ZALMANGPHA NA MAN AW

~Vz Vualnam


Muikhozin lianu siang ka lailen in
Lianu’n zalna laikhun hon zotsan e
Lia in laikhun ah mangpha na man aw
Na tuun toh um bang hong khawl dih ning e

Tang leng khawl di’n ka sen na chi hiam aw
Tangpa mel in ha hon hua a hiam aw
Kai bang ka zak suan bang ka kisuan aw
Na kaankong k’ong suah lungsiik ngawn ing e

Tang leng khawl di’n na seen hon chi leng lah
Zawltui tuanglam na zuihna sawtzou e
Tu a na saan toh na tul ding hiam aw
Zawltui tuanglam ah chiamna omlou e

Lanu a mim bang i pian leh lia aw
Zata dialdial a kholh sin ve ni e
Mu bang i ngaih leh douta bang i huat
Dialdial a haam bang huai sin ve ni e

Sing’ phung i tan a sanmun i muan ma’n
Sinlai tulsing bang sangkei  ve ni e
Sinlai tulsing bang i saan laitak in
Huihkhita’ lailaw’n luangsing tangthei hang

Zalmangpha na man aw meldeih lia aw
Na tuun zong a zaal nuamta ding hi e
Na dawngkot kip in na sung dih ve aw
Tang liang sial bang hong suak nawnkei ning e

--------------------------------------------------

Nitak a nungak ka va heel leh ka nungak heel in ahon lupsan maimah. Na lupna tung ah mangpha ana man in, nungak aw, na nu toh ka hong houlim mai di uh.

Tangvalte heel di’n ka naupang lawlai chi na hi hia leh? Ahihkaleh hon haw himhim na hi hia? Ka zumdan, ka kisuanlahdan lawmlawm tel! Ka hong pawt khak ka kisiik lawtel.

Tangvalte heel di’n na naupang lai hon chidek le’ng lah zawlthu ah saupi na luutta a, tu a na ngaih toh kiteng teitei ding in na kikoih ahia? Zawlthu ah zaw kichiamna chih bang leng bangmah hilou ahi.

Numei a i pian leh, nungak aw, mi teng kibang a kholhdan kizil ni. I ngaihte hi in i huatte hitaleh, akibang a bawldan kizil ni.

Mi’ zi i hihma teng zaw kisatheilua a omlouh ding ahi. I kisaktheih laitak in bang hiam thil hong tung in bangmahlou i suak maimah thei hi.

Khaile, mangpha ana man ta in, na nu leng a lum nuamta ding. Na kongkhak hoihtak in ana khaak in, ka hong kiu nawn hetkei di.

©Siamsinna leh Vakiangbu