LUAHLOUH LUNGDEIH MELHOIH
~ZM Tonsing
Hichitel a thu
kipah huailou mu leh za dia ka kiphallouh lai a hon mu leh zasak teitei
tu ka phone lei ah denzak phiahlouh di’n pam hina maizen e! Bangdia hiai
nitak sese a ka sakhau a earphone ka kuah ana hichi kikaih-awk nengnung
a tel a? Hiai nitak ka phone battery bei hiam ahihke’h network omlou
khawng ana hileh china mahmah ing e.... Bang dia ka phone in hiai
thugelh kipahhuailou tak ana nawlkhin beeklou a tel a???
Itluat
ziaka hiaitan tung ihihlam theisiam hile chin zaw maw.... Na ‘aw’ neem,
hoih leh kilawm siangset a ka zaaknop ziaka ka earphone ki-awk nengnung
phel kekeuh zaw hive’ng. K’on houpih nuamlouhziak hikei, k’on
ngaihlouhman le hituan kei: hawmthoh luatman hizaw hi. Hon hu-ngaihzek
lai hamham hile chin zaw...
Hiai huntan in le bangmah a
sekei, ka theisiam, keiziak ngen hi. Hon ngaidam oh! Himahleh, i kal
simthu zin hawm hia, Sian’ lemgel, theihsiam ahak in ka thuakzou kei!
Kei phone ahoihlouh tawp a le nang abeek ana hoih hile zaw haitan
tunglou di hihang a... Bang dia k’on message khak kholak a vaithap leh
mangthanglou a, na phone hoihlou a honglut teitei lai ahia awi!?
Bangziaka hichibang message, ngaihdam theihlouh di kammal gen leh
gelhkha ka tel a! Hichibang gelh ka hihlam le ka theisam a. Sian
siamlouh chimai di i diam, Luahlouh Lungdeih Melhoih!.
Nitaklam
ann nedia kisa; nektheih maidia ‘sabuai’ tunga lim in limta keileh
kikhoih ningnengte sawk dia ka kisak lai in ka sakhau sung hong ling
ningning in hong ging zaizai hi. Lamdang sakna di himhim a om kei, ka
phone ahih theichiang lua ka hihman in. Hiai phone, gui neilou kia
phetlou eikhoih ziakle hilou a hongging zoizoi banah hong kisawi ling
nilnil(vibrate) te khawng alamdan dan ngaihtuah le zaw ngaihtuah tham
pha mahmah di eive. Ngaihtuah ale ineih louhluat ziakin lamdang ahihlam
le itheikei tel a hiven. Huan, hichibang thil thupi, hoih, manpha leh
kilawm hetle hetkha ngei dia i kikoih louhlai in a hetkia hilou in i nei
maimah hi. Hiai hun tanin le vualzawlna i don thupilua ahihlam le i
theituansam a!
Ka phone sakhau apan lakhia a ka etleh kua
dang hilou in Lungtup mualsuah pihdia simleitung mi zatam lai a deih
chibang ka teel ka Ngaihnou ana hi a, ahon phone/called na ziakle ka
theipah ngal hi. Midang, lawmte hiam ahihke’h tanau te khawng hile ubel
ann nekawm leh sungkuante’ mai a le kihoupih zialzial sukmai poi ka sa
kei. Himahleh, huaite hilou, ka khovel nuam leh bukimsaktu’ ana
hihziakin sungkuante’ mai a va houpih helhal di nak zumhuai lua!
Zan
nitak a ka message nate hon thulim dawnlou; hon hih eu-au, hon hih
bebauh vial in chin mihing hihna zar a ken huaite ana dou kenkon
zousamlou ka hih chu. Huaiziaka kenle hih eu-au, hih ne-nauh, hih bebulh
suk. Mangpha nasan le khak teuhlou! Haksa sapi-pi a kidek trangtrang in
a ninawn sunnitum a le houpihlou...ahaksat danbel genvual ahi kei. Amah
le kideek tei ahi dia suun khua’n hon houpih tuankei!
Kideekzou
mahmah lou hia ahihke’h thuthak omle hilou a hon hichi neunau mawkpen
kisiik vungvung, kisiamtanlou leh akisuanlah ziaka hon houpih dek
ahihlam ka theichiang lua, fekfok in. Thu maimai hi tha-hahlou, thil
thupi leh gol mahmah gen dinei ka hihna uah ka mai a ann nektheih mai
dia thuksa diam a ompen kitheihmoh bawl in konglam zuan in ka pawtkhia
hi....
Ka phone hoih nawnlou, mitoh kihou chianga a 'aw'
uh kitheichiang theilou ahihman in mitoh ka kihou chiangin ‘earphone’
ngen ka zang hi. Konglam zuana ka paiphei kawm a ka sakhau apan ka
earphone ka lakkhiat chat leh fellouhziak hia, kizenlouhziak(?), awk
chihtak in ana kikawi awk nia-nua ta mai hi. Ken leng hiai ka earphone
gui kikai awk nianua te kin leh kinoh pipi’n phel kekeuh mahle’ng ka
phone in hon hungaihkei: A ging a dai!
Hongging biahbiah
thaknawn lam-en huntawk mahmah lai ka hihziakin ahonggin hunhun a
laktheihpah ngal di chi’n ka earphone kikai awk nianua ka phel zomzel
hi. Message tone tomchik hongging zual chihlouh adang, aging zak di
himhim a om kei. Message ka etleh “Min hon called lai a bon na
lak-utlouh, k’on call non takleh!” chihteng kia a kigelh giugeu tel hi.
Hiai message in amah’ a kipan ka phone di hongpai mawklou hial di
ahihdan hon theichiangsak lua ahihman in ann ne di’n innsung ah ka
lutnawn hi. Hichibang message mu mahle’ng ka ikh ale anam kei! Amah kia
mi phone/houpih theilah hilou a. Kenle ka call theithou. Amah houpihna
di nana-na in chu sum/balance le ka hau aka!
Ann nezou
phet, kamkhuah kawm a ka phone dokkhia in houpih di’n ka kisa ngal hi.
Himahleh, vangtah tuaktuak kisu khawmkha ka hi uh hiam aw...a phone ana
kisia ahi ngei dia ‘switch off’ a kichi bilbel ta mai hi. Hiai hun chiah
in zaw a patauh huai khopmai, hih theih danglah ka nei ngal kei a!
Phone theihlouh nana-na chu message khak a, a phone a 'on' hunhun chia a
lutmai di, chihlouh ngal lampi dang a om sama... Hiaini zaw khovel a
kidang huai, atunglou hiam ahihke’h zalmang maihileh chi na’ng e...
Ngaihtuahna, nunlui ngaihna khovel ah hon tailutpih maimah hi!
Ann
nezou, gilvah toh hih di theilou in lupna tung ah ka lum zenzan hi. Ka
khe a inn bang siik, khe lam liiksang tou, kigulpi ludin hileh kilawm
awmtak in ka lum vengvong hi. Ngeina dan in ka phone ka mek tauhtauh
a... “Bang hih e, hon call ve...” chi’n gen di theihlouh man in message
ka mawk khak hi. Ahitakin zaw, hiaibang message ka khak hangin hon call
din lam-etna himhim ka neikei, a lungsim ka etna le ahikei a, ka chimman
lel ahi.
Minute khatle pai manlou in ka phone hongging
zaizai a, ka etleh ‘amah’ ana hi maimah a... Hon call ve chi a message
ka khak hizenna pi’n lamdang sakna’n ka pum dim, thumang hina biambiam
tel e ka chi lungsim hi. Kihoupih nuamlua himahleh ka zumziakin ka
message khak bang ka kisiik zozen hi. Ahon phone ka kisuanglah kei a, ka
zum zaw, ala ngamlou lampang keive!
Laklouh maibang
lunggulh simmah le’ng maban khualna’n laklouh ka utkei zel. Himahleh,
la(pick-up) leng bang gen di keita? Nak buaihuai ka sa. Hon miss-call
maimai khawng ahihkhak zenzen leh chi’a ka hu-ngaihsim leh ka phone
aging a daihmawk tuakkei! Ka phone gin danbel nidang toh a kilamdanna
khatle a omkei, himahleh, ka bil a ahonglut dan bel nakpitak in a
kilamdang! Ka phone ging in ka lungsim hon khoih!
Phone
ging inlah khawlmawk sawmlou hileh kilawm ahihna ah laklouh theihvual
ahi kei. Nervous louh teitei sawm in ka huu ka la a.... ‘aw’ te khuah
cheuh in “Hello..... Kipahhuaina e n’on called a.... hilele, kisuanlah
ngen in ka pumdim...” chi’n ka kamsiam theihtawp in ka houpih nalnal hi.
Gendi tamlua hinapi’n gen di ka theikei. Ka tang chotchot! Amah le
zumsim ahi ngeingei di, ka dotna te kia hon dawngin a dang a gen ngeikei
himhim. Kenle a hondawnna-te le ka theituansam kei, chihbel, ama hon
dawnsung a en a dang, i gennawn di lungsim leh ngaihtuahna tengteng seng
a ana ngaihtuah zel ihih chia....Anuam in ahaksa! Huailai, ‘A’ a
kipatlai khawng ngaihhuai hina maizen e.... Hun a paimettel mai!
Kumthak
kipahhuai lawmzou dek geigei, kumthak beini zaan in Pathang in
“Khristmas hihnang kha 12 kia in sam hinawn manzel hia maw” hon chihleh
nuihbang a za zozen hi. Himahleh, zuau gen ahi kei. Kha 12 kia in
sammah. Ahi-hi hita sukve. Huai Khristmas leh kumthak chih veule
lungzuan thelbang thousak tulel hi, salam ah.
Hun-le-nite
mualliam zungzung mahleh nang ngaih in mualliam hun neiken chin... Heina
peuh i sulnung puanbang a thakzel a... Selungleng ding himhim a piang
ka hiam aw, sawlbang ka heina peuh lungzuan sialna ngen.... Gualngaih
kim a lenlai leh ngaihtoh lenlai ni chikleh ka ngilh zou dia?
Vangngaihnou, nanglah singdang siang ah muang ni chia maw? Kenlah
singdang tongdam naubang sangtheikei ve’ng... Ana in a poi ngeimai, Sian
lemgellouh ahiam aw??? Hon ngai ing e Luahlouh Lungdeih Melhoih!
15/01/14
©Siamsinna leh Vakiangbu
Comments
Post a Comment