HEHNEEM DING DANG OMLOUHNA AH

By ~ Vz Vualnam

Ke’n lah hon it a hon ngai law napi a
Nang n’on it a n’on ngaih theih hetlouh tel zaw
Ka lungtang in puaksiam didan a thei zoukei.
Ka kan ka kan a, ka dong ka dong a,
A tawp in a ziak hilh in ka om khong!
Kideihta tuaknih lah in ka om a,
A kilimsakdan uh! A kiduatdan uh!
A chihchih uh a kithuman zeldan uh!
Kisuk lunghihlouh ding a kikhualdan uh!
Kideihta geel tuh a hong kingai ngei ua,
Awlawl a a kilimsakna uh a kiamdan!
Awlawl a a kiduat peih nawnlouhdan uh!
A tawp a kihuatna a a hong bei maimahdan!
Tuakkhat dangte bel a hong kiteng ua,
Himahleh anisim-akumsim a,
A ki-it tuunglai uh a gamlaat hiaihiaidan uh!
Tu in bel k’on itna a dauna ding
Hun lemtang bawlsak in ka omkei a
Ka hon it masak ni a pan tuni dong
K’on it ngei, k’on limsak ngei in,
Themchik leng kiamlou in, kibehlap zomah in,
Ka hon it in ka hon nuamtuam hi.
Hiai ngei tuh ka hon it utdan him ahi,
A dau ngeilou, a kiam ngeilou, a daai theilou itna,
Tuma, tu leh hun hong tung ding ah!
Kingaite zaw a kideihtaakna uh theng in kikhen thei ua,
Nupate leng a ki-itna uh bei in kima thei ua,
Himahleh k’on itna zaw tuate’ suksiat theihlouh ahi ding!
Huchi bang ahi ding, ka tawldam na’ng ni a hong tun dong!
Huan ka tawldam na’ng hun a hong tun chiang in
Hiai leitung ah ka zon itna ka mu ngei na chi in,
Khamuang in Puandum silh in ka tawldamta ding!
Hehneem ding dang himhim a omlouhna ah,
Hiai thu in ka lungtang hehneem mai heh!

©Siamsinna Leh Vakiangbu