PUAKSIAM DAN SIN MAI NING

By Benmyns Agile Hilel 

Dated: 13-01-2013, Sunday at 7:31pm 

Suun khat Thangno chu a room sung ah hihding bangmah theilou leh chimtak a a om laitak in a phone a hong ging a a etleh message 1 ana om hi. Amanle message dong ngei khollou ahihtoh kua ahi mah2 de aw chi kawm2 a a etleh "bang hih e, Chingno ka hi" cih ana kigelh mawk a, amanle lamdang sa mah2 leh gingta thei pahlou in a en thak2 zozen hi. A message muhpen amanle Chingno apat hidia gingta thei mah2 lou leh hidia ana koih ngeilouh ahihman in a gintaklouh dan leh hon khem se2 ken chidan peuh in huai message amuhpen a thukkik zozen hi. Gingta thei mah2 lou ahihman in alawm dangte peuh ban call in a ngoh bawl mawk alah, alawm te'n ana theihpih kha mah2 kei uhi. Huchia lungbuaigawp kisa ahihman in amanle huai message amuhna number pen ahon call ta khong2 hi. Huchia a call pen sawtlou a ging nung in a gingtak banglou takleh huai apan message hiam call hiam dong dia ana kikoih khak ngeilouh kum 6 paisa apat hoih ana sak gige Chingno in ana pickup petmah a, amahle kipah natoh nervous na in dim ngal a agen dipen le theipahlou in a kamchip phot masa zozen kha hi. Bangtan hiam zawh in chu ahong kihou panta ua Thangno inchu nuam asa petmah mai hi.

Chingno ahihleh Thangno in kum 6 d khong paisa a amuh masak nipen apat hoih ana sak gige ahi. Huai kum ahihleh Chingno te' Thangno te veng ah akisuan kum uh ahi a; huailai in Chingno ahihleh pawl 7 khong simlel pan ahi a, Thangno in ahihleh pawl 8 khong mah ana simpan hi. A school kaina uh kibang kei mahleh Chingno in School kai dia akuan teng in Thangno te inkong tawnkha gige a, huai mah Thangno inle nuam ana sakpih mah2 in Chingno kuankal bang ana ngaklah thei mah2 a, a hong kuan chiang in aguk in ana enzui den sek a, atum zohciang in amahle amau school lam ah akuanpan sek hi. Huailai khong in Thangno in hoih ana sa mahleh a zahkai ziakmah in houpih ngam ngeilou hi. Pawl 12 azoh tan inle houpih kha ngeilou a huchi'n a siamsinna maban sunzom din Vaigam ah a zinkhiat santa hi.

Tua Chingno apat message amuh nipen February kha lakvel ding ahi a, huailai ahihleh Chingno te Pawl 12 a exam dek kuan uh ahi. Huaini a phone tungtawn a akihou pen uh akihou khak masak napen uh a hiding. Huaiziak mah in Thangno a kipak diak hi. Huaini apat message leh Call tungtawn in ahong kihou den phialta uhi. Huchia ki contact den phial a a omlai un May kha lakvel in Thangno in Chingno chu ahon contact thei nawn takei hi. Huaitak in lung buaigawp kisa in Lamka lam a alawmte kiang peuh kiang ah ahong kan a lah alawmte'n le "tulai teng ka mukha ngeikei, a phone apat le aki contact theikei" cih peuh dawnna a ngah sek a; huai in a lungbuaisak deuh2 zomah hi. Huchia ki contact theilou a a om laitak mah un Pawl 12 te result ahong suak a , Thangno in Chingno roll no. theikei mahleh amah theih khom2 a pang in ana zong chen2 hi. Zong2 mahleh Science te no. Khat mahle theilou ahihman in a zong muzou takei hi. A etteng Arts ngen ahi a huaite lah digit 4 pha ngen hizawmah. Amahle beidong kisagawp kawm a digit 5 amek mawkleh Science te a ana hikha zen2 a huchi'n Thangno le thu mu kisa in Chingno te College kaina min apan, A roll no. te un azong masa a huchia amuhtak in Chingno mintak tungtawn a a no. zong ahon kipan nawn a sawtlou nung in ahon mupah ngal hi. A result amuhtak in a etleh 1st division in ana Pass a, Thangno chu kuamah theih pihlouh in ana kipak gu mah2 mai hi.

Ki contact lou a sawtsim a om nung un, June khabul lakvel in Chingno in Thangno chu ahon contact nawn panta a huaitak in Thangno kipahna in ahong dim pah nawnta hi. Aki contact louh sung ua Chingno chu Mizogam lam ah apa kiah ana zinphut ahihziak mah a kuamah dang toh le ki contact lou mah uh ahihdante Thangno kiang ah ahilh sip2 hi. Tua June kha mah tuh Pawl 10 leh 12 zou te adia maban zilna mundi zong a abuai hun uh ahong hinawnta a Chingno le khatawp lakvel in Imphal lam ah a maban sunzom din a paikhia a huailam ah a sunzom suakta hi. Imphal lam ah Chingno om a Vaigam lam ah Thangno om himahleh Phone om ahihman in aki contact thei den ve2 ua huai chu Thangno adia a kipahna sawn2 ahi gige hi.

Ahitak a gen in Thangno leh Chingno ki contact gige in a thiltuah teng uleh a lungsim ua omteng kikumtuah gige mahle uh itna thu khatvei mahle genkha ngeilou uhi. Chingno in Thangno kiah pawl 10 ahihlai pek a hoih ana sata ahihdan te a hilh a huai in Thangno a kipaksak diak petmah a himahleh Thangno bel mi zahkai leh itna thugen lam ah zeilou leh experience nei ngeilou ahihman in Chingno kiah amanle hoih ana sak lam leh ngai ahih dante ana genkha ngeilou him2 hi. Huailai khong a Thangno ngaihdan in bel itna thu kikum kha ngeikei mahle uh aki contact hoihluat ziak un a iit/ngai ahih dante Chingno kiah genkhe tak2 kei mahleh ana theisa thouta din akoih top mai hi. Thangno in bel huaiziak mah in Chingno kiah bangmah thuguk leh iim nei se2 lou in thilteng a hilh sip2 zel hi. Huailai khong in bel Chingno in kingaihpih dang a neikei a Thangno mah inle kingaihpih ana neikha ngei nailou hi.

 December ahong nai hiai2 ta a, tunchu Thangno in inlam pai a Chingno toh kimuhtuah dikal a ngaklah petmah mai hi. Exam te ahon zousiangta ua December kha ahong tung petmahta hi. Inlam a hong pailai in lamkal ah Thangno lungsim ah chu Chingno a thamden tamai hi. Inlam tung hialleh Chingno toh Phone tungtawn couh a kihoukha ahihman un a inn uh a vahoh ngam tak2 na diam? Cihte leh a gingtak leh a lungsim a a ngaihtuah dante bang2 in thil apai thei tak2 na diam? cihte a ngaihtuah kawmzel a, a lungsim a buai deuh2 zel hi. Tutung Thangno in inlam atun ciah hih dia a koih a tup pipen ahihleh Chingno toh kimuh a, zei leh zeilouh thu omlou a Chingno kiah a itna thu agen khak ngeilouh tua vagen khiat him2 d cih ahipen mai hi. Hiai thu ahihleh Thangno in a lawmte(inlam a a lawm polhte leh a siamsinpih a alawmte) a hilhkha ngeikei him2 a kuaman le a theihpih kha him2 kei uhi. Thangno chu a lawm kipolh khakpihte kuaman nungak asai khaklam a theikha ngeikei him2 ua, tutung a saikhak dek sun2 inle aman kuamah ahilh tuan bok samkei hi.

Tunchu Thangno le Lamka ahong tung petmahta a Chingno muhkhak dikal a ngaklah petmah ngal hi. Himahleh Chingnote inkuan mi tamtham thou ahihman un Thangno chu a vahoh ngam sam tuankei hi. Chingno lah pawtkhe ngei khollou ahih zawk mah toh a kimukha vang mah2 uhi. Christmas kuan ahong hita a Thangno inle Chingno chu kikhawm di leh Lengkhawmpih d khong in azawn zel a, himahleh a zawnkhe zou takei hi. Chingno ahihleh inkuan kikolna hoihtak nuai a khanglian ahi a mitoh le a kipawl tamkei bok hi. Kikhom dia akuan lehle a sungkuante toh couh kuankhawm zel ahihman in, Thangno in a theisiam zel mai hi. 25th December nitak ahong hita a Thangno in Lengkhawmpih din Chingno chu ahon zawn pan nawnta hi. Huai nitak in zawn khezou kei mahleh amah mu dia Chingno in a gate uh kaankhia a a kimuhpih theih ziak in Thangno chu kipahna in adim hi. Hiai nitak mah chu kimaituah a a kihou khak masakna pen uh le ahi. Huai nitak a lampi ah minutes 10vel d khong lel a kimutuah ua a kihou theih uh Thangno adin a kipah nipen dikhop a akipah ni ahi a pawng mang ngilh theih din le a koihkei bok hi. Huai nitak a kipahluat ziak mah inle a itna thugen dile agen mangngilh kha zozen hi. Huai nitak chu Thangno akipah luatziak mah in a lawmte kiah Chingno toh akal ua thu omdan teng le a hilh sip2 ngal tamai hi. Hiaini ciah ahi Thangno in nungak asaikhak lam alawmte'n atheih khak patna uh.

26th December nitak ahong hinawnta a Thangno in Chingno chu kikhawm din ahon zawn pan nawnta a(zawnzou din bel a kigingta tuankei) lah azawn zou tuankei zel hi. Huchi'n kikhop tawptak in kuhkaltak mah in Lengkhawm din ahon zawn nawnta a lah azawn zou tuan samkei hi. Tunchu Thangno inle Chingno kiang ah thu khat Chiamnuih-thutak chidan deuh in, Kingaihpih nei maw leh ? Chi in ahon pawng dot tamawk hi. Cihleh agintak louh dantak leh huchi bang a dawnna mudia ana kikoih khak ngeilouh dawnna "HI" cih ahon za tamawk hi. Hiai azak ciah inchu Thangno Lungtang tawng a dengkha a gendi bei leh ngaihtuahna mumal le neitheilou zen in a lungsim ngaihtuahna ahong hawm zot tamai hi. Genzom beh dileh hihdi dangle thei nawn tuanlou in a phone ahon koihpah tamai hi. Hiaihun ciah inchu Thangno in a kan khak ma angai khopmai. Nidang a hiai bng dawnna azak lehle poi law lawm2 dia ana koihkhak ngeilouh hiaithu azak nitak ciah inchu Thangno in Chingno ana ngaigawp petmahta leh alungtang teng amah adia ana pekhe khinta ahih dante ahong kithei chian thakpan a , puak haksa a sa petmah mai hi. Nidang a mi a kingaihpihte un akhen ciang ua a puaknat dante uh khong a gen chiang ua ana thulak ngeilou pan tuhun ciah inchu a puaknat huaidan ahon theichiang khopta mai hi. Amah a kingaihpih in midang ang a zotsan le hilou ama ngaih (Gukngaih) in kingaihpih nei ahihdan agen' azak mai2 a hichituk a puaknat huai asakdante ahon ngaihtuah kik2 ciang in, mi a ngaihzawngte ziak a a hinna uh chaan ngam zen a awklum omte khong ahithei mah ahih dante ahon theih chiang sem2 hi. Hiai nitak ciah zaw amah adin a thawmhau huai khopmai. Lampi ah apai a mi akituahpih amuhkhakte lah a kop2 a kiton ngen leh kikawi kawm ngente ahon mutam deuh2 a, huai in Chingno a ngaihna a pungsak sem2 hi. Huchi'n Thangno inle a sakhau sung a a phone akuah ahon lakhe thak nawn a Chingno ahon call thak kha nawn zozen hi. Agen dipen le thei tak2 lou in awl2 in ahon kihoupih a kua toh kingai a bngchik kal a ana kingaiman uh ahiam cihte a mittui kai niuniau kawm in ahon kan panta hi. Huaitak in Chingno inle a kingaihpih Imphal lamte amau college kaina kiang ua kai ahihdante ahilh ban ah November kha lakvel a kingaipan uh ahih dante ahilh sip2 hi. Hiaithu Thangno adin azak noppen le ahi tuankei lah atung a azakpen gingtak haksa leh valh hak asak ziak a kan thak2 ahizaw. Hiai hun mah in Thangno in Chingno kiah iim bangmah neilou hial in kum 6 lam paisa a amuh masak nipen apat hoih ana sak gige leh tua a kicontact khak ua pat ana ngai a ana sunglut lawmanta ahih dante a mittui kai niuniau kawm in ahilh sip2 vek tamai hi. Hiai nitak ciah in zaw Thangno in Chingno kiah a ngaih leh a iit dante khong a gen pih2 alah bngmah phatuam d a om nawn takei. Ahitak a gen in Thangno in Chingno pen a kingaihpihpa kiang apat tuhkhiat sawm a panla ahi zen2 kei, himahleh Chingno kiang ah a ngaih/iit dante genkhe kha ngei nailou ahihman in Chingno in a iit dante ana theihpih him2 leh cih a deihziak lel ahizaw. Hiai hun in genkei leh hundang agen hundi om nawnlouh d baan ah amah couh a aguk a ana thuak2 dipen a ngaihngam louhziak a agenkhiat leng a hizaw. Phone a akihou khit un Thangno in hihdi dangle thei nawn tak2 tuanlou in Chingnote inn gei ah amahkia in a va kivial leh den tamai a, sawtlou nung in alawmte'n asap ziak un a omna nusia in a lawmte omna lam a zotsanta hi.

A ninawn zingkal apat in; nidang a dak 9 lakkhong a asungkuan te'n ann nedia a phawngzel pa uh Thangno chu, phawng le ngai nawn vetlou in aman khovak d aleh ngaklah thohta hi. Khua hong vakleh sepdi om cihle hituanlou in khovak dikal ngak in a ngaklah mawkta hi. Nidang a zingkal thoubaih ngeilou pa hiaini apat in a sungkuante thohkhiat ma in ana thoukhe zel a nidang a ahihngei/Chiingngei le hilou zingkal a Biakinn ah thuumna neidia ahoh ban ah Morning walk te bang ahon pan thepthup hi. Zingkal a pawt ciang in Chingnote inkong tawnsuk masa gige a a kiklam chiang inle Chingnote inkong mah tawnkik nawnzel hi. Hiaini apat in Thangno adin ziing-suun-leh-zaante asawt theita khop mai. Amah adin hinkhua zatman le om nawnlou mah abangta. Kipahna him2 a neithei nawnta kei. Koimun peuh ah om in miteng toh kithuah mahleh Thawmhauna in adim denta. A hinkhua a nopzawk khakleh chi in nitak Function omna peuh ah ahoh alah huai in a panpih naksang in a lungngaihna a behlap zawsop hi. Mi Zawlla sakte azak chiang in amah adia asak uh mah abangzel a huai in a lungleng sak deuh2 zel hi. Genthei kisakna in adim a, a hinkhua zatdan a ning thei petmah mai hi; lah adang hihthei le anei nawn tuan samkei. A hihtheih omsun chu nitak chiang a Chingnote Gate konglam ah va tut a Chingnote inn va et2 ahi maita. Zan sawt pi2 amah kia in khovot nuai ah a vatusek a Chingno te'n a Light te uh a off vekchiang un amanle a tutmun nusia in a paisan pan zel hi.

Nitak khat Thangno in Mang(dream) lamdangtak ahong man hi. Tua a mang ah Function na munkhat ah ana hoh hi. Huai a mipi lak a atutlai in Chingno in a vanaihphei a nuihmaitak leh kamsiam deuhmai in a vahoupih hi. Programme bei in lampi ah akiton ua huai apan akikhen dek un Chingno in Thangno chu ahon enphei a Ngaihdam a ngen mawk hi. Hiai mang lamdangtak a neihlai tak in Thangno chu ahong khanglou guih a inkonglam a dakkhiat leh khua ana miallai ahihman in ihmut kik asawm nawn alah ihmu kik nawnthei tuanlou in khovak d ngak in a zalkhuntung ah a omdenta mai hi. Hiai a zalmang mat chu Thangno in a theisiam thei mah2 kei a sun nitum in a ngaihtuah den kha hi. Tua a mangneih in omzia nei hileh kilawm sakawm in nitak in , Thangno in a lawmte ahon zawnkhawm a Chingnote inn ah a vagumlut top tamai uhi. A gingtak banglou tak in Thangno chu ngaihsak luat in ana om nawn takei hi. Amang a ngaihtuah zel a; tua a thiltuah a ngaihtuah kawm zel a a lungsim chu abuai khopmai. Chingno chu ngaihsak nawnlouh leh mangngilh vingveng ahon tum alah a hithei tuan mah2 kei. A kimangngilh sak sawm deuh2 leh a iitna/ngaihna apung deuh2 zawsop hi. Thangno chu a lawmte'n khovel ah numei atam voi huai numei 1 ziak lel a va huchi kilungkhamsak achi zel ua, amanle Khovel ah zaw numei tam mah e, Chingno sah hoihzaw le atam a hoihlou zaw le atam, himahleh Chingno chu Chingno ahi a amah chet2 midang a omkei di, a omkhak zen2 lehle Chingno bang in a ngaihbaang keidi chi in a dawng zel hi. Thangno in Chingno call2 in a iitdan leh a ngaihdan gen2 mahleh huai in phattuamna khatle atun nawn takei. Thangno le beidong kisagawp in Zingkal devotion a hohciah a thuumnate ah Chingno toh amahkal ah Pathian kigolh din Thangno in a ngenzel tamai hi. Pathian akal uah akigolh a Chingno toh akalthu uh a vengsiang theihnang in a thuumzel a, Chingno lah mangngilh thei tuan mah2 lou d ahih ciang a akal ua kiLawmtaakna omsa pen sukip thak a nidang a akipolh dan ngeina bang ua akipolh kik theih nang unle a nget behlap hi. Thangno adin chu Chingno kipahna amah kipahna ahi tamai. Huaiziak in Pathian kiang ah Chingno kipahna di leh a mabante ah lohchinna pezom touzel din a ngetsak behlap hi.

Huchia hunte hong pailiam zung2 in January khabul in Thangno in a iit angaih leh alawm Chingno adin Gift/Present houchik nutsiat in a Siamsinna lam Vaigam ah a paikhiat santa. Thangno lungsim ah bel amah leh amah kimohsakna ban ah kisiamtan louhna in adim denta hi. Bangziak a Chingno kher2 ana ngaikha ka hiam? Bangziak tak a tang zoulou ka hiam? Ka zahkai luatziak hiam? Zekailua hizaw ka hiam? Ahihkeileh, ka hai luatziak hizaw hiam ? Chihte ngaihtuahna a nei in Thangno in a hinkhua ahon zangtou denta hi. Thangno adin agentheih leh a hihthei di dang om nawn tuanlou in Puaksiam dan asin a a maban hinkhua ngeina bang a apaitouh theih nang a , pan alak thak kan , a hihtheih dang om nawn tuanlou a kithei in a hinkhua haksa sa pi2 in ahong paltou denta mai hi.

[Note of the author: He is just an uneducated person living in a remote place. He is never fond of writing and has never written a story before ever in his earlier life. This is the first time he has written it and he is really Grateful that he could finish the whole story. Although it wouldn't be that good and upto your satisfaction he would like all of u (all the readers) to know that he tried his best and spent alot of time thinking and writing this story. He would also like to express his Gratitude to u all for sparing your precious and valuable time in reading his Story. Thanking u all...... ]

© Siamsinna leh Vakiangbu