PATHIANNI ZING

By ~ Vz Vualnam

‘Zingkal chiah Thangpu’n sa va lei leh hoih in teh. Thugentute an nekpih di i hih uleh,’ a pa’n a chihleh a nu’n, ‘Pathianni a sagoh na kham uh hi lou maw. Koi a sa va lei di eita,’ chi’n a dawng a, a pa un, ‘Ei mah ve maw,’ a chi numnum hi. ‘Ak bek va en leh, a pum beek in lei theih in teh,’ a chi lailai a, a nu un, ‘Sasuak na khamtaak un kua’n ak le zuak di sa na maw, kihong mahmah ke’n teh,’ ana chi zel hi. ‘Kihong mah in teh va en himhim leh,’ a chi teitei hi. Pa Khan tuh College veng ah a teng a, village authority a Secretary ahi. Saptuam upa leng ahi. Amau tuh Pathianni a sagoh a kham ua, thupiak khauhtak a bawl uhi. Zingchiang Pathianni a mundang a pan saptuam hong veh ding om ua, huaite an nekpih ding chia sawtpi apan a na chiam ahi. 

A zingkal in a pa’n Thangpu a phawng a, ‘Thang, va dak himhim dih ve. Akpum lei di bek a om hiam,’ chi’n a sawl hi. Thangpu tuh lungkim het lou in a hong thou nulnul a, a kiphiat a, activa lakhia in a kuankhia hi. Sawtsim nung in a hong tung a, ‘Om mahmah kei,’ chi in a pa ki’ah sum a pekiik hi. ‘New Bazar lam va en lou maw?’ a pa’n a chi a, ‘Huai tantan kua peih kei. Sa hoih le om nawn ke’n teh. A zekai taaktaak toh,’ chi in a paikhiaksan hi. ‘I vengte kua akvual a om diam maw. Ak pumkhat beek i zon louh a,’ chi in a pa a kisa a, a pusuak hi. 

Sawtpi a va vakmang nung in ak laa lian lou khat a hon khai a, ‘Ak vuul le om nawn mahmah kei e i veng ah,’ chi in a hong luut hi. ‘Huai kham di i hi umaw,’ a nu un a na chi a, ‘Kham kei lele a dang di om tuan lou,’ chih toh ann huan inn a luut a thuah hi. ‘Thangpu ko om ahi? Hiai ak hong bawl leh hoih di hia,’ chi’n Thangpu sam in a au tuaituai a, lah dawn in a om kei. A tawp in amah a kipan a, a nu un, ‘Tua huai na goh a zekai lolou di maw? Naute sundes skul kaina di toh,’ a chi a, ‘Hon zoupah na veng,’ chi in tui a suang hi. 

A tui le chiak nai lou chih ding in a Niangboi puansawp khin a hong luut a, ‘Dak kua ging di hita, an neta le hi lou maw, kizekai zel di eive,’ a chi a, a nu’n, ‘Na pa’n ak gou dek pan zel a. A tui le sou nai kei,’ a na chi hi. ‘Na zekai di uleh ana ne ua, ke’n ka man chiah ne na veng,’ a pa’n a chi hi. ‘Kikhopna nei lou di mawleh?’ Niangboi in a chi nawn a, ‘Nei dah mai ni. Nitak chiah nei mai ni tuni zaw,’ a pa’n a dawng hi. An a thuuk ua, a dang teng in a ne ua, a pa bel a tui sou ngak in a om hi. 

A tui a hong sou a, a akmul a bot a, a em a, a hon sem hi. A gintak saang in hun sawt a la zaw a, naute sundes skul kai dia a kuan khit un leng a semkhin nai kei lai hi. A nu un kikhawm dia a kisak kawm in a noh nilouh hi. 

A semzoh in a khut a sil a, ‘An k’on ne di awle,’ chi kawm a a sana a etleh, ‘Eh, dak 11 lah a gingdek mawk a. An le ka ne man nawn dia hia,’ chi’n annek dohkan kiang ah a ding eu-uau a, ‘Khatvei bang kuan hak lele poi kei,’ chi in an ne di’n a kisa hi. A nu un lah, ‘Den pek in i chichi voi. Na ziazia toh. Hon na kuansan di ka hi aw,’ chi’n a phunsan numnum hi. Huchih laitak in daak a hong ging a, a pa uh hong dakkhe guih in, ‘Khaih, hunkeem di ka zomah vele. Ka naak mangngilhlua,’ chi’n an hai kim lai a hong dingdok a, a mai va phiat somsom in lupna pindan ah a dianglut a, khekol a maikhak masak pen teng in puanak khat a a zok a, sam nangawn hiat man lou in a pawt kawm in a zuut momolh a, den pek a ana ngak a lawinu bang leng ngak man lou in, ‘Inn hon kalh in aw. Ka na kuan di,’ chi’n a taipawt hi. 

Biakinn a tun in mi a na kim diamta ua, a ma tutna ding awng vevok in a na om hi. Pastor pa bang lunghimoh in ana daakdaak a, a kiim a upate toh bangthu-bangla om hiam chi in ana kihou kheukhou uhi. A tutna a tu in thumna a nei hehu a, bangteng genkha a hia chih leng thei man lou in a amen hi. A dingtou a, hun a pan hi. 

Tawp in a hong veh thugente toh kichibai in a houlim ua, a hunkep ding mangngilh ahihdan khawng houlim in an ne ding in a innlam uah a tonpih hi. Thugentupa mi nih in a hon zui ua, huchia innlam zuan a a pai lai un inntekpa’n a meh ding uh ginat louh toh a kingaihsutsut nalam in a kho-ul bang in a buak zezen hi. 

Inn a tun un a tawldam ua, thukhotaang khawng a houlim uhi. Innteekpa’n a veng ua Pathianni a sagoh a khamdan uleh tuziing a meh ding uh a suktuah mohdan a zinte a houlimpih a, amau bel, ‘Sa sang a anteh meh khawng mah sung in le zouzaw ahi. Tulai bang houh saptuam veh a a kivakleh akhat-akhat in sa hon nekpih ua, a chimtak sim le kihi a ka,’ a chi zenpeuh uhi. 

An neek a hong hun a, an a hon thuuk ua, a nu un, ‘Tuzing sa kimu zou lou a, hiai ka muh sunsun uh, a maltameh pian a nek di hi’n teh,’ chi in a aksa huan uh a hon lui hi. An a hon ne ua, a aksa uh kuama’n a suak kei zezen ua, inntekpa’n, ‘Kisuanglah hi ni uteh, suak un,’ chi in a zinte sa a suah zezen hi. A mikhualte un lah, ‘Hiai antehte mah limzaw veh e,’ ana chi kankan uhi. An a hon kham ua, a hawmthoh pen uh aksa meh bang tampi a vaalsak maimah uhi. 

An neekzoh in a tawldam ua, huai zoh awl a kisa in nitak kikhop manoh in Pastorte’ inn a baang kawm ding in a kizuikhia uhi. Pastorte’ inn a tun un amau leng an ana nekhin geih ua, ‘Hong tu un, hong tu un,’ chi’n ana vaidawn a, ‘Bang n’on meh ua,’ ana chi hi. Thugenpa’n, ‘Sa leh anteh ka hon meh uleh gilvahlaw veh aw,’ chi’n a dawng hi. ‘Nou koi a sa mu na hi ua. Ke’n lah tuzing sa ka muzou het kei a. Sa lei dia ka va kuanleh kuama’n sa a na gou lou maimah ua. Bangchidan a diam ah tuzing,’ chi in thil omdan thei het lou in tuzing a sa a va muh zoh louh lamdang a sakthu a gen hi.

A houlim lai un dak a hong ging a, kikhawm di’n a luut uhi.

© Siamsinna leh Vakiangbu