TUNNU KAHTAM THAIKAWI

Laigelh ~ Th. SuanKham.

Ka it mahmah kata aw, dam in na omna mo bawi? Na kiang ah gen ut tampi kanei, himahleh tua thute gentheihna ding a na om louh ziak in, mittui luang zungzung leh lungtang ki tamzan a, khutling deldel kawm in hiai lai nang a ding in ka gelhta mai hi. Bawi misisa suun bang mai a, ban gtan honsuun laiding ka hi dia? Hun honsak pih nailou a tuasang a tamzaw thuaklai ding a hon deih mo, bawi? Ken 

zaw haksatna na tuah khak ding ka lauhlauh maizen tawh mo….

Ka hon itna nengchik bek theisiam hi lechin zaw ka ut ngei. Tuisik na hih a na taksa nangawn a kisiam ma a kipan haksatna ana thuak keive. Bawi A kha a sim thilgim natawm zasiamlou a sungnim, luna, ann duhlou leh thazawi ngoihngoih a hinkhua ka zat hun a, ka om ding dan na ngaihtuah khangei hia? Kha tamtak kaduh kadeih natawm ne ngamlou a, ka ut dandan a leng omtheilou, gilvah keihkuih a, natna chi tuamtuam leh haksatna thuak a ka omnate bang ziak ahi di? Sihsual khop in si-leh-nai luang in ka hon nei khia a, ka taksa natna in tuamdim mah leh na mel ka muh a ka lungtang kipah na a dim 

eive. Tua bang chi hita ka hi di? Na mel ka muh chiang a launa a ka pumdim mai mah? Na mel ka muh 

masak ni a ka kipah na bangbang, hiai leitung ah ka damsung in khatvei chauh hi leh leng hon pekik 

maive. En dih bawi bang mah gentheilou a na utlouh dan, nop na saklouh dan, na hon hilhtheih na om 

sun, kah a hihlai a na kipah na ding leh na nopsak na ding hon zonsaktu na Nu kei ve. Zan khovak a na kah hun a le ken zaw hon hehnem ing a, nakipah nading na lungkimna ding, hon zonsak den hi ing a; tua bang ziak a hon kapsak dentel awi?

Tomchik sung hileh leng kipak in hon nuisak zel sam ve.... Hiai leitung a na pian ma ngai zen a 

om zaw ning lota kei ve. Naduh, nadeih khong gen a na pautheih tung a zaw kipah na a dim ing a, kata'n hiai duh a hiai deih eive chi a ka duhpipi leng ne ngamlou a nang hon pia ing a, tua na duh na deih na gente kei a ding a hon votu leh hon lungngai saktu mo ahih tak mai..... Bawi mi nute tawh na hon teh chiang in hichi lawmlawm tel a hai chin na hon hansan zialzial zel a; hilehleng mo, bangmah theilou a, naduh, nadeih na tawm gentheilou a na om lai a, alim, a-al hon pia a, na om ding dan, na gamtat ding dan hon sinsak a, ittak leh duattak mai a nawp nasak theih nading, hon ngaihtuah saktu kua a? Nataksa bawtlawh takmai a a omlai a, na ki hahsiang ding dan hon hilh a, min hon houpih hun a, na dawn ding dan; na hih ding leh na hihlouh ding tanpha, hon sinsak tu mihai, bangmah theilou, ka hih leh bawi, nang mibang chibang ta na hi di?

Na khanlet hun ding ngaklah takmai a, ka om lai a ka duhthusamte tua bang chi maimah ahita dia aw mo? Hong khanglian di china ka gimthuakna leh ka gentheihnate, ka kipahna hong hi dia, lametna lianpi natung a nei zo hi ing a. Ka gentheihna leh ka haksatna behlap tu mo na hong hih maimah.... Mi theihbang thei a, mibang a pilna leh siamna, na neih theih na ding a, maizumna leh zahtakna neilou bang mai a mi maigum leh kamsia thuak a ka khutdawh nate tuakei na hon simmohna leh muhsitna mo a hong hih mai mah. A lawhching Nu hih zaw utlua hi ing a. Alim a-al natawm ne-ngamlou a, azu-ahaam teng thuak. Na nawpsakna ding ngaihtuah a singnuai gammual a, ling leh khau kapal lai a ka lametna bang chi a mai zen a le Bawi?

Mi tampiten hiai ka ta eive chi a atate uh a ki saktheih pih mahmah lai ua ken kata na hih lam a hontheih khak ding uh na tawm lau a bangtan hinkhua zang lai ding ka hitel dia aw mo? Bawi, leitung a ka lametna leh ka ki ngakna om sun nang hi chin a tua ka lametna leh ka kingakna bangchi nahi tamai a le... ka kiang a na om chiang in na hon ning a na ut leh dah in na hon hou zialzial zel a. Himahleh mo bawi, ka kiang a na om louh zek chiang a ka ngaihtuah mo “Kata bang a chidia aw? Bangchi’n a om dia aw? A lawmte lak ah vuallel tak in a va om kha dia aw? Hong pai leh bang chi bang in inn hong tung dia aw? Silh-leh-ten lah a hoih guan zoulou ing a mite simmoh leh chiamnuih bawlna lel houh a va hi dia aw?” chi a lung khamna tawh hun a na zang ing a, inn a na hong pai chiang a lah houpih ngam ding leleng hilou na duh na deih gen chin a, “Huai va hichih oh, huai va khachih oh!” chi a na suak leh sikha bang mai a honbawl maimah chin a, bawi ka kinepna leh ka lametna om sun nang hi chin a tua bang chi na hita mai a le? Hiai leitung a nadam sung in nikhat tei haksatna leh beidotna na hontuak ngeingei ding a “Nu...” chi in ngai mahmah in na hon sam ding chih kathei. Himahleh tuahun ma in itna aw-nem tawh khatvei chauh hi leh leng honsam le chin bang chiphet in na Nu ka kipak dia aw mo? Hiai leitung a Nu tampi om mahleh nang a ding a Nu omsun kahi a, na Nu ding dang himhim. Zong le chinleng chikmah chiang in na mu kei ding hi. 

Mi tampiten ittu ding Nu natawm nei nawnlou in “Nu” chi in samsam mahle uh dawngtu ding a om kei a ngai mahmah in “Nu honpia un khovel ka khek lumlet ding” a chih hial lai un na Nu’n nang a ding a phattuam na neilou mah ka hi diam? Nik leh puan a hoih a leng kivan manlou zen a kon khualnate tua kei hon votu mo ahihtak mai? Na hinna ding a ka sapum leh ka hinna natawm pengam ding khop hial a ka sisan a honna vak lian hi’ng a ka it mahmah kata tua bang hongchi na hita mai zen a? Min kipah na tawh biak inn a zot lai ua ken bangtan mittui tawh zuan lai ding ka maizen a le? Na lawm leh vualte’n a hihtheih tawp uh suah a kipahna tawh Pathian a phat hunchiang ua amaute lak a tel sam ding a hon gingta ing a, huai hun chiang a nang koi a om na tamai a le? Bawi, Pathian mizat leh a kha omna hiding a hon lam-en lua zo hi ing a tua bang hongchi na hita mai zena? Ka dam sung ka mit a kon muhtheih sung ngeingei in Pathian neimi leh Pathian mizat hong hi ve mo bawi? Hiai thute mang ngilh ken, na Nu nang a ding in tawplou in Pathian kiang ah ka thum lai. PATHIAN neitu leh PATHIAN mi zat na hong hih kal na Nu’n ngaklah gige ka hi. PATHIAN nang in a tasam kei a nang PATHIAN a tasam na hi zawm, tuni tan dong na ma honpitu TOUPA ahi. 

~~BEITA~

© Siamsinna leh Vakiangbu