BANGZIAK PENTAK A

By ~ Vz Vualnam

Bangziak pentak a hon it ka set a oi, ka ngaihnou,
Na mit ngaihbaang takte’ ziak in hia?
Zuheisuktun a aksi laita tegel bang in a phe sialsial uh!
Na naak laita hiuhuau ziak in houh hia leh?
Loulai a buuk kilawm leh nuam tak mai bang ahi!
Na biang neel hianhiante’ ziak in a maw leh?
Chiangkot keen hiihiai mun nuam tak bang ahi!
Na meel hoih ziak in houh ahi mai di e?
Khaliik zaan a khapi vaak hiihiai bang mai ahi!
Na ang neem thiilthialte’ ziak in hia?
Patungte’ pou zelna tungtuun manphatak bang mai ahi uh!
Na khutzung kilawmtakte’ ziak in a de aw?
Gaw phung a gawtuai kilawm takte bang ahi uh!
Khap dia etlahhuai tak na pheite’ ziak ahi mahmah di e?
Longnahtang kung maam hinhen bangmai ahi uh!
Guam lai a sihtui al luanna zuktalte’ zot,
Pasal khempeuh lunggulh a kimna!
Tuate tengteng ziak a hon it hi leng
A tulthei huai thilte a hong tul chiang un
Ka hon itna a tul maimah diam?
Na nunneemna, na kizenna, na sianthouna,
A detdou tuate’ ziak in k’on it a hia leh?
Na chitlounate’ ziak in k’on itlou tuan a hia?
Huaite’ ziak in k’on it seemseem zawkei maw!
Ka hon it in ka hon ngailaw na a
Ka hon itna’ng a malmal a ka zon chia’n
Ngoh ding pen ka theizou hithetkei!
Itna zaw malmal hizawlou in
A pumpi a itna ahi a a’i di e.
Na sungte leh tanaute tan in lah
K’on deihthoh in k’on nuamtuam ngal a!

©Siamsinna Leh Vakiangbu