LUNGTU PAL BANG NANGLOU DING

~Vz Vualnam

Zoukuam damtui kaihging ngaih bang
Deihbel mu bang na ngai ing e
Zaang a damtui luang diildiil bang
Deihbel mu bag ngaita ning e
Zoudamtui kaihging ngaih hal in
Tangkhokhaal in damtui kang e
Zaang a damtui daidam hal in
Lii bang ching e kang ngeilou e

Huihkhita tulsing lailou bang
Deihbel an bang na it ing e
Huihkhidam zoukuam a lang bang
Deihbel an bang itta ning e
Huihkhita alaan naa hal in
Tomkal laang in dai bang theu e
Huihkhidam alaan neem hal in
Kumtawn tutkhawl ni neilou e

Tung thangvan zaangninou sou bang
Deihbel tem bang na deih ing e
Tung thangvan solkha neemnou bang
Deihbel tem bang deihta ning e
Thangvan zaangni taang phaa hal in
Zata’n tulliim daidam beel e
Tung solnou ataan neem hal in
Zata’n zansawt maimit suan e

Zoukuam damtui kaihging ngaih bang
Huihkhita tulsing lailou bang
Tung thangvan zaangninou sou bang
Deihbel an bang ka itlai in
A mi singta’n nuihchiam in leel
Tem bang deih khang lumsuang bang taak
Ka laan ka sat khuakiim ah thang
A mi lungmawl hizou ing e

Zaang a damtui luang diildiil bang
Huihkhidam zoukuam a lang bang
Tung thangvan solkha neemnou bang
Deihbel an bang itta ning e
An bang it in tautau zong leng
Lungtu loute’ lai kuailou dia
Thip dial in an bang it zong leng
Lungtu pal bang nanglou ding aw
---------------------------------------------
Mual a luita ging ngaihtak bang mai a ka deih pen ka na ngai hi. Phaizaang a lui daitak a luang diildiil bang in ka ngaita ding. Mual a luita zaw a ging a ngaihna a, khokhaal chiang in a kang pahpah. Phaizaang a lui luang bel a ging om hetlou napi in a kang ngeikei hi.

Singkungte khang mutpai huihpi bang in ka deihpen ka na it hi. Huihzang nung hiauhiau bang in ka itta ding. 
Huihpi zaw a haatlaw na a, tomchik a nung a, a theu pah hi. Huihzang bel kumtawn in nunlouh hun himhim a neikei hi.

Van a sa mahmah ni bang in ka deihpen ka na it a, tu in bel nitak a kha neemtak bang in ka itta ding hi. Ni tuh a vak phat mahmah hang in mite’n singliim abeel uhi. Khavaak bel vaakphakei mahleh mite’n zan sawt pipi a en uhi.

Luita luangging ngaih bang, huihpi bang, nisa bang a ka deihpen ka itlai in mite’n nuihza bawlna in a hon zang ua, ka deih lah houpih but hilou, ka gen ka sak miteng in athei ua, mihai ka suak hi.

Zanggam a daitak a luiluang bang in, huihzang nung hialhial bang in, khapi neektak bang in ka itta ding hi. It chi in kikou pihpih mah leng hon deihloute lungtang zou tuanlou dia, dai dide in it leng le hon itte daal tuanlou ding.

©Siamsinna leh Vakiangbu

Comments

Post a Comment

Popular posts from this blog

PATHAWI HIMAHLENG!!

~Kattie Mawite Ka ngaihnou ka ngaisang top. Ka dinmun uh kikheng hileh ama lungsim bang ka put zoh ka gingta kei. Iitna tak toh hon iit hi in kathei a, kenleng ka it petmah. Keilam apan ngiat a hon neikei a, apasal ka hihtheihna din CONDITION bangmah hon bawlsak kei. Tulai in hihna kibang(homosexual) kingai tampi om mahleh, kei ngaihnou bel NUMEI ahi. A hon itna thupi kasa. Ka phulouh iitna tang hi in ka kithei a, ka kipak petmah. Himahleh alangkhat ah ka kisuanglah zel. Ka kingaihsiat theihna di leh ka lungsim hon kam gegu di kampau chikmah in hon zatkhum ngeikei a, milak ah leng a hon zahpih kei. Kei ziaka nuam asaklouhni leng atam din ka gingta. Himahleh kei kianga a om chiangin maitai tak in hon houpih a, huai in a ngaihhuaina nakpi in a behlap hi. Ka ngaihnoute bel innkuan nuamsa ahi uh. Apa Evangelist teacher pension ahi a, a upa'n leng apa sulnung zui in Evangelist teacher mah a sem hi. Amah tuh college kailai ahi a, anau pasal nihte bel high school kailai ahi
Read more

PALLAI NITE

~Lian Khuptong Alamdang Pathian Itna' 'khovel nopsakna leh gentheihna tepanin Tuun sungkhatpan mimbang ka hong khangkhia hi. Deihthoh takmai leh iitakmai'n keple huihmut dingnah tomphallou in ka omhi. Kep leh etkolna nuaia kasenchiil panin kapiching dong in, duattak leh deihthoh takin kep kana hi. Sianhuaina toh hucihin ka hongkhang lianzela khovel tak palding in kongkisa ta hi. Mite kitaiteh nalak ah ka taisam hi. Hinkhua gintaksa anaa nuamchiam kei alai hawlpawl in lakloh takin ka omhi. Pallai amm'n nuamleen tuh ka hinkhua aka nopsak ahih hi. Maban etna'n kalsuan touzelin ahak-anuam phutkhak dandan in kahong phuh hi. Huaihang in hinkhua zatdan ka etchiang in lungkhamna leh mangbatna ten nisim'n hongtuam tawntung hi. Ahakdan pengen siamvual ahih keihial hi.  Huchitazong in taikhua tuh hongvak zelsam a lametna thak honguan zel hi. Naa khatpeuh zoh kuhkalna leh thuakhaatna lou toh pangtakpi mah ngai hi. Khovel zoh omvengvung kitaiteh nalah
Read more

NATNA LAUHUAI COVID APAN PIANTHAKNA

 By  ~ Paumuanlal Guite BaBs Chikmah a zak ngeilouh, lungsim tawng a leng gelphak ngeilouh COVID 19 in khovel pumpi hong sawiliing ta hi. It leh ngaihte toh tui leh nga bang bualkhawmna, a sakminthang Lamka khopi leng natna in hong hawi tuankei. Niteng in a vei a pung hulhul chih kuapeuh in thei, himahleh gamsung vaihawm solkalte’n hiai natna apan i suahtak theihna ding ua hon thupiak uh Policete mat utlouhna ziak lel in i zui hamham chiat uhi. Huai bangle Policete galmuh chiang khawng a zui hamhamte i hilai uhi. A tamzawte bang in a omna mun uh i pel chetchet zomah uh, lamka chihmah a ka tuamtuam tam i theitel ua. Siamsinna innte, nasepna buuk tuamtuamte kikhak zungzung a, i biakna munte tan leng kikhak hial in inn a kuapeuh kikhum chiat ding i chih lai un kholai a hih ding poimoh nei a pungdiak a bang maimah hi. I natna minthang ziak ua mual honna liamsan niteng in zak ahigige mai. It tak in a luangbul ah kap zoizoi ut mahlehang mangmat phak ahinawnkei, silhpuan piandang toh kithua
Read more