THANGVAN AH DAWNBANG A TUAK DUAM?

~Leon Guite

New bazar vanzuakna mun ah mitampi kiphu noinoi lak ah ka pai lai in Vaite supply khat a activa horn mek ging zoizoi kawm in mitam nalai tak ah ahong tai phei hi. Mipi te tua horn ging ngaihtak in kiguih sak ahih man in a hong kiboh luailuai uhi. Huchikawm kal ah kei leng ahon boh belh kha ua, mitamtak leitual ahka puk suk uhi. Huchia buaitak a thouzok theilou a ka omlai in ka khut hon len om hi'n ka thei a, ka et le tuma kha thum paisa a ka sumbawm mansak hong pepa ahi chih ka thei hi. Ka kimeltheih na uh a sawt naikei, himahleh leh amah apan thil tamtak sin ding ka mu a, ka lawm hoihtakleh ka lam hon hilh tu muanhuai tak ahi hi. Kipak tak a kichibai in hotel ah singpi dawn khawm in nuamtak in hun ka hon zang uhi.Amah ahih leh anu-le-pate aneu lai in ana kikhen ua, apa'n zi dang nei in a nunawn in bawl gen thei mahmah hi. A nu ngei leng sawt tak mi tuamtuam toh kizuia ut dan teng a a khosak nung in a ma sang a naupang zawtham khat zui in vengnawl khat a zu zuak in khosa uhi. A nunawn' bawl gentheih na ziak in inn ah leng om ut ngeilou a, kholai ah ahun tam zaw zang gige hi. A sinlai leng lunglut zou nawn lou in tawpsan sawm mah leh apa a lauh ziak in sunzom hamham hi. Himahleh kep louh leh it louh a om nana na zaw khovel thil ah apuk baih mahmah. Khamtheih ah kibual in a lungkhamna te hehnem tu ding in niteng in khamtheih hih in a hun teng ana zang bei hi. Tangval a simtheih hita mahleh nungak lam himhim a ngaihsak kei. Ka genpih sawmsek hang in lunglut lou ahi chih amelapan muh theih in a om a, akiang ah gengen le kisuanlah huai hun a tam mahmah hi. Himahleh, kei a lawm a ding in bangmah sit neilou in hon panpih theih na lam chiteng ah kisiit lou hial in apang gige Hi.

Hunte hong pai zel in siamtu in mihingte kiang ah thawnpiak a piak, ut in ut kei mah le hang I neih uh ITNA in amah a hel nilouh a, taisan sawm sek mah leh a taisan zou kei. Face book apan kithei kha ahi ua, nidang in numei himhim a mitsiik aen ut ngeilou pa pen tu in hiai nungak melhoih, ngoulam pang leh nuih mai hiuhiau gige amuh apan in alungsim teng akibung butun ta hi. Atung in bel lawmta bang in kithuah tou ua, nuam asa thei mahmah uhi. Amau gel a omkhawm khak chiang bang un kua hin, kua sih phawk louin nuamtak in ahun uh zang thei zel uhi. Huchia a hong kithuah tam chiang un akaluah itna gui hong zaam in khenzoh vuallouh itna in a hong kigawm ta uhi.Amah ittu ding ka lawm Thangpu in aneihakipan in a hinkhua nasa tak in ahong kikheng lamdang vek hi. A it Niangboi pen Pathian lau leh piangthak diktak ahihman in, a it Thangpu a ding in thum gige hi. Thangpu ngei in leng Niangboi in it ahi chih a theih ni apan in a thilchiin hoihlou khamtheih hih pen tawpsan vilvel hi. Biakinn zuan ngeilou pa pen biakinn ngaina pen in pang a, khalam ah leng khangtou mahmah hi.

Ki it kingai in nuamsa tak in hun hon zangtou zel mah le uh khovel zaw niteng hunteng a kipahna leh nopsak gige na gam ahikei. Lung ngaih ngoihngoih na leh lungkham na in mun tam a luah zou zaw gige hi. Niangboi pen damthei mahmah mileh nasep taima mahmah mi ahih man in niteng in nasem in lou lam ah kuan gige hi. Nikhat alou kuanna lam ah bahsia in hong puk a, a natna ziak theih louh pi in a tha te zoi in atha hong chau mahmah hi. Hiai bang a midamthei tak mai, Natna genkha ngeilou nu ahong hichih phut mawk pen mitamtak in lamdang sa mahmah uhi. Doctor kiang ah ki-ensak zelmah le uh doctor ten anatna mankhe pah thei lou in TB peuh ngoh in TB damdawi peuh ana ana pia uhi. Huaite anek hang inhoih lam sang in siatlam manoh deuhdeuhhi. Thangpu in a itpen damlouh thu a zak phet in a school kaina pan innlam zuanlou in a itpen Niangboi te innlam zuan pah vengveng hi. Amau gel ahong kimuh chiang un Niangboi leng halhtuam kisa mahmah in nuam tuam sa mahmah hi. Atha zoi in thahatna neizou kei mahleh amel maitai mahmah in a kiang a omte tha guan mahmah hi. Thangpu in it tak in a itpen kem tou a, school kailai ahihman in a deih bang in kem thei keimah leh a hun awl neih teng Niangboi kiang ah zangbei gige hi.Nikhat Niangboi hong buaise sim nawn a, apa lungkham in damdawi innlam ah kipaw suk nawn uhi. Doctor ten hoihtak a en in test ding tuamtuam te a test khit vek nung un, nikhat doctor in Niangboi pasam in tanchin kipahhuai lou tak mai a tanu in blood cancer vei ahihdan haksa satak in hon hilh ta hi. Na tanu in sawt hon dampih lou ding ahih man in a duh lehdeih teng ne sak in pia inla, akipah theih na ding ngaihtuah in. Chi'n hilh hi. Tanu tangkhat aneih sunsun, amau a ding a innsung nuamsak leh hulum saktu, a dahnikhua ua amaute kipaksak tu a a tanu neihsun in hiaibang a natna a hon vei mai tuh Pa Tuanglang a ding in athuak hak tel mai. A etna lamlam mial dundun in a thei hial hi. Saptuam upa khat leh Pathianah ginna nga mi himahleh a khen chiang in zaw a tung a thiltungte theisiam lou in thuak hak a sa thei mahmah hi. Himahleh,Pathian ah kihih hat in atanu kiang ah khasia tak a a omlouh na din Pathian kiang ah thum kawm zel a, atanu it tak leh duat tak in hon kem thei hi.

Thangpu in a itpen Niangboi in blood cancer vei ahi chih a theih in pawna mahmah a, hithei hileh ama sisan teng piak a, a itpen Niangboi hotdam a ut petmah. Himahleh kuamah in huai ding a phallou uh ahih man un ahih theih sun thumna leh hunteng a a itpen kiang ah om a etkol ahimai hi. Apa kiang ah school kainawn louh a kiloh theih dandan a kiloh mai ding in kingen mah leh phal in a omkei. School kai sang a asep theih teng sem a, Niangboi etkol a ut petmah. Atawpin chih ngaihna thei lou in Niangboi a va lut khum top mai hi. Makpa sungkhum di dan in va lut a, himahleh a itpen toh nupa hinkhua a zangkhawm kei uh. Niangboi sungkuan ten leng a ki-itna uh amuh chiang un Thangpu pen nialvual in a koih kei uh. A tanu uh a ding leh amau a ding in Thangpu pen ANGEL ahimai hi.Thangpu in it tak in a it Niangboi kem toua, a guk in a itpen hehpih in kap mah leh Niangboi theih ding a utkei. Niangboi kiang ah maitai tak aom a tum zaw hi. Nuamsa tak a ki-enkol in mailam hun ding, damlouna pan a damkhiak hunchiang a khosak ding dan khawng kikum in nuam asa mahmah ua, Pa Tuanglang te nupa in hiai ki-it tegel omdan amuh chiang un a biang uah khasiatna mittui aluang lou theikei. Naupang chik himahle uh piching tak in a ki it ua, pichingtak in a khosa thei uhi.Nangboi pen kei a ding a ka lawm hoih mahmah (Thangpu tungtawn a) khat ahihman in ken leng ka hun neih sunsun tengin ka va veh zel a, hiai lawmta te ondan ka et vengveng chiang in, "Aw khovel mite hiai ka lawm gel bang ngen hile uh aw...... khovel ah sualna in mun himhim a tankhak ka gingkei. Nungak-tangval kal ah, nupa kal ah leng ginomlouna in mun anei kei himhim ding." Ka chi vungvung hi. Damlouna ziak akikem tou den a hinkhua haksa tak a zang khawm himah le uh inn mun ah damtak a duhduh ne a, kina leh kilai a om gige te sang in a eng huai zawtham uhi.

Nikhat Niangboi kisilna pindan a kihahsiang ding a lut lai vangsiat huai takin hong tang khial kha a, a tawngum lak tatkha in a khe lam teng tangthei lou in hong om hi. A damsung zaw wheelchair a tu kawm a azat ding ahimaita ve. Kingaihsiat huai ngoihngoih a atung ah vangsiatna tung himahleh aman zaw a itpen Thangpu ang ah maitai mel a pu teitei hi. A nih un a guk in a mittui uh nulnul mahle uh a maitang uah bel nuihmai in a ki-en gige uhi.Hin hong paizel in Niangboi bel hoihlam sang in siatlam hon manoh hiaihiai a, zun leh ek natawm mahni a thathei lou in Thangpu in a lupna mun ah a zun leh ek tesiaksiang sak in it tak leh duat tak in kih lou hial in enkol tou den hi. Niangboi in tuate amuh chiang in khasiat tha suak in a it Thangpu hehpih mahmah a, a itna liandeuhdeuh hi. Ahihhang in sawt dampih louding ahihdan kithei a, tua hang in Thangpu in amah ziak a hiai bang a athuak ding pen ngaingam lou in amah taisan a, zi hoihtak midang nei mai ding in hasuan zel hi. Himahleh, amah ittu, khamtheih sal apan honkhetu Niangboi taisan a midang neih ding pen Thangpu ngaihdan a hikei bikbek hi.

Bangteng genmah le uh Thangpun bel Niangboi tph kikhen a midang neih sang in a khamtheihthil mah ah nungkik ding a tel zaw lai hi. Hiai bang a ittu diktak a tuah khak pen Niangboi kipak mahmah a, ahihhang in alehlam ah angaih tuah chiang in Thangpu hehpih mahmah zel hi.Niangboi inlah hoihlam sang a siatlam manoh deuhdeuh ahihman in Thangpu a dng in leng et haksa mahma hi. Itpen laitat ding kuan kua in a en ngam mah dia? Nikhat Niangboi pa' kiang ah Thangpu in kihih halh na kawm in ka nu vaveh zual ning aw. Chi'n bike in Khumuzamba lam manoh in hong taikhia hi. Adiktak in anu bel belh tak ahi kei. A inn natawm lut na tak ahikei. Himahleh a nu a hihna ziak in it mahmah lai ahih man in a kiang zuan in hong tai vengveng hi. A nu kang a tun in, "Bawi na hong dam maw? Bang na sem zel a?" Chi a ana dawn ding in a tunnu a omkei. Huainak sang in meltheih louh mah bang in houpih lou in a gamlat zawmah hi. A dinmun te angaihtuah chiang a pawzou nawn lou in zu a hon ngen a, thawl nih a gaoh nung in khophawk zou lou phial in a hong om hi. Himahleh alungsim bel halh mahmah ahih man in Niangboi in inn ah honna ngak ding hi a, chih ngaihtuah khe guih in pai zou lou sasa in a hong ding khe ta hi."Paita ding maw bawi? Omlai ve." Chi a hong houpih ding in a nu a omkei. Huainaksang in pai kin inla khat vei mah leng na mel hong lak nawn ken chih khum in a om zawmah hi. Khasiatna leh lungkhamna kigawm in Thangpu tuam a, mittui tak zoihzoih kawm in a bike in innlam manoh in khuamui zul in hong kipan khe ta hi. Sau tai man lou in a nunglam apan car hattak a tai khat in hong phusuk ek a,"Eh!" Chi'n a anglam ah lengphei a, huchi'n thilteng a mial vek ta.

Zingkhua a hong vak in Niangboi leng hong halh khia a, a kiang ah a it Thangbouomlou ahih man in lamdang sa mahmah mai a, a pa kiang ah Thangboi omna dongpah hi. A p'an haksa sa mahmah leh ki-ip kawm in Thangpu a inn uah pai ta ahihdan gen hi. Niangboi in lamdang sa leh apa thugen dan theisiam lou in dong thak a, apa'n bel bangmah a dawng lou in a mittui a biang a hong takkhe suk te nul kawm in a tanu aleh lam ngat san a, kidiikhuphup hi. A pa om dan amuh tak in Niangboi hong kap a, apa kiang ah kintak a Thangpu omna lam ah paipih ding in ngen hi. Thangpu te inn a tun un innkong ah parachute ana kizak a, mitam tak ana phe nuainuai amu uhi. Amau leng bangmah gen lou in innsung ah lut suk ua,tang hetlou a lum Thangpu omna lam zuan uhi. Akiang a tun tak un Niangboi in a u Thangpu sam pah a, himahleh amah dawng in in Thangpu'n a kam nengchik leng a ka kei. Hong dam maw chi ding in khatvei mah leng a mit im Niangboi a en kei. Tangtak a lum in a lu leh a ban lak a kituam bengbung hi. Niangboi in tuateng amuh chiang in kidek zou lou in a UThangpu bohkhum in kap kawm in sam ek-ek hi. A muk a tawp a, himahleh amah tawp thuk ding a omkei. Niangboi in,"Uthang ki-awi na chia maw, bangziak a ka theih louh a ana pai na hia? Vot sa na hi maw na chi teng le vot gai a, nu aw puanlum hon la in, ka Uthang in vot salua ahi. Chi'n Thangpu kawi kawm in hong kapkhe zuazua hi. Uthang thou inla hon en ve,ka zun ka ek suak gawp ahi. Hong thou inla hong hahsiang ve maw... na hong thohkei leh hiai mun ah teh di ka hi. Chi'n a Uthang sam in khamzoh vual louh in hong kap hi. Akiang atu teng leng kidaam zou omlou in hong kap khia ua, Thangpu pa nangawn, a tapa itlou a hawlkhe pa na ngawn kidek zoulou in khasia in kap ngongoih hi.Thangpu kivui zoh ni thum a ching ta. Niangboi nu'n Niangboi a et chiang in hehpih mahmah a, gentheihna a thuakte angaihsut chiang in Pathian kiang ah a tanu ittak himahleh, a kha laksak mai ding in ngen ngutngut sek hi. Hiai bang a gentheihna thuak ding a bangziak a khovel ah piangsak na hi a? Hehpihtak in thuaksak sak nawn lou in a hinna lamai in,chi'n Pathian kiang ah athumthum mai hi.

Himahleh, a ni nga ni in lamdang tak in Niangboi a hong halh khia hi. A hong tukhe zou a, kei leng a inn uah va hoh in ka va giak tei hi. A ni sagih na ah ann te hon nezou in a tga nengchik hong om a, a nu toh ka hahsiang ua, kasilsiang uhi. Kisik siang zoh in common room ah a nutaua tukhawm in hun paisa te gen in peihlousasa in maitai tak in a hong nui seih zel hi.Thangpu toh a kingaih tung lai ua a ki kiss masak ni khawng uh gen a, a nih ua zei lou lotel mamah ahih dan khawng uh gen in lungleng chitak mai in hong nui zel a akhen chiang in hong kap dek bang in omzel a, hehpih lua in gen ding thei lou in a nu toh a guk in mittui ka nulnul uhi. Nikhat a Uthang in amah sil a, a sil laitak in aman lenh a Uthang kisil ding in ngen hi. Thangpu kisuang lah tak in om mah leha itpen thu nial ngam lou in kisuah a, savuak a kisil a, a chi uh a hong kihet khak chiang bang in Thangpu zum thei mahmah ahih dan gen hi. Niangboi in a Uthang kiang ah, na hon ngai lua maw? Chi a a dot leh Thangpu in ngailua petmah ahih dan gen hi. Kiren ding kal a ngaklah dan Niangboi hilh a, Niangboi in ataksa gawng tak mai guhvuak bangmai a om pen maw a deih? Azatna omlou pi a chih hang in Thangpu in hiai pen ahi khovel ah ka deih pen chi a kawi kawm a ittak a a tawp dan khawng a gen lai in khase lua in kidek zou lou in kap khe huphup hi. A hehnep ding dan tuan theilou in a nu toh a lehlam nga in ka nih un kidiik tuak hi'n ka kithei uhi.

Ni bangzah hiam nung in Niangboi a hong buai nawn a, enkoltu nurse in a nakna lambuai ahihdan thei in kintak a damdawi innlam zot poimoh ahih dan gen hi. Himahleh Niangboi utlou a, "Ka itpen ka U Thangpu toh ka kimuh ding uh hon halsak kei un. Khovel in a hon halsak ta, nou zaw hon halsak nawn kei un. Pathian mai ah moupuan silh kawm a ka Uthang toh kiteng ding ka hi uh. Pa aw, nu aw hon paisak ta mai un aw." Chi'n a sungte ngen ngutngut hi. Huchih'n thakhat in vanlam en in a hong nui siusiau a, U Thang honna ngak in, nang toh Sianmang ang ah tullou a tengkhawm den ding in ka hong pai." Chin phun siausiau hi. A kiang a ding teng in nehnou tak kawm in paulou hial in ka na en ua, huchih lai in Niangboi in, "Endih, nu aw, ka U Thang kei dawn ding in Angel te toh a hong pai, endih, pa aw, ka pi leh pu ten leng a hon zui uh, hon na ngak un kei leng ka hong pai ta ding hi. Mangpha hoih tak aw ka nu-leh-pa te, ka lawm ka vual te aw, Mangpha...!!!!" Chi'n awl a mitsi in haknawn naw lou ding in a mitsi suak den ta hi. Thangvan ah dawnbang a kituak ding uam? Ken zaw kituak ngei ding un ka gingta. Aw Thangpu leh Niangboi aw. Kei na lawm uh na hon nutsiat uh a ding in thu honna ngetsak un aw. Thangvan ah dawnbang tuak ni hang.

~Beita~

 

©Siamsinna leh Vakiangbu