PMEGP

By ~ Vz Vualnam

‘Ash, bank manager-te khat khawng meltheih om leh hoih di hia. Tulai mi’n PMEGP loan lala ua, laak uthuai hi veh aw. U Nemliante’n le la ua, dit khollouh a le poi khollou chi ua, hi chia omom thei uh. Huchidan khawng muh theihdan om leh ka naak ut, gari neu khat deihhuai,’ Kimnem in a chi a, ‘Hon la ngut inla, ka phone di hoih deuh hon leisak aw,’ chi’n Hoihching in a chiamnuih hi. ‘Bank manager khat in zaw hon trytry mah hive’n. Ka ngaih theihlam mi ahikei a,’ a chi behlap hi.

Lianthang tuh bank manager ahi a, Lamka a a posting laitak ahi. Bank a a sep ma pek a pan Hoihching a deih a, himahleh bank a a sep nung tanpha in leng Hoihching in a deih nuamkei hi. Huchia lam-etna a neih hetlouh nung in ni khat Hoihching bank ah a va hoh a, account hong ut a hihdan a gen a, ‘A fill up didan le ka theihlouhpi, hon fill up sak mai aw,’ chi’n Lianthang’ dohkan ah sawtpi a va tu nilouh hi. Houlim kawmkawm in a fill up ua, nidang sang a a kamsiam zawk ziak in Lianthang in lamdang a sagu sim a, lah account hong ut hive’n huaiziak khawng hi’n teh, chi’n a kipehoih nuamkei hi. A fill up ua a account a hon sung teng uh leng Hoihching a tu nilouh a, a houlim nilouh uhi. A zoh un Hoihching pai ding in a kisa a, ‘Na number ngeimah hia na zat? Kithuzaklouhna a sawtta a. Bank toh kisai ka poimohna a omleh hon dong di k’eihkha aw,’ a chi a, Lianthang in, ‘Hi, ni dang a ka zat pen mah hilai. Hon dong lawtel aw,’ a chithuk a, Hoihching a paita hi.

A nitak in Hoihching in Lianthang a text a, Lianthang kilam-en loulua ahihman in a hi heihuai zezen hi. Huchia a ki-text tuah nilouh nalam un zan bang a sawt man zezen hi. Kalnawn a a tanaute’ kitenna a va hohpih ding in Hoihching in Lianthang a chial a, Lianthang leng a kipakgu mahmah a, manthei ding ahihdan a gen hi. 

A kaalnawn in kitenna ah a va hoh ngei ngut ua, Hoihching tuh a kizepna toh ni dang sang a hoihzaw hi in Lianthang in a thei a, a ngaihna a puang a, a lung a leng mahmah hi. Himahleh a kilam-en sak utkei a, lawm bang lel a et teitei a sawm hi. A lungsim guuk in bel haksa a sa mahmah. Huai a pan in Hoihching in a houpih zezeuh a, a inn ua va pawt ding khawng bang in a chial zel hi. Lianthang in bel Hoihching lungsim theih haksa a sa a, hon deih bawl hia, ahihkaleh lawmdan a hon en maimai hia chih a khenkak zoukei. Va hahthuah luat ding lah den chia lawm bang a en hileh amah lungleng thawn phet ding, thuahlouh ding lah deihbawl hikhaleh chih khawng saikaak in Lianthang tuh a lungbuai mahmah hi. 

Huchia a kihoutouh zel lai un khatvei ngaihzawng thu khawng a houlim ua, a neih leh neihlouh khawng uh a kidongtuah uhi. ‘Kei zaw n’on deih nawn hetkei di maw,’ Hoihching in a chi a, Lianpu’n, ‘K’on deihlouh lai a omkei. Deihlouh hun leng k’on neikei di. Nang n’on deihkei a hive’n,’ chi’n a dawng hi. ‘Hon deihlou le ka hikei. Pasal neih ka utpahlouh ziak hi. Nang lah zi neihpah ut na hih chia,’ Hoihching in a chi nawn hi. ‘A’ihleh tua le man nailou mawleh,?’ Thangpu’n a dong a, ‘Manlouh luat chih le omkei, man luat chih le omkei,’ Hoihching in a chi hi. ‘Zi neihpah zaw ut mah ing. I kum in le chinta, nu leh pa le theihlouh kaal a a tha uh kiam hulhul. Tuu bang muman in don man sam le uh uthuai. Hilele n’on deih di naak leh hon ngakzek le poi ka sakei,’ Liangthang in a chih tak in Hoihching in, ‘Kei toh hinkhua zatkhawm na ut leh kei le nang toh hinkhua zatkhawm ka ut,’ chi’n a dawng a, hichi bang a a lam-et hetlouh a hinkhua hong kiheek tuh Lianthang a kipak mahmah a, tu mahmah a thil tung tuh a manglam bang a sa hial a, a gingta theikei hi. 

Hun hong paizel a, ni khat Hoihching in Lianthang kiang ah, ‘Ka lawmte chi le kei sa upa zawtham, ka vengte uh khat in PMEGP loan deih a, hon gensak aw, chichi a, hilele k’on gen ut ngeilouh. Zanlam teng hon hahgen lua a, k’on gen himhim hi,’ a chi a, Lianthang in, ‘Bang chi bang mi a? Mi diktat hia?,’ chi’n a dong a, Hoihching in, ‘Diktat thou mah in teh. Lapawl a le pang gige, tuailai makai a le pang hia maw,’ a chih tak in Lianthang in, ‘Hong hoh leh eivoi, khat vei,’ a chi a, Hoihching thumu kisa in, ‘Khatvei k’on hohpih di aw,’ a chita hi.

Huai nung sawtlou in Hoihching in a lawmnu Kimnem tonpih in Lianthang a va mu ua, Lianthang in PMEGP loan bang hi a, bang chi laak a, bang chi dit ding hiam chihte nouneel tak in a na suutpih a, ‘Hiai PMEGP loan mi’n dit di et a enlou ua, huai ziak a mi nazong le kipe ngamlou. Lamka zaang bang a hiai loan la a dinlou a dim a om. Bank a semte’ tunggikna lel suak. Hoihtak in ka din ding na chih leh ka hon pe thei. Hilele na chihtakkei leh bel kou a dia haksatna tuntu ahi,’ chi’n ana kum hi. Hoihtak a dit a ut thu a gen a, Lianthang in leng a hih ding teng uh hilh in lai poimoh teng kaikhawm a kha nawn chia va hoh nawn ding in a hilh hi.

Lianthangte lawmta tuh kiten ding thu khawng a houlim zel ua, Lianthang in a nohbawl sim zel a, huai chiang in Hoihching in, ‘K’on ngak ngap na chi a kei hiam,’ chi’n a pang zel hi. A tawp in tukum kumtawplam beek hi heh, a chi khong hi. Lianthang tuh zi neihna ding naita chi’n a guuk in a kisa beemten a, a inn bang uh puahpha in lupna bang liantak a bawlsak dengdong hi. Thupi deuh a lawm ding chi in singtanglam ah sial bang a thukhak hial hi. A sungte bang a hilh a, a sungte leng mou nei khong ding chi in a kipak mahmah ua, a ngaklah chiat uhi. 

Kimnem in lai poimoh teng kaikhawm in a va hoh nawn a, Lianthang in ana saisak in loan tuh ana peta hi. ‘A lopna di’n khatvei koi hiam ah an i nekhawm kei di ua maw,’ Kimnem in a chi a, Lianthang in bel huaikhawng ngai hetlou a hihdan a hilh hi. Himahleh Kimnem in a sawm teitei ziak in khatvei tuh a thum un Tamneem ah a va hoh ua, nitum phial in hun a va zang uhi. 

‘I tup lah tangtungta ahih chiah tu’n zaw na utleh khenta aw,’ Kimnem in nui lualua kawm in Hoihching kia’h a chi a, ‘Va khen mawk di le hehpihhuai sim zel. Misia zaw hi hetlou hia. Hilele ngai thei mahmahlou ka hi. Bang suanlam bawl di le a diam maw. Tukum tawplam chia kiten di chih khawng hilai ei ka kikhemnate uh. Huai chikei le lah hon khenkha leh i thilsai buai di ahih chia,’ chi’n hihfuh kisa in a houlim uhi. ‘Awlawl in limsakkei hiaihiai inla, a hong lungkimlouh chiah nang le kihehsak inla, tawpsan le teh, haksa loupi. I siamsa vek a ka,’ chi’n bangmah in a simsakkei hi.

Lianthang tuh zi neih ding khawng ngaihtuah in a lungnuam mahmah a, kithalawpna ngen in a dim hi. Hoihching’ lawmte a dia thilhoih hihthei dinmun a a om bang a kipak mahmah a, a lungkim mahmah hi. Huchi’n a tung a thil hong tung pah ding thei hetlou in lungkim tak in a hinkhua a zang tadih hi.

© Siamsinna leh Vakiangbu