MANTA LE KHAMTHEIH DAN ANA HI EIVE LE

By ~ GM Guite

Kaneu deuh lai chizen mah le tuale chu kilian tuanlou kum tawm lai chih mai di hi maw, kakhua ua siamsinna mun(school) thum bang om hi. Huai lak ah nihte bel nidang a school hoih leh Naupang tampite khankhiakna ana hi uh hi. Kouloi school kaithei ka hong hih hun unbel a kelam pian hisimta uh ahi. School teng lak a a thakpen a kihontoh kiton in admission bawl in school kai chu a kihi mai ta ve. Kou kaina school ahih leh Grace English Jr. High School ahi a kakhua nol ua kawlnuai tak a om ahi a kawlkong a om chih mah tak huih bang hatmah mah vuvut sek hi. Naupang damthei lua kihi kei mah leh om maimai thei lou pawl aki hikha veve hi. Lawm ngai aki hih man in lawm leh vual kihau in mah ni khom a nuam sa zaw ki hisam, Innkuan khosakna lam ah bel annek hunteng a nekdi bel omsam a limlua nezou bel ki hisam lou hi. Khrismas hun chiang inbel second Hand van (pijama) khong kinei zou sam- Malta leh Dum khongtoh kikheng thei zel ahih man in..

Hunte hongpai zel in laisiam ziak chih le hituan lou pawl khat bang le kum nihnih bang ihon sim touh chia kum 10 school kai nung achu pawl nga(5) bang kizou thei sam hin maw. Huai hun a hon enkol ka schoolpute kuhkalna ziak leh kanu hon thumsaknate ziak in fail chih gige zumhuai honsa in pass lunggulhna kon neithei a nitak laisim bangle akiza phachiang a school naupang kahih pihte thawm adaih masiah keileng tawp ka sawm kei thei vang lak hi. Tua bang a kum thum sung kongpan leh ka khua ua kaitheih na tan kaibei thei in kong om khongsam aka. Huai kumthum hunkha ka ngaihtuah thak chiang in kei adia hinkho bawlna kalbi masa ana hih lam ka phok thak thak hi. Pawl guk (6) kasim hun a kum 15 bang kipha ahih man in huaihun lai a kakhua ua kiloh na baihsam mahmah gamlak a sing-at sa vaput a khua tunchia singputman kilak neih ahih man in school kai louhni chiang in sing-at pu a kikuan zel in school kaina a ei poimoh-pen,pencil,exercise book leh khateng tuition fee dikhop kiloh suah zou mahmah ahih man in Nute kithadon zou mahmah hi. Class 6-8 kalbang kumbul a admission leh textbook+ Uniform chihte hon leisak zohnak uh leh adangteng ei leh ei kitoudelh zoh in om a eimah muhsuah sa khong I fee a ikipiak in laisim awlmoh na khang sak ahih man in Division hoihtak toh kumtawp result bang kingah thei khongkhong samta hi. Huaihun lai in weekly New- *Lengpeel news* hawm in kipang a khakhat in Rs. 30 hon loh sak ua Singpu a kiloh manteng toh kanun a sawm akhat honna piaksak kha sinsakna hoihtak honna piak ahih man in kipah huai kasa petmah, tunitan kasutzop theih ziak in vangpha ka kisa mahmah mai hi.

Awle, pawlkua siinthei dinmun a kong om chiang in Lamka lam a kaidin kahong kisa a sum neihsa omlou admission fee di muh theih khak leh chi in ka Utoh sing kon at uh zaw a gimhuai telmai, Ka U a tung a pang kei a nuai lam ah pang cubic 6 bang kon at zoh un ka U'n abat in sum izong zaw mai di honchi a ka khawl uh hi. A khonung lam a itheih thak leh ei sing-at theilou pitoh sing-at kha tawlhuai sa luatel dan ana hi.Lamka ah ka U toh zinsuk in Ebenezer ah admission kava bawl uh hi. Kei mi Inn varanda tung neuchik lupna tatna lek luah din honnu sia a Innlam ah honna paisan a eichauh om ngeilou chih mahtak chu bangtan hiam zaw kihi neunou zawzen aka. khathum vel ka omnung in Hostel room khat hong ong in huai ah ka kituah suk a huai ah bel lawmdi tam ahih man in nuam tuam deuh hi.

Sum leh paihaksa ban ah kiloh tawm a honchawm uh ahih man in mehman dia khakhat a teng 150 khong zeek chenchen chu haksa hina mai zen e. A hamphat huai mahmah khat bel class VIII competition EBC school teng in asai a third position tantungte class IX tuition fee ahon sponsor ziak un Mualnuamte minih in kangah kha ua kei leh kalawmpa adi diak in aphatuam petmah hi. Ei fee kipiak a kaidi hi leh zaw kaizou lou a ka om uh baihsam tak ahi fee pelou a kai akihih hang a niteng poimoh le kinei zou lou hitel lai ahih man in. Pathian in kalampi di uh honna gelsak dan lamdang in thupi kasa petmah ahi.School kholna(Suty) di om chia chu maitetui al maimai mehdi hi lehle Mualnuam kidelh pah chenchen mai dan ahi.Hun bangtan hiam zoh apan chu kiginni teng a Bungmual ah Ka Ulal carpentry ah kuan zing leh nitak Ann amau kia ne in nitak chia paizel summer leh winter vacation chihte lou suah chu Saturday khawlteng a carpenter kihi mai singnawt na letna bang khutpi leh khuttal kikal bang pol teltol den aka, atawp lam a zaw salsuak in vom bibiai zaw zen. Nasem zou paidek chia Rs. 50 khong honpiak chia bangchu kipah huai petmah chini kg khat khong lei in annek chia huai khong a anpolh suk lim kisa mahmah veve. 

Hun hongpai zel a haichi omlam chia Inn lam a pan meh di hon khak uh Ankam honkhak chiang ua Ankam chauh tui al huan in mehmeh mai akal a sim bang meh. Huchi mah bang a beloi,maiteh, phulun chihte bang le a om ngal chu a kal a sim kimeh I chilsim chia bang a tui chauh meh masa in tui leih zel a hong mawl luat mahmah chia a ha ne in gaithei khongkhong zelsam. Meh gah omlam leh Baal omlam chia le tua bang mah a hihtou tou ihih maimah chia I ning tuntun hun zaw om lotel na a om kei leh meh neilou di ihih chia huanzel ngai. Mehnei lou hial a annnek angaih hial chia zaw I annek lai bang a kong kisung kal a om ahi. Min kong hong keuh lele ki hong ut vetlou dan hi'n imeh neih louh lam hongtheih di bang uh kingaingam sam lou ahih chia.Ka Inn kuante'n a om bangbang leh aneih bangbang uh amau leng tam nengam lou a kei a dia hon khak tiptip khong uh kakham kaning hiaite zaw honkhak kei uh chih di zaw hithei kasa mahmah kei amau leng kei maban khualna ziak a aduh leh deih uh le nengam lou a guhtui kangzen a pang hi ua kachih chiang in hon itna uh leh deih sakna uh thupi kasa tuni tan in a tuung ua ka vuingam na di ka mu kei lai a kamuh leng ka gingta kei ahi. 

Khat vei chu Class IX apat a a om om vuakneknek thei iki chih leh a kum thumna vel a chu nekhak sa deuh kihi khadi in manta amah chauh a sathau neuchik akang in ninih bang huai vuak toh an meh tou limkisa thou kachih leh ameh lah ninglou buak lah kibo ngam lou pammaih sa mehdi leina di sum lah om lou a hih chia a khing a iki namtaak touhtouh leh nitaklam nenon di ichih leh kine lutthei nonta lou I etmai lele iluaksuak sungbang nim anim tamai a buai huai khatel e oooo. Manta meh kham a kilo lou phet I etmai lele isung honnim kizoi zou mai ahi. Anvuak inek chia lah supply antang nana na chu zaak phengphang maimah limlua chihna di omlou achang a Inn veng a Kapu Liante'n sameh ahuan khong uh iva nekchiang leh Bungmual a ka Ulalte an inekkhak chia zaw tagah noimuh a kivah pengpang zozen nuam lua hiven.

Tunung a manta bazaar a kizuak kamuh chia le khamphial lai ka hi. A nedidan a kakikoih chia le kamanta kan na bel leh "kamanta" kan meldok lailai in enlah thei mahmah lou maimah. Kum li sung Hostel a om a duhduh hilou a a om om nekngai, a omlouh hun bangle om hizomah lai hun kangaih tuah leh huai bang hunte ana zang ngaplou a School kai ana tawp hileng tu in bang ka suak diam chih kangaih tuah chiah thuakzohna honpia Pathian thupi kasa mahmah ahi.

Manta meh kakham tuk in Kamihing *khelhna lungput, ngaihtuahna gilou, leh hun tampi a kiletsakna/kisaktheihna lungsim kaneih khak zelte* kikham in kikihmah mah leh ka hinkhua ah telsak kei thei leng chih huai hina maizen e......…

26072018

© Siamsinna leh Vakiangbu