GALTAI

By ~ Vz Vualnam

Mualkui a apa’ sihsual a om va veh Lemting tuh gamtat dingdan theilou in a beidong mahmah hi. Paisan ding lah den mahmah chia beisan ding dinmun a ding hi in a thei a, paisanlouh ding lah innlam a a pasal’ pa teekkuun amah kia nutsiat nilouhdan a theikei zel a, gaal in lah venlam manoh lou, Kaihlam le va luh ding uh chia thuleng a zaakna ulah sawtkuam hita, lung-am tak in a om hi. A tawp in sa-le-gaal kaal ah bangteng tung leh leng kisiamtan louh huaikei, ahun-le-mun in zil lou ahih chiang in chi in pai ding in a hong kisa khong hi. A tanu kum thum mi ding Hoihkim nungpuak in a tapa kum sawm mi ding Mangboi baankaih in Mualkui apan suntanglai in Kaihlam a zuan uhi. 

A pasal Khangin ahihleh sepaih pang ahi a, buai ziak a innlam hong paitheilou nilouh in a om hi. Huchia a pasal’ pa teekkuun leh a tate nih toh Kaihlam a khosa ahi uhi. Ama’ pa Mualkui a sihsual a om, va veh sawm nilouh mahleh gaal buailuat ziak a va veh thei lou nilouh a om, nikhat tuh kho ngaihngaihdan omkei chia va diangkhe khong ahi. 

Nitaklam dak khat leh akim vel ding in Kaihlam a tung ua, khua a luut phet un gaalvengte lawi in ana mu ua, kuamah khosung a om nawn lou a, gamlak a kibu vek uh ahihdan a hilh ua, amau leng kintak a gamlak zuan ding in a hilh uhi. Lemting in a pu uh damdawi a tawi kei kha zenzen ding uh chi in gamlaklam a zotma ua a inn uh va phaak a, a pu uh awmbing damdawi leh naute’ silhthuah ding van khawng va la ding in a inn uh a zuan uhi. 

A inn uh khokhunglam a YPA Hall kiang hive’n, awlmoh het lou a vante a zonlai in thakhat in thau a hong ging zozot a, a kiguih hial hi. Chimoh leh mangbang kisa in a naute a pumkawi a, taipawt pih ding in a kisa a, lah pawlam lauhhuaizaw dia a gintak ziak in lupna kil ah a tate a bohpih hi. Thauging in lah ngaihlam manoh deuhdeuh, khenchia’n a innkil mahmah ua hong ging hileh kilawm in a thei hial hi. Sawt lou nung in meikang ging a hon zapah ua, Lemting in bangvang a pan a etleh a innkang zuazua a mu a, amau’ inn leng hon pha hak lou ding, taikhiat louh theih louh chi in a Hoihkim pua in Mangboi baankaih in a taikhiat pihta hi. 

Huchia sawt tai nai lou chih ding in koilam a hong kipan hiam theih louh thautang in thakhat in a phei a hon vutta mai a, lamkhang a kidenna hi. Mangboi in kapkawm in, ‘Nunu, bang chi e,’ chi’n a nu phong di’n a kisa a, lah photvual ahikei hi. Hoihkim lah kah chihtak in a kap a, a nu’n tha neilou sasa in Hoihkim a puakna a phel a, Mangboi’ kiang ah, ‘Bawi, na pute’ kholam ah kintak in tai un, na nau hoihtak in keem in aw. Lampi na theilai maw bawi, kintak in tai un,’ chi’n tai ding in a sawl hi. 

Mangboi in kap kawmkawm in a nu a phong dek zel a, lah a phong zoukei hi. A nu’n, ‘Bawi, na nau taipih zok in, kei hiai a dai sung ah ka kibu dia, nou zaw na pute’ khua ah tai unla, gaal a ven chiah ka hong pina di aw, hon na ngakngak un aw,’ chi in a sawl teitei a, thauging lah tatsat lou ahihman in Mangboi in leng a nu dai liah a a kaihzoh dandan a kaiphei in, a nu leng a thaneih teng a pang in dailiah ah a kinga hi. Mangboi in a nau pua in khomuallam ah a taiphei ua, a pute’ kholam zuan in kap kawmkawm in a tai uhi. Lemting in a niik botkeek in a phei a tuam a, huchi’n a tuahtuah tuak ding in a om hi.

Sawtlou nung in khosung pasal hon galte nang zou lou in a hong taikeek ua, tangval Khangin, den a Lemting toh kihou’ pa’n Lemtingte’ inn konglak a sisan a muh in a lungsim a nuamkei pah a, tua sisan a zuihbawl leh daipang a kingai Lemting a mu a, Lemting bel khophawklou in ana omta a, ‘A naaklai, khophawk lou eive,’ chi’n a pokhia ua, khonawllam ah a taipih uhi.

Thauging lah dailou, khosung lah kuangzaak ahih chiang in Mangboite unau tuh khawl lou in a taizel ua, a gintaak sang ua hattai zaw ahi ding ua, theihlouh kaal in Baalsawplui a hong tung uhi. Nidang a a nu toh lou a kuan chiang ua tua Baalsawplui kiang a lingmin, a nu’n a lohsak zel a hon mu a, hong hong khaselua in, ‘Nu…,’ chi’n a hong kapkhia a, kinunghei in a kholam uh a en a, himahleh a dawng ding himhim a omkei hi. Huai a pan bel tai zou nawn lou in a nau a kum a, bankaih in mittui paak niuniau in a hong paizel ua, a denlam chiang in Mualnuam lamkaatna a hong tung ua, gimsim mah le uh ni niamta ahihman in khawlna ding hun a nei kei ua, a nau a paipih zel hi. 

Mualkui lampi tuh lampi nuam ahi het kei a, kawl piansim khawng a kumkhiat ahi. Munkhat ah a nau a hong gimlua a, ama’n lah pozou nawn lou ahihman in kawl a suangheng khat ah tomchik khawl ding in a tutpih hi. Huchia a nau toh kipom chittet a a khawl uleh a gim utoh a ihmut uh suaklua ahi ding a, a ihmukha uhi. A hong khanloh tak un khua a na mial a, Mangboi tuh a mangbang mahmah a, lah lohtheih nei lou in khovaak ngak in a om uhi. A nau gilkial in a kap a, lah neek ding bangmah a om kei. A dang uh a taak a, dawn ding tui leng a om kei. Khovak kal ngaklah tak in ihmut leh khanloh thuah in a om uhi.

Phalvaak huihvot lang hialhial in Mangboi a phawng a, aman leng a nau phawng in a pite khua Mualkui a hon zuan nawn uhi. Khut kilen in hong pai tittit ua, luitate, guamte kaan in awlawl in a hong pai ua, a tawp in Mualkui khomual a hong tung uhi. 

Zan a thau ging leh innkang khuluiluite Mualkuite’n na za a na mu uh ahihman in a pi tuh a lung a nuam kei mahmah a, a tute bang a chi ngei di ua aw chi’n nitak in leng a ihmu thei kei. Zingkal baihtak in a thou a, mei khawng toh in ak khawng a khah a, awl in an khawng a hon huan hi. Huchia a gamtat sung in ni a hong suakta hi. Innka tung a dum zalh dia kisa a a omlai a daakleh gaal a Mangboite unau kilen tittit a hong pai a gaalmuh a, ‘Nui, maizen. Ka naute hi lou umaw,’ chi’n a va delh a, ‘Bangchi uh e bawi? Na nu la?’ chi’n aw liing pipilh in a dong hi. Mangboi in thil omdan a hilh khit in a pi a lungzing mahmah a, himahleh naupangte muh a lungkham ut lou in, ‘Na hangsanlua uh bawite,’ chi’n a pi a, innsung a lutpih a, a singpi di uh bawlsak in an khing a suanglum a, a nesak hi. 

(I thadah toh sau le kigelh peih lou ahi. Bleh)

© Siamsinna leh Vakiangbu