MELHOIH

By ~ Vz Vualnam

A khangthu na theih louh khotang a teng na hi. Za le teh na chimul thou ding thu-le-la tampi om hi. Dawi leh kau in a hentom khotang a pan suak na hi. Dawi, kau, gamkaupi, pheisam, keuhthang, khakap, suanglepte, zaak leng na zakha nawn kei ahi maithei. Himahleh na pi leh pute’ hun lai in hiaite toh na tengkhawm uh a, a na kilautuah uhi. Sih, kawl leh munsia tuamtuamte dawite munpi chi in na gimneih mahmah ua, lou dia neih ngam louhna mun, innmun dia neih ngam louhna mun chih bang na hau mahmah uhi. Gamkha in gamlak na vaak ngam lou uh, suanglepte’n suang a lepnalam ua a kha uh suang in delhkhum dia, amau si ding, chih lau in. Sumtawng bia ua, dawite lungtaisak na’ng in huangvulh ganta in na kithoih ngitnget uhi. Zek na hau ua, heisuk-heitouh ah nawngkaisak zek a tam mahmah. Innkuan siang lou chih bang om in na kiten mahmah ua, zi-le-pasal kizonna ah leng pilvang ding in na kihilh ngiitngeet uhi. Himahleh sapkangte’n Pathian thu a hong puakluut chiang un tuate awlawl a hong daai in tuni chiang in gen ding leng om nawn lou a, khangthakte’n theih leng theikha nawn lou uhi. Daai taktak mah uhia?

Ngangai tuh nungak ahi a, Pearson a vengkhunglam ah a teng hi. Pawl sawm-le-nih a zou a, a minpu a CCPur college a kai in BA a simlel hi. A veng ua nungak dangte bang in inn ah a om a, lapawl a tel chih louh thapaih na’ng dang bangmah a nei kei. Phone khoih tuh a thapaihna omsun ahi. Innkuan hausalua hi kei mah le uh nuamsa huntawk ahi ua, vual leng a eng kei hi. Himahleh limlang a a ki-et chiang in lungkim het louhna a nei gige- a mel hoih louh ziak in. Mite’n leng lamdang a sa chiat uh. A nu’ melhoihna neuchik le sun lou in a piang a, a nu’ ta ding leng a bang kei hial hi. Himahleh a theite’n a gen chiang un a nu leng a nungak tung in hoih het kei, a hong pichin khiat leh a hong hoihkhia a hi, a chi uhi. 

Nipini zingsang khat tuailai khawmpi ding kithalawp tak in a kisa a, himahleh limlang a a va ki-et chiang in a mai a mial hi. ‘Bang a nu ka hichi melhoih louh, nang na mel hoihhoih toh. Bachia a k’on sut louh? Melhoihna thuguuk om lou hia?’ chi’n a hong kikoukhia hi. ‘A thuguuk zaw om mah e. Aman na pengam kei di,’ a nu’n a chi a, ‘Ka pengam lawtel di. A thuguuk hon hilh aw. Bang neek di a, bang taksa sawizoina hih di a?’ chia a dawnleh a nu’n, ‘Huaite khenlampek ahi,’ ‘Hilele ka pengam thouthou di,’ hon hilhzok aw,’ chi’n a nuta un a kichiamnuih uhi.

Kikhawmtawp inn a hong tung a, kap phial in inn a hong luut a, ‘Nu, kei zaw milak ka ut nawn mahmah kei. Nuam lou lua. Lawmte a houpih di tangval a dim a om, ei kuaman hon houpih ngei mahmah lou. A om lou mah kibang,’ a hon chi zuauzuau hi. ‘Khai, huai khawng patauhhuai kei lua. Hon it hon ngai dite’n hon ngai thouna di uh,’ a nu’n a chihleh Ngangai in, ‘A om kei a hi’n teh tutuan kuama’n kamsiam a le hon hou lou,’ chi in lupna a kidenna hi. 

Huai ni a pan lapawl leng a zil utnawn kei a, milak ah leng a kihel utnawn kei bilbel hi. A nu’n a sawlsawl hang in inn ah a kikhum a, ihmut, ann nek leh phone khoih kia in a hun a zang bei hi. 

Huchia kha khat phial a hong om tak in a nu lunghimoh in ni khat a kiang ah a va pai a, ‘Melhoihna man pe di’n na kingap taktak a hia?’ chitaktak in a va chi a, ‘A bang ahi, mi lungsim nop louh lai a nang le,’ chi’n Ngangai in a na dawng hi. ‘K’on chiamnuih hi kei. A lampi a om. A man na piak ngam naakleh. Himahleh na gintaksa a man tamzawkha maithei ahi. Na piak ngam di leh gen inla, na piak ngam kei di leh thou inla, milak ah kihel aw,’ chi’n a nu’n khauhsim in a chi a, Ngangai in lamdang sasim in, ‘Bang eita a man, hon hilh phot ve,’ a chih a, a nu’n melhoihna thuguukleh ama’n piak ding a hilhta hi. Ngangai tuh a utpah hi. 

Melhoih lou chih mahtak khosung a tangval a deih leh a ngaihte’n amah a ngai kei ua, a lawmte khawng a ngai uhi. Huchih chiang in Ngangai tuh a guuk in a heh thei mahmah a, a polang in a lawmte pawl mahleh a lungsim guuk in a lawm khenkhat, a melhoih deuhte a haza thei mahmah a, a gimthei mahmah hi. Huchih lai in Ngangai’ nau Bangalore a laisim ding a pa’n va kha ding in a kisa a, Ngangai in a lawm Niangboi’ kiang ah, ‘Kei toh ka nu kia om di, hong giak in aw,’ chi’n a zawn hi. Niangboi ahihleh Ngangai in a ngaih mahmah Lianpu toh kingai ahi ua, a kam in siamtak in pawl mahleh a lungsim guuk in a haw mahmah hi. Ngangaite’ va giah ding ut khol kei mahleh nial ut lou in Niangboi leng giak ding in a va kuan hi.

Niangboi a va giak a, ‘zingkal thohbaih ngai lou, ut tantan lup theih,’ chi in nitak phone khoih in a tu ni louh uhi. A tawp in Niangboi in, ‘Kei ka thohbaih ngai di, lumta ni,’ chi in a luppih khong hi. Zingkal in Niangboi a thoupah a, a innlam uh a delh pah hi. A zingchiang leng va giak lai dia Ngangai in a zot ahi a, ut kei sim lele a va kuan nawn hi. Nitak in a houlim ua, Niangboi in, ‘Zanitak ka mang lamdanglua. Vot in hon tawp a na chi ing a, ka mai teng khawng a dim, huai zoh huai votte kha nang ahi a na chi zel. Lamdanglua,’ a chihleh Ngangai in, ‘Na giakkhe ngei kei a, na giahkhiatleh na mang sia hi’n teh,’ a chihsan hi. Huaizan in leng Niangboi in mang kibang mah a mangmat a, lamdang a sa mahmah a, lah a gen ut nawn kei hi. Tuban zaw hon zawn lele ka giak nawn kei di, a chi lungsim hi. 

Huai nung in Niangboi tuh a tha a chau hiaihiai a, a gawng deuhdeuh a, a daang kikeuh a, zawngkhal tak in a om a, lapawl ah leng a pang zou nawn kei hi. Kha nih hiam kiam hiaihiai in a hong om a, lupna ngak phial in a hong zawngkhal hi. Huai sung in a mang lamdang tuh a man zezeuh lai hi. Kumkim phial huchia a om nung in awl in a hong haat a, kha bangzah hiam nung in ngeina a hong bang nawn hi. Mi khenkhatte’n nau sukia hi ding khawng in a muangmoh ua, a gen kheukhou uhi. 

‘A hunphet na theih kei leh den chiah nelum le teh mi’n hon muangmoh di uh ahi,’ chi’n khatvei a nu’n Ngangai a thuhilh hi. Ngangai tuh limlang kho a ki-et chiang in ngou deuh in a kithei a, a mai khawng leng zawl deuh in a thei a, a kipakgu mahmah hi. ‘Muamuang le giak di’n ka zawn di,’ a nu’ ki’ah a chi a, a nu’n, ‘Pilvang inla, mi damthei loulua khawng na tawpleh siloh thei uh ahi,’ chi’n a thuhilh hi. Muamuang tuh amau lawmta lak a a melhoihpen ahi. 

Ni khat a pa khual a zin in a lawmnu Muamuang giak di’n a zawn peetmah a, Muamuang leng a va giak hi. A zingchiang nitak in tuailaite biakinn ah lazil in a om ua, huchih lai in Muamuang khophawk lou in a puuk a, kintak in inn ah a pitou uhi. A mit hak gegu napi in kua a phawk kei a, amau leng chimoh in damdawi inn ah a posuk uhi. Ngangai in leng a va zui a, a va giahpih hi. Lamka a te’n leng a loh dingdan thei lou in phai ah a khaksawn ua, phai a va tung uhi. Huai mun a ni nih huchi bang a houpih but louh a a om nung in a si a, innlam ah a pi uhi. 

A zanhahpih ua, Ngangai leng a omden hi. Huai zan zinglam dak nih vel in tangval nih, Suanthang leh Khanliante lenkhawm lai a va vakkhia ua, Ngangaite’ inn kiang a tun un a innsak ua lampi ah khuttum chia khawng vaak phimphem thil khat a mu ua, lamdang a sa mahmah ua, bang a de aw maw, kichi a chiang a a khet uleh a kithehzak a, ‘Lamdang na e maw,’ kichi in a paisan uhi. Inn va pha zual a hong kiiknawnlam un bel bangmah a na om nawn kei. A thil muh uh video a lak uh whatsap tungtawn in a kithehthaang a, a mukha peuh in lamdang a sa ua, bang hi hiam chih bel a kuamah a thei a om kei uh. 

Hun hong paizel a, Ngangai tuh hong kikhek mahmah a, a mu peuh in lamdang a a sa uhi. Ni dang sang in a gawngzaw a, maibeem teitui a thau behbuah hinapi maizawl in a hong ngou hiuhiau a, lamdang sa lou kuamah a om kei uhi. Amah leng a hohnalam peuh ah houpihtu ding tangval a mu samta a, a kipakgu mahmah hi.

Ngangai’ pa tuh a sepna toh kisai a zinzin ahihman in a zin a hong hun nawn a, hun lemtang a la in Ngangai in a lawm Muanching giak ding in a zawn nawn hi. Muanching in bel thil omdan a ngaihsut chiang in gimneih a, a ut het kei. A lawmte huai a va giakte’ tungtang khawng a suut chiang in banghiam om di’n a koih a, thil kituak khawmkha maimai in a sep thei kei. Himahleh a lawmnu’ chialna lah nial ut lou in ut lou pipi in giak di’n a va kuan hi. 

Lauh ding pentak thei het lou napi in a lungsim a nuam het kei a, a ihmu ngam kei. A pindan uh a vangkim a enkual a, banghiam khawng mu guih di’n a kikoih a, a kho-ul bang a pawtzou hial hi. Zan a hong sawt hiaihiai a, amah a halh dedeuh. Huchia kingaihsun dedu a a om lai in kongkhak lam a hong vak puappuap a, a lu phong a a et leh huai a tangval nihte’n video a a lak bangbang uh, vak, dumpian sim, khuttum chia khawng amaulam zuan in a hong kitawn phei a, laumahmah in lah kihangsansak in dip kisai litlit in a na en gige hi. A lupna uh a hong tun dek tak in a lawmnu’ kam apan in tua bang mah a hong pawt a, ama’ lam ah a hong vakphei hi. A nih un kantha a tung ah a hong vakphei ua, ama’ tung a vaklut dia a kisak petmah tak in kantha nakpi in a sing a, tua vakte tuh tuanglai a kidenna uhi. Awl in a hong vaak tou zel ua, Muamuang in a na singkhe zel a, huchia thum vei bang a sinkhiat zoh in tua vaakte tuh a hong kipatna chiat uah a kiiknawn ua, Muamuang ahihleh ihmut het lou in a zanhak pikpek hi. 

A thiltuah kuamah a hilh ngam zok kei a, a tawp in a pi ki’ah a hilh hi. ‘A kau uh eive,’ a pi’n a chi a, ‘Huaite innkuan ka muanmoh sim mah ahi,’ chi in a Ngangai’ nute’ khangthu uh a hilh hi. ‘Lau ke’n la, va giak nawn inla, na hih didan k’on hilh di,’ chi’n a pi’n a hih didan a hilh a, Muamuang tuh a zan nawn in a va giak nawn hi. A giahpihte’ ihmut khitvek nung in zun nawn ding in a va pawt a, innkong a a pi’n a na koih nga matna len them lian lou leh sathu bawm a la a, a lut nawn hi. Zankhang a hong hi nawn a, zan a dan mah in thil a hong nawn petmah hi. Muamuang in leng a pi’ thuhilh bang in lau het lou in a na pang a, a kiang a hong tun tak un a len in ana luak a, a sathu um sung ah a thun a, kiptak a siin in inn kong ah a va koih hi. Tua sathu um a pi’n phalvaak kuamah thohma in a hong la a, khopua ah thuukpi ah a va phuum hi. 

Ngeina bang in zingkal a hong thou ua, Muamuang leng a innlam uah a pai hi. Huai ni apan Ngangaite nuta awlawl in a hong zawngkhaal hiaihiai ua, a meel uh hong kikheek in a nu bang houh melhoih mahmah lai a melsepi a hong suak a, lupna bel ngakzen lou, lah zawngkhaal mahmah in a om hi. A pa uh lung himoh in damdawi inn a zuan thithe ua, Delhi tan hial bang va pha mahle uh a natna ding a thei zou kei uh. Ngangai ahihleh huchilua in a zawngkhal kei a, a mel bel a mel ngeina mah a hon punawn hi. ‘I kau mi’n hon matsak uh eitave. A hong kiik nawn kei uleh hichidenta ding i hi. I va zon ding ahi,’ a nu’n Ngangai ki’ah a chi hi. A muzou di uam?

© Siamsinna leh Vakiangbu