SIAN' LEMGEL ITNA - (Khen 1na apan 10na tan)

~ Lianzamang Tonsing @ ZM Tonsing

Exam zoh di ni ahihman in kithalawpna ngen in ka pumdim hi. Zinghal chiang a innlam pai di ka hihzawkmah ziak in huai in ka lungsim ah kipahna ahon guan diak a, kuamah theihpihlouh in keikia ka guknuih viaivuai zel hi. Huan ah, tuni a ka exam di uh bang ka subject tengteng lak ua nuam ka sak leh ka ngapthohpen ahihlai zawkmah ziak in exam di kal bang ka ngaklah a, ka khut a ka bulh sana bang ka en zihzeh kha hi.

Ka inluahna toh ka college uh kigamlalou, gari a lamzangtak a i tai leh minute 20 le kitailou, peih hile khe a le kipaitung zou di himahleh exam hun di minute 40 val in a saplai in ka kuankhia hi. Kithalawplua tuh ka hi peuhmah. Kuanbaih ka kisasim a lah khat veivei traffic khawng a buai chiang a sawtpipi kitai theizel ahihman in kivenna kawm chi'n poi ka sa lawmlawm kei. Bus ngakna mun ka tunma deuh in ka tuanna di bus khat hongtai ka galmuhpah a himahleh kuanbaih simthou ka hihman in a dang hongpai nawn ngak di chi'n tua bus hongtai pen ka delh sese kei hi.

Bus ngaknamun ah bus hongpai nawn ngak in ka ding hi. Sawtsimtak ka ngaknung in le bus hongpai kei a, himahleh lam-etna toh ka ngak veve hi. Bus hongpaina di lam en in ka mit ka vakkual sak zel a, a kallak in ka khut a ka bulh sana ka en zel hi. Ka mel a kipat kinohmel suakkhia ahi diam ah auto' pute bang in amau' auto a tuang di bang in hong zawn zihzeh uhi. Niteng a tua bus ka ngakna mun a bus ngak a ding gige ka hihman in auto' pute bang in hon meltheih zozen ua; ke'n leng tamkhop ka meltheih hial hi.

Bus ah tuang le'ng a thawn a ka tuanlouhtawp a le teng 10 kia seng di ing a, tu'n auto in tuang le'ng a tawmpen a 30 seng di ka hihman in ka sumsen di ka iai zel hi. Ka sana ka en zel a, minute 23 hiam kia in a samta. Ka lungsim a kinohgu mahmah mai a, den a bus hongpai masapen a ka tuan khaklouh bang ka kisik petmah.

Ka college uh naichik himahleh khe a pai di hial ahihchiang in a kholum banah a nisat toh kipeih mahmahlou hi. Nitak khawng bek hilehtuh khe a pai bangle poi kisa lawmlawm khollou di hi a, sun a tuh khe a pai kipeih mahmahlou ahi pen mai. Ka sana ka et nawn leh minute 10 kia in a samta! Gari in paita mawng le’ng le a zekai khin ka hita hi. Ahi a, ka bus ngak hongpai nai tuanlou. Ka thang a pai a, ka heh lamlam bang a suak zozen hi. Kei hehsan lam thei hile uh le bangmah a phattuamna om mahmah lou di ahihlailai in a theihlouh un bus pute nasatak in ka hehsan zaw mah hi. Bus hongpai om lele tuang nawnlou himhim di chi'n bus-te lawi ka 'boycott' a, auto a tuang di'n thupukna ka la hi.

Denlam a ka gei a auto pu te'n auto a tuang dia ahong zotzot lai ua kisatheitak a ka nawlkhinsa tua tuang dia va dawpthakphing di chihkhawng ka ngaihtuah chiang in ka zum khemkhem hi. Huaiziak in a khanglam a auto te a tuang di'n khe in ka paisuk latlat a, ka ngaihtuah kik chiang bang in hiaihuai bang ka sa a, ka nuih lamlam bang a suak zozen hi. Auto pute khat kiang a ka dawp leh 50 bei di ahon chi chat a, chikmah a hiai kal 50 seng a tuangkha ngeilou ka hihman in ka ut kei.

Ka paina di mun a theihchianglouh ziak hi'nte chi’n hoihtak in genchiang thak mahle’ng 50 mah ahon chihsan veve hi. Zekaita, kinohna ngen a pumdim ka hihman in ka hehtha peuh a suak mawkmawk hi. Paisan dia ka kisak hialtak in 40 tan a di’n hon kiam a, himahleh ka ut kei. Huaizoh, 30 a di'n ahon kiam nawn a, 30 ngen a kipai sek himahleh honna khembawl chitchiat ziak a thangpai vilvel ka hihman in ka uttuan kei a, auto dang ah 30 di mah in ka va tuang hi.

Ka sana ka etleh minute 15 phial bang in ka zekai khinta hi. College ka tun chiang a tuh dakkal kimkhat phial bang a zekaita di ka hihman in ka kinohgu petmah a, auto a le tulem theilou in ka taw khawngpeuh a zau maimah hi. Auto pupa kiang a hat deuh a tai di'n ka noh thithe a himahleh ka thugen za hia zalou, ahon ngaihsak vak kei.

College ka tung a, gate a lut dia ka kisak aleh ka I-Card paw khalou ka hihlam ka theikhe phing hi. Maizen! Zingkal a zaw manzou ngial hi ing a, tu'n lah ka khonung mankei phing a! Ka I-Card tawikha kei mahle'ng admit card tawi veve ka hihman in huai kilak leh hon lutsak thou na inte chi'n gate keeper pa kiang ah ka va lak hi. Lam-et banglou tak in ana khauh viau a, I-Card mah honna ngen teitei in, huai omlou a lut phallou bikbek ahihdan gitlouh mel deuh in honna genkhum loiloi hi. Ka I-Card la di'n va kikthak le'ng zekai law petmahta di ka hihman in ka lung a buai petmah.

Tuni bus a ginatlouh ziakmah le ahi dia kei louleng midang a zekai tam in a tam vanglak a, lehlamtak ah a dandan a om vanglak hi. Hitamahleh, ka I-Card la dia inn lam ka va kiik hialna dia hunsawt lalaw di ahih ziak in ka lung a buai veve hi. Lungbuai tak a gate a ka din lai in lawmte khat college sung a om ka galmuh hi. Ka phone la khia in ka call a, a I-Card exit gate lam a hongpe ding in ka ngen hi. Exit gate a sawtlou ka ngaknung in aman leng thumangtak in hongpia a, gate keeper pa'n bang hon enkawi vungvung zozen hi. 

Entry gate ah lawmpa I-Card lak in huchi'n nuamtak in ka lutthei ziau hi. I-Card hoihtak a check chih omlou, a mel i dawksak himhim nak aleh hun ahihman in buaina om selou hi. College huangsung ka lut a, exam teng a tutna mun kikhek gige ahihman in ka tutna di mun zong in buai in ka buainawn sursur mai hi. Ka kilawpni pen tuh ka buai nipen suak ahihman in ka lai theihna teng bang manggai hileh kilawm hialkhop in ka khuak sa vutvut hial in ka thei.

Exam hall sung ah ka lut a, zekai gawpta ka hihman in khenkhat, a tungbaihte'n bang paper khawng ana lakbeh hialta uhi. Hilele ke'n ka tutna mun di muloulai! Zum pipi in ka tutna mun di ka zongkual a, Vaite mi et ut dan lah theihsa, tua miteng a kim nung a kei tutna di zong a ka vial vak tuh ka kiheina lamlam ah hon en duamduam mai ua, muhnop suah mah ka bang hial hi.

Lungbuai leh zum sim a ka dak vial lai in last third line, bang lam nawl ah mun-awng kiluahlou khat ka galmuh hi. Kei tutna di hi mahmah inte chi’n ka va en a, ka lam-et bang ngei in ka roll no. ana kigelh hi. Ka tutpih di numei ahi a, a laigelh awlmohtuak mahmah hi. Midangte’n laigelh khawl zen a honna et heuhou hang un tua minu’n tuh exam hall sung a lut ka hihlam leng a theih melkei. Dotna paite nuamsa ngial hi’n teh gelh in a gelh zungzung mai hi.

“Excuse me” chi’a kisuanglah pipi a ka gen leh tomchik khawlzual in ka paina di ahon awn hi. Ka mel ahon etlouh ziak in ka melhoihna mukhalou tuh ahi mai ve! Dakkal kimkhat bang a zekai khinta ka hihman in zoh manlouh khak ding ka lausim mahmah hi. 

Thumna ka neihzoh a gelh dia ka kisak leh ka pen ana om kei zaw mah hi. Ka lungsim in ka gei a nu’n zaw pawthuah kha di hive’n chisim mahle’ng a laigelh a awlmohtuak luat ziak in ka ngen ngamkei. Lu khuat vuaivuai kawm a ka saukhau ka sawksawk hang in bangmah a om tuankei a, inn a ka pen koihna bang ka mitkha ah ahong kilang dundun zozen hi. Mangbang leh lungbuai tak a ka zul a nu ka etlaitak in aman le hon enphei guih a, ki-entuah kha in ka mit bang a tai gual hial hi.

Poimoh khat nei ka hihlam honthei ahi ding a, ‘Pen?’ ahon chigaih hi. Ke’n leng pautam hetlou leh nuisim kawm in ‘Hmm’ ka chi lel hi. Huchi’n ama pen khat hon zangsak in a laigelh mah buaipihpen in neipah hi. Laisiam mahmah khat tuh ah peuhmah di, gelh di ngaihtuah zel chih le om selou in gelh in a gelh zutzut maimah hi. Laisiamle hipouh ke’nte, hiai Vaite mawngmawng a theih uh toh theihlouh uh toh ban a ban gelh zungzung mah uhi peuh ka lungsim in ka chi khemkhem hi.

Ke’n le gelh dekpan ka kichih leh ka pen zat atui hong bei pah mawk a, kisuanglah mahmah kawm in ka pen zat a tui bei ahihdan ka hilhgu phei siausiau hi. Aman leng pen dang pawthuah nawnlou ahihdan hon gen mahleh hon awlmoh ahi ding a, midang a hon khelhsak in nui siusiau kawm in ahon pia hi.

A muk pan sim dildel, san lawlou leh neel chi mahmahte kal ah a ha (teeth) poudan dik leh kilawm, ngou silselte ahong dawk a, hun tomchik sung kimuzual himahleh a etnuam in a chidamhuai mahmah hi. Lai ka gelh kawmkawm in a vangkim in ka va enkha veu a himahleh aman bel ahon en kei. A biang ah a kuak tiuhteuh, biangsum kichi om a, a mit liansim kilkel leh a mitmul sau, del finfente bul ah vom lawlaw lou dia kinuh eybrower zol sipsip hi. A kallak a a sam hong kaikhete a bil tung a a huitouh chihlouh thildang buaipih manlou hi.

Bangtan hiam nung a extra paper ngen a ka dintouh zat leh lamdang sak chimeltak in hon en lolop a, hon nuihsan cheuh kawm in a laigelh mah sunzom nawn hi. Ka khutmal ahoihlouh kia hilou a, gol a gol zawmah ahihman a paper zanghek ka hi lel hi. Ahi a, extra paper ngen zihzeh ka hihman in a hon theiloute’n tuh laisiam honsa maithei.

Ka tutpihnu a laigelhna dangtak zozen ahi ngei ding a, tui hong kihawm tak in ana ngenpah somsom in a tuidawn bang ahon thalh zaw mah hi. Ke’n le awlmohlua kisa in ka romol bang ka pepah leklak kha hi. Ka romol zang dia kisa man himahleh kisuanglah thak ahi diam ah, ahong tawpkik leulou guih hi.

Laigelh kawm himahle’ng ka theihlouh kal in ka va enkha veu. Ka laigelh lamlam sang in leng amah et ka lunglut zaw a, ka lungsim leng aman a luahzaw hi. Ka exam-na ua dotna te ah tua minu melhoihdan gelh dia hong kisawl hilehtuh tam ka gelhkhe ngot di. Hichi zaw deuh leh chihna di himhim a om kei. Vaite himahleh a nak (nose) a saukei a, a kui ngiaunguau sam kei. A vom liakluak kei a, a keu seusou kei. A tom bekbuk kei a, a thau em-um kei. A lianlua ahihlouh hang in a neulua le ahi sam kei. Ngou kilhkelh in a siangthou mahmah a, ka muhna chiangchiang tuh ‘hichi zaw deuh leh’ chihna di himhim ka theikei. Table tung a dinsak a, kalkhat khawng bang hoihtak a study bawl di hileleng reject na di himhim a om ka gingta kei.

Hun bangtan hiam nung in midangte’n ahon paisan zungzung ua, minu’n le a answer paper-te ava submit tei hi. Hon paisan dia kisa ahihman in a guk in ka khelah petmah a, khawl zeklai in va chih mawk theih hilou ahihman in a paina lamlam ka en dundun mai hi. Ka pen zatlai bang piak ka sawm mawk a himahleh laigelh lai ka hihman in ahon laksak kei a, ahon nuihsan lel hi. Kei ahihleh ka tung hak man in mi nung ah a siamlua mah bang in ka gelh nilouh lai hi.

School ka kai nung a exam hun a lai sawt ka gelh nipen ahi di, hun tawptan ka gelh hi. Ahon theilou khenkhat te’n laisiam dan in ahon ngaihtuah di ua, khenkhat leuleu in bel a theihlouh luat ziak ahi hon chi d’uh chih khawng ka ngaihtuah khemkhem hi. Khovotlai himahleh ka lungsim kinohluat ziak in pum in ka pumsat hehu a, khovot lam himhim leng ka phawkkha kei.

Exam zou, room mai a tuisiang dawn di kikoih ka dawn hi. Nitaklam a exam ka hihman un exam ka zoh un ni tumta a, khual bel mial dek nailou hi. Innlam a paipah di chi’a exit gate lam a ka paileh den a exam hall a ka tutpihnu tel in numei thum ding ka galmuh hi. Ka mu ut alah hoihtak in ka en ngamkei. Ka zumtha bang ahongsuak mawkmawk a, paiphei di bang ka lingu mahmah mawk hi. Kei et bangbang a amau leng hon en di khawng bang un ka ngaihtuah mawkmawk a, huai in ahon zumsak deuhdeuh hi.

Pawtna di gate bul a ding ahihman un a kiang ua pailouh theihlouh suak hi. A guk in zumsim mahle’ng zumlou leh kipasal sak deuh in gate lam ka naih lanlan hi. Minu’ lawmte ahoihlouh ziak ua amah hoih a kimu hia, ahihkeileh amah ahoihluat ziak a alawmte hoihlou a kimu hizaw hia ka thei zoukei, a lawmdangte bel a hoih himhim a om kei uh! Aha khawng uh kia a ngou fekfok a, a taksa uh vom sim biibiai in a sam uh kil lenglung in khauhtuak mahmah hi. A nalh theitawp dia kichei zaw ahi samna di ua, jean khekol kigak huntawk teng tehtah mahle uh nalh ka sa thei himhim kei! Ahi a, a lawm dangte banglou tak in tua minu zaw melhoih mah ahi. A kicheidan toh le a kituak a, a lawm dangte bangloutak in a sam leng neel tuak mahmah hinhian hi. Siamtu’n a siamna tengteng suah a a bawl hi di’n ka gingta.

A kiang uh ka tun a houpih hetlouh di ka chih himahleh “Na hihfuh hia?” chi’n aman honna houpih mawk hi. Lamdang ka sa a, ka bil san tuaituai in ka lung bang am zou hial in ka thei. Dawn di dan theipahlou in ka chil bang ka thalh kha zozen hi. Ahon nuihsan ua, ka zumtha a suak deuhdeuh. Ahon thildot lamlam le phawkkha nawnlou in ka sakhau a pen om pe ding in ka kisa ngal hi.

“Hiai pen piakkik ngailou ahi”

“Hilou nang a k’on khelh ahihchia k’on piakkik ngai ahi. Ke’n le honpua ka kisak leh kong kuan a hon sumang malam kha ing a..”

“Kei a n’on khelh pen a tui n’on sukbei sak voi! Haha. Hiai pen midang a ahi, nang tangsuak mai in amau paikhinta ahi uh”

“Kipahhuai e. Hilele anuam sam, nang kem in la zingchiang hiam, na kimuhlem hunhun un a na pe maive maw, thil mantam hikei mahleh kisuanlah huai ka sa…exam hun sungteng n’on zatsak uh leng kipaklua ka hi”

“Huchia na kisuanlah leh zingchia nang na pe maike”

“Ke’n a mel le ka theihtup nawnlouh pi hehe.. Huaichia ke’n tuni a exam zou ka hi, zingchia pat khawl ta di” ka chih leh lamdang sak chimeltak in hon en heihawi a, a mel putdan bang kilamdang hial in ka thei.

Sawtlou nung in ahon dawngzom nawn a…

“Chihpah mawk eive… enghuai tuamna chia exam zou chih himhim”

“Pah ahi mawk dia maw, sawt lawta vele exam i patna uh. Nou le zohpah na ut ua leh kei subject lakte la le uh chin zou pahpah mai di hehe…”

“Semester nawn a pat nang subject te a kihei thak di hi leh haha”

“Ngaklah huaina tel e leh… Nou lah bangchikchia zou di e?”

“Kou karnawn a subject khat neilai ka hi uh” chi a ahon dawn sung in a lawmte midang bangzah hiam ahong pai ua, paingal dia a zot ziak un ahon paisan uhi. Ka kihouna uh lakloh ka sa sim a lah kihouzom hile ung leng bang thu gen di ka hi ua chih ka theituan kei.

Saulou a tung nung un a lawmte mikhat hong kik in na min n’on hilh thei diam hong chi mawk hi.

Lamdang sakna ngen in ka pumdim a, lehlamtak ah ka lungsimguk a nui hiuhiau hi.

“Hilh thei tham e. Ka min Mang ahi. Nang min lah na hon hilh thei diam?”

“Mang maw?. Kei min Priya ahi” a chih kawm in ka min a khutsung ah pen in gelh kauhkauh hi.

“Bangziak e ka min bang n’ong dongthak zozen a?”

“Hehe bangziak hituan kei, a theinuam himhim a hi’nte”

“A theinuam himhim a hinte chihmawk, kua’n maw a theihnuam?”

“Ka theinuam himhim ua hi ka chihna” chi’n nui selsal kawm in hon paisan hi.

A hon paisan nung in ka lungsim ah “A theinuam himhim a hi’n teh” chihkia a ging nilouh hi. Den a ka tutpihnu’n ahon sawl ahi ngeingei di chi’n a khenchiang in a hoihlam ka kipia hi. Ahi a, denlam a sawtsim kihou, kimaingal sim zozen ung ua, ka min theinuam hileh amah hong kik in ka min hongkan zaw lou di a maw? Ka phone no. le hon ngen vet leh hoih di hive’n!

“Priya” chih in ka lungsim a luah a himahleh ka theihnuampen’ min ahihlouh ziak in kipahna taktak ahon pe tuankei. A lawmta ua a min uh ana bankan kha khemkhem le’ng hoih di hi a. Min maingaltak a ka min hong khonung kan ngam leh bangziak a ke’n maingaltak a ana houpihlou ka tel a!? Kei leh kei ka kimohsa a; a khen leh hoihlam kipia in a khenleh a selam ka kipia a, kei-le-kei kimohsa in ka lungsim a kisual nilouh hi.

Bang louteng ngaihtuah a ka paipai leh ka inluahna ka tung mawk a, bus a tuanglou a khe a pai nilouh ka hihlam ka theikhia hi. Sawtpai ka hihlam leng ka theikei a, gim leng ka gim samkei. Ka lungsim ah exam kizou nailou hileh hoih di hia chihkhawng ahong suak mawkmawk hi. Itna le ka chihpah zozen kei, numei in zaw thil ahihthei ngial aka maw. Numeite’n pasal’ lungtang a huchih zoh tuk ua pasalte’n le numei’ lungtang kizou thou sam hi’nte maw…? Numei melhoih etnuam a kisak mah bang in numeite’n le pasal melhoih etnuam ana sathou di uh hi a maw chihkhawng ka ngaihtuah kawm in ka nitak mehhuan di allu ka met tauhtauh hi.

Nidang a facebook leh whatsapp a thu mantheihlouh teng gen a chiakchiak pa’n tuh tunitak zet in social media-te ka koihkhia a, sun a ka hun zatdante leh exam hall a ka tutpihnu toh ngaihtuahna khovel a hunzatkhawm ka tel zaw. “Priya” kichi exam hall a ka tutpihnu’ min hikei mahleh ama’ min didan in ka suangtuah a, ngaihnatna ka nei mawk hi.

Exam hall sung a a humsam kaikhiate a khut nou ngiingei a a huitouh lai khawng ka mitkha ah hong kilang dundun a, a sam bek hile’ng ka chi hial hi. Pen neilou a lungbuaitak a ka om lai a ka poimoh thei hileh kilawmtak a ama’ pen ahon piak gaih theihmawk bang pil ka sa mahmah hi. A hon nuihsan cheuhchauh kawm a a biangsum kuak teihtaih khawng ka mitkha ah hong kilang dundun a, gate bul a ka kihou lai ua a aw suakte bang ka bilkha ah ahong gingging mai hi.

Hun paisate ngaihtuah a suangtuahna khovel maimai toh om himahle’ng kua mah ka engkei. Kei khomtek in ka kipak mahmah hi. Nuam ka sa a, tuni tuh hiai khovel a ka hunnuam penpente lak a khat dan in ka koih. Kei ngaihtuah dandan a aman le honna ngaihtuah a, suangtuahna khovel a honna lenglutpih sam di bang in ka ngaihtuah hi. Himahleh, bangchik chiang a kimu kha nawn di ka hi ua, ka damsung in ka mukha lai diam chihkhawng ka ngaihtuah chiang in ka dip a hawm a, ka ngaihtuahna a beidong petmah.

Ani nawn in amah muh-ut man khawng in college zul ah hih di neile hiloupi’n ka va kivialleh deuhzut hi. Himahleh muhkhak di’n a om kei. Kei mahmah in leng ka va muhkhak ka kinem kei him hi. Zingchiang a innlam paita di ka hihman in bazar khawng ka va vak tei a himahleh lei dia hoih ka muhgeihlouh ziak in bangmah leilou in ka kik hi.

Innlam pai di chi’n kipaksim mahle’ng lehlamtak ah ka lingu sim velvul hi. College le kikhawl sese kei henla kikaisuak maileh chihkhawng ka lungsim ah a om a, college kai thanuamlua hi awmtak in college huangsung khawng bang ka mitkha ah hong kilang dundun hi. Ahitak a gen in zaw exam lai a ka tutpih, Priya’ lawmnu ka muh ut ziak ahi zaw hi. Hichibang a melhoih ka college ua om ahihlam abul tung apat ana theipah himaizen le’ng zaw ka attendance hoih ngial di hiven! Tua lah ‘undertaking’ bawl kia hilou, sum ‘find’ zen a exam kipethei hamham.

A ninawn zingkhua hong vak a, innlam ka pai hun di ahihman in zingkal baihtak in airport lam ka zuan hi. Lampi kathuam ah taxi ka ngak a, hiai hun in khua vak nailou hi. Ka taxi lak pen in ka omna mun chet ahon naihtheih pahlouh ziak in sawtsimtak ka ngak a, phone a ka omna uh ki-entuah in buai in ka buai nilouh uhi. Gari taituah a tamlouh hang in phalbi zingkal baihtak, tuimei sah mahmah ahihziak in mun gamla kimubanlou a, gari hattai ngamhuailou ahihman in awlawl in ka tai uhi. Hiai hun a tuh zekai khollou ka hihziak in ka kinoh lawmlawm kei.

Zingkal dak 5:15 a lengkhe di himahle ung tuimei sahluat ziak in ka leenna uh dakkal khat mawngmawng zekai sak in om hi. Hoihtak a kituam lenglung chimahle’ng lum ka sa zou mahmah kei a ka liing keuhkeuh zozen hi. Ka khut khawng gaw velvul in ka omna ngal ah ka om kenkon mai hi. Nitak ihmu manlou sim toh kibang ka hihman in votsim mahleh ka ihmut peuh a suak a himahleh lawm neilou ka hihman in ihmut ngam mawk di ahikei.

Keikia chimtak in airport ah votsa leh liing keuhkeuh kawm in ka om a, ka phone ka khoih tauhtauh hi. Mi ihmut san laitak ahihman in facebook leh whatsapp leng dai zikzek a, houpih ding om tuanlou hi. Facebook leh whatsapp a mi kihouna tuamtuamte khawng ban et-et in a khenchia keikia om himahle’ng ka nui viaivuai zel a, a gal a honna mu gu hiam ahihkeileh airhostess te hial ahihkei leleng cabin crew-te khawng bang in honna melhgu nilouh bang hile uh tuh mihai khawng honsa a, lungke dimdem hial di un ka gingta!

Huchia hih di pi lua omlou a ka phone ka thaithaina lam ah nidang a ‘Lungtup mualsuahpih dia sim leitung mi zatam lai ah deih chibang ka tel’ chi a itna simthu khaubang ka na sutkhoppih Lunching ka phone mai ah hong kilang dengdang hi. Nidang in le facebook khawng ah mukha zel seksam mahle’ng ka va ngaihsak lawmlawm kei a himahleh tua tuh ka chimluat ziak ahi diam ah a profile picture, a timeline leh a facebook sung ka vel theihna chiteng ka banvel hi.

Damsung loubang tulkhawm di chi a Lunching toh tong ana chiam himahle ung ka kikhennung uh kum 2 bang pha di ahita! Ka kikhennung uh hoihtak in kihou kha ngei kholkei mahle ung photo leh status chihkhawng ka ki-like sak khial kholkei uhi. Ka first love ahih kia hilou a High School kailai pek a kipan ana kithuah leh itna pak huan sung a kum 3 bang ana khosa khawm ka hihziak un ka mangngilh theikei a, tua a profile picture-te leh facebook a a sulnung khawng ka muh in ka lungsim a thaksak mahmah mai hi.

Lunching mi melsia ahi kei. Mi sapan, ngou kilhkilh, din sang lawlou, kamsiam leh paunuam mahmah ahi. Nuih toh pau thuah in ngaihbang huai mahmah hi. Ahi a, lehlamtak ah tanu khat neihsun leh innsung khosatheitak a khangkhia ahihziak in khat veivei mi dinmun theisiamlou dekdek a dia aw ka chihhun om hi. Huan ah, a nu-le-pa a dia ta khat neihsun, tanu hawmthoh ahihziak in a khasiat leh a lungkham diing phallou uh ahi ngei ding, a duh a deih teng leisak leh a ut bangbang in om sak uh a, ‘hakai pahtak lungvei’ i chih toh kibang hi. Hiai chet ahi ka kal uh a buaina leng.

A itlou ka hikei a, a ngailou leng ka hisam kei himahleh hiai khovel thilhoihlou a ana kibual khak ziak a lungkia a ka khen mah ahi hi. A khentu kei ka hi a, a pawna leh a thuaktu leng kei mah ka hi. Ka itna tengteng ka na piaksa, ka lungkham-mangbat hun a ka taina, ka kikuppih, lawm bang a ka kipolhpih kia hilou a itna huangsung a kum 3 bang ka khosak nung ua kikhen tuh haksa ka sa petmah. Ama’n leng haksa sa ahi ngei ding a, nang toh ka kiteng kei di leh midang leng ka neituan kei di ahon chi hial hi. A thugen tunitan lenkip ahi diam ah, huai toh a kingai uh chihthu leng ka za kei a, a facebook khawng ah leng a om dan a kipan in ngaihzawng neihtuaklou mah hi. 

Huchi’a Lunching toh ka hunluite uh ngaihtuah a lunglengtak a ka om lai in ka lenkhiat uh ahong hun hi. Lenna sung a lut in ka tutna di ah ka va tupah phenphan hi. Lungmuang lua ka diam ah lenna sung ka lutzoh sawtlou in ka ihmu zui ngal a, ka khanloh in Guwahati ka tung maimah uhi. 

Sawtlou Guwahati ah ka khawlnung un ka lengkhe nawn uhi. Ka gil a kial sim a himahleh leenna sung a nektheih a limlouh theihluat ziak in bangmah nek sawmlou in Imphal tun ka ngak hi. Tawlet (window) bul lam a tu ka hihman in huihkhua a kipan in leitung ka ensuk a, sunma hilai ahihman in mun khenkhat ah tuimei kai thithiai khawng kimu thei hi. A kallak ah mual-le-tang hing dipdipte kimu a, tuate kal ah luiluang dimdim khawng kimuthei a, kuamah theihlouh kal in ka lunglenggu mahmah taget hi.

Guwahati leh Imphal kal bel kinaichik ahihman in lengsang pan i kichih leh lengniam ngal in Imphal kitungngal hi. Ka gil a kial petmah a, ann hial ahihkei leleng tamneem sakthei di banghiam khat nek ut mahle’ng meitei pau ka siamlouh ziak in ka ngamkei. Inn tungpah di kihita na chi’n kei-le-kei kihehnem in inn lam ka zuanpah hi.

Inn lam zuan in bus ah ka kisawitou noknok ua, a bus in hon thazohlua hia ahihkeileh lampi hoihlouh ziak hia alang-alang ah hon sawi noknok hi. Ka gilkial ziak ahi diam ah chikmah a gari kham ngeilou himahle’ng ka khampian nenaw zawmah mawk a, ka halhzou mahmah kei. Imphal leh Lamka kikal bang gamla ka sa petmah.

A tawp in Lamka ka tungkhong sam ua, heisuk-heitouh a eipau kiza kiaukiaute’n hon khamuan in hon lungnuamsak mahmah hi. Ana om gige te’n bel bangmah in ngai kholkei mahle uh, mundang, ei pau a kizak mengmeng louhna khawng a i om khiat hial leh imi-isate ngaihna uang mahmah hi.

Khakhat kan le om manlou di ka hihman in ka am petmah a, ka hih masak di le ka theikei. Huanah, zing leh nitak a bangmeh va lei get di a dia aw chi a buailou phot ka hihman in huai mahmah leng nuam diak hi.

December kha ahihman in programme tuamtuam atam petmah a, alanglang ah pawtna di om-om mai hi. Khokhal huih nung vuvu te’n leivui mutkhu lunglung ahihman in i pawtkhiat zekchiang in leivui in kipumdim a, chipum teng gentaklouh kamsung natan ngiat lukluk maimah hi. Zingkal leh nitak khawng chiang in vot mahleh sun hun in bel lum mahmah zel hi.

Nikhat Vengnuam a moulop di a om ziak in zingkal baihtak in social work di’n ka kuansuk hi. Amun ka tung in mi ana tam naikei a, a om sunsunte’n inn kong ah mei-awi in khotang thu leh gamsung thu khawng houlim tiptip uhi. Kei leng insung alut masa seselou in tua mei-awite lak ah ka va tel a, a houlimnate khawng uh ka va ngai hi. Bangtan hiam nung in inn sung a kipan numei khat a hong nui ging kolkol mawk a, a nuihging ka zakngei banglua ahihman in kua hi ding hiam chi’n ka lungsim ka taituah sak dandan a, a mi bel ka va en tuan sese kei.

Nnasep ka hon pan ua, tutnate lem leh parachute khawng ka khai zoh un sa sem lamte a manzoh nailouh ziak un ka va huh hi. Sasem/sabawl chihkhawng ka lit mahmahte lak a khat ahi a, kei kia nek di bang hiletuh sabawl sang a ngawl mai leng poi salou khat himahle’ng mi lak a utlou leh hihtheilou va chih kilawm ka saklouh man in ka va tel hamham hi.

Siamlou sasa leh lin pipi a ka va sem puihpuih leh ka ki-at kha zaw mah hi. Ka khutpi liansimtak ka at bal diatduat a, a si tampi pawt in a nat lambang kitheilou lehlam zozen hi. “Lunching bandage hon tawi inla hon paizual dih le” chi’n Pathang hong kikou a, denlam a a nuihging ka zakngei chi a ka ngaihtuah nilouhpen ka theichiangta. “Ki-atkha om uh maw? Insung ah honglut mai ou hiai ah damdawi khawng nuh in tuam zaw ni...Na hahpan lua ua ahi di e, pilvangtak in awlawl in hon sem uai” chi’n insung a kipan Lunching hongpau khe kalkal hi.

Keileng ka khut keh tuam diing in insung ah ka lut ngal a, Lunching in hon muh tak in lamdang sak chi meltak in hon en heihawi hi. Ke’n tuh Lunching ahihlam theikhinsa ka hihman in a lamdang luatna di ka theikei a, himahleh kum 2 lam bang ka kimuhlouh nung ua ka kimuhkhak patna uh ahihman in ka hamhaih sim melmul hi.

“Kaaaaa! Umang nang lah na hi mawk a! Bang chik a hongtung oi?” ahon chihkawm in ka khut ahon tuamsak hi. A hon houpihna na ka dawn ma in “Lin pipi a na va sem leh ki-atkha hi zaw mah di hi chin a maw, poi tak ahi sasem na litlit maizen toh maw” chi’n maingal tak leh nui lahlah kawm in ahon chih behlai hi.

“Sa sem ka lit lam na thei a maw?”

“Thei mahke. Sa sem sang in a ngawl le ka ut zaw khawng na chi sek vele”

“Haha thei hoihna tel chia. Hilele tua chu sasem nuam sak a sa ta ka hi”

“Zuau lua! Lin pipi a na va sem leh ki-atkha neizaw ve. Thil khawng i thadah hihluat chia kihihsual nuam ahi”

“Zuau mawk di hia. Hun hongpai zel di ah sa zuak khawng a nek zong di le kihi maithei eivele” ka chihkawm in Lunching in a khut nou ngingei leh nel thiamthiam a ka khut a si neng bangte ahon nulkhiat sak ka en a, damdawi hon nuhsak in hon tuamsak hi.

“Bangchik a hongtung na chimai?”

“Sawtsimta eive k’ong tunna maw”

“Huchidi’n na vang ngei, tu’n lah kon mupan tel a, chilelah...” chi’n a dang gen beh di nei hileh kilawmtak in hong tawp letlut hi.

“Chilelah chihmawk bang eita?”

“Bang hikei ka zuau hi. Bang chikchia kiknawn di e?

“Zuau khawng mawk gengenlouh di, meidil ticket ahihkha aw hehe. Zingchia kik nawn di hita?”

“Chihpah mawk e’n tua hon kimu kha pan a. Kisathei gawp hivechin aw maw mundang a na va om leh?”

“Kisaktheihna di le om tuankei, nang a kisatheilou le tua hon kimukha pan thou hive’n” ka chihlaitak in ka Ukim honglut a, “Nou gel le kitheihtuakna zel uh chia?” hong chi gaih hi. “Kithei chih ningniang a kimangngilh deklam ka hita uh” chi’n meinei deuh in Lunching in ka Ukim dawngthuk ngal hi.

Lunching in ka khut ahon tuamsak kawm in hoihtak in ka en a, ka kingaihlai sang ua amel bangle hoihzaw in ka thei. Ka kingaihlai ua sana ka piak leng bunlai mahleh mel et in bel lui mahmahta hi. Inkuan khosatheitak ahihman un a thak leinuam hileh leizou mahmah di chihkhawng ka ngaihtuah chiang in huai in ka lungsim ahon sukha mahmah a himahleh huai tungtang va gen mawk na dan om a ka theihlouhman in ka gen se kei. Kihouhou mahle ung a guktak in zahtakna khat ka nei a, gen di bang khat veivei ka maimoh simsim hi.

“Chidaihle Lun hiai ah nana om kha zenzen a bang chi kitanau uh e?”

“Zenzen kisatuah dan i vele maw hehe. Ke’n le nang zenzen honsalua ka hi. Tua hiaite maw ka pute eive. A pa uh ka nu’ sanggam ahi. Tua zi nei dekpen ka Puthang eive” chi’a theihsiam huaitak a hon dawng tiautiau zoh in “Nou la bang kichi tanau uh e?” chi’n hon kan zuingal hi.

“Kou tuh a phung/bulpi lam a kitanau chihdan le hilou, tua den a hong houpih Ukim, nang a dia na Nukim pen ka u pa’ zi ahi. Ka sungh te eivoi haha” chi’n nui nalhnalh kawm in ka dawng a...

“Sun chia le om den didan neivele maw” ch’n ka dong nawn hi.

“Hi. Om det di le hinalou di hia. Nang la om denlou di maw?”

“Om den kholkei ning. Nitaklam ann nek di hun khawng chia hongpai di a diam ah, kiduhgawl lel hiven hehe”

“Chi khemkhem sun chia le hongpai aw kithuah kei dia. Nang chihdantak leh sungh te’n mou neidek a na hohkei tel in haha”

“Ka hoh a ka ki-atkha zozen voi”

“Sun chiang eivele ka chih... Huaichiah na sungh te ahihle tuh tanu, mehhuan a na pang zawk mah di eivoi haha. Taktak in sun chia le hongpai ve, lawm di omlou a nuamlou eive... Biakinn lam alah kihohmanlou di ahihchia...”

“Hmm en le maw k’ong pai sawm mai kei dia” chi a ka kihou zoh un Lunching in nnasemte singpi pe ding in hon paikhiatsan hi.

Lunching a paunop ngei in a paunuam a, a kamsiam danleng a kilamdang tuankei. Lunching toh hunzatkhawm tuh nuamtak ahi. Singpi hawm a a va paina khawng bang ka enzui dundun a, a guk in a gamtatdan teng khawng ka en kual nilouh hi.

Ka khut sukehkha, kituam lenglung ahihman in sa semzom thei di ka batnawnlouh ziak in inn lam a paimai ka sawm hi. Intekte kiang a pai dia ka gen zoh in Lunching kiang ah leng ka pai di lam ka va hilh hi. Sun chiang a n’ongpai teitei di ahi hon chihkawm in annek lim ahon khak a, huchi’n ka kikhen uhi.

Inlam a ka paitouh kawm in Lunching toh nidang a ka hunzat dante khawng uh ka ngaihtuah a, hunlui mualliamsate tuh ka lungsim ah ahong thak mahmah mai hi. Lunching ka first love ahi a, kikhen mahle ung ka lungsim ah mun lianpi luah veve hi. Tu zingkal a kimaituah a ka kihou zawkmah ua leh ahon dendan a tuam a, ka lungsim ah mun lianzaw leh thukzaw ahon luahbehlai hi.

Tua ka moulop deknate uh toh Lunchingte kitanau ahihlam uh ka theikei a, Lunching ana om di’n le ka gingta kei himhim hi. Inlam ka om sung a Lunching khatvei bek muhkhak kilam-en mahle’ng kal 3 bang ka om nung ale mukhalou ka hihman in mukha di’n ka kigingta nawnkei a, tuzingkal a ka muhguih mawk leh lamdang bang ka sa zozen hi. Ahi a, lehlamtak a ka kipak a, damleh tuni mah a kimukha nawn didan a om ka hihman un a guktak in ka kipak mahmah hi.

Sun a le va hohmai bang ka ut a himahleh ama hon zotziak a va hoh zozen di le nuam ka sa kei. Huan ah, a diklel a gen in itna huangsung a a lutpihtu kei ka hi a, a taisan leng keimah; a lungtang kipaksak leh suna tu leng keimah ka hihziak in a mel muh di bangle ka kisiamtan theikei hi. Aman bel ahon tuam bawl kei a, nidang a itna huangsung a ka lutma ua lawmta bang a ka kithuahlai mah bang un ahon pawl a, a kamsiam leh a nuihmaite leng ka mai ah a mansuah tuankei. A hon bawldan a kipan in mipil leh lungsim pichingtak nei ahihdan ka theikhe deuhdeuh a, ka ngaihnatna leh ka itna a lian deuhdeuh hi. Midang khenkhat hileh kisathei leh kiliansaktak in om ding uh a, ahon bawldan tuam mahmah kha ding hi.

Sun a hohlou in nitaklam annek di hunkuan in ka paisukpan hi. Theih toh theilouh toh mipi ana tamsim mahmah mai a, huailak ah Lunching ka zonbawl hang in ka muzou kei. Tuanvaite panpih a pang dia ka gintak ziak in meh/ann hawmte lak khawng ka enkual zel a, himahleh amah didan ka mukha himhim kei hi. Lamdang sakna leh lunghimohna in ahon tuam a, damlouh guihna khat khawng nei houh hia le chi’n kei Zeldim thubawl in ka lungbuai mahmah hi.

Mi kiang a va kan mawk di lah ka utkei zel a, a guk in innsung khawng leh mun tuamtuam ka zon theihna teng ka banzon kual hi. Huaitan in leng Lunching ka mu tuankei. Ka lung a nuamtheikei a, kan mawkna di thei tuanlou ka hihman in ka Ukim kiang ah “Lunching koi a om a, zingkal a sunchia thilkhat k’on tawi di achih khat om hi a, tu’n la ka mukha nawn hetkei a” chi’n zuau khat phuaktawm in ka kan hi. “Nguttak! Zingkal a hongkuan a huainung ke’n le mukha nawn hetlou ka hi. Bang chi a ngei ngut dia aw?” chi’n aman le a tungtang theihtuak hetlou zaw mah hi.

“Ana khawl dih k’on kan bawl di” bek honchi di ka sak leh hon chihtuak hetkei a, ama buai in buai maimah hi. Ke’n lah theinuam tenten, hon kansak dih va chih guigui dilah nuamsalou zel ka hihman in ka buaigu mahmah hi. Mi a tam ziak a mukhalou chih dia lah den mahmah a ka Ukim in sun a pat mukhalou chikhinphet a. Mi tam ziak a mukhalou chi a kikhem lungdam zohvual hilou hi. Sun a pai hile’ngle amah omlou, kei kia theih ngeilouh lak a chimzen a va om nilouh didan keivele maizen chi’n sun a ka hohkhaklouh bang kipahhuai lehlam ka sa hi.

Tuzingkal a lam-etlouh leh kigingkhawl hetlou a ka kimuhguih ziak ua alou theilou a kihoupih maimai lel hi didan keive ua. Tua tuh kei om di theita, ahon muhpeihlouh ziak a hongpai nawnlou hi’n te. Zingkal a maitai leh kamsiamtak a ahon houpihnate khawng zaw mihai ahihlouhdan a chianna lel hi, alou theilou a kihoukhak dia a om ziak a hon houpih lel hi’nte. Mi’n hon mupeihlou tuh bang di’n ke’n ka zongzong dia chi’n kei-le-kei ka kihehnem a, ka kihehsuah sim zozen hi. Ahi a, kei leng Lunching’ dinmun a ding hile’ng ka hoh ka gingta tuankei. Kei bang Lunching hile’ng zingkal ale houpihlou zaw mah maithei chi’n Lunching’ dinmun leh om didan bang ka ngaihtuah sak hi.

Ann duh ngelloupi’n ka ne namnam a, ka gilvah in le ka ne zoukei. Ka awm a bing ep-awp a ka mit bang mial hiaihuai in ka thei hi. Ka om a lemthei hetkei. Ann nezou pai dia ka kisak leh ka Ukim in honsam a, Lunching’ tungtang hon gen dia ka gintakziak in kithalawptak in a kianglam ka naihpah hi.

“Pai naike’n la, denlamchia mou pina lam ah va zui in, van khawng tuahpih di om maithei ahi” chi’n lam-etlouh lamtak hon gendaih hi. “A chihleh Lunching koi a om eita?” chihguih di’n hoih ka sa mahmah a himahleh ka thugen uh toh kizawitawn loulua ahihman in ka gen hialkei. “Awle...sak ah dawr khawng ka va phatou himhim di” chi’n ka paitou veve hi.

Dawr phadia paitou, saulou ka painung in Lunching leh pasal khat hong kizuisuk latlat uhi. Ka mupah a, himahleh et-hak ka sa mahmah mawk hi. Amau bel ahon muhtuak kei uh. Lehkiik zozen na dan lah omlou, mundang a petkhiat na di lampi lah om mawklou ahihman in kituak kha thouthou di ka bang uhi. A hongpaisuk zel ua, kei leng lamnawl a lehdin in phone a mitoh kihou dandan a om in ka mai ka selbawl hi.

Ka kiang ahong tun un “Paitou dek hita maw Umang?” chi’n Lunching in ahon houpih hi. “Paitou nailou deuh di, denchia moupina lam a hohngai di chi ua, sak khawng ah ka va vakkhe tou zual di huaima” chi’n ka dawng hi. “A hoihve nana paitou khinman dia aw chih lausim hi ing a, hong kiksukpah in aw. En bang ann le kinenailou ahi” chikawm in ahon paisan ua, keileng dawr lamzuan in ka paitou hi.

Nitaklam ankam limna di va hihcheuh a get d’uh maw, a ngeingei mah zaw hilai eive maw ka chi lungsim hi. Mi’n hontheile uh na kamsiam, na melhoihnate khawng bangmah a le mu nawnlou d’uh eive. Pasal a di’n ahoih ka chihna hikei mahleh numei hial zu dawn zaw kilawm lah lawdeuh eive, ke’n ngawlta di k’on sa a chi’n Lunching zaklouh di’n ka lungsim in ka chi hi.

Dawr phazou ka kiksuk a, moupi ding in ka kuan ngal uhi. Mou lamte mi neizoutak ahi ua, mou vanken thupi mahmah mai hi. Tua amou vanken kia maile’ng maban ah a pasalte’ insung a kiletsakpih natham ahi hi. I hichitel na mah ua tuh dan a kiteng chihkhawng a neizoulou deuhte a dia hihngam huai hetlou di mah eive chihkhawng ka lungsim ah hong suak dundun hi.

Mou pizou pai dia ka kisakleh Lunching in amau’ inn a khathou malam di’n hon ngen a, ka kilawp lampangtak ahihman in ka nial sekei. Lunching’ nu-le-pa bel hongpai naikei ua, kou gelkia a inn uah ka om uhi. Zingkal a kinel huntawk thou himahle ung tua, kou gelkia ka om hialtak un gen di a tam lawmlawm hetkei a, chil valhging nasan kiza thei di hialkhop a ka daih dide hun uh leng om in, a kallak in ka ki-entuah kha luakluak zel uhi.

Ei a pasal pen va paulouh belbul nadan omlou ahihman in gen di khawng ka ngaihtuah dedu zel a, ka genkhiat sunsunte leng aban ka gennawn di ka ngaihtuahna lam in ahon dawnna bang ka zakha kei zel hi. Ka kihouna uh a lamzang thei himhim kei. Ahi a, Lunching toh om khawm ka hihman in nuam ka sa veve a, himahleh gen di maimohlua a ka om hial chiang in nuam salou leh kisuanlahna ngen in ka pumdim zel hi.

“Lun, na sana le sawt neina chia” chih gen di theihlouhluat man in ka chikha laizang hi.

“Sawtsa maw? Ke’n lah sawt ka sa mahmah kei a. Hithei henla, sapkik theih hileh hiai sana n’on piaklai ka samkik nuamlua Umang...” chi’n ahong nehnou pianpah mawk hi.

Hiai sana a bulh zingkal a ka khut ahon tuamsaklai pek a kipan ka muhsa ahi a, hiai tungtang genkhaklouh himhim ka sawm himahleh gen di ka beidot luat ziak a gintaklouhpi a genkha mawk ka hihi. Ahon dawnna in ka gen di a beisak deuhdeuh zaw mah hi.

Paulou a ka daih dide sung in amah ahong pau nawn a...

“A battery le bei nailou eive! Ahitak in sana zaw ka ngaina kei, tulai diakdiak bang a hun etna ding in phone khawng le om vek a, sana zatna di tam vaklou hi. Himahleh, hiai pen nang a kipan ka ngah tunitan a muhtheih omsun ahihman a ngaina diak leh deihthohtak a ka bulh ahi” ahon chi hi.

Lunching mah in ahon genzom lai a....

“A mel et in zaw luita mah e, den a ka gen bang a sana deih himhim a bulh hile’ng hiai pentak zaw ka bun nawn hetkei di himahleh hiai sana khenlam a gen neitak thil ahihziak a deihthohtak a ka bulh ahi zaw. Nang a di’n zaw muhdah huai leng ahi maithei himahleh ke’n tuh a siat matan ka bun ding a, ka bun den diing. Umang, mit a muhtheih a sethei thil i kipiakte leng se nailou eive... A setheilou - damsung daih diing chi a lungsim tawng a pan muhtheihlouh thil i kipiak lah bang chi maimah a....” chi’n Lunching khasetak in ahong kidiik hithit tamai hi.

Kawiphet chot a, k’on taisan nawnkei di chi kawm a a mit a khitui takkhe zungzungte nulsiang leh a muk san tiuteu, nou ngingei tawp chenchen di’n hoih ka sa hi. Ahi a, a hong khasiat deuhdeuh khak di ka lauhman in “Hon ngaidam in Lun, kei ziak ngen ahi” chihtan lel in ka dawngthei hi. Kei mahmah leng pasal zoulou tuh ka hi pen mai.

“Ngaihdam n’on ngetna di san a om kei Umang. Kei ziak ahi zaw. Kei thulimlouh ziak ngen ahi” chi’n kidik seihseih kawm in ahon dawng a, huchihlai in gate hong ging in a nute ahong pai uhi. Lunching in leng a nute theih di lau ahi dia, a annhuan inn lam uah lut in bangbang hiam sem dan in va om a, a mit a khitui pak niuniaute ahon nulsiang zoh in kou omna lam ah hongpai nawn hi.

Lunching’ nu a paunop ziak in gen di hau in ka houlimtui mahmah ua, ka houlimnate uh Lunching in dai dide in ana ngaikhia hi. Lunching’ pa ahihleh news sim in tutna sau tung ah tu a, ka houlimnate uh za hia zalou chih ka theikei, a news sim awlmohlua ahi zaw diam ah kamkhat mah leng honkumlou in dai dide hi.

Nitak bangle sawtsimta ban ah zingchia ka omna lam a kiiknawn di ka hihziak in sawtpi om hitheilou suak ahihman in pai ka sawm hi. Lunching in gate tan hongkha a, ka paikhiat a ‘Mangpha’ ka kichihlouh ngal uh kamkhat leng ka pau kei uh.

Inn ka tun in ka vanpuak di khenkhat bag ah ka guang a, huchiloute zingkal a awl a guan dia sit in lupna tung ka kidenna ngal hi. Zingkal a Lunching toh ka kithuahzual dante uh leh nitak a khasetak a ahong om dante khawng ka ngaihtuah a, ka om a lemthei mahmah kei.

Lunching a kipan a message honglut di peuhkhawng a gingta in ka phone ka en zel a, himahleh Lunching in ka phone number nei hia neilou chih ka theikei. Nei di’n leng ka gingta kei. Ke’n bel ama number nei mahle’ng ka kihoulouhna uh a sawtluat ziak in a number zanglai mah hia chih ka thei tuankei zawmah.

A number ka neihpen a a whatsapp ka et leh a last seen leh DP (Display Picture) bangmah a kimuhlouh ziak in zangnawnlou hi di’n ka gingta hi. Ahi a, kei number aman a neihlouhziak a tuate kimutheilou hi’nte peuh ka chi zel a, call thoh hial dia lah utlou zel ka hihman in ka lung a buai petmah hi.

A number a zatlai aleh a lut dia, a zatnawnkei lelah a lutkei dia himai chi’n “Lun, tunitak k’on khase saklua a hehpihtak in hon ngaidam ve maw...” chihteng ka khak hi. Himahleh ka message a deliver louh nilouh ziak in a number zang nawnlou mah hi di’n ka gingta a, facebook a lah online lou, a houpihna di dang theituanlou ka hihman in lungnuamloupi’n ihmut mai ka sawm hi.

Ihmut sawm in kikhim bawlbawl mahle’ng ahithei mahmah kei. Ka mitte si mahle’ng ka lungsim a hak gegu a, ka taksa lupna tung ah lum mahleh ka ngaihtuahna in munchih-mualchih a dengsuak hi. Lupna tung ah ka kileklek mai a, ihmut naksang in ka halh deuhdeuh maimah hi. Thildang ka ngaihtuah hang in Lunching ka mitkha ah hong kilang dundun zel a, ihmu thei mawk di ka bangkei. A kallak in ka phone ka en zel a, Lunching ka message pen deliver nai tuanlou hi.

Ihmu theilou chi a ka kileklek lai a ihmu kha khongsam ka hi ding a, bangtan hiam zoh in ka khanglou guih hi. Ka phone ka et leh zinglam dak 2:13 ana ging a, ak khawng bang ahong khuang ngawlngawl mawk hi. Ka whatsapp ka et leh Lunching a kipan in message bangzah hiam ana om a, thu kipahhuai di’n gingta kei mahle’ng a message ka muhkik maimai leng ka kipak himhim hi. A message sim utlua himahle’ng a thugelhte ka en ngamkei a, a message sim ka kithalawpna zahzah inka lin ngoihngoih hi. Ka mit bang nuaichiang masa zozen in Lunching in ahon message-te ka ban simsuk a…

“Itna tung a thuneihna nei hile’ng tunitak in na mai ah, na mit mahmah a na muh di’n ka mittui ka nulkei hial ding. Kei thil hihtheihna khenlampek a kipan ahihziak ahi zaw”

“Deihlou a n’on taihsansa ahihman in ka mittuite’n nang ah gen bangmah a neih ka gingta kei a, huai dia hong pawtleng ahisam kei himahleh ka lungtang tawng a ka puakgikte mittui a hong pawt ahi zaw a, kei utthu a ka pawtsak leng hilou hi. Ka mittuite pawtlou di’n ka hihtheihtawp suah in ka kham a himahleh ka khamzou kei. Tua mittuite nang a dia kihhuai leh kei a ding mahmah ale vuallelh huai ahi chih ka theitham hi. Nang ngaihdam n’on ngetna di san om in ka theikei a, ahon ngailou pi n’on ngaihna dia mittui toh na itna hon ngen bangmai ka hihman in ka kisuanglah petmah a, na hon ngaihdamna ke’n k’on ngen zaw”

“Hon paisan ding na hi a, i kihoutawpna le himaithei ahihman in k’on gen lai mai di aw, hehpihtak in honna simsuaksak hamham ve maw...Itna huangsuang a i lutma pek a kipan a lawmta bang a ana kipawl ihi chih nang leng na theitham hi. Ka om dan bangkim ahoih hi’n hoihlouh hileh na thei tham a, niteng a ka hunzatpih ka nu-le-pa sangmah in le ka hinkhua na hon theizaw hi. Hichituk a hontheitai dimdem khat in itna huangsuang a khosa khawm dia hon ngettuh ke’n leng nialvual ka sa kei a, tua ziak mah in lawmta khenlam a khosa khawm dia na hon chialna kipaktak in ka na sang hi. Ka hoihlouhna teng na theihnung a lawmta khenlam a itna huangsung a hon lutpih na hi chile’ng khial di’n ka kigingta kei. A dikmah ahi. Himahleh, hun hongpai zel ah ka hoihlouhnate nang a dia thilthak bangmai ahongsuak a, hoihna himhim neilou mihing bangmai in ka hoihna om sun leng na mitmuh in bangmahlou ahong hi maimah hi. Hichitel a haksa hinkhua pal di ka hihlam ana thei hile’ng itna simthu na hon lelni a na tong naubang ana sanglou mah di hive’ng...! Tu’n zaw itna kia mai hilou in i lawmta kal nasan a kitan a, thilteng bangmahlou a suak vekta; i lawmta kal bek humbit theih hileh chih ka ut mahmah. Ahi a, hiai tungtang ah a thuaktu nang hilou a kei ka na hihkhak hamphat huai ka sa lai, hiai bang hinkhua, lungtang kitamkham zaw nang tuah di’n ka phal mahmah kei...!”

Lunching in ka phone number save ta ahi ding a, a display picture leh last seen khawng le chiangtak in kimutheita hi. A hon message na ka dawn kikma in a last seen ka en a, dak 1:03 AM ahi hi. Huan ah, a DP ah leng ka kingaihlai ua ka piak sana, a khut a a bulhlai lim zang hi. Huaiteng ka et zoh in a status update ka en nawn a, hichi’n kigelh hi – 

“Itna zaw kipahna ahikei – Kipak kawm a lungkhamna, nui kawm a kahna, gingta kawm a ginlelhna, lam-en kawm a bei dotna, lungkhamna hontun tu lel ahi” chih leh “Mi kua hiam in bang chituk a hon it ahia chih na theihma in pawng it law pah ke’n, tuni a na itna zahzah tuh zingchia na thuakna di hikha thei ahi” chihte kigelh hi. 

A hon message nate kia hilou in a status update-te khawng kei ahon chihna ngen dan in ka ngaihtuah a, kisiamtanna di himhim neilou in ka kimohsa petmah. Bang dia a tawptan ka tunpihlouh di kiang a itna thu va gen kha sese ka hia? Lunching dik mah, a hoihlouhna tengteng ka theihnung a itna thu gen mah ka hi, ahihleh tua bang dia a hoihlouhnate ka itna daltu a pangzel ahia? Kimohsakna ngen in ka pumdim a, ahon message nate dawnkik didan bang ka theikei zozen hi.

“Lun, hichitel a genthei hinkhua honpalsaktu kei ka hi, hon ngaidam mahmah in. Ke’n le’ng ka hon it in ka hon ngai petmah a himahleh na kiang a itna thu hon genkik di ka chih chiang in zulhzau huai leh lungsim mumal huailou ka sa a, ka kisuanglah in ka zum zel hi. Ahi a, hon genkik hita mawng le’ng le hichitel a k’on suk gentheih nung in zaw na hehpihna ka tan ka gingta nawnkei. Ke’n leng haksa ka sa a, ka thuak petmah. Nang sang a le haksa sa zaw ka hi chile’ng na gingta tuankei dia hive’n. Bangteng hileh itna huangsung a i lutkik kei hialta zong in, lawmta bang a kipolh kei leng ka ut petmah. Huan ah, Pathian in eigel tuibang kigawm dia honsiam ahihnakleh tu’n bangchiteng in haksa pal mahle hang nikhatni chia kigawm veve di ihi, ngakzou peuhle tua i gentheihnate nikhatni chiah hon kipaksatu hong hi diing hi” chi’n ka thukkik hi.

Message khak khinphet ihmu zuingal ka hi ding a, ka khanloh nawn in zingkal dak 9 lam ana ging hi. Tuni a pai di himahle’ng nitaklam dak 2:35 pek a lengkhe di ka hihman in kinoh huai lawmlawm lou hi. Nitak ihmu hoih taktaklou ka hihman in ka ihmut a suaklai mahmah a himahleh van puak di khenkhat kaihkhoplouh a om ahihman in tua te saifel pah sawm in ihmut suak pipi’n ka thoukhe nelnul hi.

Ka phone le en sese lou in ka kihahsiang masa a, ka mansiangtak a ka phone ka et leh lawmte a kipan vanpuak di hong kithukhak bangzah hiam banah Lunching a kipan in leng message khat ana om hi. 

“Hichitel a non suk gentheih nung in itna honpe lailai mawkle’ng nang a di’n simmoh huai lawtel lou di ka maw? Upate’n ‘Bawng in chilchil leh neknek a thuah’ a chih uh toh kilamdanglou di eive! Huan ah, Bible thu a theipen ka hi zenzen kei ban ah khalam mahmah leng hatlou ka hi chih ka thei, nang leng na hon thei a tua mah ahi i kal buaina leng. Ahi a, hiai ka hon gen di – nnasep tellou in ginna tuh asi ahi” chihteng ahon khak a, a thugen dan liamluam ka sa a, mansiamlou ka hihman in zanitak a ka message nate bang ka enthak zozen hi. Himahleh a gennop ka man tuankei!

“Bang na chihna e Lun, na thugen ka mansiam kei” chihteng kia khak in ann ka neksan hi.

Ann nekzoh a Lunching a kipan message om ngei dia ka gintak ziak in ka phone ka enpah loplop a, himahleh lam-et banglou tak in whatsapp message khat leng ana om kei hi. Ka phone ka et hoihthak leh network omlou ana hi maimah a, ka message khak leng a paikei zaw mah hi. Ka message khak bek pai hileh hoih di hia, tua a message seen ing a, kei thukkikna pailou chih maimah, reply ut nawnlou khawng ahon sakkhak di ka lau petmah a, lungnuamlou pi’n ka om liailiau zel hi.

Ka vanpuak di tuamtuam khawng sa khin in paikhe di’n ka kisa a, himahleh huaitan in leng phone network om nai tuanlou hi. Ka message pen bek kikhakkhe man hileh chihkia ka lungsim in a om a, network omlouh thei gegu hinapi’n call bang ka va mekkha thepthup hi. Ka SIM zat uh kibang bek hileh tuh ama a le network omlou dia, a dandan om di hive’n, tua ka SIM zat uh kibanglou, ama a network om dia, a message seen reply lou suak maimah di chihkhawng ka ngaihtuah chiang in ka thang a pai a, ka SIM zat bang khek lawlaw hial di’n hoih ka sa hi.

Gari sung ah thildang himhim ngaihtuah theilou in Lunching kia ka lungsim ah a om hi. Lunching ka mangngilh kei himahleh amel ka muh kia hilou a, a kampaute ka zak in ka lungsim nidang sangmah inle aluah zaw a, inn lam ka pai khakbang ka kisik tuntun hial hi.

Airport ka tun tan in leng network a om kei lai hi. Free wifi bek a omkha hiam chi’n alanglang ah kivialleh mahle’ng a zattheih di hial ka tuakkha kei. Theihngei hon hotspot di beek omkha dia aw chipeuh in ka vial dakdak a, honna engu khilkhial khawng bang a om leh tuh hawkdak honsa ngial unte.

Nitaklam dak 2:35 lak in ka lengkhia uhi. Leenna ka tuang nakleh ihmu pahpah sek ka hihman in ngeina dan in ka ihmu sukpah zel hi. Guwahati a ka leenna uh khek ngai ahihman in leenna dang ah tuang ding in ka kumkhe nainai ua, gari in ka tuanna di uah ahong kha hi. Sawtlou chik petmah, leenna khek sunglel ahihman in mundang a paikhiatman di hilou hi.

Leenna sung ka lut in ka tutna mun di 32b naihpah galgal in tut leh phone et ka thuah zuingal a, network om mahleh data pai hetlou chitchiat zel hi. Ka hehtha a suak deuhdeuh mai a, ka phone bang densiat hial di’n ka mu!

Sawtlou chik nung in ka tutpih di mi 2 lak ah khat hongtu a, eilam’ mel a putlouh ziak in ngaihsak in le ka neikei. Mitsi kawm diaudiau in ka phone ah laa lungluttak in ka ngai hi. Ahi a, lunglut tak a laa ngai kichimahle’ng banglaa ngai ka hia chih le ka theikei, laa ngai ka hi chihtan lel ka thei. Ka laa ngaih in honkhim ahi ding a, ka theihlouhkal in ka ihmu suk nawn hi.

Bangtan hiam nung in ka khanglou a, ka tutpihte ka etle nikum college exam lai a ka tutpih, Priya’ lawmnu ana om mawk hi. Lamdang sakna ngen in ka pumdim a, ka mit hai hi di peuh a gingta in ka en tuantuan zozen hi. Aman le’ng lamdang sak chimeltak in leh nuikawm sim selsel in ahon entei hi.

“Nang lah nana hi mawk a?”

“En le i honglut leh nang ana tu mawk chin a lamdang salua ihi. Hilele na ihmut limtuaklua ahihchia k’on phawng ngamkei a”

“Hon phawng di eivoi e’n tua hon kimupan. Ahimhim a bang chidan a hiailam a hong om kha e?”

“Mi nuamtak a ihmu lai phawng a kisuanlah huai voi. Ka pa hiailam a posting kha a, suty sung hiailam a om ka hi”

“Aw... Na pa’n bang sem e? Koimun lak deuh e a posting na?”

“Ka pa IPS ahi. Jorhat District, Assam a SP nna lenlel ahi”

“Aw maizen pa hoih, etton huai leh zahtakhuaipi khat nei neivele maw”

“Hehe bang ziak maw?”

“IPS chihkhawng a utlou om dia hia?”

“Hi. Kei utlou”

“Bang ziak in?”

“Theikhang haha”

“Na ek!”

‘Na ek’ ka chihmawk leh lamdang sak chi meltak in ahon en hiaihuai a, ban ah amel ah leng kisuanlahna nei ahi chih a kimuthei. Hichi dandeuh kampau zongsang kha ka hihman in, a kitheisa, eilak khawng ah bel a noplouh nang omlou in kizang zialzial sek mahleh ahon theingeilou khenkhat a dia kampau kilawm hilou ahihdan ka theikhe thak a, keileng ka kisuangthak mahmah hi.

“NE nuam nasa hia leh? Na muhpatna hi’nte maw?”

“Nuam lawtel a climate mahmah nuam ka sa. Ka muhpatna hi zenzenlou, ka pa’ posting na munmun a kou ka inkuan kuan ua omsek ka hihman un suty teng a hiailam pai gige ka hi. Kumkhat a nihvei khawng kipha hi ei, tua bang ka pa’n tua a sepna mun ale kum 2 val sem hita” chi’n ahon dawng hi.

Apa posting na munmun a a inkuan ua pai nainai sek ahihdan uh ahon gen leh eilawi toh ana tehkak ka diam ah lamdang bang ka sa mawk hi. Eilawi tuh inkuankuan a pai malak ah a semtu nasan le om peihlou. Sorkal’ nnasemte kia hilou a, saptuam tungtawn a Pathiann’ gam nnasemte le hithou. Zi-le-ta neikhinsa te a dia sepna munmun a inkuan a paitheilou dite’n kinget a kul kei chisekmahle hang a taktak a sepsuah leh zuih hikhollou hi.

Amah mah in a thugen ahon sumzom lai a...

“Class X ka hihlai hiam a le Manipur a bang district hiam khat a ka pa sawtlou posting kha ngei ahi. Huailai a le hohkha ka hi, huaiziak a NE tuh kei a dia gamthak hi lawmlawmlou eive” ahon chi hi.

“Manipur ah e!? Bang district a dia aw?”

“Hi Manipur ah. A district min ka thei nawnkei, sawt gawpta haha. Lamdang na saktuak tel, houh nang le Manipur-te maw?”

“Hi, Manipur a kipan ka hi”

“Chi daih aw hehe Na mel a kipan a chu NE te na hi chih kithei hilele koi state a kipan a chih kitheilou. Ke’n Mizoram a kipan dia hon gingta hi’ng a, ana hilou daih hehe”

“Mizoram toh kigamgi eivoi hehe. Mizoram ale om kha ngei maw?”

“Omkha ngei chiahlou hilele ei college a Mizo te om zeuhzeuh ban ah ka lawmte le Mizote khat om in chin. Na min bang Mizoram te a toh kibang sim zaw mah hehe”

“Ka min na thei a maw?”

“Thei mahke kei dia”

“Bang aleh?”

“Hmm Mang”

“Ale! Koi a na theih la?”

“Khemkhem genlou di haha!”

“Khemkhem k’onsa mahve, genlel ve huai hek lah hilou a hehe”

“Nikum exam i tutkhopni, nitaklam pai di kuan in ka lawmnu’n hong dong vele”

Hiai ahon chihleh ka lungsim bang zangtuan huai in ka thei a, ka hi hiaihuai zozen hi.

“Eimahve maw, ahoihve ka min na theilai a. Ke’n nang min theilou, na lawmnu min tuh thei hi’ng a, nangmin le na hon hilh thei diam?”

“Ka lawmnu min koi a na theihkhak e?”

“Huai ka min ahong dotni a ke’nle ama min ana kan ing a ahon hilh ahi”

“Chihleh amin bang a leh?”

“Amin maw Priya”

Hiai ka chih aleh nuih in ahongnui mawk a, anuihna ziak ka dot chiang in ahon hilhpah nuamkei zaw mah hi.

“Bangziak a na hichi nuih la?”

“Na kimuhkhak chiang un Priya chi le chin thei selou di ahi, midang houpih honsa di”

“Bangziak in maw?” “Ama’ min Priya lah hilou a”

“Chimawk! Ama hon hilh eivele, ama min mah eivoi” “Hi mahmah kei”

“Chihleh ama min bang eita leh”

“Priya a chih leh chu Priya himailou di”

“Chizel! Priya hilou chizouphet a selsul” ka chihkawm in ‘na ek hia’ ka chikha manzel hi. Amah ahongpau zomlai a....

“Amin Priya hilou ahi na theih utleh na kimuhchiang un kanthak nawn mai aw, College kilutpahta di, huaichia kan le chin”

“Chihleh Priya kua min hi di eita leh? Ah! Ahi hi hita sukve, nang min hi ka theihnuam na min hon hilhta aw leh?”

“Priya na chichi voi!”

“Chihleh Priya nang min maw”

“Hi. Kei min ahi”

“Chihleh na lawmnu’n nang min honghilh hidaih eivele maw?”

“Hi di eivoi ka nuih a zalua” chi kawm in nuih kulhkulh nilouh hi.

“E’n na lawmnu min di kisa nilouh eivoi” ka chihlaitak in ka lenna un leitual ahon boh guap a, ka kiguih zozen hi. Kumkhiat ahong hun maimah a, ka kihouna uh laklohtak a tawpsan a ngai nawn zel hi.

“Priya?”

“Hawi”

“Chih leh nang hiai apat bang chi pai di, hong pi d’uh hia?”

“Hmm hongpi d’uh, ngak le honna ngak khinta uh ahi. Nang la bang chi paisawm?”

“Ka theikei. Bus ka muhzoh nawnkei leh taxi khawng a paimai di a diam ah. Bus tuh ka ngak bawl himhim dia”

“Ngailou! Tu phingphing bus ngak ngai nawnlou, buaihuai. Taxi in pai aw, ahihkeileh auto bek”

“Sum a pammaih voi”

Pammaih chihmawk a nitak a sawtta voi. Bus le muzou nawnkei nite. Huchia pamaihsa na hihleh chi’n ama’ sum 500 ka taxi lakna man di’n honpe mawk a, himahleh huaibel ka sangkei.

“Chihleh damleh college kaichia kimu ni aw...Painuam aw le Mang... Bus ngak ke’n la taxi hiam auto hiam a lemtang zawzaw ah tuang teitei in aw...Mangpha”

“Awle nang le mangpha”

Priya toh ka kikhennung un bus ka ngak a himahleh ahong pai ngeilouh ziak in auto in ka tuang hi. Ka inluahna ka tun in zan dak 11 pelta hi. Priya toh leenna sung a ka tuangkhop khakmawk dante uh ka ngaihtuah chiang in lamdang ka sa a, lah nuam leng ka sa hi. Huanah, alawmnu’ min Priya ka saksak lai a ama’ min ana hih maimah bang lamdang ka sa sawnsawn. A lawmnu’n ka min ahongdotma a hoihtak a amaugel kihoutuak masa ahi uh chih ka chiang.

Huchi’a Priya toh ka kihoudante khawng uh ngaihtuah a ka buai mahmah sung in zingkal a Lunching ka message ka phawkkhe guih hi. Ka phone lakhe ngal in ka en a, ka message deliver kia hilou in sim leng simkhinta ahihdan whatsapp blue tick tungtawn in kithei hi. Himahleh Lunching a kipan dawnna bangmah ka mukei.

Ka message luite uh bang ka en thakthak a, nihvei-thumvei bang ka simsuak sung in Lunching leng hong online hi. Ahon message khakleh chi’n bangtan hiam hungaih mahle’ng ka lam-et bang dawnna himhim ka mukei. Ka message khak hon dawngkei mahleh “Lun, damtak in ka tung nawnta” chih ka khak zoh in kihahsiang di’n bathroom ah ka lutsan hi.

Kihahsiang zou ann lah kinepeih nawnlou ahihman in ka lumpah hi. Lunching in leng ka message nanungpen ahon dawng a, ka kihou nilouh uhi. Zannitak a ka ki-message dante uh bangloutak in gen di bang ka hauviau ua, khatvei zingkal a ka kihou dan uh bang in kineltak leh nuamsa tak in ka kihou a, a tawldam huai tuan mahmah hi.

Khakhat hiam inlam a hun ka zat pen inlam ngaihna puangsaktu lel a bang hi. Ka mitkha, lungsim leh ngaihtuahna inlam kia ah a om hi. Himahleh, hung hongpai zek dia, tua ka omnna leng kingeinaseh nawnpah di ka hi chih ka thei a, lungleng sim mahleh a puakdan siamthou hi’n ka kithei. Omlouhna lamlam ngaih chihkhawng mihing’ ngeina dan him leng ahi hi.

Pawtna di lah kithei mawklou ahihman in ka chim mahmah a, college lut chiang a Priya toh kithuah di, ka houpih didan bang ka ngaihtuah khemkhem sek hi. Nidang a college kai thadah mahmah himahle’ng tu’n tuh a lut kal bang ka ngaklah a, suty sung bang sawt ka sa hial hi. Priya toh kimuhchiang a kineltak a kihou thei himahle ung omkhoplouh chia kihou theilou, phone number khawng nasan kitheituahlou ka hihman un mel kimutuahlou a kihou chih om theilou suak ahihman in college lutkal bang ka ngak lah mahmah a, ban ah, Priya toh kimuhnawn hunhun a phone number ngenta di chi’n ka lungsim ah thupukna khat ka bawl hi.

Ahi a, Priya toh bangchituk a kihouthei in kinel mahle ung Lunching in ka lungsim ah mun lian aluah zaw hi.

Hunte paizel in college lut ahong hun a, Priya toh kimukhata di chi’n ka kithalawp petmah hi. Nidang a zingkal thoh haksa ka sak penpente lak a khat himahleh tu’n tuh ka kithalawpna lam in hon zouzaw ahihman in zingthoh le haksa ka sa hetkei. Ngeina dan in zing ann nelou in college kai di’n ka kisa a, Vai nungak melhoih mahmah Priya mu di chi’n ka hihtheihtawp in fuh deuh thithet di’n ka kichei teisam hi. Ka om dan ka et chia nidang a toh kikhailua ahihman in ka zumtha lamlam bang ahongsuak zozen hi.

Bus ka ngak sekna mun ah bus ka ngak nawn a, a zul a auto pute bang in nidang ale hon muhmuhsa uh himahleh fuh honsasim uh ahi diam ah hon en utdiak uh mah abang hi. Honmu peuh in hon en dundun dan khawng in ka thei a, himahleh a taktak ah bel ana hichi kholkei a, ka lungsim ngaihtuahna lel ahi zaw hi.

College lutpatni ahihman in mi a tam hetkei a, class ngei leng kila gina hetlou hi. Tuateng banah ka lam-et mahmah Priya mel muh di’n a om kei zaw mah a, college kai ka kithalawpna teng bang a beizou hial hi. Huan ah, lawmte hongkai a omlouh zawkmah ziak in keikia ka om gialgual a, mi a lawmte uh toh kithuah a nuamsatak a om khawm zaizaite ka muh chiang in enhuai leh hazat huai bang ka sa hi.

Gilkial simtoh inlam a pai mai bang utsim mahle’ng college kaita vevet class lakveklouh utsamlou ka hihman in class ngakna le hikawm chi’n college canteen lam ah nektheih ne di’n keikia ka paiphei latlat hi. Mi a lawmte khawng uh toh a kithuah nainai lai ua ei lawm neilou a va om gialgual anoplouhdan ka theikhe deuhdeuh a, ka lawmte bang ka lungsim in ka mohsa mahmah hi.

Huchia canteen a nektheih ne a ka om laitak in Priya leh a lawmte gintaklouhpi’n ahongpai ua, lamdang sak leh kipah thuah in ka om liailuai hi.

“Hai! Mang! Hongkailou di k’on sakleh n’ongkai vanglak a”

“Bangziak a kailou dia n’on gintak eita?”

“Nou NE lamte’n first day ni a college kaitheih ahihlam theilou na bang ua!?”

Chiamnuih a hon gen himahleh a thugen ah ka sa-ikh piansim ziak in ka dawngkei. Pau hetlou a ka om melmul leh kisuanglah thaksim ahi dia, a lawmte nektheih la dia a sawlkhiat zoh in ka tutna ah hongtu hi.

“Tuni tuh pen na hon paw na maw Mang hehe?”

“Pawtham e, tampi pua ka hi. Na poimoh leh na hon khelthei di hehe”

“Ke’n le paw tektuk mah ing e hilele koi veleh khat k’on khel himhim di nang a i nuamtuam vele...” chi’n ka pen khat ahon laksak gaih hi.

Lawmte nektheih lei a hongpai ma un thil tuamtuam ka na houlim ua, a lawmte lah kou chance hon piakbawl ahi di uam ah pai in hongpai hak zaw mah uhi. Ka kihou kawmkawm un a mel hoihtak in ka en a, ka muhna chiangchiang tuh hichi zaw deuhleh chihna di himhhim a om kei. T-Shirt vom silh in jean khekol tight sim khat teng a, airmax vom, neu litlet khat bulh in kilawmkhawm mahmah hi. Numei ahi chih latsakna maimai bang in bilbah neuchik khat bat a, a khutchinte leng a hawisau pianpuanlouh ban ah rong dang le nuhtuanlou in apianpih mah toh siangthoutak in koih hi.

“Mang nang class bangzah neilai e?”

“Khat neilai, denchia 1:30 a kipan di ahi. Nang la bangzah neilai?”

“Kou nei nawnlou. Inn lam paina dia lah baih sa deuhlai ka hihchiang ua, canteen lam a k’ongpai ua leh nang ana om chin a, huchilou hileh inlam le kipaikhinta di ahi”

“Kei ka om ziak a pailou chihdan neive ua le maw... Kipahhuai na e nou ziak a kichimlou, nou omkei le uh chin en lawm thuah di kineilou dia chimtak a ki-om di hi a...”

“Zozen kamsiam lua teh. Pasal-sal huchi kamsiam”

“Kamsiam ahi di hia ahimah eivoi. Na lawmte le hongpai hak na uh e”

“Hon ning sim maw?”

“Eh! Huai dan hi mahmahlou. Huchidan a na lak di leh tuh hongpai ngei nawnkei le uh le poi ka sa kei hehe”

Hiai ka chih laitak in ahongpai ua, nektheih nek di tampi petmah ahon tawi neinoi uhi. Ka gil a kial hang in ka duh di ka thei tuankei a, va neklouh hial na dan lah omlou ahihman in duhlou pipi’n ka ne namnam hi. Amau bang kisuanglah dan a hon ngaihtuah in ahon piak behbeh zaw mah uhi.

“Priya, ka na pai mai aw ka class kipan di hita”

“Eimahve maw... Ana khawl aw kiton pheini ke’n le tui k’ong dim zual di”

Class la dia ka paiphei kawm in Priya in le tui dim di’n hon zuiphei hi.

“Priya?”

“Yes!”

“Na phone number n’on pethei diam, a poikei di leh?”

“Poi zenzenlou e” chih toh a phone number piak ahon thuah a, huchin ka kikhen uhi.

Class la dia room a ka lut leh class omlou thak di honna chihziak un kipaktak in inlam ka kik vengveng hi. Huan ah, Ka deih mahmah Priya’ phone number neita ka hihman in ka kipak petmah a, a phone number bang ka en-en a, ka by-heart zozen hi. Text pah ut mahle’ng awl a nitak chia text di’n ka limsit hi.

Zing ann nelou a college kai himahle’ng college a nektheh tam ka nekluat ziak in ann ka duh nawnkei a, inn ka tung a ann le huannawn seselou in movie ka en hi. Movie en-en ka kisak leh ka theihlouhkal a ihmu kha ka hi ding a, mang lamdangtak ka nei hi.

Ka mang in lampi hoihlaw khollou khat ka na zui a, a lampi hoih kholkei mahleh a phei ngen ahihziak in a zuih a nuam in a tawldam huai mahmah hi. Sau simtak ka pai nung in ka lampi zuih mun khat ah ana kakhia hi. Tua lampite khat hoih in a zuih a noptuak mahmah a himahleh khatpen bel hoihlou in a zuih leng a haksat tuak mahmah hi.

Tua lampi nihte koipen zuih di a chih sawtlou ka saikak nung in lampi hoihlou zaw pen nusia in a hoihzaw lam ka zui hi. Bangtan hiam ka zuihnung in ka lampi zuih ahong haksa deuhdeuh a, kuamah zuihkhak ngeilouh lampi mahbang in siat in a sia hi. Lampi hoihlou chih mahtak a khenchia kisuikha in ka kipalpuk dekdek a, ahon batkha di louthang bang a tam petmah hi. A lampi a touh kia mai hilou in a kuul mahmah zaw mah a, a kallak ah khatveivei hongnuam zual mahleh tua a nopnate’n sawt daihlou in a haksa zaw sem ah hon pilut zel hi. Hiai lampi ka zuihkhak bang ka kisik tuntun hi.

Sawtsimtak ka zuih nung in leng lampi nuam ah ahon suakkhiat pih kei a, tua naksang in ka zuih lampi ka zuimong maimah hi. Lampi zuih di lah om nawnlou, lehkik dia lah saupi tungkhinta ka hihman in ka lung a buai petmah a, ka theih ngeilouhna mun ahihzawkmah toh gammang tuh ka hi mai hi. Lampi hoih leh nuam chi a ka zuih bangdia tua hong huchi mot maimah a dia aw chi’n lamdang ka sa mahmah hi.

Singkung liansim khat nuai ah sawtlou tutawldam in ka maban di ka ngaituah hi. Maban pai di lah ka gammang deuhdeuh khak di lau; lehkik dia lah saupi paikhinta ka hihman in ka buaipetmah. A tawp in singkung sangsim khat a kal in ka khodak a, ka omna toh kigamlalou, ka pamlam deuh ah lampi hoih leh ngil, noptuak mahmah, denlam a ka zuih nuamlouhpen ka galmuh hi. Himahleh, tua lampi naihna di kawl sangtak khat in hon nang chitchiat ziak in tua ka omna mun a kipan baihlamtak a naihzoh di vual hilou a, ka lehkik a ka kipatna masa mah a ka va kibulpatthak veve ngai diing bang hi.

Hiai mun a ka gammang nilouh sang in ka va kibulpat thak di chi’n ka tuanna singkung a kipan kumkhia in ka zuih nuamlouh lampi zuithak di’n ka nungkik hi. Ka pai kawmkawm in anuam leh baihlam ka zonluat ziak a haksatna tuak ka hihdante khawng ka ngaihtuah a, kua honsawl hilou, kei mah thupukna liuliau a pai ka hihman in mohsak di midang himhim a om kei.

Atawp in ka kipatna lampi kathuam ka tungkhong a, lampi hoihlou chi a ka zuih utlouhpen zui di’n ka kipankhe thak hi. Hiai leng a zuih a nuam liai kei, hoihlou chi a ka zuih noplouhsa leng ahi hi him hi. Ahi a, lungke sim mahle’ng lampi nuam a ahon suahkhiatpih ngei lam-en in lam-etna liantak toh ka zui veve hi.

Huchia bangtan hiam ka zuih nung in awlawl in ahong nuam hiaihiai a, a tawp in lampi nuam mahmah khat ah ahon suahkhiatpih petmah hi. Zou huihkhisiang lang hiauhiaute’n ka gimna tengteng muttheng bangmai in ka zang hiuhiau a, singlek a vasa ham ging kiaukiau te’n hon khamuan in tawl a damsaktuan mahmah uhi. Gammang sahtak kawm a hongpawtkhia Zou siktui siang kilkel, vot dikdek ka dawn zoh in maiphiat di’n ka kisa a, ka mai tui ka buah toh kiton in ka khanglou hi.

Ka sana ka etleh nitak dak 8 bang ana pelman hi. Nitak ann huan nailou ban ah ka nitak mehhuan di nasan leikhalou ka hihziak in mehlei di’n ka kisa ngal hi. Niteng a mehlei di kithei gige zoulou ahihman in inlam a om chia sungkuante’n ‘tuni bangmeh huan get di a dia aw’ a chihsekte khawng uh bang theihsiam huailua ahihdan ka theikhe deuhdeuh hi.

Ann ka huankawm in ka mang ngaihtuah a lamdang ka sa mahmah hi. Banghiam khat a khiatna om di’n ka gingta tinten hi. Bang etsakna a hichibang mang lamdangtak nei ka dia aw chih kia ka lungsim a om in ka hi dedu a, ka etna ngal bang ka en lelu kha hial hi. Mang letsiam Joseph damlai hileh tua ka mang va kiletsak leh chihkhawng bang ka ngaihtuah khemkhem hi.

Ka mang in ka lungsim luah petmah ahihman in thildang bangmah ka ngaihtuah theikei a, phalbi mang lel chisim mahle’ng ahithei taktak kei. Ka mang khiatna di kei-le-kei kibawltawm in ka buai mahmah a, a chang in Lunching taisan mahle’ng ama kiang a kiiknawn veve di houh ka dia aw chih khawng ka ngaithuahna ah hongsuak bualbual hi.

Ann ka nek lai in ka phone ah message khat honglut kaukau hi. Tua message pen Lunching a kipan hi dia ka gintak ziak in ka lungsim ah etpah utna ka nei a himahleh, ka ann nek lakloh lai ahihman in va en selou in ka ann nek mah ka sunzom hi. Ann ka nek zoh in ka phone ka en pah a, message honglut pen Lunching a kipan hi dia ka gintak himahleh ka theih ngeilouh number a kipan ana hi daih a, ka reply ma in a DP hoihtak in ka enchian masa hi.

Lam-et hetlouh in Priya ahi chih a DP a kipan in ka thei a, ka number koi a a theih a dia aw chi’n a tung in buaisim mahle’ng sun a a number ka lak lai a a dik leh diklouh etna dia tomchik call zual ka hihlam ka theikhia hi. Himahleh, Priya a kipan message mu dia ka kigintak hetlouh man in lamdang sak leh kipah ka thuah a, ka lungsim a nui heuhau kawm in ahon message ka thukkik ngal hi. Priya toh sawtsimtak message a ka kihoukia uh hilou in VIDEO Call bang ahon bawl a, ka khomtek un nuam ka sa mahmah uhi.

Hiai ni a kipat in Priya toh kithuah in college khawng ah leng hun a om liai leh ka kithuah den uhi. Eilam dan a a inn khawng ua va lengla a, va hel theih mawklouh ahihman in college a hun lemchang ka muh sunsunte uh ka am thei mahmah ua, ka class uh a bei nung nangawn in leng sawt pipi college ah ka om zel uhi. Kholak a kithuah a, hunnuam zang a pawtkhawm ut huai mahleh mel-le-puam kibanglou, nam tuamtuak ka hihman un lemchang taktak theilou a, college huangsung mah bitpen suak hi.

Priya toh kithuah a, hun tamzaw phial zangkhawm himahle ung Lunching ka mangngilh theikei a, mangngilh ka sawm nak zohkhop leh ka lungsim luah deuhdeuh abang maimah hi. Huan ah, mel kimu a kihou hikeimahle ung niteng a phone tungtawn a kihou gige ka hihman un ka kingaihnatna uh lian deuhdeuh hi. Ka kal ua a mangsa itna ngahkikna dia panla hikei mahle’ng ka lawmta kal bek uh mansuahlou a, ki-ittak leh kingainatak a hinkhua ka zattheihna diing un ka hihtheihtawp suah in pan ka la sek hi.

Nikhat, college kai ka tawp un Priya in park a hoh di’n hon zawn hi. Ka lungsim in kilawpna khat neimahle’ng lehlamtak ah ka ut leh utlouh ka thuah hi. Himahleh min khatvei sunsun pawtdia hon zawn va nial hial di hi sathei lou ka hihman in ke’n leng lem ka sa a, Priya in leng a lawm dangte nusia in kou gelkia park khat ah ka va om uhi. Priya ahihleh innkuan khosathei tak sung a kipan ahihman in sum-le-pai, neih-le-lam ah kuamah englou a, ka pawtkhawmna uah leng nek di tampi petmah hon tawi hi.

Singkung liansim khat nuai ah tu in ka nektheihte uh ka ne tauhtauh uhi. Gen di bang hau viau ka hi ding ua, a khenchiang in kipak in ka nui napnap zel uhi. Ahon mu khempeuh in ahon enkawi vungvung ua, Priya, amau lak ale nam lian leh changkang banah IPS Officer’ ta nam niam leh tuantual, singtangmi pasal khat toh hun zangkhawm tuh ahonmu khate’n hazatna mit ngen in ahon en uhi. Himahleh, Priya in tuate theilou ahi diam ah nuamsa leh kipaktak in nui lahlah zel a, kei ahihleh aguk in pilvangtak in ka om khilkhial hi.

Sawtsimtak Priya toh park a omta ka hihman un ka nektheihte bang uh beidek hial zozen ta hi.

“Mang?”

“Bang a Priya?”

“Nuam nasa hia tuni?”

“Nuam lawtel, hichibang a nang toh hunnuam zangkhawm kha di’n ka na kikoih kha ngeikei himhim. Nang la nuam nasa hia leh?”

“Ke’n le nuam sa lawtel ka hi Mang. Hichibang a nang toh damsung hun zangkhawm di hile’ngle poi ka sa kei. Huan ah, pawt dia ka honzot niallou a na hon lem sakpih lelleng kei a dia kipahhuai khin ahi Mang”

“Nang toh pawtkhawm a, hichibang a hunnuam zat ka ut gige mah ahi. Himahleh, Priya, na theihsa mah bang in pau-le-ham kibanglou, nam tuamtuak, tawndan leh sahkhua nasan kibanglou ihihman in kisuanlahna leh nang toh hiai bang a hun zangkhawm di’n chinlou kisakna ka nei hi. Eigel kal ah zaw bangmah hikei mahleh midang, na chipih, na sapih khenkhat a dia mitsip huai vulvul ka hihkhak ding ka lau...”

“Mang, na thugen ka theisiam. Hiai mun diakdiak bang tuh nang a dia gamdang bangmai ahi a, pau-le-ham na siam a, sawtpi omta na hi maithei himahleh na mel-na puam maimai aleng haihvuallouh a tualsuak mi na hihlouhdan kithei mai hi. Himahleh, naupang hai hi nawnlou, sia-le-pha thei, pichingtuak ihihtak man in kei deihtelna leh thupukna tellou in na ut dandan in na hon kai theikei ding chih theihsa ahi. Huaiziak in Mang, hiai lamthu ah zaw kilung nuamlou sak hetke’n, a tawppha in nang lam ah ka pang den diing....”

“Priya, nang bel na theihsiam di theihsa ahi. Himahleh, nang theihsiam dan a midang in ana theisiam veklou hial ding ahi chihleng na theih poimoh ka sa...”

“Mang hiai lam thu zaw hiaitan in hunsakni. Eigel kal a kitheihsiamna a om leh huai a poimoh masa pen ahi. Tuni a hiaimun a k’on paipih zenzen lamdang na sa chih ka thei a, ke’n leng lamdang ka sa! Ka chipih ka sapihte mah toh pai hile’ng bel a hi di mah ahi a, himahleh tua nang hiai mun a pai dia ka hon zot in chituamna khat nei ahi Mang...”

“Bang a a chituamna? Hon hilh veleh...”

“Ka hon hilh ding. Himahleh, na ngaihdanlou lampang ahihleleng na hon theisiam ka hon ngen masa hi. Mang, nang toh i kitheihnung kumkim bang pha thei di ahita hi. Nang toh hun zatkhawm nuam ka sa a, den a ka gen bang in ka damsung a nang toh hun zatkhawm di hileleng poi ka sa kei”

Priya thugen paulou hial in lunglut tak in ka ngaikhia a, aman leng awlawl in a thugen ahon sumzon tiautiau hi.

“Nang toh hun i zatkhawm khaksate khawng keikia a ka om chiang in ka ngaihtuahtuah sek hi. Exam lai a ze a zekai a n’ong lut a, pen neilou a buai a n’ong buai lunglung laite; exam tawp a gate a konna houpih ua na nervous luat ziak a na chil n’on thalh ek laite khawng bang ka mitkha ah a mangthei kei hi. Nang ka hon ngaihtuah khak chiang in ka lungsim ah genkhiak theihlouh kipahna khat a om a, lungnopna ka nei hi. Mang, nou paidan leh tawnlou lou ban ah, tua ka thugente na lungsimlou lampang ahihleleng hon ngaidam inla, himahleh ke’n ka lungsim a ka vei mahmah thil hon genkhia ka hihman in nang a kipan na ngaihdan leh na thupukna na hon hilh thei diam?”

Neih-le-lam a lah mi englou phetlou a mel-le-puam a leng sit huai hetlou khat in hiai thu hon gen tuh ka dawn didan bang ka buai zozen hi. Thu kipahhuai leh zaknuam mahmah khat za tuh ka hi peuhmah hi. Tangtak in Priya’ mai ka en a, aman bel hoihtak a hon en ngamlou in leilam en in kun dide hi. Huih nung hiauhiaute’n Priya’ sam mutleng selsel in, a mitmul sausim, del finfente nasan leng huih in mutling delhdelh hi. A kicheina gim namtui diik nuam mahmahte vasa te nasan in le diiknuam mah bang hial in ka zul uah hong lengtuah vengvung in hong ham chilchel geuh uhi.

Priya hon thugente dawng dia kisa a “Priya” ka chih patleh Vai tangvalnou bangzah hiam in hong subuai ua, ka thugen dek genzom theilou in leh ka omna mun ua leng om thei nawnlou in ka paikhia uhi. Priya bang hehlua kisa in san tuaituai zozen a, a kisuanlah zawkmah toh ka hehpihtha a hongsuak deuhdeuh hi. A kisuanlah neuchik a dan om deuhkhakleh chi’n chimnuih khawng gen in houpih-pih mahle’ng ahon dawng kholkei a, a mit a khitui pawt nilnelte a guk in nul zel hi.

Mundang a pawtna dia lah zekaita ban ah ka kihouna uh leng lamzang thei nawnlou suak ahihman in inn lam tuak a pai di’n ka kikhen uhi. Priya a kisuanlah luatziak in kei a di’n leng kisuanlahhuai hial hi. A om didan leh a dinmun, a lungsim di khawng ka ngaihtuahsak chiang in ka hehpih mahmah hi.

Inn ka tun in Priya hon thugente ka ngaihtuah hi. Priya tuh ka muhtung a kipan melhoih ka sak ahi a, a om dan leh a khohei-gamtat bangkim ka muh leh theihna chiangchiang ah ka lungkim mahmah hi. Tuaziak mah in sun a ahon thugentuh ka kipahpihlamtak ahi hi. Sun a leng buaina omlou a dawngsuak thei hile’ng damsung a hun zangkhawm dia a hon ngetna ka nial ka gingta kei. Ahi a, lehlamtak a Lunching taisan a midang neih ding ka ngaihtuah chiang in haksa ka sa a lah Lunching toh itna kitansa zopkikna di’n panlakna tutan a om nai tadihlou ahihman in ka lung a buai mahmah a, ka lampi zuih ding, ka thupuk didan ka theizou kei hi.

Priya a kipan message honglut di’n gingta mahle’ng nitaktan in le Priya a kipan thu-le-la zak di bangmah omlou hi. A kisuanlah luatman a hon houpih ngamlou hipeuhmah dia koih ka hihman in kei a pasal zaw deuh chi’n whatsapp ah ka message hi. Tomchik sung in ka message na ahon thukik pah a, huchi’a Priya toh ka kihou kawmkawm un Lunching toh leng ka kihou uhi. Hiai gel kal a thupukna lak didan ka buai a, keileng khat veivei ka om dan vallua houh a dia aw chihkhawng ka ngaihtuah zelsam hi.

Priya in sun a ahon thugente hon sunzom a, hon genlai di ka sak leh huailamthu himhim genkhak in a neikei a, ka kihouna uh leng deih bang in a lamzang thei taktak kei hi. A omdan leh thugendan a kipan in sun a ka thiltuah uh kisuanglah petmah ahihdan kithei hi.

Nikhat college kailou a inn a ka om leh Thathang honghoh a, khatvei hongpha sunsun nitak ann nesuak ngal di’n ka khoutang hi. Ka phone tuak uh khoih tauhtauh kawm in ka houlim uhi. Lunching toh ka kihoulam uh lawmpa’n honthei ahi ding a, “Hiai Lunching le na houpih peih mahve!” ahon chigaih hi. A khamtheih hihte ziak a mi muhlou khin hi di’n ka gingta zuingal a, himahleh bangmah theilou dan in ka kan khemkhem hi.

“Bangziak in maw?”

“Ex te khawng houpihpih louh di!”

“Ex chih ziak a va huchi nawlkhin di le hipah tuanlou pi”

“A kikhenle banglou na kei ua maw...Kihouden na hihtel chiang ua. Hichitel a kikhelah guigui di bang kikhen selouh di eivoi. Na huchihchih ua le zaw kingaikik khong di neive ua. Upa te’n zawllui leh lamlui a nal chi uh eive”

“Lampi thak sat sang a alui puahthak tuh baihlam zaw himhim di eimah voi”

“Hilele, tangval neilou bek hileh. Mi tangval neisa va huchi houpihpih zozen nang le, denchia a kal uh suse giap niteh!”

“Bang e? Tangval nei maw Lunching in?”

“Theilou tel maw a tangval neihlam?”

“Thei mawk di hia kei kia neilou a chih detpi a”

“Numeite gintak di himhim omlou pi a!” a chihkawm in a tangvalpa toh a lim kilakkhop uh ahon lak hi. A tangvalpa ka muhkhak ngei bang ka sa sim alah koimun a, bangchik a ka muhkhiak chih ka theituan kei. Ka ngaihtuah thakthak leh khatvei, Lunching’ Puthang zineih a ahon kitonpih pasal pen ahihdan ka theikhia a, huailai a a om dan uh toh ka ngaihtuah khop chiang in kingai taktak mah hi ding un ka gingta hi.

Lawmpa’n Lunching in tangval nei ahihlam ahon hilh a kipan in ka om a lemtheikei a, ka dip bang kisai dutdut in ka mitkhawng mial dundun hial in ka thei. A guk in ka pawna mahmah a, ka awm bang bing ep-op in ka tha zoi ngawingawi hi. Himahleh Thathang theih di bel ka phal hetkei.

“Thang, chihleh Lunching a tangvalpa toh a kilimlak khopna uh koi a na muh eita?”

“A tangvalpa’n fb ah a upload mun lawvele. Ki-friend khalou uh maw? Lamdang na sak tuakngei ke’n lah theikhin lawta di k’on sa a...”

“Theilou hial, Lunching in lah huchidan lim fb a koihkhe ngeilou ahihchia”

“Fb privacy le ahoih vial a eive!”

“Zaw mah! Koita a tangvalpa’ username hon hilh dih e k’on stalk deh a melhoih hiam hehe” chi kawm in ka nui nalhnalh a, himahleh ka lungsim tawng bel mial dedu in a nui hetkei.

Thathang toh ka kihouna uh leng lem nawnlou hialkhop in ka lungtang ahon dengkha a, gintak leh gintaklouh thuah in ka buai mahmah hi.

Thathang toh ka om khoplai sung uh bel a dandan a om a himahleh ahon paisan a kipan in thawmhau kisakna bang ka nei mawk hi. Lunching’ tangvalpa’ facebook timeline a lut in a limlakte khawng uh ka en a, hazatna ngen a pumdim in a limlakte bang uh et-hak ka sa mahmah hi. Lunching in lawmta bang a honna pawlkhinta ahihdan ka ngaihtuah chiang in haksa ka deuhdeuh a; kei huai lawmta khenlam a pen nuse theilou a ka om ka puakgik behlaptu a suak zel hi.

“Lawmta dan bek a kipawl di” ka chihsekpen a taktak dinmun tung dia ka hong om hialtak un haksa lawtel ahihdan ka theikhe phing a, itna huangsung a lutkhinsa nana-na tuh lawmta bangmai a omkhopthak kichi thil baihlam liai ana hilou hi.

Ahi a, Lunching in tangval a neih ka lungsim hon phawng in ka lungtang hon sunkha mahleh kei a dia kalbi masa houh a dia aw ka chisim hi. Ama a Lunching’ itna pak huan sung a gammang a, pawtkhe theilou leh maban le suanthei tuanlou a ka om geigoi pen tua maban a thovengtak a kalsuanthei di dinmun a omta ka hihman in lehlamtak ah thu kipahhuai khatleng a suak hi. Lunching itlou leh ngailou hikeimahle’ng kei leng maban paitheita di ka hihman in a tangval neih ka kipahpih hi. 

Lunching in tangval a neih pawna lua ka hi diam ah ka om dan khawng bang kikhekzou ahi ding a, Priya in lamdang sa in khatvei college ah ahon kan hi.

“Mang, tulai bangchi e na om dan tuamna e?”

“Bang ka chi a maw?”

“Damlouh mel chih di lah hichiahlou lah nidang toh kibanglou; nguai a nguai na hi”

“Eh! Huchidan maw ke’n lah huchi dan a om ka hihlam le ka theituankei a. Bangmah chilou ka hi”

“Mang, hon im ke’n la thudik hon hilhzaw maive... Na haksatna zaw k’on theihpih kei himahleh na mel a kipan banghiam lungkhamna leh haksatna nei na chih kitheithou ahi”

Priya mah ahong pauzom lai a...

“Houh khatvei a k’on thilgen na lungsimlou leh zakdah huailua khat ahi hia?”

“Priya, bangmah ka chikei ka chi. Huai na hon thilgente kei a di’n zakdahhuai khatleng a om kei, ahi a lah lehlamtak ah nang a kipan hiai bang kampau ka zak in hon kisuanglah sak zaw”

“Huaini a kipan na omdan kilamdanglua ahi Mang. Mang, hehpihtak in thudik hon hilh inla, na lungsimlou lampang leh na mitmuh a kilawmlou tak a hong om kha ka hih a leleng hon genmai in, ngaihdam nget a ngaih a leleng k’on ngen di. Ke’n tuh ka lungsim diktak leh ka lungtang a ka puakgik thilte hon genkhia ka hi a, nang a kipan dawnna ngak ka hi lel hi. Ahi a, huaini a i thiltuah in ahon kisuanlah sak mahmah a tua kawmkal ah huaini a kipan na omdan ahong hichituam mawk zawkmah man in ka kisuanlahna a lian deuhdeuh hi”

“Priya, ahimhim a bangchi dan a kei singtangmi, nam niam leh mawltak khat kiang a itna na hon huchi ngetmawk a?”

“Mang, itna in gamgi nei hia?”

“Itna in gamgi a nei ka chikei himahleh, ka dinmun ka ngaihtuah chiang in nang a di hial a chinlou kisa ka hi zaw”

“Ke’n itna kichi lungtang tawng a kipan lel di ka sa a, bangbang kiphamoh ahia oi? Mang, zanlam in le ka hon genkhin a, tu’n ka hon gen nawn di – Ka hon muhtung a kipan in ka lungsim teng na hon luah a, ke’n leng lamdang ka sa zozen hi. Ka lungtang tawng ah mun lianpi na luah pah hi. Exam i tutkhoplai in leng na laigelh lai khawng in k’on na en-en hi. Huan ah, exam zoh a gate bul a i kihou laite khawng tutan in ka mitkha ah a lang dundun theilai, ka bilkha ah leng na ‘aw’ ging chikmah chiang in a dai ngeikei diinh. Ka hon gen ding, huai ka lawmnu’n na min hongkan khonung bangleng kei sawl ahi!”

Paulou hial in Priya thugen lungluttak in ka ngaikhia a, aman leng a thugen ahon sunzom zel hi.

“Nidang in mi khatvei ka muh a itna mit a ka na etkhak a om kha ngeikei a, hichibang om thei di’n le ka na koihkei himhim hi. Himahleh, nang ka hon muhni a kipan in ‘love at first sight’ kichi om thei dia ka na gintaklouh omthei mah hitah chih ka theikhe pan hi. Bangteng hileh, hun hongpai dia hon mangngilh pah di’n ka kingaihtuah a himahleh nithak-hunthakte’n ka hon ngaihna a khangsak semsem ua, mangngilh naksang in anini in k’on it, k’on ngaihna khang hulhul a bang maimah hi”

“Priya na hon it a ka kipak. Himahleh, nang a di’n kei bangmah ka hikei. Huan ah, na theihsa mahbang in mihing tuak himahle hang mel-le-puam, pau-le-ham banah tawndan natan a kibanglou ihi a, denchia ei-le-ei kisugenthei lel ihihkhak diing ka hau. Ahi a, na hon itna nial di’n kei bangmah ka hikei!” ka chihkawm in Priya’ khut nou ngingei ka letsak hi.

Sutzopna … Hiai a CLICK in

© Siamsinna leh Vakiangbu