ZUANG HONG THOU AW PAA

~Kap Tawmbing

(Father's Day Special din aw.)

 

Ka PA India sepaih/sepoy a pang ahihman in asepna tawh kisai a state dang a a om ziak in neuchik kahih lai apan ka na omkhawm tam hetkei uhi. Ka PA'n kei a taa a hon iit a ahon ngaihna akiam tuankei a, himahleh omkhawm tamlo kahihman un ken ka PA sang in ka NU ka ngai zo hi. Kumkhat a atampen a nihvei kan ka PA suty ahong pai thei ngeikei a, a hng pai theih sunsun chiang bang in hon ngailua kisa in ka PA'n hon pom sawm zel mahleh ken ka PA mutamlo kahihman in ka lauh bawl a, kaki pomsak ngam ngeikei a ka NU aangsung kia ka delh zel hi. Ka PA'n a hon paisan nawn hunta ahihman in kei tawh ka NU kia thawmhau tak in ka PA'n gimtak a alohsuahsa kha sum tamlou chik tawh kana khosa tou thei hamham zel uhi.

Hun hongpai zel a keileng kum thum ka hong phak hun in ka NU le PA'n mibang a siamna nei dia hon deih uh ahihman in skul ahon kaisakta uhi. Ka kaipatna ding ahihman in ka utkei mahmah mai a, ka NU'n ka class room d tan a hongkha zel a, ahon paisan dek chiang bang in ka phalkei a ka len tonton a ka kap ek ek zel hi. A hun sawt zil in bel lawm bang le ka hon neitheita a kaki ngeina seh theita hi.A kumtawp in ka PA le Christmas hun nuam zang ding in suty ahon ngahthei nawn a, inn lum manawh in ahong pai nawnta hi. Ka PA ka inn uh ahongtung in ka NU'n "Bawi, PAPA hongtungta" chi in ahon hilh a keileng innsung a kimawl a omlai ka PA dawn ding in kava taikhia a, ka PA,n ahon muh in hon na pom pah hi.

Huai hun in kei leng ama a ka PA hongpai tawh teh in kana tei mahmah ta a, ka PA leng ka ngai mahmah theita hi. Ka PA'n kei a ding in zinpaak hoihtak tak bangzah hiam ahonpuak a, kakipak petmah a, puanak ahon puak bang ka muhphet in ka silhpah a ka suah khe ut nawnkei phial hi. Ka PA'n zinpaak ahonpuak kakipahpih luat lam thei ahihman in amah(KA PA) leng akipak petmah a abiang ah akhitui a hongpawt khe hial a ken theisiamlo kahihman in kenleng ka PA kiangah "PAPA, ng bangziak a na kap mawk a?" ka chihleh ka PA'n le ka theihsiamlouh a ahylo lam a ka ngaihtuah khak d lau chuh ahingei dia hichiin ahon dawng hi "Bawi, ka kaplouh pi ka mit ah niin neng ahonglutkha a huaiziak ahi" chi in a hon dawng hi.

Huchin Christmas le Kumthak hunnuam te ka NU le PA tawh ka hon zangkhom ua nuam kasa mahmah uhi.A kumnawn february khabul in ka PA suty aneih beinawnta ahihman in kei leh ka NU khelah tak in ahon paisan nawnta hi. Keileng skul ka lut hun nawnta ahihman in skul kai ka honpan nawnta hi. Ka skul kaisung in ka NU'n inn naa poimoh asakte ana semzel a innsung siangthoutak in ana koih gige hi.Huchia ka NU tawh kana om sung un ka PA'n asepna mun ah natna khawktak damdoi a phatuam nawnlou d malaria Pf kichi thoukang natna khawktak ahon thuakkha tamai hi. Kei leh ka NU ading in azaak ahaksa ngeimai. Huchibang thu ka hon zak chiang un ka PA va pii khe ding in ka PAPI ka PA omna mun manawh in ava kuanta hi. Inn ahongtung hun un ka PA agim mahmah mai a, damdawi inn ah kaki admit ngal uhi.Damdawi inn a ka om sung un ka PA'n ahoihlam sang in siatlam ahon manawh deuhdeuh a, ka lung uh agim mahmah ta hi. Himahleh I biak tung van Pathian in ka PA a ompih a bangtan hiam ahong hak khia a haksa pipi in kei leh ka NU om dingdan ka NU kiang ah ahon gen hi.

Kei leng ahonsam a, kakiang ah ka khut len tinten kawm in, "Bawi, kon omlouhsan khakna a omleh na NU thuthu in hong om inla, na NU deihdan zui in thumangtak leh Pathian phawk gige in na NU hong om in aw, Bawi" chihteng ahon gen man hi.Ka PA'n naak haksa ahon sa hiaihiai a, huchiin awl in amit ahong si a ahon omlouh santa hi. Ka PA'n hon beisanta chih ka theih un ka iit mahmah ua, hon paisan din ka phal naikei mahmah a, ka PA ngai in ka kapkap mai hi. Ka PA ngai in samsam mahleng ahon dawng nawn dingte ahikei. Huchiin khelah tak in ka PA ka hon koihkheta mai uhi.Ka PA hon omlouhsan nung in kakingaih tuahtuah mai a, ka neulai a ka PA'n kei adia zinpaak puanak kilawmtak ahonpuak bang kava enthakthak a ka PA ka iitna ka ngaihna athupi tel mai. Hunbi poimawh te ahongtung zel a mite a NU le PA te utawh kipaktak le nuamtak in a omkhawm ua kana eng gu thei mahmah a, kou bel ka NU toh kia in ka om ua ka lung uh alengthei mahmah hi.

Ka PA'n hon ompih lai hile zo mi englou a kipaktak a ka NU leh PA toh omkhawm thei di hi ing a chih ka ngaihtuah chiah ka PA hon iit dan, hon ompihlai a hon hawmthoh a ahon pom thinthen khawng ka mitkha ah ahong kilang dundun a ka NU theihlouh a mittui ka nuul ni atam mahmah mai hi.Himahleh tung Pathian in leitung a ka PA khualzinna hunsata a ka PA samkikta ahi chi in ka NU tawh kaki hehnem theizel ua kakipak mahmah ua ka kha uh amuang mahmah hi.Zuang hongthou in PA aw, na nua chiang a meigong tagah ten na vaang mubang hong ngai ung PAA...

NB : Ka thugelh #‎FATHER's_DAY_SPECIAL dan a I PAA te hon iitna gelhtheih dandan a kon gelh ahi a, ka gelhdan le dik khinlou maithei khenkhat te adia simhak maithei ahi ka gelhsiam chetkei a banah a thiltung taktak hilo a kon phuahtawm ahi ataktak khawng nana sak khak uleh.  

 

©Siamsinna leh Vakiangbu