CHIANGKOT A TAWSAW

By ~ Vz Vualnam

Galmual a chiangkot ah
Tawsaw kungpi khat apou a
Khaal huih a hong nun sim in
‘Nipi hong tung ding hita,’ chi in
Kithalawpna in a dim naak hi.
Banghang a kithalawp ahia?
A gaal ah vaukung a pou a
Nipi a hong tun chiang in
Kilawm tak in a paak zel a
Zu leh va’n a boh liailiai uhi.
Tawsaw’n tua vau a eng mahmah a
Khaal huih a hong nun sim in
‘Kei leng ka paakta khong ding,’ chi in
A na kisa beemten sek hi.
Himahleh khaal huih a daih a
Vau paak nanung apulh a
Tuuk vuah a hong luan tan in leng
Tawsaw tuh a paakkei lailai hi.
Kumteng a huchi hinapi in
A lam-etna a khah utkei.
A kiim a singkungte’n, ‘Tawsaw aw,
Lam-en nawndah in,’ a chih un leng
Kumsim in a lam-en a
Kumsim in a lam-etna a thawn hi.
Kum tampi a lam-enta a
Kum tampi a lam-en lai ding hi.
Paak kilawm a paak ding a lunggulhna
Kua’n a laakmang sak thei mahmah dia!
Nahteh khat kia aluai tan in leng
A lam-en lailai ding hi.
Kei tuh tua tawsaw liim a
Nileng a tut nuam ka sa hi.
Amahlou hon theisiam ding mi
Hiai leitung ah a omkei hi.
Kum teng a aw neem ka ngah chia’n
A itna leng ngahta ding kisa in
Lam-etna’n ka na dim kha zel a
Himahleh kumsim in
Ka lam-etna a thawn zel hi.
Khaal huih bangzahta nung mahleh
Tawsaw a paak ngei tuanlouh bang in
A aw neem bangzahta sang ta mah leng
A itna a hon puak tuankei lai uh.
Himahleh lungke ngeilou tawsaw bang in
Ka lam-en lailai ding hi.
Nikhat ka bilbuuk ah
‘K’on it,’ ahon chi khong ding.
Paak ding a siam hilou tawsaw
Chik chiang in a paak ngei mahmah dia!
A itna kei a dia siam hilou
Chik chiah a hon it mahmah dia!
Himahleh kei leh tawsaw kung in zaw
Tua lam-etna ka tawpsan kei dingua
Nahteh khat kia a luai tan in
Hu khat kia’n a sap dong in
Ka lam-en ding uh!
Hinkhua zaw tua bang ahi –
Hon theisiam mite’ kiang ah
Ngeina i bang thei hi!

©Siamsinna leh Vakiangbu