DAWILOK LIANNOK

By ~ Vz Vualnam

Nidang pekpek in Tedim khua ah Guite Innpi ana om a, pu Mangsum tuh hausa in a om hi. Hausa bulpi ahihman in nuam a sa mahmah a, khokiim-khokiang a siah kai in niang-le-tai in a om hi. Khopi mahmah, inn bang leng zasagih val bang ahihman un kimuang mahmah ua, tuunpi bupha mah a bang uhi. Huchih hang mah in Pawite nangawn in leng a sim ngamkei uhi. Khopi na nana tuh a tong ding bang kimat in a om ua, khodou toh bang toh kumtawn in a luum vengvung zouden uhi. 

Huai hun lai tuh sa-le-gal a kineih hun ahi a, hansanna leh pasalphatna tehna tuh samat-galmat ahi. Tua hang mah in a mantam kituh in sabeng-galbeng a kuan tuh pasalte' kidemnapen ahi. Tua bang a a thatzou-manzoute mite'n a tung-et ua, a thu uh a pai a, nungakte'n leng a deih diakkhol uhi. A thatzou-manzou loute ahih uleh pasal a leng a sim louh phial uh ahi.

Tua hun lai in khosung ah tangval melse het lou Liannok kichi a om hi. Agual-apaite a hatzaw kituh a sabeng-galbeng a a om hehu lai un a mah bel huai khawng a lunglut kei a, loukhoh mah a tha-itpen hi. Kithah-kimat chih khawng ama'n thilhoih hi in a ngai kei a, gamsa natawm a that ut kei hi. A lounawl ah sakhi va hawk leh leng a bil lel leng a thou kei. A huchih ziak mah in a lawmte'n a simmoh ua, Dawilok Liannok, chih minkhem a pia uhi. Haam bang a a vuallel thei mahmah a, giah bang a lin tuntun sek a, himahleh tangval khat hihna a giahlouh-theihlouh ahihman in a va giak hamham zel hi. A upa Khatchin ahihleh pasalpha mahmah ahi a, gal makai bang a leng pang mun mahmah khat ahi. ‘A upa’n a naupa’ a di teng le uun-gai hi set ve’n,’ chi’n a khote un chiamnuihna in a zang uhi.

Tua bang a mi zaidam himahleh kuamah theihpih louh in lunglutna mahmah khat a nei hi. Huai tuh thalkaap leh temvai ahi. Himahleh kuamah muh in bel a hih ut kei. Thal hoihtak a bawl a, gamnahtang lei ah a seel a, a vangkim a va hoh a, sawt pipi thalkaap a va kizil zeel hi. Tua bang mah in nahtang kungte temvai kizilna ding a zang a, tam pipi a satpuuk lemlum zeel hi. Himahleh a khote un a theihkhiat khak ding uh a lau a, mun khat ah sawt a gamta nuamkei a, kaal teng in mun tuamtuam ah a kituan hi. A tangvaal tuung apan tua bang a ahih ahi a, a siam mahmahta a, mi bang a sabet-galbetna dia zang hileh amah khingzou ding a om kei ding uh. Himahleh aman bel a lunglutna thoihdamna ding lel in a zang a, nahtang kung kaan a saat kei hi. 

Liannok in nungak Chingchiin a ngai mahmah a, a va heel thapai hi. Himahleh Chingchiin in saman-galman ngei lou chi in a simmoh a, a deih kei hi. Chingchiin' nu-le-pate'n Chingchiin' kiang ah, 'Deihta houh ve, den chia sabeng-galbeng a hon kuan sansan pasalte' sang a lou hon khohpih thei pasal hon deihzaw di neilim ve,' a chih chiang un leng Chingchiin a ta ut kei hi. Chingchiin i chih khosung a nungak melhoih leh kizen lawi a hihchiang in a heel bang tamthei mahmah a, huai lak ah Liannok leng lungke het lou in a va tuzel hi. Sabeng-galbeng in kuan ngei kei mahleh innnna-lounna a kizen mahmah ziak in nu-le-pa tamtakte'n a pakta mahmah ua, makpa ding in a deih uhi. 

Hun hong pai zel a, khosung a pasal hangsan mahmah tangval Ngulpum in leng Chingchiin a hon deihta a, aman leng a va heel sam hi. Chingchiin in tuh a na deih pah a, a hong kingaita uhi. Tua bang a kingai tuam a hong om a, kiheelna mun a leng gamtat-khohei a a hong ki-huituam luat chiang un Liannok in nuamsa thei nawn lou in, it mahmah napi in a a va lengla nawn kei hi. Ngulpum leh Chingchiin in tuh nuam hon sa mahmah ua, loulam-tuilam a kithuah in hinkhua a hon zang uhi. Liannok in bel hihtheih dang nei lou ahihman in a lungzuan khitkhiatna ding in a thalkaap leh temvai naak seemseem in a hih a, thangpaih pan chih mahtak a thazoh thei ngial hi. 

Huchih lai in voknou siah toh kisai in Munchih khuate'n buaina a bawl a, Tedim hausa Vumsum tuh a thangpai mahmah a, tangvalte' kiang ah Munchih khua va simmang ding in a sawl hi. Hiai Munchih khuate ahihleh a tam utoh kiton in tangval hangsan a tam ua, a kiphatsakna uh sawtkuam ahita hi. Tedim tangvalte leng khosim a a kuan louhna uh sawtkuam ahihman in hausapa apan tua bang thu a zaak uh thumu kisa in gal makaite toh hong houlim pah ua, gamtat didan hon geel pah uhi. Amau toh teh dia kho neuchik ahihman un ngamthoh mahmah ua, a ik uah leng a nam kham kei. Buhtuh saan lai ahihman in buhtuh zoh chia va sim ding in a koih uhi. Tua ma in upa lungpi geelte’n kisim a, sa-le-gaal a kineih sese ma a a ven theih khaakleh chi in Munchihte’ kiang ah thu a khak ua, ‘Voknou siah leh siah dang ginatak a no’n piak kei uleh hong simmang ding ka hi uh,’ chi’n thu a khak uhi. A lam-et bang ua thupha bangmah a hong kiik louh chiang in amau leng hawmsa bang in buhtuh zoh a ngak uhi.

Buhtuh hon zou ua, upate’n vai hon hawm ua, upa gal makaite’ pipi le va kuan ngai kei. Tangvalte amau leh amau kimakaih in va kuan le uh le zouthohlua un teh chi in tangvalte kuan a, upa galhangte kuan lou ding in vai hon hawm uhi. Huai tuh tangvalte a utlamtak uh ahi. Upa gal makaite a tel chiang un minhoih teng amau khuzel ua, tangvalte’ bel a hansanna uah phat in om mahle uh vualzohna taktakpen upa gal makaite’n uun nakkhem uhi. Tutung in bel minhoih teng amau kitan ding chi in tangvalte tuh a kithalawp mahmah uhi. Upate’n hiai ni in, a chih uh ngak in a om lel uhi. 

Khaliik ma deuh in upate’n tangvalte a hon kaikhawm ua, ‘Khaliik ma ni in na kuan ding ua, khonawl ah na ngak phot ding ua, phalvaak in na sim pan phet ding uh. Pawng hansan lou in pilvangtak in hong gamta unla, kuamah kinuse lou in kimtak in na hong kiik ding uh,’ chi’n a thuhilh uhi. Tangvalte tuh kuankhiat ding kaal ngaklah in a om kinken thei kei zezen uhi. A kuan ma zan tuh a nungak deihtaakte uh kiang chiat ah a kisial nak mahmah ua, salmat toh kiik chiat ding in a kigen uhi. 

A kuan ni ding uh a hong tungta a, phalvaak in a kipankhia uhi. Munchih khua i chih pasal hatte a dia ni khat a nuamtak a tun ahi. Himahleh galmatawngte bang tuah baihlam ahihman in amau bel lamnuam a zui nuam kei ua, gamlak a tawn uhi. Khua a galmuh un ni tum ding in a kisata hi. Awl in a naih zel ua, khua apan gamla kuam ah a ngak ua, enkhe ding in gal makai Chintual in tangval nih a sawl hi. Amau leng awl in geemphei ua, kha vaaklua ahihman in a va naihlaw thei kei uhi. 

Munchih khote tuh naakpi in a ana kisakhol ua, kulh thupitak a khoh in galveng in ana om uhi. Enkhe tute’n khokulh hoihtak a a va velh khit un kongpi khat kia a mu lel uhi. Khotolam ah kawl a om a, huai a va kalzou ding ua a gintak louh ziak un huailam bel kulh in a um kei uhi. Enkhetute’n tua bang thute a va tut chiang un luh a haksat dingdan a thei ua, a lungziing sim mahmah uhi. Himahleh ngal hapaksa tumkiik ut lou in luhkhiat teitei sawm in panlaak dingdan kikum in a houlim tumtum uhi. A denlam chiang in singtuai a va saat ua, tua singtuaite leilawn a zang a kulh kaan a sawm uhi.

Phalvaak a hong hita a, awlawl in kulh a naihphei ua, kalkhat suan le uh galvengte’n muta ding uh chih ding tan a tun un thakhat a awng in kulh a delhphei ua, galte’n a theih phet un, ‘Gal om ei,’ chia kikou in thal in ana kaap uhi. Sialphaw hoihtak a kidang ahihman un kuamah a liam bel a om kei uh. Huchi’n mun thum ah a luut ua, kisat kipan ahimai hi. A tuung in a silah sim ua, himahleh sawtkuam a kisaat a a kikap nung un tamtak a that ua, a damsun teng a taizaak uhi. Huchih lai in Ngulpum in Phaidam khua a pasal hangsan samat siam a minthang Tuaktel a galmuh a, mat teitei tum in a va delh hi. A delhpha a, a kisual uhi. Huchih lai in galte khat in a gaal apan thal in a na kaap a, a gawl a kha pailet hi. Huchi’n a midelh Tuaktel tuh manzou lou in a taimangta hi. A lawmte’n a va delh ua, a pi ua, tangval nih gaalte’n a satlupte uh pua in leh galmat tampi a matte uh tonpih in innlam a hon zuan uhi. Inn a hong tun un ngulpum tuh a khoi ua, himahleh kal khat nung in a liamna a sihpihta hi. Hiai gal ah Liannok’ upa’n leng nungak melhoih lah lou khat sal in a hon kai a, a suak ding un a om hi. 

Tua bang a Ngulpum a hong sih chiang in Liannok in Chingchiin a va heel nawn a, himahleh khat nu ana neem tuan kei hi. Liannok tuh lungke lou in zan teng in a va lengla gige hi. A lou bang uh vaatpih in sep leh bawl ah lohzou mahmah napi Chingchiin in deih thei het kei chiitchiat hi. Hunte hong kivei zel a, Chingchiin in tangval Suanneng a hon ngai nawnta hi. A huchih chiang in tangval Liannok tuh a kidangkoih leuleu hi. A u’ galmat a suaknu uh Ningtel toh kithuah in innlam-loulam ah nna semkhawm uhi. 

Sawt lou nung in Suannengte’n Chingchiin a va heel ua, amau leng ana nial kei ua, himahleh kumtawplam deuh chiang a kiteng pan ding in vai a na hawmpih uhi. Huai kum in leng kumteng a ahih bang un nungak leh tangvalte khodou zang ding in hong kisa beemten uhi. Nungak leh tangvaalte kithalawp mahmah ua, a hun ding ngaklah chiat uhi. A ni a hong tun in nungak leh tangval vualnuam in om ua, zune a lasa in a om uhi. Huchih lai in Liannok bel loulam ah a va giak hi. Hichi bang hun in a thatzou-manzoute’n kisialna in nei ua, thatlou-manlou Liannokte khawng mite’ chiamnuih buuk hi uh ahihman in a tel utkei hi. 

Huchia vualnuam a khua phawk lou zen a a om lai un Bumzang leh a kiim a khuate’n a va sim laizang uhi. Mi zune a vualnuam a a omlai un inn chih a luut in mi kaikhia ua, a ngawng uh bantan zialzial uhi. Ihmu lai a va phawnte banngun, ‘Ke’n zaw teep ngap nawn lou ke,’ chi in zuteep dia va kai ding uh sa in a zui namnam phet uhi. Huchi bang a mi tamtak a thah nung un khua hon phawk ua, ‘Gal om ei, gal om ei,’ chi in hong kikoukhia uhi. Huchi a mat theihtheih uh man in galte toh hong kisattuah ek ta uhi. Galte leng a khauh mahmah ua, sawtkuam a pang uhi. Huchia sawtkuam a kisattuah nung un tampi tuak a kithat ua, galte’n inn bangzah hiam leng a hal man uhi. Galmat bang leng bangzah man in kintak in a kihemmang uhi. 

Huchih lai in Liannok in lungzuang tak in loubuuk apan kholam a hon galdot gige a, huchia innkang khawng a hon muh chiang in thuhoih lou khat om hi’n teh chi in kintak in lounawl a a thal leh thaltang va la in innlam a hon delh vengveng hi. Khua a hong tun in a lauh mah bang in galte’n hong sim uh a na hi peetmah a, a kap toh, liam a naasa a mau vengvung toh, thawm a ngaih ngial hi. A innkuante zong in a buai mahmah a, sawt lou nung in a u a va mu hi. A nute’ a kan leh bit uh ahihdan a u’n a hilh a, huai phet in Chingchiin kan ding in a diangkhe nawn hi. 

Khodung-khovai a zon a a kan hang in kuamah a theikha a om kei uhi. A tawp in numei naupang khat in galte’n a mat lai uh mu ahihdan a na hilh hi. Huchia a hong kikankan chiang un galte’n tamkhop hingmat uh ahi chih ahon thei uhi. Liannok tuh a thangpai mahmah a, galte va delh ding tangvalte a zawn hi. Himahleh kuamah a ngam a om kei uhi. A tuah masak a tuah nanung a kun a, kuamah amah zui ngam a omkei uhi. A tawp in aman leng na ngam kei uleh kei kia kuan ning e, chi’n azan-azan in Bumzanglam a delh hi. Galte’n salmat kai uh ahihman in hat zou lou ding ua, delhpha mahmah ding in a ki-um hi. Himahleh khua a mialluat ziak in deih bang in a kinoh thei kei a, meisel lah de ngam lou in a hat theih dandan in a delh hi.

Huchi bang a a zekai luat ziak in galte a khomual ah a phazou phet hi. Khua a vaak siangta a, galte tuh khomual ah a galmatte uh toh a na khawl phengphung uhi. Hanla sa pawl toh, kisial pawl toh, a gamlum mahmah ua, thau a gin phungphung uhi. Gamla kuam apan a gal-et a, va buluh ding vual ahi kei. A kikhin khiat uh ngak in a mah leng a khawl hi. Sawt lou nung in khua apan amaute dawn ding mipi a hong tung ua, zu kitulh in nuam a sa ngial uhi. Chingchiin khitui-naptui toh a om a galmuh a, a lungtang a naa mahmah a, a poimoh laitak a a kiang a a om louh mah a kitan a, a thang a pai mahmah hi. Mi dang a hutkhiat zoh kei leh leng Chingchiin beek hutkhiat a innlam zotpih a ut hi. 

Khovak lai a khosung luut nadan om lou ahihman in khomual a khomial ding ngak in a om hi. Suun in a gil a hong kial a, khonawl a leipi a kawlkai a va kuat a, huai in a taam a neem hi. Khua a gal etet a, kigelguuk ding dan a geelgeel hi. Kil teng a pan a va sui a, a tawp in suah lampang ah lutheihna ding munlem a va mu a, awl a kihemkhe nawn in khomial a ngak hi. 

Khua a mial a, zune in Bumjang khuate tuh gal-ai-sa-ai in a hulum mahmah uhi. Awl in a va kigelluut a, pilvangtak in kho omdan a va enkual hi. Salmatte Sumtawng khawng a kolbun in a om ua, kuate hi uhiam chih bel a muchian thei kei hi. A hulum mahmah ziak in a gamta ut nai kei a, Chingchiin muh teitei sawm in awlawl in a zong hi. A tawp in mun khat ah a va mu a, kol bulh in innka ah ana tu ngiungeu hi. Innsung ah mei a kuang liakliak a, mi om uh ahi chih a thei hi. A kiang munlem khat ah a ngak a, thawm hong daih deuh chiang a gamtat dingdan geel in a om hi. 

Zan a sawt mahmahta a, thawm leng a dai zikzikta hi. Innsung a mei leng a kitenta a, khausel haam chih louh thawm dang zaak ding a om nawn kei. Liannok awl in hong kisa a, a va naihphei a, Chingchiin awl a a va sapleh ana kiguih hial a, thawm nei lou ding in a hilhzui hi. Chingchiin tuh votsa in muttui kai niilneel in a na liing kekeuh a, Liannok a muh in lungmuang kisa in a khasiattha a suak a, lah kapkhe ngam lou in a ki-ip tuntun hi. Liannok in kintak in a kolte a phelsak a, huchia taikhe mai dia kisa lai innsunglam ah tuang a hong kisiikging a, dawi kiikei in a ngak uhi. A denlam chiang in a hong dai vengveng a, huaiphet in Liannok in innka a pan a pomkhia a, a baankaih a, awl in khonawllam a zotpih hi. Khonawl mun khat ah a omsak a, ana ngak ding in a hilh hi. Amah khosung ah a va luutnawn a, mi dang hutkhiat theih ding a va zong hi. Huchih sung in zankhang bang a hong hita hi. Innkhat ah tangval Tuanlei a mu a, a va hunkhia a, amau gel in hotkhiat ding dang zong in a kizuikhia uhi. Mun khat a a nuneu Niangtel a va mu ua, a va suut uhi. Huai apan kipankhe pan den a Tuanlei a va hotkhiatna inn apan mi khat, ‘Saltangte taikhia uh ei, kisa un i delh ding uh,’ chi’n hong kikou a, amau leng kintak in khonawllam zuan in nakmoh zen in a tai uhi. Innteekpa zunnawn dia kuan in va tuakkha ahi chiitchiat hi. Mitphiat kal lou in tuate’ inn a mi hong kipunkhawm ua, meisel de in khaap a hon zui uhi. Midangte’n leng a salte uh a om louhlam uh a hon thei ua, delh ding in hong kisa chiat uhi. 

Liannokte leng a hat theipen in in a tai ua, khomial in a nawngkaisak mahmah hi. A up louhpen ding uh chi in khomuallam a zuantou ua, huai apan lampi man a kholam a tai vengveng ding a chi uhi. Mual a tuntouh un Liannok in a nung-et a, midelhte pawl thum a kikhen in a mu a, pawl khatte’n amaulam a hon delhtou uhi. A taizomzel ua, himahleh khomial toh, numeite’ a bah utoh, a kintat theikei hial uhi. 

Galte’n lah a hon naih tetelh ua, a patau mahmah uhi. Galte’n leng lampipi mah hon zui uh ahihman in sawt lou in a hon phatou ding uh chi in Liannok in lamsak ah a lawmte a peetpih a, galte’n a peetna uh a theih ua, a delh uleh kisaatpih mai ding lungsim in a neita hi. A tempawng Tuanlei a pia a, amah thal toh kigingsa a om in lamsak gamla lou ah a kibu uhi. Sawt lou nung in galte’n a hon phaphei ua, himahleh a peetlam uh bel kuaman a thei kei ua, a delh paisuak uhi.

Huaimun ah sawtsim a khawl ua, huai khit in a kipankhe nawn ua, tua lampi mah a zui uhi. Amau va delhte a hong kileh uh leh leng a thawm uh kithei man na’n teh chi in muangtak in lampi a zui uhi. A hong paizel ua, galte’n leng saupi va delh utuh ahi ding ua, tutan a hong kileh kei lai uhi. A bah mahmah ua, himahleh khawl ngam lou in a pai teitei uhi. Phalvaak hi nuamta ahihman in amau leng lampi zui ngam nawn lou in gamlak ah a peetkhia ua, kholam zuan in a hong pai zel uhi. Sawtpi a hong pai nung un ni leng a suakta a, Amau va delhte leng kiik thamta ding un a gingta uhi. 

Bumjang leh Tedim gamgi a hong tung ua, luita khat in a hal lel hi. Huai lui a kumsuk a, tui dawn malam a, paizel ding a chih lai un lui a suahsuk uleh amau va delhte lui gaal ah ana om ua, a kibingtuah uhi. Kintak in gamlak manoh in a kileh ua, galte’n kikou kawm in a delh uhi. Galte’n delhpha thouthou ding chi in a dangteng kholam manoh a lampipi a tai ding in a hilh a, aman galte a na ngak hi. Galte a hong suahtak un thal in a na kaap a, thum a kaapliam pah hi. A sihna ding un a kaap ut kei a, a liam ua, a lawmte nawngkaisak ding ngimna in naktak a liam ding in a kaap zel hi. A huchih chiang in galte’n leng pawng naih ngam sam lou in a kibukbawl zel uhi. Huai hun lemtaang a la in Liannok tuh a tai ek zel a, galte’n leng khahsuah louh teitei sawm in a delh uhi. Himahleh a liam a tam ziak in deih bang in a hat theikei uhi. 

Liannok leng a gim mahmahta a, mun lem khat ah galte a na taang nawn hi. Galte a hong suak ngei ua, tutung in tuh si ngeingei ding un ana kap a, nih a kaappuuk hi. Huai phet in a galte a khawl nawn ua, Liannok leng a tai nawn leuleu hi. Galte’n leng vai hon hawm in a liamte leh a amau enkol ding mi nih nusia in a dang mi thum in a hon delh nawn uhi. Tu in tuh Tedim gamsung a luutta uhi. Himahleh khua bel gamlapi ahilai veve hi.

Liannok in a lawmte bang a chichi ding ua aw chi’n a lunghimoh mahmah a, delhphak tum in bah mahmah kawm in a hong taizel hi. Himahleh a mah delhte leng haat mahmah uh ahihman in a naih tutulh uhi. Aman leng mun khat ana taan nawn sawm a munlem a zon laitak in gaalte a leh lampang ah a hong suak ua, galte’n ana khelh uh ana hi hi. A thal a lai a, khat a kaptuuk man hi. A dangte bel thal laihna di hun le a om nawn kei. Khat in a hon boh a, a kipumbuan uhi. A tem lah a lawmpa taisak a hihman in a tua bang kilai hun in a khutsam mahmah hi. Kintak in a thaltang khat a dokkhia a, a mit a dawt-tapsak hi. Naupang chik a hihman in a thaneh mahmah hi. Huchih sung in a khatpa a hong tungphei a, a lawmtegel kipuuk a kipeek a muh in a khawlguih a, patauh chitak in a ding gegaw hi. Liannok in a thal a lai a, mipa a tai a, a ngawng ah a kap pailet hi. Huai zoh in tua mi thumte’ lu a la a, a samtum uh henkhawm in singtuai khat a khil in innlam a hon manoh hi. Huai nung tuh a subuai ding a om nawn kei a, thoveng tak in a hong paizel hi. 

Khua tundek kuan in ana mataite a a delhpha a, kho tun ding kithalawp mahmah leh lit mahmah thuah in khasetak in a manoh zel uhi. Khua a hong luut ua, a etnalam peuh uh khitui in a zeel hi. Ni dang a kuamah eng lou a bualna uh tu a kahna-mauna in zeelsuak tuh naa a sa mahmah uhi. Mite’n amau ana muh un lamdang a asa mahmah ua, ana kawi in a kikahkhum uhi. 

A liamte kikeem in a site vuikhiat dingdan a ngaihsun ua, thazoi ngoihngoih in a gamta uhi. A liamte lak ah Suanneng leng a tel a, a liamnaak mahmah hi. Ni a hong neem a, ann neek ding don leng a om kei uhi. A omna chiat uah thazoitak in a om chiat uhi. Nitak hong tung ding a kihta mahmah ua, lah khouhtheih ahi kei. 

A zinglam chiang in khomite’ tua bang a siluang kikhamna khua luah ngap nawn lou in peemkhiat a hong ut, hausapa’n leng khomite’ deihna pompih in Tedim khosak mual ah khothak a saat ua, a khomin ding in Tedim Mualsang a sa uhi. Huaimun ah sawt lou a om nung un a liamte bangzah hiam damzou lou in a si ua, Suanneng leng a telkha hi. 

Huchia a tangval deih nih hial bang a hon suun chiang in Chingchiin a lungsim a gik mahmah a, huchi kawmkal a a deih louh tangval khat in lubuuk phal a a va hutkhiat hiilhial lamdang a sa a, kisuanlahhuai sa in om dingdan leng a thei kei hi. Hun hong paizel a, Chingchiin sungte’n Liannok a deih mahmah ua, a simgen chiang un Liannok a ut kei hi. Chingchiin leng a va heel nawn kei. Mi’n, ‘Ittak a va hunkhia chin a, tua a hon deih tak ua ba chia ut lou na hi hiam?’ chia a dot chiang un, ‘Ka it ziak mah a ka hutkhiat ahi. Ka zi dia ka hutkhiat hi lou ahi. A itna ka lam-et ziak a ka hutkhiat le hi lou ahi. Chikmah in a hon it kei a, chikchiang mah in leng a hon it kei ding. A it khat toh kiteng leh ka deihsak,’ chi’n a dawng zel hi. Huai kum kumtawplam in a suaknu zi in a nei a, huchi’n hinkhua a hon zangtou uhi.

Huchia Tedim Mualsang a kumsottak a ten nung un Innpipa Mangsum in peem ding vai a hon hawm a, Tedim Mualsang a pan Phaitong ah a hong peemkhia uhi. Huai a sawtpi khosa in teekkuntan in Liannok a dam a, Phaitong a singtaam a tunman a haksa sa in Teikhang Innpipa makaih in a hong peem leuleu uhi. Huai khua ah Liannok tuh a zi leh tate leh tute tanpha muman in teeksih in a sita hi.

© Siamsinna leh Vakiangbu