SIAN' LEMGEL ITNA ( Khen 11na apan 15na tan)

~ Lianzamang Tonsing @ ZM Tonsing

(Khen 1na apan 10na sim nailou nahihleh… Hiai ah CLICK in sim masa in)

Priya’ khut nel thimthiam ka letkawm in ka thugen ka sunzom a...

“Priya, a diklel a gen in ke’n leng ka hon it in ka hon ngai petmah. Na hon gen bang in exam hall sung a i tutkhop, ka hon muhtung a kipan ka lungsim teng na luahkhin hi. Ahi a, kei singtangmi leltak in na mai ah itna lou ngal bangmah suan di dang neilou ka hihman in bangmah ka hon gen ngamkei. Ka lam-et khen a ka kiang a itna na hon nget ka ngaihtuah chiang in ka kipak a himahleh lehlamtak a nang a dia chin kisaklouhna lianpi ka nei hi. Himahleh, kei toh anuam-ahaksa thuakkhawm a, thuak mualsuah dia na gin-omna na hon chiam ngam nakleh kei leng nang a di’n sihtanpha in ka gin-om diing....”

“Mang, ka hihtheihtawp suah in kei leng sihtanpha in nang a di’n ka gin-om diing. Haksatna i tuah ding ke’n le ka thei, himahleh tuate tengteng thuakngap a k’on gen mah ahi. Haksatna khawng i thuak zohkhop leh haksatna khenlam ah nopsakna leh kipahna in hon ngak ahi, tua nopsakna leh kipahna tan tun mateng bang chiteng in haksa thuakmahle hang nang a di’n ka gin-om diing. Ka hon itna hon nawlkhin saklou a, na hon sansak ziak in ka kipak. Mang, bang chituk in i mai ah lungkhamna meipi zing mahleh ka lungtang a sisan lum a luanlai siah nang a ka hi” chi’n Priya in leng ka khut ahon letsak tei hi.

Huchia kipaktak leh kuamah englou a nihgel lungtuak a itna guikhaubang ka sutkhoplai un class lak ahong hun a, ka room di tuak ua lut in ka kikhen uhi. Ke’n class khat kia nei himahle’ng Priya te’n a kizom a nih a neihziak un ngak seselou in inn lam ah ka paisan hi.

Lampi a ka pai kawm leh inn ka tuntan dong in ka kingaihtuah dedu den hi. Priya ngailou hikei mahle’ng ka thupukna lak pen hun hongpai zel di ah kei a dia puakgiklel ahikhak di ka lau a, kipah leh lungkham ka thuah hi. Huan ah, ka college khawng zou le’ng hiaimun a om gige khollou di ka hihman in huaihun chiang a ka lungkham na di phet houh a dia aw chihkhawng ka ngaihtuah hi. Ahi a, khat veivei lah a hun leh munzil in a lampipi hong om thouna ve, itna hi a poimoh pen chi’n kei-le-kei ka kihehnem zel hi.

Lunching in lah tangval neita chi’n ka houpihtha a dah a, ke’n ka houpihlouh chia lah aman hon houpih khollou ahihman in ka kihouvang mahmah uhi. Himahleh, kidek zou taktak lou ka hi ding a, a vangkim in ka houpih kha zel hi. Ka houpih chiang in bel hoihtaktak in ahon dawng zel hi. Tangval nei taktak hia chih ama’ kam mahmah a kipan thudik theinuam in kan sawmsim sek mahle’ng ahon dawnna di kammal ka zak ngamlouh ziak in ka kan ngamkei zel. Lunching tuh mangngilh thei mahmah lou ka hi pen mai.

Hunte paizel in Priya toh ka kal uh leng ahoihtou zel hi. Priya in kei theihna tan ah hon ngai mahmah hi a ka theihziak in ka lung a nuam mahmah a, kei leng ka hihtheihtawp in ama a di’n ka gin-om hi. Nitak khawng chiang in VDEO call bawl in hun sawtpipi ka zangbei sek ua, huchilou a eilam paidan a a inn ua va pawt a, va hel chihte om theilou ahihman in ka kiheltheihna uh college huangsung khawng lel, huaileng miteng muh dia om nuamlou ahihman in ka hun zatkhop dante uh a sit huai thei mahmah hi. 

Priya toh itna huangsung a ka omkhop nung uh a khatveina di’n nikhat park ah ka hohkhawm nawn uhi. Mi hon sukbuai nawn get khak di lau ka hi ding ua, mi hon muhlouhdeuhna di khat ah ka omkhawm tektak uhi. Chitak deuh a i hong kimuhhial chiang in gen di bang vang zozen a, i ngaih taktakte kizahtak ahi a chih uh dik ka sa mahmah hi. A khenchia ki-entuah kha gaihzel in ka nui chemcham zel uhi.

Priya’ khut ngou kikkiak leh nou ngingei awl in ka letsak a,

“Priya, i kiten chiah i tate a hoih mah di maw hehe..”

“Bangziak maw?”

“Nam tuamtuak a kiten chiang ua a tate uh hoih ahi”

“Chi khemkhem kua gen a na theih oi? Na thutheih le khelkhel na e”

“Taktak ei ngal, kou lam a huchi dan a kiteng om zeuhzeuh un chin a tate uh hoih a hoih thei mai”

“Chih leh nang le na nu leh pa nam tuamtuak ahi di maw leh?”

“Bangziak in eita?”

“Nang le na hoih law vele”

“Chi zozen zel aw, kipahhuai na e” chikawm in a khut gak zaw sem di’n ka letsak a, a khut nak mek lawdeuh kha ka diam ah a guh bang hongpuak lok hial hi. Aman leng na sa in hong kikou khe kha dek zozen hi.

“Eh! Thil khat k’on dong aw Mang?”

“Dong ve, dong ve, khatlou le hon dong aw hehe”

“Zozen selsol hehe. I maw na min tuh Mang hi a hilele noulam na kisapdan uh a tuam deuh om hia?”

“Bang chidan in e? Kisapna dia min kiphuak mah hilou maw, min a i kisap ke’n bang a kisam di la? Huchih in min neihman om dia maw? Hehe”

“Zutzut maizen hiaipa! Haha. Min a kisap di tuh ahi lawna a ka chihtuh maw kei hon sap didan?”

“Eeee...Huaidan maw. Kou lam paidan a tuh maw numeite’n pasalte sang a neuzaw ahihkei peuhmah ua leh amin ma ua ‘U’ chih behlap ka hi uh. Etsakna in kei bang ‘Umang’ maw hehe”

“Huai ‘U’ pen bang etsakna dan e?”

“Huai pen maw sang a upa zaw chihna leh zahtak etsakna khawng ahi. Huai banah, kou paidan a tuh numeite’n pasalte ‘U’ chih ngeina ahi a, huaiziak in pasal khenkhat in amau sang a upa zaw nungak/zi nei mahle uh a zi/nungak in a pasal pen ‘U’ a chih teitei di ahi”

“Aw...ka theisiam. Chihleh ke’n le Umang k’on chih ngai di eivoi maw?”

“Tua dantak a tuh ngai maimah leh kilawm maw hehe?”

“Umang”

“Hawi”

“Umang. Umang hehe Umang”

“Na bang a zihzeh n’on chiamnuih bawl”

“Huaidan hilou Umang, na min samsam nuam kaka” chikawm in ka ang ah hong kingaisuk hi. Ke’n leng awl in ka ang ah ka pombelh a, a sam huih in a mutleng te khawng in ka mai ahon zepkha niapniap hi.

“Umang k’on ngailua, haksatna bangteng tuak mahle hang lungtup mual i suahma zaw haksatnate kizou sakkei ni aw....” Priya in aw nemtak leh chiang kilkel a ahon chihkawm in ka ang a kipan ahongdaktou keukau hi. Ke’n leng haksatna bangteng tung mahleh gin-om gige di ka hihdan genkawm in a muk nou ngiingei awl in ka tawpsak a, aman leng kipaktak in hon tawpthuk hi.

Singkung nuai a om ka hihman ua tua singkung a om zawng (monkey) te bang in hong en keukau uhi. Vasa leh ganhing tuamtuamte’n leng hon munuam leh hon kipahpih mah bang in ka zul uah ahong om litlit ua, ka pamlak deuh ua utong (peacock) ngial bang in houh ka thuchiamte uh hon kipahpihlua mah bang in akha ana zak deidai in etlawm mahmah hi.

Hichibang a hun zatkhawm a nopdan leh maban a tuate sang a nuamzaw nupa’ hinkhua palkhawm di chihte ka paikawm un ka houlim uhi. Mi hon muh leng poisalou in kituaktak leh kikhelahtak kawm in khut kilen tittet in ka pai uhi. Hon mu khempeuh in nopsakmel ahonsa mahmah ua, kouleng nuam ka sa him uhi. 

Sun a ka pawtna gimsim ka hi ding a, inn ka tung in ka ihmu kha vengveng hi. Ka khanloh a ka phone ka etleh lam-etlouhpi’n Lunching a kipan message ana om mawk a…

“Tulai vangna chia Umang”

“Vang ka maw? Hon message di chihsim chia le kingam mahmahlou le ahi a eive hehe?”

“Huh! Bangziak in eite na ngaplouh?”

“Denchia a hehthei khawng bang om mawk leh”

“A heh thei om di leh zaw kihou dahthakni. Denchia na kal uh subuaitu lel ka hikha ngut di. Bye!”

“Eh! Lun tua dan hilou, kei lampang hilou in nang lampang ah ahi ka chihzawk”

“Kei lampang ah bang a om mawk di. Khatveilai a ka gen thei nawnlou maw?

Hiai ahon chih aleh “Nang k’on neihkei dileh pasal dangle ka nei tuankei di” ahon chih ka lungsim ah hongsuak chet hi. Himahleh, a tangvalpa toh a kilimlak nate uh ka mit mahmah a mu a, ka phone mahmah ale kem ka hihman in a thugen in omzia nei ka sa kei a, hiai hun lemchang a la in ke’n leng....

“Lun, na gen zaw theilai mah ing himahleh na thugen ah gin-om taktak na hi chile’ng thudik mah ahi na chi lailai ngam diam?”

“Bangziak a thudik ahi chi a pangngamlou mawk di ka hia?”

“Pasal nei nailou mah na hihchia na thugen tuh tutan in dik tadihlai mah e. Himahleh, i zuih zohlouh dingpi genkhia-khia ihihkhak ding lauhuai ka sa”

“Umang, bang chidan e, bangthu zakha awi, na paudan nidang toh kibanglou in hongtuamna e?”

“Bangthu za chihzaw hituan kei ahihhang in Ulal toh la bang chikchia...? Hehe”

“Chizel aw! Hiai le ka nak zakmun e. Nang kia na hikei hiai hon chi”

“Midang inle ani di ngaklah lua uhia? Hehe”

“Umang, a poikei dileh sawtlou bek ka hon call diam?”

“Awle poi zenzenlou e”

Sawtlou chik nung in ka phone hongging a, Lunching ahih theihsa ahihman in ke’n leng ka la ngal hi.

“Hello... Lun”

“Umang, taktak in Ulal toh ka kal ua thu bangmah omlou ahi. Miteng in leng kingai di’n ahon koih uh. Ahitak in Ulal in zaw hon ngai mah e himahleh kei ka hitheikei, a ziak gen ngailou a na theihmai ka gingta”

“Limlak a na omdante khawng uh lah mit mahmah a kimu zel a....”

“Aman itna mit in hon en mahleh ke’n lawmta bang in ka en a, ka kithuahsek uhi. Itna hial petheikei mahle’ng kiliansaktak a mi va nawlkhin mawk hithei ka saklouhman ziak in tuambawl hetlou in ka kipolhpih a, aman nuam a sa diam chih theikei mahle’ng ke’ntuh nuam ka sa veve. Ka ‘doha’ maimai a ka kithuahpih ahi chih kampau kilawm hikei mahleh tuabang sim ahi hi. Lim bangle ka kilatham ua, tuate Ulal in fb khawng ah tampitak koih in tuate ziak mah in mite’n kingai ahonsa uhi. A tung in ke’n hichidan a limte fb a koih ahihlam ka theipah kei a, ka theih hunhun a ka gen leh aman leng theisiam vanglak ahi dia huai apat fb ah limte koih nawnlou hi. A omsate bel lakhe hial kei mahleh a thak a koihbehlam ka theikei”

“Lun na taktak ahihle tuh Ulal in na maban di naktak a honna dal chihna suak eivoi maw?”

“Ulal in ka maban di ahon dal kei, amah toh ka kitheihna naichik ahi. Ulal toh ka kitheihma ua mikhat’ tung a thupukna ka lak ahi ka maban di ahon dal! Himahleh, huailamthu gensawm ka hikei a, Ulal toh ka kal ua bangmah thu omlou ahihdan hon hilh ut lel ka hi. Hunsakni Umang, mangpha” chi’n aphone ahon koihsan hiau hi.

Call thak le’ng le la (hon dawng) dia ka gintaklouh ziak in ka call thak tuankei. Ulal toh kingailou taktak mah uhia chih dotna ka lungsim in ka kibawl a himahleh a dawnna di ka theituankei. Lunching in zaw hon im hiallou di hive aw chi’n a thugen dikmah hidi’n ka ngaihtuah alah Thathang in kimuangngam tak a kingai uh ahon chih lanlan laite khawng ngaihtuah in ka lung a buai petmah. A khenchia Thathang bang ka mohsaktha khawng ahongsuak mawkmawk hi. Ahihleh, Lunching hichituk a ngai a, mangngilh theilou di’n bang dia ka khen sese ahia??

Hiai nitak zaw Priya toh le kihou hoihlou in ka ihmu pah a himahleh ihmu kiplou theilou in ka khanglou thithe a, ak ihmu mah ka bang hi. Priya toh kingai hilele Lunching mangngilh theilou chihkhawng ka ngaihtuah chiang in ka omdan haihuai ka sa a, lungsim guk nei hetlou a itna tak toh hon it hi a ka theih Priya bang ka hehpihtha a suak hi. Ka om dan hoih sa hetkei mahle’ng hihtheih ka nei tawm mahmah. 

Hunte paizel in nikhat Priya in a inn uah a birthday lawm ding in hon chial hi. Ka kithalawp hetkei a himahleh va nial di ka utkei zel hi. A inkuan ua a omkimvek laitak uh ahihzawkmah ziak in, kei, meltuampi khat anu-le-pa’ muh in va kilak mawkle’ng muanmohlouh theihlouh suak di, huai a nu-le-pa’ ngaihdanlou khawng ahihkhak di lauhuai ka sa hi. Kei ngaihtuah theilou in Priya bel kilawp mahmah a, sunkhua in nitak chia a inn ua birthday party di thu ahon genpih nilouh a, lunglut ngellou in ka ngaikhia hi.

College kaitawp in Priya’ Birthday present di banghiam khat bek lei di’n ka pawtkhia a himahleh lei di ka theizou hetkei hi. Banghiam khat bek piaklouh di lah hithei sa mahmahlou sam ka hihman in ka vanpiak di ka ngaihtuah-tuah a, inn a ka Paite puandum liangbat piakmai hoih ka sak ziak in bazar a bangmah leilou in ka kik hi.

Ka hihtheihtawp a nalh a kichei nek sam in Priya’ birthday lawm di’n ka kuankhia hi. Bangtan hiam keikia a ka painung in Priya in honna dawn a, huchi’n amah toh kiton in a inn uah ka lut uhi. Anu-le-pa te leng ana om ngei ua himahleh Priya in a genkhitsa ahi diam ah lamdang bel honna sakmel lawmlawm khollou hi. Huan ah, Priya in keitel a a lawmngaih mibangzah hiam khawnglel chial ahihman in mi tamlou a, thupitak in leng hih zuazua hetlou uhi.

Birthday party ka zoh un ke’n leng sung dite maivil chihna le hituanlou in Priya’ nu-le-pa chibai buk in leh ka min, omna leh ka kipatna mun chihte gen in pulakna amai uah ka nei hi. Manipur a om Lamka a kipan ka hi ka chihleh Priya’ pa’n lamdang asak chi mahmah a, nidang a Lamka a Superintendent of Police (SP) dinmun sawtlou lenkha ahihdan hon gen zuingal hi. Huai a hon gentak in Priya in le “Eh! Lamka ei ngutmah ve a min mangngilh ka chihpen” chi’n nui selsal kawm in hon gen hi.

Priya’ pa toh ka kihoulim ua, tuate Priya tel in a suangkuante’n lungluttak in a na ngaikhia uhi.

“Mundang ah sawtpipi semkha zel mahle’ng Lamka ah bel kum kim le om manlou in hon suankhe pah uh” chi’n Priya’ pa’n athugen hon pan hi.

“Bangziak a tomna tel e” chi’n ke’n leng ka dongkikpah hi.

“Ke’n le ka theikei. Ka nnasep hoihziak chile’ng lah kei-le-kei kiphat mah ka bang dia. Lamka, Churachandpur District za-a-za (100%) Khristian kichihna ahi. Himahleh, a sung amite na gamtatdan uh lamdang ka sa. Sawt omkha hetlou himahle’ng hun tomchik ka om sunglel inle kithei mai hi. Khristian kichimahle uh chin na sahkhua un zuih dia dan a bawlte zui omlou mah na bang ua, nekgukna, diktatlouhna chihte khawng na sahkhua uh toh kihaw mahmah di hizennapi’n na pibawl mahmah mawk uh! Huan ah, lemna leh muanna chihkhawng bangle om ngellou a dia aw chih hun tomchik ka om sung a case tuamtuam omte a kipan kithei mai hi” chi’n ahon genkhe zungzung mawk a, lamdang chihdia lah ka zak patna leh theihpatna himawklou, a phuahtawm thil gen ahihlouhman in ka etna di lambang theilou in ka kun dide zozen hi

Ka lungsim ah aban hon gen beh nawn mahmah keileh hoih di hia ka chihsung in ahong pauzom lai a...

“Gam-le-nam it tam mahle uh chin gam puah sawm na om kei uh! Gam-le-nam vai khawng na genkhak chiang un na sousang pahpah ua himahleh kei theihna tan ah zaw gam it hizawlou in a gilou na hi zaw uhi! Lemna sang in buaina deihzaw na bang ua, gam-le-nam, mihinpihte’ sang in sum na itzaw uhi. A bulpat nasiam ua himahleh a tawplam chiang in sum in na kikhawng beizel uhi....” chihte im nei hetlou in ahon gen zungzung tamai hi.

A thugente a dik a himahleh va kup a, va gen somsom pen ei-le-ei kitawlawm banglel ahihman in kum selou in a thugente dai dide in ka ngaikhia hi. Hun tomchiksung lel ale ahon hichitheih sawt om himaizen leh i District uh bang ahon chimuhtel dia aw chihkhawng ka ngaihtuah hi. Athugen tawpna ah “Thilhoih deih hile uh chin kei bangle kum khat beek omkha sam di hi’ng a...!” ahon chihbeh lai zaw mah hi.

Priya’ pa thugente’n ahon kapkha thei mahmah a, va hehmawk dia lah zuau gen hi a ka theihlouh man in kei gen di a tawm mahmah hi. Ka hihtheih omsun tuh paulou hial a a thugente ngaihkhiat ahi lel. Priya’ mai leh a sungkuante’ mai ah ka zum mahmah a, a birthday a ka hohkhak bang ka kisik hial hi.

Birthday lawmzou ka pai in Priya in hon message pah a, a pa’ thugente hehna a lalou di leh amah bangle a guktak a kisuanglah mahmah ahihdante thute hon khak hi. Himahleh lampai (gari tuang) kawm ka hihman in awl a intung chia reply di’n ka koih hi. Kei mai a Priya’ pa’n a ahon gen sangmah a thupi zaw Priya kiang a gen dia, huan ah, ahon deihsaklouh lampang ahihzawkmah leh Priya’ lungkiat theih di dandan a gen zawmah di chihkhawng ka ngaihtuah chiang in ka hehgu velvul hi.

Priya kisuanlah luat khak di ka lauhman in apa hon chihnate poi salou ka hihdan inn ka tung in ka hilh hi. Himahleh aman bel a kisuanlah dan ahon gen tuantuan a ban ah kei paizohnung a apa’ thugente khawng ahon gen chiang in ka gintak dan bangngei a a pate’ deihsaklam hi khollou ka hihdan bangtan theihtheihna ka nei hi. Priya in bel huchidan lam himhim bangmah theihsiamna nei tadihlou ahihman in ke’n le bangmah ka gensau tuankei.

Nikhat college ah lawmte theihlouh kal in Priya toh kou gelkia college canteen ah ka tukhawm uhi. Nektheih tuamtuam khawng nekawm in class lalou zen in ka houlim ua...

“Priya ka khotang dinmun khawng uh na pa’n theichiang lua ahihchiang a kiteng di bang in om lele hon phal hetlou d’uh eive maw?”

“Bangziak in maw Umang? Na khotang uh toh kiteng di lah hilou ing a, nang toh kiteng di keivele...”

“Khotang i chihchia lehlamtak a a sung a teng a khosamite genna eivoi. Mi tuamtuam om khawm a, kipawlkhawmte’n khotang hon bawl uh ahi”

“Ka thei Umang, ka nu-le-pate’n bang chituk in hon dal le uh le ka lungtang sung a ka hon itna ahon dal theikei ding uh. Ban ah, ka gensa mah bang in i kal ah melma bangchituk in hat mahleh nang a di’n ka gin-om ding...”

“Priya na thugen a zaknuam in hon kipaksak mahmah hi. Keikia ka om chiang in tua na thugen zelte ka ngaihtuah a, ka lungsim guk ah kipahna alian mahmah hi. Himahleh, ka gensek bang in mel-le-puam kia le hilou, nek-le-dawn ban ah sahkhua natan kibanglou ihihman in na nu-le-pa’n chuh ahon hal ding uh theihsa ahi”

“Tutan in zaw huailampang ah bangmah ka tuak nai tadih kei. Maban ah zaw theikhang himahleh itna mah a thupipen in ka koih. Huaiziak mah in, i kibatlouhna na gen neuhneuhte zaw ka thupi ngaihvak kei – na neknek ka ne ding a, na sahkhua tuh kei sahkhua ahi ding a, na Pathian leng kei Pathian ahi ding. Huan ah, na tawndan ngei leng kei tawndan hong himailou di hia?”

“Huai tan tung di mah a bul pan tuh ihi. Himahleh, Priya kou paunak ah “Nu-le-pa thuman nahlohpek” kichi khat om eive”

“Nu-le-pa thuman a sia ka chi hetkei himahleh na damsung anuam leh haksa a hun na zatkhawmpih di’n nang deihtelna maw ahihkeileh na nu-le-pa’ deihtelna? Koipen zuih hoih nasa ale? Ahimhim in Umang hiailam thu khatvei kia na hon genna le ahi nawnkei, na hon genmun simtak ziak in khat veivei ka ngaihtuahna kikhek dekdek ahi”

“Priya hon theisiam in, huaidan hilou ahi. Tuisik na hih a kipan a itna tak toh hon kem a, hon khoiliantu na nu-le-pa kei ziak a na melma a suahkhak ding lau ka hi zaw”

“A hon it taktak ua leh ka melma a suak ngeikei diing uh! Ka nu-le-pa ahi ua ka maban diing zaw ahon ngaihtuahpih tham ding uh chih theihsa ahi himahleh keileng sia-le-pha thei khat ka hisamta...Umang na thugen dan zaw awlawl a hon nawlkhin bang hive chin aw... Ka hon itluat ziak in ka pau ngeikei a, hehna di mun ah leng ka hon hehsan ngamkei chihthu lel ahi...”

“Priya hon nawlkhin hilou ka hi. Ke’n leng ka hon it a, nang hon it sangmah in le kei hon itna lianzaw khamohlou di ahi. Himahleh nang a dia hoihzaw lampi ahihkhak leh chi a hon gengen kha mah ka hi zaw”

“Umang, itpen toh khovel tomchik damsung anuam hi’n haksa hitaleh thuakkhop kan a nuamzaw om lailai di hia khovel ah?”

Priya’ thugen dawngdia ka kisak laitak in pasal bangzah hiam honglut uhi. A mel uh ka et-leh khatvei park a ka hohlai ua hong subuaite ana hi ua, thil paidan diktuak ka saklouh ziak in paulou in ka pilvan theihtawp suah in ka om hi. Keisang a Priya in ana theitum baihzaw ahi ngei ding a, pawtkhe di’n hon zawn pah hi.

Ka nekman te uh pia in Priya ka zuikhe ngal hi. Kong a pawt dia ka kisak laitak in tua honglut pasalte lak a khat in hon tum dek ahihdan ka mitsik in ka mu hi. Tua mipa’n ahon tup toh kiton a ka na kilepzat leh kilepfuh kha sim ka hi ding a, kipuk hetlou in leilak ah ka dingtang kha zat hi. Hon tum tupa’n kongkhak tumkha in a khut bang vei longlong hial hi. A danglai a hip-hop ana kihaichilh khasim ahihman in kilep zatzat chihkhawng kihihthei sam a, tua hiai hun a ka kilep fuhkhak chet zawkmah ziak in langlamte’n kungfu siam dia hon ngaihtuah ahi d’uam ah a paungam om nawnlou uhi. Hiai hunlemtang a la in kei bang kimuangngam tak in ka ding fenfan zaw mah a, hong khoih teitei ua leh ana khoihkik tei di’n ka kisa hi.

Mi class laklai tak ahihziak in midang omlou a, tua ziak in amau leng hong khoih ngam om tuanlou hi. Midang tamdeuh om khawm hile uh tuh hon khoih ngam maithei uh. Ken lah amau naih tuanlou; amau lah kei hong naih ngam tuanlou ahihman un sawtlou nung in ka paisan hi.

Hiai lawmta te’n ahong sukbuai uh khatveina hi nawnlou ahihman in ka thang a pai a, Priya hehsan hikeimahle’ng kihehsak in Priya le houpih seselou in hat a hat in ka pai a, Priya makhelh in ka paisan hi. Priya in hon sam mahleh ka dawngkei a, phone ah hon call mah leh ka ka la kei. A hon message-te leng ka ngaihsak kei hi.

Huaini Priya ka houpih nawnlouh gentaklouh a ninawn in leng college ka kaikei kei. Nitak chia ahon call aleh houpihpan di chi’n sunkhua a Priya in ahon call leh message nate ka ngaihsak kei.

Sunkhua a vangkim a hon call louh chia message hon khak den himahleh nitak hun in Priya a kipan bangmah thuzak ding himhim omlou in hong dai zikzek mawk hi. Ka lung a himoh mahmah a himahleh a houpih a va pan khonung phing di ka utkei zel. Sun a ka ngaihsaklouh bang ka kisikthak mahmah hi. Ahon message nate bang ka simthak zihzeh a, sun a ka om dante athuaktu leh a lungkhampihtu in ka pang maimah hi.

Dak 10 tan in leng Priya a kipan bangmah thuzak ka nei kei. A whatsapp ka et chiang bang in ‘online’ kichi den zaw mah a huai in ahon lungkhamsak deuhdeuh hi. Online lou bek hileh ngaihdan khat om di hi a, tua online lah hon message hetlou! Nidang a hichi hunkhawng a ki-message kia lou VIDEO Call khawng bawl a, kua mah englou a hun zangkhawm sek hi ung ua chihkhawng ka lungsim ah hongsuak zungzung a, ka sana bang ka entuantuan zozen hi.

Lunching lah online lou nilouh, a online Priya in lah hon ngaihsak nawnlou chihkhawng ka ngaituah chiang in thuakhak ka sa mahmah a lah ka tuhgah mahmah at ka hihdan ka haihkei. Hun paisa tengteng ahihlouhtawp ale dakkal bangzah hiam bek samkik thei hile’ng chi’n ahitheilou di thil ngaihtuah in ka lunggim mahmah hi.

Priya a kipan a thuzak nei dia ka kigintak nawnlouh nung in Priya in ahon call zenzen a, kipaklua dawng pah dia ka kisak leh ka reject kha zaw mah hi. Himahleh vangneih huaitak in ahon call kiknawn pah vanglak a, ke’n le pilvangtak in ka la a...

“Hello...!”

“Hello Umang... Bang chi e tuni college n’ong kaikei a?”

“Bang chi khang, ka om a nuam kholkei a hi”

“Damlou maw? Gimlua maw? Tua koi a om?”

“Inn a om. Huchidan a damlou gimlua dan hilou ka hi”

“Aw ahoih vele... Om nuamlou na chihleh ka lung himohlaw man eivoi...Sunkhua a ka hon call leh message nate lah hon ngaihsaklou na hihchia, gimlua khat houh nei dia aw chisim ing a... Houh, zan a na kisual dekna uh gimlua na hi hia leh haha?”

“Gim mah kei dia, nang lah hon hut sawmlou na hihchia. Hiaite lawi in ahong sukbuai uh a khatveina hinawnlou, nou kitheikha ngei uh maw?”

“Kitheikha thou mah ung e... I kimuh nawnchia k’on gen di aw hoihtak in”

“I hichihchih di leh kimuh dile a ngaphuai nawn dia maw?”

“Ash! Umang nang huai hon chi zaw mah keive. Ei le kisuanglahlua hang a, hihtheihlah kineilou. Thu omdan hon gen di i chihsim lelah houpih butlouh a om zaw mah na hichia ka beidot dan aw.... Zanitak bang ihmulou, zan khovak a kap ka hi”

“Priya, hon ngaidam in aw ke’n leng ka om dan haihuai ka sa. Thil ngaihtuah detdetlou ka hehlung a ka om khakziak ahi, hehpihtak in hon ngaidam in aw...?”

“Hmm... Umang na man di leh zingchia college kailou in Park ah i va hoh diam...Na man dia aw?”

“Theilou, manlou chihle om khol dia hia...Koi park ah e?”

“Theilou, gamla deuh mi hon sukbuai louhna di deuh ah hehe Hoh di’n hong kisa in aw, keile k’ong kisa di....Umang, ka pa’n hon call hunsak maini aw...zingchia hong kisa le chin hon muang ka hi...Mangpha hoihtak” chin kei dawnna le ngaikhe man nawnlou in ahon hon mekmit san hi.

Priya toh ka kihou zoh uh sawtlou in Lunching in whatsapp ah hon message hi.

“Umang?”

“Yessss... Na hon text zenzen a kipahhuaina e”

“Nang lah hon text sawmlou na hihchia, nuamsa gawp tuh na hi peuhmah a...”

“Hon houpih gige di le n’on ningkhak di lau hang a”

“Chi deidai! Chik in k’on ning a e? Nang hi zawlou maw hon ning?”

“Ka hon ning kei. Lun, hehpihtak in hun paisate zaw paisa chimai in hoihtak leh thovengtak in kihouni. Ahoih hi’n hoilou hitaleh a paisa tuh paisa ahita a, bangmah hihtheih kinei nawnlou hi”

“Umang hon ngaidam in, kei ziak ngen ahi. Ke’n huailam ah ka kailut kha pahpah a ahi. Hon ngaidam in ka hon ngaihluat ziak ahi. Nang n’on phawk nawnlouh nung ale hon phawk teitei lai ka hihleh hon ngaidam in. Nang a dia ninghuai leh muhdah huai ka hihleleng hon ngaidam inla, singdang’ ang a na zal hang a kon itna beithei tuanlou a, nang a kipan a lam-et nei lailai ka hihleleng na hon ngaihdamna ka hon ngen”

“Lun, Pathian in eigel tuibang kigawm dia ahon siam ahihleh nikhatni chiah kituak veve diing i chi v’oi. Huan ah, nungak le neilou ka hi”

“Kikhem sese dahni. Nungak ka nei chilechin bang a siatna om ahia?”

“Ka neihlouh bang di’n ka nei ka chi dia?”

“Tusun in Vaite nungak khat in fb a na limlak leh status a ka hon comment-na te khawng hon ban like sak a, tua zoh in hon message hi. Ahon message kia hilou in nang toh na kilimlak khopna bang uh hon send a...”

“Bang hon gen a?”

“Huai tantan zaw k’on hilh poimoh ka sa kei. Aman leng thusia leh paukam kilawmlou in ahon houpih kei, kamsiam tak a hon houpih ahi”

“Na kihounate khawng uh screenshot inla hon khak himhim ve Lun”

“Nou kihounate le screenshot in na hon khak diam leh? Umang, hunsakphot mai ni aw, ka na ihmu di. Singdang palzaw liapal toh nunuam laitual na len zong un khat vei changchang bek hon thuzak zel sam in aw....Mangpha”

Lunching toh ka kihouzoh un facebook ah ka lut ngal a, facebook a ka lim leh status Lunching in ahon comment khaknate ka ban et hi. Lunching hon gen mahbang in Priya in tua Lunching comment hon nate ana ban like ngeingut hi. Lunching toh ka kihounate uh Priya in theilou hial ding himahleh huchidan a ana gamtat mawk lamdang ka sa a, Priya in ka kiang ah gen hetkei mahleh honna muangmoh mahmah ahihdan ka theikhia hi.

Priya in Lunching kia bangthu gen a peuhmah diam chih theihnuamna liantak ka nei a tua in ka lungsim ahon luah gegu hi. A khenchia Priya’ omdan bang ka hehtha lamlam a suak a, khenchia lah hichitel a ahonsui peihlai teng tuh hon ngai taktak lai ahi chi’n lungnop ka kipia hi. Itna i chihkhawng khat-le-khat kisuituah a, thikthu se simsim a i om pen itna dik hizaw hi. Thikthu siatna tellou itna tuh itna dik ana hikhollou maithei hi.

Zingkal khua hongvak a, Priya toh pawtkhawm di chi a thupukna ka bawlsa ahihman in college kai leng ka sawm kei. Zanitak a Lunching a kipan ka thuzakte ziak in Priya toh pawtkhop di bang a guktak in ka linsim a, Priya’ mel muh di nuam saklouhna khat ka nei mawk hi.

Dak 12 lak a kimu di ka chih uh himahleh Priya ahong zekailuat ziak in sawtpi ka ngak kha hi.

“N’on na ngaklah hia Umang?”

“Ngaklah tham! Hehe”

“Chitel hiaipa”

“Eimah voi. Numeite tuh min thudik a genkhum chia zadah mawk uh chin ua buaihuai aka”

“Bang chidan in eita?”

“Na melhoih lua i chihchia gingtalou uh, na melselua chi lelah heh a heh lelu d’uh”

“Haha. Tu zingkal tuh ka pa toh ka va pawt ua leh traffic jam nasalua nasa lua in chin sawtpi tang ung ua zekai ka hi uh. Ngaihsiam aw, maban ah zaw hun ka hon lap gige di hehe”

“Na pa hongpai zel maw?”

“A sepna vai a thilhih di khat om in chin zan a hongpai, zingchia kiknawn di ahi” chi’n ahon dawng a, thu tuamtuam khawng ka houlim kawm un ka hohna di lam uh zuan in ka pai uhi.

Bangtan hiam ka painung un mun thoveng leh nuam mahmah khat ah ka lut ua, tua ah nungak leh tangval hunnuam zang a kihel midang tampi leng a om uhi. Kisubuai chihte omlou in nuamsa tak in om chiat ua, amau’ ngaihzawngte chiat toh lungkim tuak mahmah uhi.

“Priya, hiai khawng ah om le hilou maw? Singlim nuai mah nuam hi, huih lah nung hiauhiau a...” “Eimahve, k’on gen dekchet leh n’on gen a” ahon chihkawm in ka zul ah Priya ahongtu hi.

“Priya, hiai park ah nungak leh tangval tampi a om khawm ua himahleh eigel kan a kituak di midang ka mukei”

“Umang, ke’n le hiai a pasalte khawng ka melh bawlbawl hang in nang kan a melhoih leh ngaihhuai di ka mukei”

“Hiai a pasal omte’n kei hon haza mah d’uh maw, hichitel a nungak melhoih khat toh omkhawm ka hihchia....”

“Huchidan in tuh kei le numeite’n ahon haza law kei di ua. Nang ahon muh ua pat a a tangvalte hoihsa nawnlou a khen bangle om dia gingta ke hehe. Nangzaw mun tuamtuam ale ka hon pawtpih tamlouh hoih hive aw denchia mindang khawng in hon tuh khak di lau ka hi hehe”

“Na ek! Uang kei dih le...” chi’n kipak leh lungkimtak in ka nuikhawm laihlaih ua, midang omte’n le amau omna munchiat uah kipak leh lungkim tuak mahmah chiat uhi.

“Umang, bang chi e na dakdak a nungak melhoih dang zong na maw? hehe”

“Nang kan a melhoih di midang ka mu kei, om leng a om kei di. Hong subuai zel di khawng a om kha hiam chi a dakdak ka hi hehe”

“Huchi gige samlou e Umang. Zanlam ate zaw hiailam hongtung mahmah lou di uh ahi”

“Nguttak. Zanlam a huai pasalte toh bang kichitheih khak uh e?”

“Ka kitheihna uh sawtpi hita eive”

“A sawt leh sawtlouh kon kan kei a, bang kichitheih khak uh e chih eivoi k’on kan” chi’n ka pautuh pah hi.

“Ana khawlve hon gen di keivoi leklawk hehe. Na hehlouh di aw?”

“Heh na di om hia?”

“Kei ngaihdan in zaw hehna di om hi’n ka theikei himahleh ngaihdan kibanglou ihihchia huaiziak a k’on chih ahi”

“Ka hehkei na di hon gen awle...”

“Tua hong subuaite lak a pasal khat (amin gen lengle amel uh na muh keileh theituanlou di na chia maw hehe) toh hun bangtan hiam ka na kingaikha ua himahleh ahon kop ziak in sawtsim paita in ka khen hi. Kikhen himahle ung ahon saipeih mahmah a, hun paisa a a omdante khawng kisik chi’n ngaihdam ahon ngen hi. Tua ahon ngaihdam ngetna ke’n leng ka ngaidam a himahleh itna huangsung a lutnawn di hial in amah ah muanngamna himhim ka nei nawnkei. Aman bel hon ngailai ahihdan hon gengen mahleh hithei nawnlou chi’n ka nawlkhin sek hi”

“Ka theisiam. Priya, ahimhim a hichitel a ahon saipeih a, kei nasan ahon huchih mawk leh tuh na kal ua banghiam khat omlai hilou di a maw? Huchilou hileh nang kineitusaktak a kei hong huchihna di thu omlou ahi”

“Ka chikhin voi Umang – aman ahon ngailai a himahleh ken ka ngainawnkei!”

“Chih leh tua le nou kihouhou lai uh maw?”

“A changchang in ahon message zel a, huaichiang in bel ke’n le ka reply zelsam hi”

“Ex na chih leh tuh ex himai, houpihpih louh di eivoi”

“Amau hon houpih chiang ua va houpihlouh belbul dile nuamlou abatna chiang khat om ahi Umang. Hon theisiam in maban ah zaw ka houpih nawn kei di”

“Na houpih nawnlouh di, anumber le delete inla, social media khawng ah le block aw” chi’n ka sal gaga hi.

“Umang zozen chin, huchihial dia le anuamlou khat om ahi”

“Nuamlou na chih atuh nang le mangngilh theilou, na kal ua banghiam khat om chihna eivoi”

“Omlou ka chi vele. Umang, huchidan a gen di’n tuh nang le facebook ah Lunching kichi khat toh na kihou den ve ua le. Na lim leh status teng alah hong comment zou den, nang lah kamsiam taktak a houpih zaw mah. Keibang n’on chi na a keisang a nang uang zaw di na hi”

“Kou chuh lawmta keive uai. Nou lawmta lah hilou uh chin ua”

“Lawmta e? Umang hon khem sese dahmai aw! Ka theithou himahleh ka paukei chihman thu ahi. Lunching na lawm ahi kei a, na ex ahi! I college uah noulam mi tampi om ahihdan thei inla, na kihounate uh theithou ka hi chihleng thei in. Himahleh, hiai facebook a na ki-comment nate uh zaw public ahihziak lel ahi a, mimal, kuamah midang theihpihlou in bangteng na gen di uam chih ka ngaingam kei!”

“Priya, huailam ah zaw muanmoh huailou hial ka hi uh”

“Kam in zaw utteng genthei mah e ban ah na pau uh theilou zaw mah ka hihman in ken zaw gen di ka theikei. Ken tuh den a na hon muanmoh pa toh ka kihouna tengteng uh leng na mitmuh in ka hon lakkhe ngam di. Nang Lunching toh na kihouna uh kei theihdia hon letkhe thei di mikhat’ mai ah na hon lakkhe ngam diam? Ahihkeileh den a na hon chih bang in Lunching block oh hon chile’ng bang ngaihdan na nei dia?” chi’n heh mahmah leh kidik seihseih kawm in Priya in hon chi hi.

Sawtlou nung in Priya mah in a thugen ahon sunzom lai a...

“Umang, ka hon itna na hon theihsiampih ka hon ngen. Na gen gige mah bang in pau-le-ham ban ah sahkhua leh tawndan kibanglou kia hilou in nam tuamtuak ihi a, tua ziak mah in haksatna ka na tuak tham hi. Ka lawm-le-vualte a kipan in leng ‘namdang toh kingai’ chi’n enghouna kammal ka za mun mahmah hi. Huan ah, ka nu-le-pa ngei in leng na chihsa mah bang in ahon hal uhi. Hichibang haksatna, mualphouna leh enghouna kampaute ka thuak di ka thei a, nang k’on it ziak a thuak mualsuah dia hong kipan hi. Himahleh, nang a dia ka gin-omna leh ka thuaknate a thawn mai ahihkhak ding ka lau”

“Priya, na thuakna leh na haksatnate tengteng k’on theihpih a, ka hon thuakpih petmah. Keiziak a hichibang haksatna na tuahte’n kei ah kipahna leh lungnopna hon pezaw hi. Na thuak leh haksat-gentheih natuahte hon kipahpih ka hi zenzenkei himahleh keiziak a hichibang haksatna tuak ngam khattoh itna guikhaubang zamkhawm ka hihman in i kal a itna tuh a mawk a a bei ka gintaklouh ziak ahi zaw. Priya, tuni a haksatna na tuahte nikhatni chiah kipahna hontun tu ding hi zaw ahi” chi’n ka dawng hi.

Ka kihou kawmkawm un ka dakkual zel a, ka omna mun uah midang, nungak-tangval daltu neilou a lungnuam leh kipaktak a omkhawm helhelte ka muh chiang in ka eng mahmah a, maute bang a omtei ka ut mahmah hi.

Park ah hun sawttak ka zatnung un inlam zuan di’n ka paikhe nawn uhi. Metro ah tuang in inlam ka zuan ua, metro a tuang mi a tam khollouh ziak in tutna ka tang vanglak uhi. Priya toh tukhawm tittet in a khut mam hinhian leh nou ngingei kiptak in ka letsak hi. Priya leng lungmuang kisa ahi ngei ding a ka liang ah a lu hon ngaisuk ngeihngaih in mitsi diaudiau zozen hi. Ka chihsek mahbang a mel-le-puam kibanglou, nam tuamtuak ka hihman un ahon mukha peuh in lamdang sak chimeltak in hon en hiaihuai geuh uhi.

Metro a saulou ka tainung un station khat ah Priya’ pa honglut guihmawk hi. Ngamkhat a kimutuah guih ka hihman un ka kiguih hial a, Priya leng ahong tutang zat zozen hi. Ka mai ua tutna ah Priya’ pa tu a, ut leh utlouh genlouh in ka kimaituah kha lelu uhi. Gen di a vangtel mai. A khenchia bang ka ki-entuah kha lelu zel uhi. Station khat ka tung nawntak un Priya’ pa’n paulou hial in Priya hong kaikhe guih in pawtkhiatpih vengveng hi. Bangmah genlou in a paina nung uh ka enzui vungvung a, midang ka tuanpihte bang in lamdangsa mahmah uhi. Mihon lak a zahlaktak a omkha ka hihman in dakkhe ngam nawnlou in nuailam en in ka kun dedu den hi.

Mi honmu khapeuh in ka omdan honthei di peuh a gingta in ka zak a ta mahmah, lampi ka paikawm in leng hoihtak in ka dakkhe ngamkei. Inn ka tun tan inleng ka om a lemthei mahmah kei a, Priya a kipan banghiam thuzak khatbek nei di’n kigingta mahle’ng ka lam-etna tengteng a tawn ahi hi. Priya toh ka kal ua itna pen mualsuah zou mahmahlou di houh ka di uah aw chihkhawng ka lungsim ah hongsuak a himahleh mihing’ dai kuaman kai zoulou chihdan a Priya in ahon it a ahon ngaih taktak leh ahitheilou bangmah omlou hive’n chi’n Priya’ thupukna dandan zui di’n ka kiman hi.

Nitak tan in leng Priya a kipan thuzak bangmah ka neikei a, kei ziak a thuak dite ka ngaihtuah chiang in ka hehpih petmah hi. Priya tungtang thu theinuam in call mahle’ng a phone switch off kiden a, ka message leng diliver lou hi. Ka lung a nuam hetkei a, kei ziak a vuak leh salh a om di Priya ka ngaihtuah chiang in a thuak di ka ngaingam kei.

A ninawn in Priya college hongkailou zaw mah hi. A lawmte kia a tungtang ka kan leleng amau leng bangmah thu theihtuak hetlou ua, phone tungtawn ale houpih theilou ahihdan uh hon gen uhi. Eilam dan a inn khawng a kipawt tuah zelzulte hilou ahihman un college kai tawpchia a inn uh va pha unla, thuchian hon hilh ua va chihmawk theih hilou hi. College kai mahle’ng ka lungsim college ah a om kei a, class la a ka tut hang in bangthu kigen a chih nasan leng ka theikei. Ka omdan bangkim tuh mang (dream) toh kibang in bangmah ka chiangkuang kei.

Ka thiltuah leh ka om dan tengteng ka zalmang himaihenla, hiai lunggimna zanmial a kipan khanglouta leng chih ka ut petmah hi. Final exam nang lah kal khat le om nawnlou, huchi kallak a hichibang lunggimna leh haksatna ka tuah uh poi ka sa petmah a, a diakdiak in Priya tung ah bang ka ka kisuanglah petmah hi.

Huchia lunngai vungvung a ka om laitak in lam-etlouhpi’n Lunching in ahon phone a, ke’n leng ka dawngpah hi.

”Umang, hehpihtak in hon theisiam mahmah maive...?”

“Bang chidan in maw Lun?”

“Ka hon mangngilh thei mahmah kei. Ni leh kha kidang mahleh nang kon it, kon ngaihna a kidang theikei. Hon mangngilh ka sawm nak zohkhop leh k’on ngaihna a lian deuhdeuh hi. Nithak-hunthakte’n ka hon itna a thaksak deuhdeuh ua, nang tellou in hiai khovel ah zaw ka hingzou kei diing...” ahon chimawk hi.

Lunching hon thugen a dawn didan theilou in ka om hiaihuai a, ka ngaihtuahna khawl mahbang hial in ka om dedu hi. Lunching hon houpihna dawng hetlou a om dedu den kha ka hihman in Lunching in “Hello! Umang, na za hia?” chi’n ahon kanthak a, huchi’n keile ka halh huai zozen hi.

“Lun, hon theisiam in, na hon itna hon nawlkhin ka hikei. Itna kichi a mantam dan ke’n leng ka thei a, a thuak hak dan leng ka thei. Na lungsim puakgik leh na om didan ka hon theihsiam pih himahleh Lun hon theisiam in, karnawn a exam panta di ka hi ua, huaisung hehpihtak in honna ngaklai hamham phot maive maw...” chi’n ka dawngthuk hi.

“Umang, hai n’on sak leleng honsa mai in hon haichilh mah ka hi. Zumna in leng ka ngai zou nawnkei a, ka zak leng a ta samkei. Zum leh zahlak ding ka lauhsang in ka hon itna lah a lian zaw ngal a...Umang, na chihbang in ka hon ngak ding, tukal kia lou ka damsung leng ka hon ngak diing” chi’n a phone ahon koihkhum hi.

Lunching in a phone ahon koihsan a kipan in Lunching leh Priya ka lungsim ah hong kisual nilouh zel hi. Priya in kei ahon it ziak a haksatna leh gentheihna a tuahte kitheih mohbawl a Lunching toh kithakpat ding maw ahihkeileh Lunching hon itna nawlkhin a gentheihna mah toh Lunching nengbelh diing? Ka om dan leh thupukna lak didan ka theizou kei a, ka thiltuah tuh lehlamtak ah vangsiat huai ka sa a, ka om dan ka kining petmah. Itna huangsung a mavang hetlou, mi vangtah tawpkhawk in ka kikoih hi.

Huchia lungbuai tak a ka om lai in ka facebook ah message khat honglut kauh a, ka et leh Priya ana himawk hi.

“Umang, na kiang ah gennop tampi ka nei a himahleh ka genkhin vek mankei di. Zanlam a i kimuh ninawn in ka pa’n a omna lam ahon paitouhpih a, tua kia hilou in ka phone leng ahon laksak zawmah hi. Ka tungtangthu hon hilh sawm mahle’ng hunlemchang ka muh theihzok louhziak in na theihsiamna leh ngaihdamna k’on ngen hi. Tu in ka pa’ posting na mun ah ka om a, kalnawn a exam di hita mahle hang ka pa’n kong paitouh ahon phalkei.

Umang, ka maban di ka ngaihtuah chiang in ka lung a kham a, bang chibang a hiai haksatna palsuah di ka hia chih ka theizou kei. Na hon gen mah bang in ka sungkuante’n nang toh i kingaih ahon theih ua kipan in nasatak in ahon dal ua himahleh paulam tuamtuam zang in ka kigenlem theizel sam hi. Ahihhang in zanlam a nang toh pawtkhawm, i pailam a metro sung a ka pa’n ahon muh a kipan in kigenveng zoh di vual ahi nawnkei a, kei utna leh deihtelna himhim omlou in ka pa’n ama’ omna lam ah hon pitou zawmah hi. Nang toh i kimuhlouhna di ahihpeuh leh exam lou kia hilou a, college kai ka khawlsan maile’ng ka sungkuante’n poi salou uhi.

Umang, ka hinkhua, ka puakgik leh ka om dan hon theihpih in, bang chi panlak ding ka hia? Damsung daih diing chi a itna k’on piaksa lah lakiik theivual ka hi nawnkei a, nang k’on it ziak a ka nu-le-pa ban ah ka sungkuante te ka melma ahih poisa kei mahle’ng ka hinna di tanhial a lauhuai thei thil ahihziak in thupukna bawl hak ka sa. Ka hinna it ka hi kei a, nang ka hon it ziak a hinna tan leng poi ka sa kei himahleh nang a di tan a leng lauhuaithei thil ahong hihkhak di lau ka hi zaw.

Tuisik ka hih a kipan a hon khoilian a, lungkham-mangbang leh gentheitak a ka om diing deihlou dia ka gintak ahon suangtu ka nu-le-pa hon bawldan lamdang ka sa a, hon it uhia ahihkeileh ka gentheih ding deih hi zaw uhia chih ka theizoukei. Ka nu-le-pa a kipan kampau ka zak tengteng zaw ka hon hilh ngamkei, tate tung a nu-le-pa’ kampau di’n a lamdanglua! Umang, bangziak a chi-le-nam a kideidanna ana om sese ahia? Bangziak a nam tuamtuak i na hihkhak sese??” chi’n Priya in ahon message a, Priya hon message ka sim kawmkawm in ka dip bang a kisai lutlut hial hi. Tua ka dip kisai lutlut te’n ka mittui ‘pump' pawt bangmai in ka mit a kipan khitui ka theihlouhkal in ahong pawt zungzung hi.

Itna! Itna! Itna kichizaw a lamdang tel mai. Kei ziak a Priya in gentheih-haksatna, enghouna leh a siamsinna nasan sukbuai sak a om chihte ka ngaihtuah chiang in thuak hak ka sa mahmah a, Priya thuakna zahzah in ke’n leng ka thuak veve hi. Itna lam a ka thiltuahte ka ngaihtuah chiang in vangtah huai ka sa a, ka hinkhua mahmah leng ka ning vungvung hial hi. Priya in zaw hon ngai taktak ahi chih ka thei himahleh maban ah kei ziak hichibang haksatna a tuahte mangngilh di zen in kipahna ka guanzou taktak diam? Priya ka it in ka ngai petmah himahleh kei ziak a hichibang gentheihna ahon tuah hial chiang in khahkhe zawle’ng maban ah ama a di’n leng kipahna ahi zaw diam chihkhawng ka lungsim ah hongsuak a, zing khawng chiang a ka thupukna bangbang Priya kiang a tangtak a genkhiat sukmai hoih ka sa zaw hi.

(Sutzop diing…)

© Siamsinna leh Vakiangbu