HIAI AHI, KHOVEL

By ~ Vz Vualnam


A tung uah thilhoih na hihkeita zong in
Honna paakta ding mi om veve ding a
A tung uah thilsia na hihkeita zong in
Honna iiplah ding mi om veve ding hi.
Na chitlouh zahzah a honna it ding
Koi hiam ah mi om veve ding a
Na chit zahzah a hon deihlouh ding
Koi hiam ah mi om veve ding hi.
Michih in lah chituam chiat in a ngaihsun a
Thupi asak uh chituam chiat ah anga uhi.
Khente’n silh-le-teen ah anga ua
Khente’n neih-le-lam ah anga ua
Khente’n mel-le-puam ah anga ua
Khente’n gamtat-khohei ah anga ua
Khenkhat leuleute’n pilna-siamna ah.
Thupi asak chiat uh thuzoh in a om uhi.
Itlouh toh khosathei tak a hinkhua zat sang a
Itpen toh gentheitak a khosakkhawm telzaw a om a,
Itpen toh gentheitak a khosakkhawm sang a
Itlouh toh khosathei tak a hinkhua zat telzaw a om hi.
Adeih gou leina ding a a-innmun zuak a om a
Innmun leina ding a a-it gou zuak a om.
A siangthouna dangka a khawng mi a om a
Dangka nawlkhiin a siangthouna keembit mi a om.
Silh-le-teen hoihtak a kivat a lungkimmna mu a om a
Ngaihsutna gil taktak pokhia a lungkimna mu a om.
Pilna -siamna a ahun teng zangbei a
Mahni lungsuak pilna khatmah pokhelou a om a,
Pilna-siamna sin ngellou napi a
Mite sin ding pilna pokhiakhia mi a om.
Hiai ahi, khovel, i teennaThilteng kibuukkim helhel in apai a
Ahi, koilam hiam in abuukzawk hun leng a om hi.

©Siamsinna leh Vakiangbu