LUCKY DRAW LEH RHINO DRAW…!!!

Written by: K Lianthansang

‘Leikawm apan Phuluun hong pawtkhiak na di Leikha in a keihvangsak’ chih, thudik haihvuallouh ahi..!!. Banah, ‘ Talpaak-te banglou in, eimi-te I sih chiang un Haanmual a leikawm ah iki vui (phuum) ua, tulai a Tuailai lamte’ lak a SIH KIDEMNA om hongbat ziak in I Haanmual-te uh adim dekta..!!’ chih leng, kihilh ngailou a itheih mahmah uh khat ahi, chileng saulua genkhial law di’n kaki gingta kei..? Huai mahbangin,‘ Mutpuak (ballon) I muut chiang in, mit a muhtheih in hong khang hulhul a, ahunphet theilou a I pawng muut-muut chiang in a puak-kham sek ’ chih, leng ‘ABC’ simthei nailou tanpha in atheih uh khat ahi nawn.

Tuabanah, ‘Lucky Draw (Lottery)’ kichi thumal bang leng I theihveksa uh ahi ngei ding a, hiaiziak mah in leng mi tamtak in hauhsak-lawh in, tamtak in zawn-lawh uhi. Huchibang vingveng kal ah, Assam gam a Kaziranga National Park ah ‘Rhino(chingpi) Draw’ kichi leng aguuk tak a sai in ana om a, hiaiziak mah in leng mi tamtak in hauhsak-lawh in, tamtak mah in sih-lawh ta uhi. Eimite’ lak ah leng ‘Agent’ tam mahmah ta chi’n a gensek ua, mi tamtak in ‘Kaziranga National Cemetry’ chihtheih hial dia zangta ihihman un, adik mah leng hiding in a gintaak huai…!!

Pawl tuamtuam (aneu-alian) in Lucky Draw hon sai ua, mipi’n Vaang etna in sum tampipi sung ki sung nainai sek hi. A saitute’n sum thoh a dau (vaang) en di’n kuamah a bingphuut(force) kei hial ua, mawhsakna di a omkei. A tel-te, amau utna leh thupuukna a tel ahi ua, a vang un a zawhkei leh leng kuamah mawhsak di a omkei. Nupa kisiat-lawh, zawn-lawh, innmun taan-lawh chih te pen eima’ mawhna hilel hi. Mi tampi atel ua leh a saitute’n leng sum mutam uh chihdan ahihman in, mipite’ sumthoh apan a sum mu chihna himai uhi. Huaimahbang in, Phuluun’ hongpawt na di leng leikha in amau utthu in a keivang ua, phuluun in a bingphuut(force) ahi hetkei. Leikha tampi in phuluun’ pawtna di muntam a keihvang ualeh phuluun tam pawtzou di chihna hilel hi.

Mi khenkhat in, “Lucky Draw kichi Pathian thu tawh kikalh ahi” chi uhi. Hiai tungtang ah bang ngaihdan inei a chi in kidong leng, kiselbuai hial ding in kaki gingta.(?). Tuisou dawn ahoih a, a soulou dawn ahoih kei. Himahleh, tuisoulou dawn khak ziak a sihpah lawlaw di ahi kei..a soulou dawn pen ahunphet theih ahoih..!!. Lucky Draw a tel asia ahi pah lawlaw kei, Pathian muanna pen I taihsan khak di leh bel tellouh vet ahoih. Aziak ahihleh, tulai hun a Pathian in hon vualzawlna vaan a kipan hong khesuk di ahih mawklouh man in amah a muanna koih a, ama’ vaang a vualzawlna ngahna dia zat a sekei. Himahleh, sun-le-zaan nasan khuallou a, mang(dream) khawng a kinga leh Pathian’ sang a mahni mang(dream) muanzawk a nei-te’ a di’n bel tellouh ahoih, milim(milem) biakna tawh kibang ahih ziak in..!!

Huaibanah, ‘Damloute a di’n damdawi neek ahoih a, dam napi a damdawi pen khamtheih dia zat ahoihkei’. Tuamahbang in, Damtheihna dia zu dawn asia ahi pah lawlaw kei, dam napi ahunphet theilou hial a zu dawn a, mahni damtheihna tanpha suse-te’ a ding in bel dawnlouh ahoih..!!. Saptuam tamtak in Christmass leh Kumthak lop hun a gangoh uh lu(head) te khawngbLucky Draw a prize dia bawl in, huai a sum muh-te saptuam phungvuhna hisak uhi. Huaikia hilou in, saptuam sung a Department khenkhat bang in Lucky Draw sai ding, Project(planned chi ni) bang in nei thepthup uhi. Pawl tuamtuam tamtak in leng Lucky draw sai vengvung ua, Pathian’ deihlouh dan a sai-te bel amau mawh kipuak di hilel uhi. 

Sihna kichi in khentuam aneikei a, mihing-te’ pumpelh zawh di vual leng ahikei chih haihvual louh thudik omsa ahi. Mihing-te’ bawltawm sihna apan sum in I hinna achaang in leizou mahleh, mihing’ bawltawm hilou natna leh sihna zaw sum in leng leizoulou a, khawvel a Doctor siam penpen ten leng daal zoulou uhi. Huchibang kawmkal ah, ‘Rhino Draw’ kichi te a vatel a, sihna delh a vadelh pawl om veve hi. En Chingpi kii(horn) iva Draw khiat sawmna lam a ei hinna iva mansuah leh a mangthang kisuak lel ding hi. Tuailai-te’ lak a ‘SIH KIDEMNA’ a nasatluat ziak a I hanmualte uh dimgawp dek mahleh, Assam gam a Kaziranga National Park pen hanmual dia vazat sese kuul lou hi.

Mi khenkhat, a sumzonna uh I theihpih kelkul te khawng, zaankhat thu a muhtheih hial dia hongkhang hulhul chiang un zaw, a diklou leh patauhhuai lam ahi zaw ua, engluat di ahikei..!!. Mutpuak bangmai ahita ua, muhtheih semsem a khang hulhul hong ut deuhdeuh deuhdeuh chiang un puakkham nuam uhi. Sum hau phephu, neek dia leizawh di hizeenpi netheilou, lupna hoihtak neizou hizeenpi ihmut limtaka ihmu theilou, inn hoihtak lamzou hizeenpi asung a nuamtak a teeng ngamlou chihte khawng puahkhapna kipatna kalbi himai dan ahi..!!

Khawvel a piangkhe taphot, sum deihlou om ding in a gintaak huaikei. Naupang pauthei nailou tanpha in sum deihdan thei ahihman un, sum in zaw hihtheih ahau ngial hi. Sum lawh na dia banghiam sep ana poimawh a, huai sepna muhna ding in leng sum ana poimawh masa veve hi. Sum in leitheih ahau a, himahleh hinna, nopsakna leh lungkimna taktak aleitheikei…!! Sum deihlou omkhang, ahihhang in sum I muhna leh muhdan ah ki veelthak ni chinuam dan ihi zaw. Huaiziakin, Lucky Draw sai(di) te’n leng a ‘DIKTATNA’ uh hon suahzom zel uhen la’n, Rhino Draw a tel dia kisa te’n leng ‘TAWPSAN’ le igam uh a Chidam dia, lei ah leng I Damsawt deuh ding uhi.

2412 – Kakipak – 2014

©Siamsinna leh Vakiangbu