ZIMPU TE LAWMTA TANGTHU

~Elshy Tunglut

Zimpu kichi leh Lianpu kichite nidang laiin khokhat hikei mahle-uh skul kai khom kha ahihman un,a ki ngai mah2 uhi. Zimpu min omdan ahihleh akhua uh tam a kiphuak, Khozim-"Zimpu" ahi. A omdan taktuh mi chiip, sum chiit, zim-lungsim neu,ang masial, itna neilou, mi kideih khop, lian lou, neu chih na ahi pen mai ding... Lianpu mah leng a khomin uh tam a kiphuak, Kholian-"Lianpu" ahi. A omdan tak tuh lungsim lian, mi hehpih thei, mi somdawl siam,mite thei siam, hehpih na nei, itna hau chih na hi ding hi.

Lawmta te khotuam tuak himahle uh,a skul kaina uh kibang, niteng phial a ki mu gige, ki thuah gige ahi uhi. A skul kaina mun uh ahihleh- "Lungleizaang" ahi. A omdan tak tuh "Lunglei" i chih chiang in;zuu,nganza,No.4 leh khamtheih tuamtuam tamna mun, lungsu-am thei thil om na mun ahi. Huai ban ah "zaang" i chih chiangin, khopi deih teng kimna hi ngei ding hi. (Mi masa te gen dan in). Zimpu leh Lianpu kithei mahmah leh lawm hoih mahmah, lungput hihna kibang mahmah lou, ahihhang in Lianpu pen mi lunglian, lungduai, chitak, itna leh hehpihna hau, Pathian phawk gige mi; banah Pathian phawk innkuan a kipan ahihman in,a lawmpa Zimpu pen lungsim neu in ki deih khop in, kisa thei tak himahleh a lawm Lianpu in itna a athuah ziakin kingai in kithuah thei mahmah uhi.

Hun hong pai zelin, Zimpu te lawmta leng hong tangval ta un; ngaih bang hong nei tuak ta uhi. Huchi kawmkawm in Zimpu leng a ut a dah in hong om a,khamtheih tuamtuam ah hong bualin, huai kia a hunsak lou in numei-pasal kal thang tatna te ah leng hong puuk lut a, a hinkhua nuam satakin, noptaal in hong om tou den hi. Huchia omom lai zi hong gu phut in, a ngaih mahmah Chingte toh annkuang sawk khawm in, lupna khat hong kikop ta uhi. Himahleh Zimpu'n a min pokha mahmah in, a zi nasan in a pasal theihlouh in nawtkuang (matchstick) tangkhat lel tung ah leng thu anei ngam kei hi. Huai tuh apasal theih louh in nawtkuang (matchstick) tang khat lel leng sai/nawt ngam lou chihna ahi. Zimpu khamtheih leh numei-pasal kal a bual a hihhangin; midang banglou takin, sep-le-bawl a fel mahmah hi. Pa tai matak ahihmanin buh-le-baal bang a hau thei mahmah hi. Sum-le-pai bang a kining chingin a nei gige hi. A hihhangin, khua leh vengte- tagah,meithaite tai na in leng pang theilou hi. Mi'n sum hiam, buh hiam bang va ngen leh leng piak sangin kisial na in nei nak hi. Kasem a, ka zong a, leitang taumoh ka tum a,nei kei ve. Sem ve ua, zong ve ua, cih toh mi piak louh thuah a thangsak mahmah hi. A neina ke, a muhmuh la a, midang a dile chi selou a, huai pompom; adik-diklou le chi selou a, a hamphat na'ng ahihnak leh poisakna himhim neilou hiven, chih tuh a innsak-innkhang, a khopihte houlimna ahi tangpi hi.

Huchi'n Zimpu te nupa in gil-a-gah goutan hoih mahmah ta pasal a hon nei ua, amin ding in apa Zimpu in; kinei thou a, ki nuamtaal thou hiven, chi'n a min ding in "Taalpu" a honsa ta hi. Hun hong pai zelin, a lawmpa Lianpu leng a lungsim lian in, itna hau in, zi bang hon' nei in hong khosa thei mahmah uhi. Huchi'n khua-le-vengte; tagah,meithaite, panpih ngaite panpih in vualzawlna te dong thei mahmah hi. Bangteng tuak mahleh, TOUPA vualzawlna ahi chi'n, Pathian phawkin, Pathian akipan ahi, vualzawlna ka donte, mi panpih thei dia ka omte chi'n TOUPA thupi na pia in kipah thu gen zel hi.

Huchi'n Lianpute nupa'n leng Pathian vualzawlna tangin gil-a-gah goutan ta pasal melhoih mahmah hong nei ua; amin dingin apa Lianpu min lou in, "Lianlal" ahon phuak uhi. A nu-le-pa'n deih thoh takin, Lalpu chi'n a hon sam uhi. Huchi'n Lalpu leng hong khanglian in skul kai thei ahita hi.(A tom lam a genin). A pa'n a neulai a askul kaina mun mah ah "Lungleizaang" ah skul a hon kaisakta hi. Huchi'n a lawmpa Zimpu'n leng a tapa,"Taalpu" leng ana kaisak hi. Huchi'n Taalpu in tuh a min mah pua ahi ngei dinga, "Lungleizaang" khopi, thil teng kimna ah tuh, a nuam taal mahmah a, a mah vualzawltu, amah pitu, Toupa a Pathian phawk lou, a ut dandan in a hong kitaal ta hi. Huchia a omlai in, nikhat nasatakin Taalpu a hong damlou hi. A nu-le-pa leng lungkham lua in damdawi in ah tai/paipih pah uhi. Huchia damlou gimtaka omlai Dr.(Doctor) pa'n a hong et dek leh damsiang vilvel bangin hong oma, a nu-le-pa'n leng damsiang ding mah sain kipaktakin innlam zuan kik pah uhi. Huchia inn atung uh toh kitawnin a damlouh na amasa sangin nasa zaw in hong kipan nawn in, a nu-le-pate lungkham mahmah ua a om lai in, apa (Zimpu) lawm Lianpu leng Zimpute inn hoh ding chi a hong lut toh kituakin, Eh..!!! Lawm.... bang ana chi uh e? Naupa damlou lah abang a chia a dot leh alawmpa'n (Zimpu) leng Lianpu thu omdan teng hilh ta hi. Huchia kihou zou phet Lianpu leng kintaka pai vengveng in a veng ua Pastor vasam ta hi. Huchia hong tung kik tak un Pastor in leng Zimpu kiangah huchia i nau uh damlou ahihleh thumsakna kon nei di aw chi'n hong gen hi. Inntekpa leng Pathian phawk kha lou himhim ahihmanin a lungsim in a na ut khol kei hi. Himahleh a lawmpa vasap ahihmanin nial ngam samlou in 'ole' hon chi nulnul hi. Pastor pa'n leng damlou tungah a BIBLE koih in thumna hong nei panta hi. Huchia hong neih laikn Taalpu leng hong buaise deuhdeuh in hong kikou kheta hi. Hong kitunga, TOUPA, TOUPA chi'n hong kikou kheta zoihzoih mai hi. Lianpu leng Pathian a ginna hattak nei ahihmanin ahihtheih tawpin ana thum hi. Tua mah bangin a kianga om te'n leng ahihtheih dandan un a nathumpih uhi. Huchi'n Pastor pa'n leng a sunga Setan om tuh Pathian minin hong hawl kheta hi. Huchi'n Taalpu hong damsiang vivel mawk hi. A innsung uah kipahna hong dimin, a pa'n (Zimpu) leng kei chit lou man ahi chi kawmin Pathian kiangah ngaihdam hon ngen hi. Tuni akipan "Kei leh ka innkuan te'n Pathian nung zuiin amah adingin gin om takin ka damsung teng ka hing ding uh" chi'n hamchiam ta hi. Pathian pahtak innkuan ka hong hih touh det theih na dingun, azahtak huai Pastor leh hiai a ka thiltuah uh mu a, hong paikhawm te'n Thumna a na hon phok touh det uh hong ngen ka hi, chi'n a thugen hong zou hi.

Huchi'n, Lianpi tapa bel; a pa thu awi, thumangin, "Lungleizaang" thilteng kimna a om himahleh, a pa thu hilh nate vom tinten in lai hong siam tou in, a min mah hon pua in; milian, milal, hong suak ta hi. A pa'n TOUPA a Pathian thei a, a om ziakin a tapa Lalpu'n leng a pa Pathian hong theih ziakin; milian, milal, hong suak hi zaw dan hi. JESU KHRIST sisan tungtawn a Pathian thei leh Pathian theih; Innkuante zaw leitung ah leng, sum-lou in, zim lou in, paak bang in hong paak khia uhi. [Nuu...!!! A en huai tel uh hiai te innkuan, chih tuh mite gen pen ahi mai hi.

I tangthu gen phuah tawm, i deih peh ahihleh lawmta te apat a zillai; Pathian phawk a, hon it banga midang te it a, diktatna toh thu tak a om ding, Pathian hon pahtak theih na din, ei lam ah hon phut khat om hi. Amah thei a, kihtaa, a itna kikoppih ngei ahi. Huchi hileh "Pathian pahtak Innkuan" hi nailou te leng i hi thei dia, a hisate leng a masa sangin Pathian leh mite muan kihi thei ding hi.

"Ka Kipak"

©Siamsinna leh Vakiangbu