KIZUAK

By ~ Vz Vualnam

Khang kidangta a, nidang a khosung a nungak leh tangval kiheel a zi leh pasal a kizon hun a beita. Kawlgam-vaigam a omte tutmun a kithuah bang a kithuah hun ahita. Zi leh pasal a kizonna ah leng leitung lehlam a omte toh leng kigaal heel theih ahita. Hichi bang hun ah a sia in leng mun ngah a, a pha in leng mun ngah hi. Tua bang a kigaal heel a, kitheichian het lou a zi leh pasal a kizonna ah heelkhelh-neihkhelh baihlam a, mihoih-mipha theih haksa mahmah hi. Ki-it kingaihna lah baihsam a, kitawp-kikawi baihsam hi. Kizuakte leng hiai hun ah a hong phatuam mahmah uh. 

Chingnu tuh Lamka a om ahi a, Lamka college a BA simlel ahi. Amah leng kizuak ahi a, sum zat ding kitatsat lou in a mu hi. Himahleh kizuak ahihlam pasalte’n a thei kei uh. Numeite kia’n a thei uh. Papau leng kizuak ahi a, Pearsonte ahi. Amah leng pasal bangzah hiamte kia’n kizuak ahihlam a thei ua, numeite’n bel a thei kei uh. Amau bang a kizuak nungak leh tangval bangzah hiam a om ua, mi tawmchikte kia’n a thei uh. 

Ngangaih tuh nungak melse het lou ahi a, Delhi a company a lian lou a seem ahi. Lamka a om Khenpau, primary teacher a sem khat toh facebook ah a kithei ua, tua pa’n a heelbawl nilouh hi. Himahleh Ngangaih in theih taktak louh chi in a ngaihsak utlaw kei a, kanna ding lua le a thei kei hi. Himahleh Khenpau a tawp kei a, kum khat vaal bang a buaipih ni louh hi. A huchih chiang in Ngangaih a hong neemsim a, himahleh thupuukna a la ngam kei hi. Khenpau pen tuailai lak kho le kihel mahmah khat ahi a, tuailai khawmpi chihte khawng a leng heutu a pang ahihman in mihoih mah hi ding in a gingta a, lah a chia’n ngam kei hi. 

Ngangaih in khatvei hiai thu a a nau Kikim, a nuneu’ tate khat kiang a a gen leh Kikim in, ‘Huai bang a buaihuai sam a, kizuakte khat zang le teh himai eivoi,’ a chi a, Ngangaih in lamdang satak in, ‘Kizuak, bangchi dan a kizuakte zang di eita?’ chi’n a dong a, Kikim in kizuakte nnasepdan a hilh a, ‘...hilele kuate ahi ua ka thei kei. A zat uh ka zakha,’ a chi hi. Ngangaih in tuh huaite khawng va zat hial ding le haihuai a sasim a, lah tulai khovel a pilvan kaan om lou hi in a theisim zel hi. ‘Kizuak hon zong himhim ve leh,’ Kikim kiah a chi a, Kikim in le a na kankhe ding ahihdan a hilh hi. 

‘Mi khat ka mu, a number k’on pe diam,’ chi’n ni khat Kikim in Ngangaih a hilh a, ‘Hon pe himhim ve,’ Ngangaih in a chi hi. Kikim in a number a pepah a, Ngangaih a chi bang a liingsim pepelh zezen hi. Zat tatak ding a ngaihsut chiang in a kingam kei a, lah a lawmpa theih chet tatak a ut zel a, lungbuai mahmah in huchi’n a koihdap phot hi. 

‘Na houpih hia leh?’ Kikim in a zinglam chiang in a u Ngaih a dong a, ‘Zang ngam chiah lou kei voi, ka ngaihsut chia haihuai sasim zel ing e,’ chia Ngangaih in a dawnleh Kikim in, ‘Huai chi ke’n aw, tulai kuamah muanngam di om lou eikha. Den chia na kisiik sang in zangsuk le teh,’ chi in a dawng hi. 

Ni khat tuh a phone a la a, Kikim in a number piak nu a whatsap a, ‘Chingboi maw? Pasal khat hon chatsak le teh ut sim ing a,’ a chihleh a a dawnna a hong kiik pah a, ‘Bang chat eita? Kua na oi?’ chi’n a hon chi a, Ngangah in, ‘Ngangaih ka hi, Delhi a om ka hi, hichidan hihzel a hon chi ua,’ Ngangaih in a chihleh, ‘Na gen thei mahmah khang,’ chi’n a dai vengveng a, Ngangaih in leng a dawng nawntuan se kei hi. Kikim ki’ah thil omdan a hilhpah a, ‘Ka na kan di,’ a chi hi. 

A zinglam chiang in Kikim in, ‘A theisate khat na gensak kei leh hon hihsak ut mawk lou di uh ahi. Amau le mi’ theihluat di ut het lou uh ahi. A theisate khat ka theih om, huai ki’ah ka na gensak diam?’ a hon chi a, ‘A na gen ve,’ Ngangaih in a chi hi.

A zinglam chiang in Chingboi in Ngangaih a hon text a, ‘Zanlam a na migen kua eita? A facebook min hon khak ve,’ a chi a, ‘Ngangaih in leng a khak pah hi,’ huai zoh Chingboi in a facebook lemlak a hon khak nawn a, ‘Hiai pa maw?’ a chi a, Ngangaih in ahihdan a hilh hi. ‘Text maimai di ahihleh teng sangnih, limlak a tel di leh sangnga, a kimkhat tua n’on piak di, a kimkhat a zohlam chia n’on piak di,’ Chingboi in a chi a, Ngangaih in leng lemsa in a account number a kipia ua, ‘Text maimai hi heh aw,’ chi in sum a khak pah hi.

Chingboi in Khenpau friend request a khakpah a, Khenpau in leng a na pompah hi. ‘Heutupa, fel k’on salua. Zanlam a khawmpi na ah k’on mukha a,’ Chingboi in a message pah a, Khenpau in leng kintak in a dawng pah hi. Huchi’n a kal laklak in a kihou zel ua, a tawp in Chingboi in hun ta’n teh a chih in Khenpau a block a, tua a kihouna tengteng uh Ngangaih kiang ah a pia hi. Ngangaih in huai a muhtak in a lungsim a na mahmah a, hiai kizuakte om kei le uh pasal gina lou chik khat neikha di keive maw, chi’n a kingaihsun a, huai nung Khenpau a limsak nuam nawn kei hi. 

Chingboi kiang ah a sum kibang lai teng a pia a, huchi’n tangval dang in a heel nawn ding uh ngak in a sepna a semtou zel a, nungak le nuam thou na, a chi hi, khawng chisak suk maimai ni. Phuah beh didan le thei nawn tuan khang. Na bang uh ahi!

© Siamsinna leh Vakiangbu