PHULOUH VANGNGAIH

BY Sang Hisia

(requested by Beemawi Khuptong)

Ka nu' gil sung ah kha guk vel a naupang ka hih lai in, ka pa a gamvak na ah tuah sia in, hon na om louh san pah a, ka nu'n haksa tak in hon hing khia hi. Ka kingak na pen u leh innsung khai khawm tu pen PA om lou ahih man in, ka nu'n gim-le-tawl khawk sa lou a nna a sep kul hi. Niteng in ni tha kiloh in a kuan zel a, nitaklam kho mui zuul khawng in a hong pai pan zel hi. Kei ka hih leh ka pu te' inn ah a hon koih zel a, ka nu'n a hon kuan khiak san dek ciah ka kah ek ek zel hi. Ka pu te'n lah a tunu neih sun uh ci in hon duat petmah ua, hon hawmthoh petmah mai uhi. Haksat na ka tuah ciang un leng, a neih bangbang un hon panpih khial ngei kei uhi. Ka hong khang lian deuh deuh a, skul kai thei di din mun a ka hong din ciang in, ka nu'n haksa sa pipi in hon na kai sak hi. Ka nu nitha kiloh a kuan zel a hih na a, a hong pai hak thei mahmah a, skul tawp ciang in ann khawng ka na huan zel a, hu ci in ka nu ngaklah tak in ka na ngak zel hi. Ka nu lah nin bimbem leh gim mel tak in a hong tung zel a, himahleh a nuih mai a hon suah gige hi. Ka nu kisil na di ci in, tuilum kana suan sak zel zel a, a tui di ka bawl sak a, a hong ki hah siang a, ann ka ne zel uhi. Huai hun ciang in ka nu'n, "Bawi.. na fel lua, ka kipak lua, na mel kon muh ciang in ka gim na tengteng a bei vek, Kon iitlua Bawi...", ci in kipah thu a hon gen khial ngei kei. Ka nu a melhoih in a duangcing mahmah a, naupang cik a meithai leh ta khat couh nei pan ahih na ah, mi a enlah a na om kha sek ua, himahleh kei' a hon khual na ziak in huai te tengteng nawl khin a, haksa tak leh nitha kiloh a, neih sunsun a kipak tak a khosak a tel zaw. Hun te hong pai zungzung in, kei le ka nu dungsuun naupang melhoih tak ka hong hi a, mi te pahtak leh iplah ka hi hi. Ka pu te'n lah pa nei lou ka hih na ah, amau ta bang tuk in hon en ua, ka poimoh ka taksap te a hon nung thuap zou gige uhi. Amau ta te mah inle a hon ngaina mahmah ua, a hon hawmthoh un a hon lainat mahmah uhi. Pawl giat di vel khawng ka hih in, ka pu te'n Lamka lam ah pem di a ci ua, kou toh lou in a pem ut kei ua, huci in amau pang bel mah in Lamka Hebron veng ah kong khosa uhi. Kei a dia hi ci tuk a kho thupi ka muh patna a hi a, thupi kasa petmah a, ka dakdak mai hi. Skul te bang kai sun zom tou in ka om a, nuam kasa mahmah hi. Ka nu'n meh khawng zuak in nek a hong zong a, kou khomkhom in ka kipak ua, suansam lou a hon koih tu Pathian tung tawn a ka pu te tung ah kipah thu ka gen khial kei uhi. Kei lah ka melhoih ngal a, skul ah ka luck petmah a, kei ziak a tangval khenkhat kisual a om uh cih le ka haih kei! Himahleh, ken tangval lam sai hun kasa nai kei a, ka siamsinna mah ka pibawl zo hi. Huai ziak mah in mite'n kisathei nu, ki liansak nu leh ki hoih sak nu a hon ci ua, himahleh poi kasa himhim kei. Laivuan na te bang ah ka hih hoih thei mahmah a, huai in ka heutu te a kipah sak a, amau deih sak na ka tang hi. Hiai ziak mah inle lawmte' hazaatna ka tuak zel a.. 

Theih louh kal in, Lamka a ka om uh kum thum bang a hong hita, pawl sawm ekzam di ka hong hih hial incu sum senna a hong tam mahmah ta. Form fillup di tuamtuam khawng om in, ekzam fee khawng sun ngai ahih man in, sum ah taksapna lianpi ka nei ua, zum pipi in skul a a thunei pen Principal pa kiang ah ka buai na uh hoih tak a ka gen leh, ahon na theisiam mahmah a, "nang, ei skul in kon suan pen uh na hi, khosak na niam cik a hong kipan himah lecin, na kuhkal na leh na hansanna, skul in hon kipahpih mahmah ka hi uh. Fee na sun zoh louh ziak in lungkham ke'n, lungnuam tak in lai na sim dia, na maban a ekzam na poimoh mahmah ahi cih thei kawm in, hah tak in hong pang in aw... Ke'n ekzam na dia a poimoh teng kon piak sak ding, tun paita in, lungkham na di bang mah om lou ahi", hon na ci a, ka biang ah kipah na khitui a hong tak khe keuhkeuh mai hi. Kenle kipah thu gen in ka pawt ta hi. Ka thiltuah ka nu kiah ka gen leh amah le kipak lua in a khitui ahong luang zungzung a, "Bawi, i haksat hun a hon panpih tu di Pathian in a hon piak te mangngilh ngei ken aw..", hon ci hi. Kenle ka lungsim in, ka tung ua a hoih na te uh dit kik di cih ka lungsim ah a hong lian mahmah a, huci in lai hoih tak tak in ka sim hi. A zing in ka nu'n kipah etsak na in a meh zuak te, ka Principal te uh va khol di ci in ava hoh a, amau ana siam mahmah zel ua, vai dangka 1000 ana pe hawm zel ua, kou a di'n bel a thupi kei ka ci lou thei kei uhi. A hoihna te uleh a siamna te u ziak mah le ahi dia, amau ngei inle nuam asa un a kipak thei mahmah ua, a skul u le a khang mahmah hi. Hu ci in heutu te deihsak na ziak in ekzam thei di'n ka om ta a, ka kipah na zo gen vual ahi kei.

Huchi in lai hoih tak2 in ka sim a, ka hong ekzam ta ngei a, ka hih hoih mahmah a, ka ki muang a, ka lung a nuam mahmah hi. Rizal ngak kawm in, ka nu ka panpih na in dawr ngak khawng in ka ki loh tei a, hu ci'n ka hun te ka zang hi. Theih louh kal in ekzam zoh nung kha nih khawng ahih in, rizal suah di khawng a hong ki gen thang vengvung ta! Kei bel ki muang mahmah ka hih na ah, ka na ngaklah gu mahmah mai hi. Sawt lou nung in, rizal cu a hong suak ta ngei a, ka ki gintak khel ah lohcinna ka ngah hi. Manipur pumpi ah Top 8 na in ka pang a, MIL(Paite) ah Subject topper hihna ka la hi. Rizal ka theih phet in ka kipak pet mah a, ka nu ka hilh pah a, amah le kipak lua in, a khitui a luang zungzung mai hi. Ka nu kiah, "Nu, ka pa dam lai le zo, hon kipahpih lotel di hia mo?", ka ci a, ka khasiat tha a hong suak petmah hi. Ka pa ka ngaihtha ahong suak petmah mawk a, a mel ka muh le hi lou, ka theih ngei le hi lou, bang dia hi ci tel a ngai ka de o khawng ka ci lungsim hi. Hucih laitak in ka Pu hong diang lut a, hon kipahpih petmah a, hon pom tonton mai hi. Kei sang mah inle kipak zo hi leh kilawm hial a, hon kisaktheih pih petmah hi. "Tu laisiam neih nak nop hi na tel e", ci hial hi. A nitak mah in ka Pu'n hon lop pih pah a, Pathian kiang a kipah thu gen in, singpi dawn khawm na ka nei uhi. A zingnawn in innkim-innkiang te hong diang lut khiu kheu ua, hon kipahpih a hong chibai toh, thilpiak hon tawi toh ka om laihlaih uhi. Ka gintak louh pi in ka Principal pa te nupa le ahong lut ua, ahon ki pahpih petmah uhi. Ka Principal pa'n thugen na tom cik hon nei a, ka mi hoih dan, ka laisiam dan te, ka kuhkal dan te khawng hon gen a, kei kana zum sim hi. A thugen zoh in kipahpih na etsak na in ci in Teng 10000 a nupa un hon pia ua, thupi kasa mahmah hi. Kenle thu tam lo ka gen a, ekzam dek a buaina ka tuah a, fee pe zou lou a ekzam thei lou dia ka om lai a, hon panpih dan te ka gen a, huan ah ken ka dit kik na dia ka hih thei om sun ka rizal ahih dan khawng ka gen a, mipi'n a thil hih hoih sa in, khut beng zuazua uhi. 

Maban mun dang ah pai sawm tuan lou ka hih man in, ka skul kai na mah nuam kasa a, huai mah a sutzop ka ut ziak in, mundang ah ka pai kei hi. Hun te mualliam zungzung ahih man in, Pawl XII bang theih louh kal in ka hon zou ta hi. Hiai hun in bel, sutzop di hia ahih kei leh sepna zon di? cih ka lungsim ah a om a. Sunzom ut mahleng sum-le-pai mah a ki buai ahih na ah, huai kia le hi lou in, mundang a paikhiat ngai sim mawk ahih na ah, buai huai sa in, sepna zon ka sawm zota hi. Himahleh, ka pu' ngaihdan ahi het kei a, na maban sutzop na di ken kon chawm(support) di a ci a, nidang a hon na panpih na te le kisuanglah mahmah ka hi a, tua hon ci nawn ahih na ah, kipak lua himahleng, ka kisuanglah petmah mai hi. Ka pu hoihna, asiam na te ka din kik zou ngei kei ding!! 

Hun-le-nite hon pai liam zungzung a, maban sunzom dia ka kuan ahong hunta. Kei le ka siamsinna di Delhi manoh in, ka iit ka ngaih ka nu leh ka pu te nusia in ka kuan khe ta a, mittui a dai ut khop mai!!

Theih ngei louh na gam leh cik mah a phak ngeilouh na gam ah om ka hi a, haksa kasa mahmah hi. Ka nu bang ka ngai thei petmah a, ka lung a leng thei mahmah mai hi. Hostel ah ka om a, ka theih ngeilouh ngen leh vaite ngen phial ahi ua, kei couh eimi ka hi a, ka thawmhau thei petmah hi. Huai ban ah, koleg a le eimi ka mu kei himhim hi. Hostel lah numei ngen om khawm cih mah tak, khen khat phok simsim, poi sak le nei khol khawng ahi ua, vuaktang phialphial khawng in a om en on sek ua, kei bel hu ci khawng in ka om ut kei himhim hi. 

Nikhat, library a lai ka et lai in, pasal khat ka theih ngei le hi lou ka kiang ah hong pai a, "hong tu leng poi kente mo?", nuih mai tak in ahon ci a, lamdang bang kasa zezen a, a ziak bel ken eimi kei kia om a ka ki theih lai a, eipau siang sitset a hon houpih mawk a hih na ah, lamdang kasa petmah hi. Lamdang sa tak a en kawm in, "a poina om zenzen lou, hong tu in", ka ci a, amah le ahong tu a. "Kei Chinbiakmuan ka hi", hon ci a hong ki introduce pah a, "Geography Department apat ka hi", hon cih behlap a, hon chibai a. Kenle chibai kawm in, "Chingngaihvung ka hi, Sociology Department apat ka hi", ka ci tei a. "Hon bang ci theih e Umuan", ka cih leh, nui kawm in, "U non ci zezen a", hon ci a. Kenle, "U kon cih di mah hi lou di mo?", ka cih leh, "theilou huai cu..", hon ci a, "na tau a hon thei ka hi", hon cih behlap a. Ka tau cu ka kuan khiat dek a ka nu hon piak ahi a, khitang neu cikcik te a kibawl, nampuan gial a gial ahi, huai ziak a hon thei ana hi a, ana phatuam mahmah hi. Ka ki hou hou ua, sawt lou cik sung in ka k ngaina pah uhi. Amah lah a paunuam a, a nel huai mahmah ngal a. Hostel a om ka hih dan te hilh in leh, a hon muh khak ziak in kipahthu ka gen a. Amah cu mingou, duangcing mahmah leh sa ki phut mahmah ahi a, mit la mahmah hi. A pa sepna ziak a Delhi a om ahih dante hon gen a, a sung kuan ua om ahi dan uh khawng hon gen hi. Contact number khawng kila tuah in ka ki khen ta uhi. Huchi in niteng in ka ki thuah gige ua, amah lah a fel a, pau siam a hih toh, hon makaih a, nuam tuam in, koleg pai dan tangpi ka thei pah hi. Eimi kou gel coh ka hih na uah, ka ki ngaina bik ua, ka pai na lam teng ah ka ki zui tat tat gige uhi. Skul a ka ki thuah kia uh hi lou in, fon tungtawn in le ka ki thuzak den uhi. Ciamnuih dawl thei tak ahi a, a nui nuam a, pau le a pau nuam bok. Kha khat di vel khawng ka ki thuah nung un, a mi zia ka theiciang sip sip ta hi. Nu-le-pa thumang tak ahi a, ama siat na di khop a thil tung di hi le zong, a nu-le-pa thu ahih nak leh a nial ngei kei himhim a, a nu-le-pa a zahtak petmah hi. Aman sanggam pianpih dang a nei kei hi. Ka ki hou ciang un, sungkuan thu khawng ka ki dong ua, ken le im nei lou in mi tagah leh innkuan haksa tak a kipat khang khia ka hih dan te ciang tak in ka gen a, huanah, ka pu te ziak a hiai tan tung thei ka hih dan le ka gen tel hi. Ka U Muan cu a pa IRS ahi a, pawl giat ahih apat Delhi a kai ahih dan ahon gen apat ka thei hi. Lai siam mahmah ahih ban ah, kimawl siam ahih ziak in a lar mahmah a, lawm le ahau mahmah a, ka koleg uah a thei lou a vang mahmah ding in ka um. Hici tuk a lar leh lawm hau himah leh, alawm te lak ah hon nuse in hon taisan ngei het kei. A lawm te sang mah in le hon ngai zo a, khat veivei kei ziak a alawmte toh a ki thuah theih louh hun a om a, huai hun ciang in kana kisuanglah thei petmah hi. Himahleh aman, "Ka lawm namdang te a kum a sim ka ki thuah pih sa te sang inle kon ngai zo", hon ci sek a, ahi lou le ahi kei mah. Aziak bel Delhi a om apat a vaite ngen toh ki thuah den a, eimi ki thuah pih di nei lou ahih na ah, hon ngai na petmah a, ama kai na skul a ka va kai khak hampha a kisak dan leh a kipah dan hon gengen sek hi. Huaiban ah, a sung te kiang ale ana gen a, khat vei hun lem ah a inn uh va pha di'n hon cial ngal hi. Numei a ki hih na ah, poimoh neuhneuh a om sek a, ama fel na leh hoihna te ziak in buai na lianlua ka tuak kei ci leng ci khial lawmlawm di'n ka ki gingkei. Mi hausa mahmah ahih hang un, a simple mahmah a, a thei ciang lou te'n bel a hauhsak lam uh thei di'n ka um kei. Singtang haksat dan tuak lou leh nu-le-pa aang a inn nuam tak a gentheih-haksatna tuak lou a khang khia himahleh, ka hinkhua a hon theih siam pih mahmah a, ka heh na di, ka lungsim nop louh na di in le hon hou ngei kei a, a nuih mai kilawmtak mai hon suah zou den a, lamdang bang kasa zezen hi. Sungkuan ki iit tak a pat khang khia cih mah tak, iitna a hau mahmah a, hon nung thuap zou den hi. 

Nikhat tuh ka hostel fee piak ngai ahi a, lah sum ka nei kei. Ka nu kiah ka gen alah, ka nu'n a muh sunsun te antang lei na dia zang tawmtawm ahih na ah, tu-leh-tu a 4000 amuh na d a om kei himhim a, sum khak di ahon nei kei a, ka pu te lah a inn lam uh kisaan mahmah ahih na uah, lem thei lou di a ci ua, ka beidong petmah hi. Ka pu bang a kisuanglah petmah mai a, himahleh lampi dang a om thei tuan kei. Kei lah ka pu te vaak lel ka hi a, amau ziak a hiai tan tung thei lel ka hi a, sum loh suah na di ka nei sam kei. Lungkham mangbang tak in ka om a. Huai ni tuh ann ne lou, tui dawn lou in ka om a, hi ci mai a ka siamsinna bei mai di pen ka ngaingam thei kei a, ka mit apat khitui hong luang suk zungzung mai hi. Bang teng hi leh ci in koleg kai di'n ka kisa a, ngui tak leh thazoi tak in ka kuan hi. Skul ah ka Umuan toh ka ki muh tak un, lamdang hon sa a, nidang a nuih mai tak a ana vaidawn gi ge tu'n, et le ka en kei a, ka mai a mual petmah a, lungkham petmah ka hih dan ka mel et mai in a ki thei a. Ka Umuan in, "Vung bang ci e tuni, na maitai kei ngei", hon ci a, ka dawng kei!! "Hon en dih", hon ci a, ka en kei!! Huaitak in cu ka khabe ah awl in hon dom tou a, ka mit ah hon en kilkel a. Ka mel amuh tak in, ka kahna ka mit khawng san ahih man in, "kap mo Vung? Bang ci e? Hon gen ve, tuni ka BIRTHDAY eive, nang toh nuam tak a lop di ki ci a", hon ci nawn a, hon hah dot luat ziak in, ka haksatna tuah imm nei het lou in, khitui-naptui toh ki diik hithit kawm in ka gen a, huai ciah incu amel le a tuam hial in ka thei a, a om de du zezen hi. "Ana om o, ka va vak khe zual", cih toh din a thuah a, bang hih dek a cih le ka dong man kei. Minute 10 vel nung in a hong pai nawn a, a sakhau apat laithem hon sawk khia a, hon pia hi. Ka et leh fee receipt ana hi a, CLEARED cih stamp a ki tat ka mu mai mah hi. Ka kipak pet mah a, kipahthu ka gen kawm in, ka Umuan ka kawi ton ton zezen hi. Tu'n cu ka Umuan ziak in ka mangbat na te a bei nawn ta!! "Umuan lawmlawm na hih thupi ngei, hon din kik ut mah leng, ka tung a na hoihna te, na siam na te, ka damsung in le kon din kik zou kei di, ka kipak lua Umuan", ka ci ngut ngut mai hi. Aman, "Tuni kapa'n na Birthday lopna di, na lawmte toh na nek khawm na di ci a 5000 hon pia a, tukum cu ka Birthday lopdan kum dan te toh teh in a thupi zo tham tham", hon ci hi. Sawt lou nung in, a hon iitna thu te a hon gen a, dawnna ki cian tak pe kei mah leng, tua ni apat kou gel kal ah, iitna gui a hong zaam lut panta a.....

Himahleh, kei tagah genthei lel tak in bang ci'n ka iitna mi hausa mahmah leh khosak na ki khai mahmah kiang ah ka pe thei dia? A nu-le-pa la thei lou ing a, amau hon deih di uleh deih louh di uh ka thei kei. A leh lam tak ah, ken ka Umuan ka midang et heh kei a, ka U mahmah, ka pianpih laizom bang tuk a ka ngaih a hi a, a iitna thu hon gen mawk pen lamdang kasa mahmah hi. Huan ah amah toh ki ngai leng ka maban bang a ch dia, cih tan pha ka ngaihtuah a, ka na guk buai petmah hi. Ken bel a iit a ngai lou ka hi kei a, himahleh nungak-tangval kal a iitna piak di pen haksa kasa hi. Aman lah niteng in a iitna thu leh kei lou a hing zou nawn lou di ahih dan khawng hon gen zel a, aleh lam tak ah ka hehpih mahmah zel hi. Ka tung a ahoihna-asiam na te dit kik ut na lungsim nei gige ka hih na ah, ka iitna pen ka dit kik theih na om sun a hi diam ka ci zel a, ka buai in ka buai petmah hi. A ziak ahih leh, ka iitna midang kiang a ka piak khiat masak na di pen le ahih man in!! Dawng di ci leng lah ka ki sit mahmah a, "kei lel tak" ka ki ci zel a, dawn louh di ci leng la, kenle ka ngai mahmah zel a. Ka nu ka ngaihtuah a, a ki ngakna omsun ka hih man in, ngaihzawng nei ta leng, ka laizil na ka bah diam? cih tan pha ka ngaihtuah a, ka lungsim a ki sual tuahtuah mai hi. 

Nikhat tuh ka Umuan in,"Vung ka nu te'n le hon mu ut ua, tuni cia skul tawp ciang khawng a na man di leh ka inn uah na hong hoh di aw..", hon ci a. Zum huai bang kasa sim a, himahleh, eimi midang om lou ahih na uah, ken le ngaihnat na ka nei a, lem ka sak pih ta hi. Nitaklam skul tawp in ka Umuan toh kiton in amau inn ah hoh di'n ka kisa hi. A inn uh ka skul ua pat Kilometer 5 khawng a hi a, a car a hong kuan zel ahi dan hiai ni in ka thei pan hi. A inn lam uh ka manoh lai un, "Vung, zan lam a kon thil gen non dawng nai kei a, na ngaih dan hi khol lou hia? Na ngaihdan bek hon gen ve", hon ci a. "Umuan, hi mah e, na gen bang in iitna mah a thupi pen mah hi, himahleh, kei genthei-tagah lel ka hi a, suan di bang mah le ka nei kei. Na nu-le-pa'n bang ngaihdan a nei di ua, cih le ki thei lou ahi. Ken zo hon phu mahmah lou ka hi Umuan...", ka ci a. Aman, "iitna gentheina, hauhsak na ziak ahi sam a, I lung tang mah poimoh zo hi lou mo?", ci'n hon dawng a. Ke'n, "hon iit lou, hon ngai lou ka hi zenzen kei Umuan, ka tung a na hoih na, na siam na te cik mah ciang in kon din zou ngei kei di. Tun ka iitna hon pe leng, I maban di ki thei lou ahi, nang bang le na pa te'n mi hausa leh nei zou mah hon deih sak zo khamoh lou ding ua, huai hun ciang a kei a dia gentheih huai lotel di ahi. Ka iitna kon piak ngal leh ka sih tan pha a ginom di ka hi. Umuan, kei a dia zo ka "PHULOUH VANGNGAIH" na hi. Poi na sak kei leh, ka ki ngaih tuah na di hun hon pe zek lai ve mo?", ka ci a. Aman, "ok, take ya time", hon ci a, apau nawn kei. Amah lah nidang toh teh in a maitai kei a, nuam kasa het kei a, "Umuan heh mo?", ci'n ka dong a, "heh lou e Vung", ci'n hon dawng a, hucih sung in a inn uh ka tung uhi. Gari horn 3 vei vel a mek nung in nupi khat in gate a hong hong a, ka kiang ah, "MAMA", hon ci a, anu ahih lam hon hilh na ahi. Anu ana fel mahmah a, hon chibai pah a, hu ci'n innsung ah ka lut uhi. Apa ofis kai, emergency meeting di a om ziak a hong zekai di ahih dan Nu Ngai(Umuan nu) in hon hilh hi. A inn uh a lian in a thupi mahmah a, huai kia le hi lou in, paak huan lian hun tawk tak le a nei uhi. Singpi khawng hon dawn pih ua, huai zoh in, Nu Ngai in a inn kiim khawng uah hon vak pih hi. Numei cih mah tak, a paak te u bang nalh kasa thei lua a, ka pakta petmah hi. Nu Ngai in, "na Pa Lian(Umuan pa) khut nasep ngai na mahmah mi ahi a, a tam zo aman hiai paak te enkol ahi, zingkal teng a paak huan a hoh gige ahi", hon ci a. Ka vak vak ua leh dailing paak kon mu a, lamdang kasa petmah hi. Singtang a ka neu lai hunte bang ka phawk thak a, ka ngaih tha a suak mahmah a, ka lungleng petmah hi. Minute 30 di vel khawng hon vaak pih nung in, innsung ah hon lut pih nawn hi. Nu Ngai in, "ana om unla, bazar ka va kai dia, ann ne sa in na pai di o Vung", hon ci a, hu ci'n a pawt ta hi. Umuan in Nu Ngai a suun mahmah a, a hoih tuak mahmah uhi. Nu Ngai pawt khit nung in, ka Umuan in a room ah hon lut pih a, a lian hun tawk mahmah hi. Pasal room himahleh a thang nengnung het kei a, a om cit cet a, hi ci zo deuh leh cih na d ka thei kei. A kimawl na a lawmman a ngah: certificate leh cup alak bang a taak a, thupi thei mahmah hi. Nui kawm in, "room hiai ciah a eikia om cih gige le nin huai, om pih di khawng deih sim hi veng o Vung", hon ci ciamnuih a, ke'n, "hu ci bang om pih di zong ve ua ka ci thuk tei a, a hah nuih petmah a. Amau mi hausa mahmah himah le uh, om pih nei lou ahi ua, huai ziak ahi ka Umuan a fel. Hih lit, sep lit nei lou mi ahi hi. 

Dakkal 2 nung khawng in Nu Ngai bazar hoh ahong tung a, ka pai baih ngai ahih toh, ann hon nek pih baih ua. Ann ne zou, kuang khawng sil zou in, ka pai ta a. A gari mah un hon kha ua, kipahthu gen in ka ki khen ta uhi.

Nikhat tuh ka phone a hong ging a, ka pu ahi a, ka nu damlouh thu kon za ta. Ka beidong petmah hi, thawmhau tak leh lungngai tak in ka om a. Ka Umuan ka hilh de o, zan la sawt sim ta a, a ihmu ta de o ka ci zel a, a tawp incu ka hilh ta a. Ka gintak bang lou tak in ana ihmu nai kei vanglak a, ka lungsim a nuam dek hi. Ka iitna pe khe kei mah leng, thil a hoih hi in asia hi ta leh ka hilh zel mah ahi. Ka nu damlouh thu ah hon dah pih mahmah a, thawm hau ka ki sak thu khawng ka gen leh, "na ut leh kong pi di, nang kia a huai a lungleng tak a na om sang in", hon ci a, himahleh, "zan le a sawt tak toh a buai huai maimai", ka ci a, zan khovak in ka ki message uhi. Nitak a ka ihmut louh ziak leh ka kah ziak in ka mit bang a bawk a, a san a, ka lu a na bekbuk zomah hi. Ka gim mahmah. Ka nu bang din mun a ding a, bang ziak a damlou hiam cih le ka thei kei. Fon hong ging alah, bang thu ka za dia, cih ahi ta mai!! Ka Umuan in hon khotuah mahmah a, hon taisan ngei kei a, ka lunggim na ka gen te hoih tak in hon ngaih khiat sak a, ahih theih bang tawk in hon heh nem a, ka lungsim a nuam tuan mahmah hi. Ka Umuan ka iit in ka ngai mahmah a, hon iitna ka saan nop louh ziak hi lou in, ama a dia cin lou lotel ka hih na ah, ka saan louh ahi zo. Himahleh, a ni ni in ka iitna a pung hulhul mai a!! Ama hon dot louh inlah ka gen ngam kei a. Nikhat tuh ka fon hong ging a, ka nu number ahi a, bang thu ka za de o ci in dip hawm mahmah kawm in ka pickup a, ka nu ahi a. Dam ta ahi dan leh, lungkham lou a lai hoih tak a sim di'n hon hasuan hi. Ka nu aw ka zak in kipah na in ka dim a, zang huai in ka ki thei hi. A thu ka Umuan ka hilh nawn pah a!!

Hunte hong pai zel a, ka Umuan toh ka ki thuah na uh kum 1 bang a val ta. Ka ki thuah nak luat ziak un, mi'n bel kingai hon sa ua ka lawmte'n bang, "na bf a fuh lua", khawng hon ci ua, ka zum thei petmah hi. Nikhat tuh ka Umuan in, "nang hon ngai lou mo Vung, ken hon ngak den kei ve", hon ci a, "Umuan ei., hon ngai lou ka hi zenzen kei, nang a dia phu ka ki sak louh luat man ahi, nang hon iit tuk a kenle hon iit mah ka hi, himahleh nang di'n zo ka cin kei lua, kei tagah-genthei lel ka hi", ci'n ka dawng a. Aman, "Kua a cin tuan dia e?", hon ci a, ka dawng thei kei. Huci in ken, "a cih leh Umuan, tun hon dawng leng ka zekai lota diam?", ka cih leh, aman, "my heart is always open for you", hon ci a, "ok" ka ci a. "ok na bang cih na eita?", hon ci a, ka nui lel hi. Tua ni pen kei a dia ni ciam teh tham ahi, a ziak bel ka iitna, ka lungtang tengteng ka Umuan ka piak ni ahih ziak in. Hu ci in ka Umuan toh nungak-tangval ki iitna, ki-ngaihna hinkhua ka hon panta uhi. Tua ni tuh April 8 ahi. 

Hunte hong pai zel a. Ka Umuan to mah ka ki thuah tou den ua, midang ka thuah tam lotel kei hi. Ka Umuan ka lungtang ka piak apat, ka iitna nidang sang mah in le lian zo hial in ka thei a, huan ah amah le a kipak petmah hi. Hu ci in, ki iit tak leh ki duat tak in ka hinkhua uh ka hon zang tou ta uhi. Hun-le-nite hong mualliam zungzung a, 2nd year bang kon zou ta. Kum 1 couh om ta ci in ka phur petmah mai a, inn lam pai kal bang ka ngaklah petmah mai hi. Sum haksat na ziak a inn lam pai ngei lou ka hi a, kum 3 na ka zoh cia cu pai di ka lungsim hi. 3rd year kong lut ta ua, sum khol ka panpah ngal hi, ka poimoh tenten lou te ka lei kei a, ka nu te hon sum khak te ka hih theih dandan saving ka bawl hi. A chang in ka Umuan in, ka silh-le-teen di ahon lei sak zel ban ah, ka poimoh te a hon leisak zel a, huaite in ka ki manage thei hi. Ka Umuan hon iitna lamdang kasa a, hi ci bang a iitna hau leh lung pi cing tak mi ka thei nai kei. Ka tung ah a heh ngei kei him him, khat vei vei ki uangsak in hih heh sawm sek mah leng, nui kawm in, "na lungsim ka thei. Non suheh zou kei di", hon ci sek. Hiai ahi ka Umuan ka ngaih thupi na pen. Ka taksa uh a lian tuak mahmah a, ka kilawm tuak mahmah ua, mi'n ki tuak hon sa thei petmah uh. Ka Umuan hon eng bang a om ua, ka na kisaktheih pih mahmah sek hi. Ka Umuan bang a hon iit a, ka hih na bang bang a hon pom thei di, hiai khovel ah om nawn di'n ka ging ta kei. Ka Umuan ka ngai in ka kisaktheih pih mahmah a, "Umuan.. Umuan", ka ci tuau tuau zel a, aman, "Vung non sap mai mai le nuam kasa", hon ci sek a, a chang in a kiang ah ka ki ngek sak zel a, huai hun ciang in aman duat tak leh theisiam tak in hoih tak in hon kem zel. A aang nuam kasa a, park khawng ah ka hoh u hiam a hih kei leh mun fianrial deuh khawng ah ka om khawm ciang un, a aang ah ka belh top zel a, ka Umuan in le duat tak leh iit tak in hon na pom zel a. 

Kuaman ka kal uh hon subuai lou a nuamsa tak a ka om lai un, nikhat ka Umuan in, apan hon deihsak louh thu a hon gen a, naa kasa petmah hi. Hih theih lah ka nei kei a, ka mittui kham vual louh in a luang zungzung mai hi. Tagah-genthei ka hih ziak a amou dia hon sit ana hi petmah hi. Ka iitna, ka lungtang tengteng ka Umuan kiang a ka piak khit tak ziak in, hi ci mai di zo ka ngai ngam kei. Bang ziak a phu ki sa lou pi pi a ka Umuan ka iitna ana pia ka de o.......???

Kei a di'n bel ka hin man le om nawn lou tuk ahi. Ka iitna ka piak khit sa lah lak kik di haksa kasa petmah a, ka bei dong mahmah hi. Ka po na petmah a, hi le le a di dan dang a om tuan kei. A chang in cu tagah-genthei ka hi a, ka tan tawk mah hi ka ci zel a, himahleh ka Umuan midang a di'n ka phal thei kei. Aman lah 3rd year exam zou le ung, zi hon neih san di a hi ta mai. Ama ut thu le a hi sam kei, niteng in a hon iit thu a gen gen lai ve ve. Bang ziak a sungkuan hausa leh nei zou apat khang khia ka de o, vangtah hi na lawmlawm ing e, khawng peuh ka ci a, ka ki ngai se petmah mai hi. Kei a di'n bel zing khovak kilawm tak te le bang mah ahi nawn ta kei, a ki lawm na tengteng a bei vek ta. "Umuan, hon iit in hon ngai mahmah lengle, ka neih ka lam in a cit louh man a, hi ci mai a i ki khen di zaw ka po siam thei mahmah kei. Himahleh deih tel na ka nei kei. Kei toh ki teng teitei le le I maban ah ki buai thou thou di ahi, huai ziak in na Pa thu na man hoih kasa", ci'n khitui luang zungzung kawm in ka gen hi. 

Hun sawt lou cik sung in ka ekzam khawng uh kon zou ta uhi. Ka ekzam zoh nung uh kha 3 di vel in ka Umuan in zi a nei ta! Kei le a ki teen na uah ka va hoh a, "maizen.... Umuan, ki chiam haksa nasa tel mai maw...", thum vei, li vei khawng a gen nung in a ki chiam thei pan.. Kei lah kil khat ah kua mah phawk phak louh in, ka na ki nuul mai hi. 

Rizal te bang suak in, hu ci in kei le iit-le-ngaih te kim na zuan ding in kong kisa ta. Ka nu toh kum 3 bang ki mu lou ta ka hih na uah, ka nu muh kal ka ngaklah petmah mai a... 

~~~BEITA~~~

 ©Siamsinna leh Vakiangbu