ZODAWN ZINNA

~Song Sing Son

Ka veng uh mei (Electric)sia ahihman in phone charging ding in veng dang ah ka kuan a ka phon charging na ding mun ka tun nung sot kihal lo lou in "Tung Pathian sehsa Damsung" chin ka phone hong ging henhen a ken le en ngam zok lou in gep thoh phial in ka phone kava naih a ka khuttal a nol phei gaih in bang a poimoh om hia chia ka dot leh gintak huai lou pi khat in ka U ana hi maksa kawm lah dip kisai guih zozen in thu omdan ka kan chian ta hi. Ka u ahih lam ka theih phet in nidang a kamsiam ngei mawngmawng lou pi kamsiam theih top suah in bang a thukin thubuai om hia? Chin ka dot toh kiton in Zodawn lam a om ipa thu khat hon khak achi a ken le thei ut in kadot beh ngal hi. Ka U in ipa'n na dam liai nak ua leh hong paito phot un achi chin hon hilh a, aguk in bel ut huai kei na e lampi hoihlouh toh ka chi hi. Aziak bel ki pasal sak sim mah leng gari bang kham di khop ki leizou lua ahih chiang a lin pipi ole ka chi ta hi.Azingchia pai di kihi ngal ahih leh chi'n lawmte kiang ah dakkal 3 khong ka va tel tei a amau ma in ka pai a zingchia hon zin san di kahih chiang in kavan di kasak sam ngai di ahih chiah kei ana pai masa ning chin kalawmte ka paisan ta hi.

Ki oi lo pipi a pai suk ka hih man in nuam kasa khol kei a, himahleh aloutheilo a zingchia pai ngai ahih man in inlam zuan in kapai a, inn ka tun in van tamlou tuipuan(polythene), ah ka thun a van sa khin chu hi phot, lum din ka kisa a imut ma deuh in message thum hiam gelh in ka imuta. Zingkal thou zou ngeilo bang kha in hon phong ata diam khovak ma in ka khanglo zihzeh thou lele hih di omtuanlo chia ka imut thakthak leh khovak lam phok vetlo in dak 5:15 am in ka phok a thou khia in kivan khin dimdiam in kihahsiang in ka vante ka kai khawm a hoihtak ka etchet nung in zodawn lam zin din auto ah kon tuang ta a, vangsiat huai tak in bahara dia hon kipia pen sumang kana himaimah.

Dakkal bang zah hiam nung in gari hon man a kipan khia in Zodawn ka pianna khua zuan in ka hon tai veng veng uhi. Bang tan hiam ka tai nung un Check Post tung in gari ah kum khia in ka ID Card la in check hon bolpa ka lak a akhut ah ka pia alehlam ka ngat san zual hi a etzoh in kisuanlah mel deuh in ka I Card hon pia a kenle ka nuih san lel hi. Nidang a ki pasal sak gige pa tuh kanau te nih toh zin ka hih man un lungsim pichin sak ngai ta khat kapang ah khat ka phei tung ah tusak in ka kol tou hi. Lampi a kapai hun un tohlet(Window) ah kidak thei ahih man in ka dak khia a mualte tangte dum diai te ka mu a kalung bang aleng zozen hi. Hiai hun thil khat ka lungsim ah hong om mawk a huai tuh I Zogam uh ahi chi namah a Talpak ten enlah eive ua le mw chin kei kia ka ki hou a kagei aten mak hon sa mahmah uhi.

Ka paizel ua, huih vot hiauhiau hon nung a anuam khop mau kholum lai a huihvot nung anop dan i theih vek uh hiven. Lengthe chituamtuam uleng, baalthe,galngam daktak te khuang veuveu ka lungtang hon vut a i zougam ipu ipa ua pan iluah namdang ten hon laksak di chu ka ngaingam kei chin keikia ka pau khekha zel kagei aten bel ahai hi di chia hon lauh bol maimah uhi. Dakkal bangzah hiam ka tai nung un Singngat ka tung ua,kum khia in singpi hotel ah ka lut ngal uhi. Ni bangle hongsun dek ta gilbang kial ta ahihman in nek ding dawn ding te ka dawn khit uh sotlou nung un gari hon ging non a keile ka naute toh gari ah kal ngal in kipan khe non in kong pai nonta uhi. Minute 15 khong ka tai nung un lampi hoihlouh hong kipan ta Bus sung a tuang himah leng agim in ka gim hi, ka lungsim hong se guih mawk a Heutu te mohsak na ka lungsim ah hong om mawk a huai bel lampi ahoihlouh ziak a ka ngaihtuah na ahi huai tuh amau le paipai thou uh hia hoihtak bol mai le uh chih khong kana ngaih tuah hi.Dakkal 3 leh li kikal khong ka tai nung un ka hoh tupna ka pianna khua ka tung a ka tun tung inbel gari khamsim mah leng minute sawm 30 leng khol manlou in huan ah ka lut ngal a nek ding zong in ka phe vengvung hi. Khua hong mial ding in ahong kisa ta kiphaijang misak hon chih di uh bel ka lau mahmah a electric omlo ahih man in chim in ka chim mai hi. Hih ding dang omlou ahih man in ka lumpah hi.

Gari tuanna gimsim chu ka hi ngei dia mang bang ka nei a ka mang in gaal peuh kap in kahah pan mahmah hi. Zing khua hong vak ding hong hita aak masa hong khuang a, Khuangphilit, Simbu tanglit leh vasa chituamtuam te hong ham siausiau ua zingkal bang ka thou pah kha zozen hi. Lamka tual a kiza ngeilo Vahui(huiva) bang hon ham a ka lung hon su leng mahmah mai hi. Huai kia le hilou in va-ak bang hong ham Aakpa bang hong khuang a I zougam uh it huai ahihdan leh nop ahihdan ka musuah thakthak hi. Khokhang lam khong ah kiza mialmial in Sakhi hon hok vengveng hi, Singtang gam a khang khia himahleng ka pianna khua nuam kasak laitak a Lamka tual a siamsin a paikhia ka Hih man in Zougam bel ka khelah pet mah hi. Zing annek hong hun a anne din dohkan ah katu a ka lungsim khat in kakipak petmah aziak ahih leh Mehtui mawl limsa kahih ban ah akiloukhe tawm meh di kahih ziak in ka kipak petmah. Aleh lam tak ah lah ka kha siat tha asuak zozen hi. Aziak ahih leh lamka tual ah bel meh ding leithoh ngai a singtang(zodawn),ah bel akilou tawm limchi tak kihuan a lamka ah bel avuai nemnum khong man tampipi a kilei chih ka ngaihtuah kha zozen hi. Huai kia leng hilou in Supply antang chih te om se lou Singtang pa khohsa mah singtang buh mah kine pinpin hi.

Gil avah thei mahmah mai hi.... Meh lah limlo chih omse lou huansung ah i duhduh kiloh himai. Huai hun chiah zaw kua mah ki eng vetlou dan eive. Annek khit vai kuan hong hun a vai kuan ding a kisa in lou lam manoh in ka hong kuan suk ta chu..................... Lampi ah vasa tuamtuam zem nalh pipi a Pathian in a bawl te kailiak talsan chi 12 akizem bang, va puansan silh bang, tukrou, leh sailuvual bang ka mu a nidang a vasa beng a ka kuan lai khong hon phok sak mahmah mai hi.

Zusa chi ah Zulei, penglam sakamkei, thete leh biang chih te khong ka muzel a lung len hon kaipuang dedeuh mai. Ki awm tholh chi gul chituam tuam gulngong san, gulvom,gulha ,sakhigul leh thankik chi ah tangteuh, talmaam leh Tang bang le ka va mu kha zen houh hi. Hiai te ka muh chiang in i Zogam uh talpak ten hon deihgoh ziak uh hiai te ziak ei vele maw ka chizel. Hiai ziak eivele maw Talpak ten ah 1951 Cencus et di chia hon ngiat uh chih bang ka phok khia a ka heh tha bang a suak tuntun mai hi. Maban sawn zel in ka pai zel a sing kung chi tuamtuam meleng,tuaiteng,theikhuang tawm ,naldiap leh bil sing te bang lampi ah kamu suk zel lai hi. Khaugui chi ah thuulpi, leenggui,khaukang, tangval khau bang ka mu lai hi.I zogam uh hoihdan sing lelou hin hoihdan ka mit a va mu ka hih man in ka mit atai mahmah hi.Ling leh khau chi ah bel imu gui, maimang gui, inkan khau, chipkhau leh veihnam khauh kumleng bang ka mu kha zel hi. I gam uh zaw singlelou kim thou eive mae? Ling chi ah bel lingmin, Kachin lingmin kanval ling,lingmin vom te khong kava mu hi. I zogam uh hing dipdip leh tuipaai tak talpak ten a muh chiang un hon duh goh lo mahmah uhi. Thagum thatang in lah hon laksak ngam kei ua,amau toh teh ding in milip tomchik himah le hang singtam mite lungtang phatdan leh poisak i neih tawm dan leh ipu ipa te uh khang a pan a gaalhang leh loungam ihih dan uh haih lou in khovel pilna toh kituak in pilsiam tak in hon laksak sawm uhi. Huai ziak in na hih theih na lam lam ah i gam i lei humbit in chin leh ha suan a ngaih a thagum thatang a ngaihna mun a pang thei ding in na hih theih nana ah nang le pang tei in hiai thugelh tungtawn in pan la thak ni.

©Siamsinna leh Vakiangbu