LUNGKIMTAK IN SIHNA NA ZUI DIAM?

~Vz Vualnam
 
Leitung a na lunggulhpen bang ahia?
Na lungkim na’ngpen hi a na ngaihsut bang ahia?
Sum leh pai tasamlou in na duh na deih nei peuh lechin?
Na kiim na kiang kial taleh nang vah peuh lechin?
Na sak na khang vot taleh nang lum peuh lechin?
Leitung nopsakna a bual a, utna teng suk pichin?
Huai ahihleh, kidaam ke’n, na deihzah in bual in.
Na innsak khual ke’n la, na innkhang limsak samke’n.
Na hauhsakna ah nuamsa inla, chiilbawlke’n.
Tuailai’ hun lah akhiatlahhuai ngal a.
Huchi’n na hinkhua n’on zangtou dia,
Na tuailai thahat hun n’on kheng ding a,
Upat hun in ahon pha ding a,Haat nawnlouh hun ahong tung hi.
Thakhat in patauhna kha in ahon man ding a,
Kisiikna tuichiiim in ahon tuummang ding hi.
Kipahna leh lungkimna chia na delh thilte a,
Kipahna leh lungkimna himhim a omlouh ziak in!
Nang, na tuailai’ hun na deih bangbang a zangpa’n,
‘Hai hina ing e! Ka hinkhua ka mangthangsak khinta,
Hiai tan ka damsung in hin himhim ka na hing hetkei,
’Na chi ding. Ahi, na mangsak nguut ngei!
Na hing hetkei nguut ngei! Hinna lah neek leh dawn ah ahi ngalkei a,
Silh leh teen ah leng ahi samkei hi.
Hinna lah sep leh bawl leh piak leh hop,
Huh leh panpihte khawng ah ahizaw ngal a!
Na kisiikna a gik dingdan tel!
Na kimohpaihna a let dingdan tel!
Ahi a, nang na hatlai uh tua bang a zangpa’n,
Kisiikna ding tuan na neihkei leh,
Naungek in na piang a, naungek mah in na si hi!
Leitung a kum huaizah na damsung in,
Khan himhim na khangkei hi!
Taksa kia a khanna bang ahia?
Nebeitu loungal bangdang ah phattuamna anei a?
Damsung lamkawina koimun hiam ah,
Sihna in ahonna ngak gige hi.
Tua sihna na bingtuah hun chiang in,
Na lunggulh bangtak a hinkhua na zatziak in,
Lungkimtak in sihna akholam ah na zui diam?

©Siamsinna leh Vakingbu