi. 

A zingchiang tan in leng Kikim a hong kilak kei lai. Sunnung in New Lamka hanmual ah siluang khat a mukhia ua, a liamna ma ua pan in tuma a misite toh kizawitawn vek ding in a ummoh uhi. Tua siluang a muh u tuh Chinpu ahi a, Sir Lian lawmpa, Khisiangte lak a khat ahi. Sir Lian in siluang a va en a, a kisualna ma uh leh Kikim’ gamtatna a muh in Kikim tuh a gintak sang mah ua hatzaw hi in a mu a, a lawmte pilvang ding in a hilh thakthak hi. 

Huai nitak in zankim in a pa Kikim zong ding in a kuankhia hi. A gial a suah a, Kikim’ gim zong in a langlang ah a diang hi. A tawp in a gim a za a, a zuihzuih leh Tangnuam khokhunglam a va tung hi. A gim a haat deuhdeuh a, huai kiim a om ahi chih a thei hi. A naih hiaihiai a, Kikim in loubuk kawm ah ana en gige a, a naihluat tak in a na ngiik a, a gim a kipan a pa ahi chih bel a thei hi. A pa’n a va naih a, Kikim dai dide in a na om a, a kiang a tun tak in a pa’n deihthohtak in a liak a, huchi’n a gial a hon kheng a, mihing mel a hon pu hi. 

‘Na tung a thil tung theisiam lou in na lau ding chih ka thei. Hiai tuh i hihna uh ahi. Keimi i hi uh. Himahleh i deihteelna uh ahi kei. Hiai bang dinmun tang ding a vaang in a hon hamsiat ahi. Tangthu saupi ahi. Khanglui hunlai in Keimi tui kichi a om a, huai tui dawn peuhmahte Keimi suak a kichi. Himahleh sapte Zogam a a hong pailai un huai tui a vukmang uh a kichi. Himahleh huai tuisam a phul thouthou a, na pite a laizillai un huaimun ah gamsui ding in a hoh ua, vangsiathuai tak in huai tui a va dawnkha a, Keimi a suak. Keimi dang toh suan leh paak hon nei ua, tua a suante tuh i deih a i teel hilou, hiai mihinna nih i neiden uh. Lauh ding ahi kei. I kisuumzoh naakleh mihing ngeina bang a hinkhua zat theih ahi. Na gial hon khek inla, inn ah i pai ding. Hinkhua ngeina i zang nawn ding,’ chi’n a zol hi. 

Kikim in leng a gial a hon kheek a, ‘Hinkhua a ngeina thei ngeingei nawn kei ding. Mihing ka hi kei. Sahang ka hi, mihingte toh tengkhawm thei ka hi nawn kei. Ke’n amau ka thah kei leh amau kei a hon that ding uh. Ka hong pai thei nawn kei,’ chia a dawn laitak in a pa’n a khutvan a, dai ding in a hilh a, ‘Hiai mun ah a om uh, a gim uh ka za, kihem in,’ chi in a nung ua loupa buk kawm a kihemkhe ding in a sawl hi. Huchia Kikim kihemkhe dia a kihei laitak in thau a hong ging a, Kikim a puk nok hi. Huai phet in Kikim’ pa thakhat in a kikhoh mang a, thau ginnalam a delh hi. Khisiangte’n nakpi in na kap mahleh uh a kinluat man in kapkha uhia kha lou chih leng a thei kei ua, miphiatkal lou in a mangsak uhi. Chikchiah koi ah a hong suak dia chia kiging giikgeek a a om lai un thakhat in a hong suak nawn a, a lak ua khat tuah in a taimang pih hi. A lawmte un kapzui mah le uh a kapkha a om kei uh. Mi nga hong kuan ahi ua, a omlai lite awlawl in Kikim’ luanglam naih in a kikhin phei ua, himahleh Kikim’ leng a omna mun ah ana om nawn kei. A si a etzui uleh loupa buk kawm ah a lut a, zui ngam lou in a kikhiinkhe dia a kisak laitak un loupa kawm a pan Kikim a hong tawmkhia a, a lak ua khat tuah in loupa kawm mah ah a lutpih hi. A kin mahmah ziak in kuama’n thau a khah man kei uh. A omna mun uah a ding den ua, amau malam chiat veng in a hong kilak nawn chikchik kaplum teitei ding in a kiging uhi. Sawtsim huchia a din nung un thakhat nawn mah in a langtuak a pan a hon boh ua, khisiangte a pang man kuamah om lou in tomchik sung in a malchai uhi. 

Hiai bang teng tuh Kikim’ pa’ utlam ahi kei a, himahleh ut-le-utlouh a gamtat ngai a hihman in hiai bang teng a tung hi. 

Kikim liamna a etsak a, a liangguh ah thautang a lut hi. Kintak in a paipih a, damdawi inn a lah lut ut lou in Kikim mun khat ah a nusia a, pharmacy kihong zong in a va diang a, damdawi inn kong a te lel a na kihong a, huai a a poimoh teng va lei in Kikim a enkol hi. 

Huchia innlum leng beel ngam lou a dainawl a gentheitak a ki-enkol a a om lai un Kikim’ pa a kingaihsun vungvung a, Lamka a khamuang tak a khosak a utlai leh khisiangte hihchimit masak ngai ding a, huai a ut kei leh ama a dia lampi om sun tuh Lamka nutsiat a, koihiam a hinkhua bulpat thak ding lampi omsun ahi. Keimi tengteng kaikhawm in khisiangte’ tung ah gaalpi a puang ngam diam?

© Siamsinna leh Vakiangbu