LUNGKE LOU IN AW. . .!

By AchillesLal Yatze

January 10 , 2013 at 4:26pm 

Thumasa:Itna kichi pen mi khempeuh in aneih hi a, mi tamtak te'n itna diktak ana nei leh tangkha in om ua, tamtakte mah in itna kichi ana theisiam taktak lou in, lungsim leh taksa mahmah ah zong ana thuakloh uhi. Mi a naupang ziak hiam, a mi ngaih theihna lungsim aneih a, itna apiak leh tuapen naupang lungsim maimai hi chi a va muhsit bawl di le hituan lou hi. Hiai thugelh na a min omkhate bulhtawm ahi a, akibang nei ina omkhak leh ei' dan in ana kikoih kei ni.

Lalboi kum sawm-le-giat veldiing, a Nu-le-Pa te tapa duat, mi pautawm leh chitak mahmah mi ahi. A khosakna mi sang a niamzaw tuanlou ahihman in Lalboi in adeihte aneilah tuankei. Naupang chik himahleh ngaihzawng bangzah hiam ana neikha ta a, tuhun tak inbel a Facebook a Relationship kichihna munpen ah leng 'Single' chi in koih hi. Hun awl aneih chiang in a hunte Net leh Facebook khoihna dimah in azang a, himahleh thawmhau kisakna chu anei veve. Ngaihzawng aneihlouh ziakmah in ah, a sms bang asubei zou ngeikei hi. Akhenchiang in a lunglen tha bang suak in ahun paisate bang angai a, himahleh hun paisa ahita. A lawm khenkhat, nopni-dahni a om khawmte amuh chiang bang in a enluat hun omkha sek hi. Hunte apai zel a, kho omdan a kikheng zel bang in mihingte' hinkhua leng akikheng zel a, Lalboi ngeileng itna khuukpi a kihei lut nawn di abangta. Tuahun pen Christmas kha ahihtaak man in tleirawl te adiing diak bangin a kisaan huai mahmah ta. 

Lalboi bel a om ngeingei in a om. A phone ah laa khawng ngai in a om a, sms lah azat luatna di a neikei hi. Nitak khat huchia a omlai in number a theihkhak ngeilouh khat apat Lalboi phone ah msg honglut a, amanleng reply pah in huchia ahong kihouhou ua leh a vengte uh mah Mangnu ana hi hi. (MANGNU PEN LALBOI SA KUM 4 KHAWNG A NAUPANG ZAW AHI A, NAUPANG CHIK AHI. HITAMAHLEH, LALBOI IN MANGNU PEN ANA MUHTUUNG APAT HOIH ANA SAK SA HIM A HI A, HOIH ASAK LAMBEL KUAMAH KIAH AGEN KHAKEI. TUA A KI TEXT TAN UN LENG, LALBOI IN HOIH ASAK LAM MANGNU IN THEI NAILOU HI. HUAI KAWMKAL AH, MANGNU INLE PLAN KHAT NEISA AHI MAITHEI, CHIK A A KIHOUPIH NGEI LUA LE HILOU A TEXT MAWK KHA!)

Hun hong pai touzel in Lalboi leh Mangnu leng hong ki text tou den uhi. Ahong kinel hiai hiai ua hohna aneihkhiak chiang bang un a kipituah zel uhi. Akal uah bel bangmah thil a om naikei.A hong kithuzak tam deuhdeuh ua, kichiamnuih tuah bang hön thangsak mahmah ua, atawpin chiamnuih dan mah in hong kingai khata uhi. A kingaihdan uh lempi bang mahleh sawtpi apat zung omsa ahihman in a ki itna pen uh bel thupi petmah hi. A hong kingaih tak chiang un Lalboi leng a omdan hi'n a lungsim hita leh anuam petmah ta. Nidang a sms zangbei zou ngeilou pa, sms chiil pen in ahong pangta. Nikhat a zakhat tan chauh sent khiak theih ahihmanin a deihkhop kei petmah ta.

Hun nuamtak in a hon zangkhawm panta ua, sun hi'n zan hita leh hunlem a om hun teng in ahong kithuahta uhi. Omkhawm gige ahihman un veng kibang a hih u toh, lawm-le-vualte dem bang ahon tuak theita ua; 'a hilou lah hilou a' chi in amau leng poi a sa tuanse kei uhi. Amau adia hun haksa omlou chih bangtuk in kipak leh nuamsa tak in a om uhi. Ahi a, amau adi'n le kipah gige theih ahi tuansam kei. Khatvei, Mangnu alawmteh a vapawt leh, a lawmte' ziak in GJ achihte uh a vachiam khata hi. Chikmah a ahih ngeile hilou ahihmanin akhonung in Mangnu a hong buaise panta. Inn a pai dilah ngamlou, atawpin in a Ulal phone a sam in, thil omdan teng hilh a, a U u ngei inleng lung himoh petmah ahihmanin akin theibang pen in akiang lam azuanta hi.

A vatung a, Mangnu lah buaise petmah ahimai. Lalboi inlah aloh ngaihna athei tuankei. A angsung a kawibelh chihlouh adidan athei kei. Mangnu lah gim kisa, pek a kipek mai in, a thuum hit2 mai hi. Lalboi in ahoupihnate lah dawng thei didan in a omkei. A hong paukhiat theih sunsun chiang inlah, 'U, ka kisiklua, hon ngaidam in aw' chih kan agen beh thei tuankei. Lalboi leng chimoh gawpin a lawm muan mi bangzah hiam a hon sam a, a lawmte a hong tung ua, naupang chik2 ngen ahih man un amau leng bangmah a hihthei tuan kei uhi. Lungkham mah leh Lalboi bei a lawmte amuh chiang in kisuan lahna toh. . a nui mai hi. Huchia amau lawmta teng kikem tit2 a ahong omlai un Mangnu nu' in thakhat in ahong tuakta hi.

Mangnu nu'n ahong tuahphet chiang in abuai semsem uh. Lawmta te hihkhelh omkei mahleh a zum uh toh a kisuanglah petmah ua, bangmah lah agen khethei sam kei uhi. A kisuanlah na uleh a zum na uh theipha lou in Mangnu Nu'n lawmta te ahon kou ziarziar ta hi. A kounate lawmta te bilkha ah mangnawn di vual ahita kei. Dawng ek sawm mahle uh lawmtate'n a lawmpa uh Lalboi akhualna ziak un a dawng kei lel uhi. Lalboi in lah etna di leng a thei nawn kei. A zum petmah. Kouna tampi thuak in a hong kikhenta uhi.

Huainung, Lalboi leh Mangnu kimuh theih didan tuh agamla mahmah ta. Lalboi inleng kouna tampi thuak mahleh a itna huchi a beisak mai di bel a ut tuankei a, hileleng haksa chu asa petmah. Lungkelou a pang diing in a lungsim in a kihanchiam thakthak hi. Alehlam ah, Mangnu in leng haksatna tampi ana tuak hi. Sawina leh gawtnate tuak in, lawmta te toh kithuah nawnlouh bikbek dia khaam in a om zomah. Ahih hang in, amanleng itna ana piaksa tawpsan ut di ahikei. Lawmta te tung ah a kisuanlah na alian a, ngaihdam nget theih a ut petmah hi. A diklouh na tan ua a U' te minse kha uh ahihmanin poisa in, a mittui bang aguuk nulnul mai hi. Mihing dai kuaman kaizou lou ahi chih bang deuh in, akal uh kigamlata mahmah mahleh, a kimuhtheih na di uh hun chu amu zel thou uh. Mangnu lah pawtkhe thei nawnlou in, kikhop chiang bang in inn ngak in apang angaita a, phone lah tawisak nawnlou uhi. Lalboi in tua hunte ahi Mangnu muhna dia hun angah sunsun. Mi kikhop kal chiang in a vahohgu zel a, ki-aam leh ki it tak in ahun neih sunsunte uh a zang uhi. Amau adi'n huchilou hunlem dang a omkei. A daltu atam peuh leh, alawmte uh panpihna toh a ki itna uh bel a tat/bei kei.

Hun hong paizel a, bang mah in hihbuai zou kei mahleh, a kithu zakna uleh a kihoupih louhna uh a hong sawt chiang in akal uh kigamla deuhdeuh in om hi. Khat veivei chiang in Mangnu in, 'U, i kikhen maidiam' khawng achi zel a, Lalboi in bel huchi mai a topphut di ahihmanin a nial teitei sek a, a huchih chiang in Mangnu in leng ngailaw zel ahihman in khen ngam tuanlou hi. Lalboi inleng Mangnu in kikhen di thu khawng a gen chiang in lamdang a sathei mahmah. Aziak om ngeingei d'in agingta a, Mangnu' nu le pa te'n hahtai lua leh a lauhziak hidi'n agingta tinten hi. Lalboi in Mangnu lunggim didan atheihpih mahmah. Naupang chik 'itna' ziak a vuak leh sat a a om dante Lalboi in a theih chiang in a pawna thei mahmah a; ama tung a tung hizaw leh chihbang a ut hial hi.

Nikhat, hunlem a hon mu zenzen ua, huai hun pen Lalboi in mangsak louh teitei tum in, a kalthu uh hoihtak in genthak sawm hi. A hong kimu ua, a nih un ah akal uh ahaksat dante khawng genkhawm in, bang chituk in haksa lehle lungke hetlou diing in thuchiam kiptak mai bawl in, adam sung uh ki it leh kingai a om a, lungke hetlou a pang teitei ding in kithukhak in kikhen ta uhi.

© Siamsinna leh Vakiangbu