SORRY CHRISTMAS

~Lianzamang Tonsing Kʞkʞ

Niangbawi toh itna gui khaubang ka pehnung uh kum 2 leh kha 6 bang a chingta. Christmas bangleng singdang englou in 3 veibang ka na zangkhawm ta uhi. A kallak ah thusia-lasia in hontuam a, itna meipi zing in vangkholai ah sakmin sia’n lawibang than hunleng om tham hi. Tua kia hilou in, ahunsawt dungzui in khat-le-khat kiningtuah hunleng om theizel hi.

Buaina tuamtuam in nung-le-ma, vei-le-ziak ah honkhiang in, hon um-chimit zel mahleh nihgel lungtuak a tongchiamte theibang huut di’n ka phalkei uh. Lungtup khomual suah a, anuam-ahaksa thuakkhawm a, loubang tulkhawm di’n hanlung ka chiam thakzel uhi. Pialgal gamnuam a dawnbang kituak dia khenna lou ngal thildang bangmah in hon khenzoh ka ging kei.

A hausa vekvuk a gen di hial hikei mahle uh kou toh teh in zaw Niangbawi-te a tungnung zo-tham uh. Huan, mel-le-puam ah leng Niangbawi’ mai ah puanse kihhuai bangmai ka hi. Himahleh, itna ziakin amai ah chitlahna himhim nei in ka neikei. Itna’ mai ah zaw ka bukim. Kisuanlahna di himhim om inle ka theikei.

Kumte apailiam zel a, i duh-i deih, kul-le-poimawh banah lunglut leh nopsak zawngte bangleng kikhek kawikawi hi. Nidang a ihih ngeinate tu’n zaw ‘thring’ a kisa ta. Vanthak leh mutpuak toh Christmas nuamtak a zat hunte a beita. Zanhak di chi a inn lum a lupna nuamtak taisan a, kholai ahihke’h dailing nuaipeuh a khovot-daitui nuai a votsa pipi a ihmut hunte’n lenmual a khumta. Haihuai bang a kisa maimah hi.

Lawmta kizui dondon a, koikawm hiam a mei-awi kawm a nuihchiam lelna maimai di’n Christmas ka phal nawnlou. Kuate hiam toh kizui heuhheuh a, puankhat zawngkhawm a, amialna mun, kawmbu-bu naih a, hunnuam zatlouhna di’n Christmas pamlua sa’ng! Kum 3 vingveng bang Christmas ka na zatpih Niangbawi toh nidang a ka zat ngeina dan uh, kikhawm a, lengkhop hun a lenkhawm zel pen ka ningin ka chimtak ahi maita.

Tutung Christmas zaw pasal khat hihna zal in mite hihsek bang a hih a, khovel bangleng khatvei bek nopdeuh a zat di chi’n hanlung ka chiam hi. Kikhawm lou di chihna hilou, lengkhawm lou di chihna le hituanlou in, huaite khel ah nidang bangloutak a zatleng lunggulhna lianpi ka nei mawk hi. Niangbawi toh bel alou theilou a zatkhawp ka ut himahleh, ama banah midang leng ka poimawh. Mite’n Christmas ‘gui zen a’ a zatlai ua en siangthou tak a va zat heuhau gige leng mibatlouh huai khat hi’n ka ngaihsun. Niangbawi toh zangle ung lah nidang a danmah a zangzel di ung ua….

Tupna om leh lampi om. Ka tup mahbang in Christmas Niangbawi toh zangkhawm thou mahle ung midang leh thil tuamtuam toh ka zangtam zaw hi. Mite zat bang chi’n keimah hihtheih khom in ka hih ekh sam hi. ‘Pasal khat’ chi’n nidang a ka hih ngeilouh thilte – tep-le-muam, nek-le-dawn ah ka kisum hetkei.

Nidang a Niangbawi toh ka zatsek dan utoh tehvual ahi hetkei. Nek-le-dawn kia maihilou, ka taksa pum siangthouna huaikum Christmas in ka khahsuah hi. Niangbawi toh kum 2 val vingveng bang kingaita himahle ung numei-pasal kal thangtatna ah ka kibual kei uh. Ka siangthou petmah uhi. Khat-le-khat ka siangthouna uh kizahtak tuah in, thangtat tak a om di lungsim inle ka nei ngeikei uhi. Simleitung mi zatam lai ah damsung loubang tulpih dia deih chibang ka tel hichi maimai a bawl di’n ka phalkei.

Sualna chiteng toh Christmas zang mahle’ng ahun in zaw paulam kilawm pipi zang in Niangbawi’ mai ah ka kiveng zou sam hi. Christmas a hongbei a, kuapeuh in i gen mangmoh leh ngaklah pen hi gige ‘31st zan’ ngial in chu Christmas a anop dan ka theihsa vek ahihman in Christmas laisang in ka huaise zaw hi. Kinelum lou phet ka hi chile’ng le khial di’n ka gingkei. Huaikia hilou in, Christmas leh 31st zan a numei’ tung a ka sisan senteng misuak hivek mawkleh tamtak’ pa ka hi ding! Numei tung a ka gamtatna pen ahun in Niangbawi’ mai ah imm zou mahle’ng nek-le-dawn thu ah zaw imm theihvual ahi kei.

Ka nek-ka dawnte kham a, khophawklou a bangtan om ka dia aw…. Niangbawi in bangtan honna khoi leh kem man a chih theikei mahle’ng a omdan in zaw hun tomchik ahikei chih a chiang. Mundang a lah hon paipih zoulou, midang theisak lelah kei minsiatna pen ama’ minsiatna bang a ngai ahihman in ka minsiat di aphal kei. Ka omna mun ah khovot thuak in honkem den hi. A anglum hithit a hon pom in, akhut vot dikdek in hon kawi a, neh dup didelh leh votsak ziak a khaguh kitattuah gagat kawm in a khamzohlouh khitui in ka mai hon taksuk kauhkauh hi.

Itna ziak liuliau in ka sualna leh chitlouhna-te tengteng ahon ngaidam hi. Ka hoihlouhna te tengteng leng kitheih mawhbawl in a thei gige nawn ta kei. Hichi bang atak itna ka tankhak hampha ka kisa a, lehlamtak a lamdang bang sa in ka phulou itna tangkha bangin ka kingaihsun hi. Hampha ka hihlam ka theisuah deuhdeuh hi. Himahleh, hunte paizel in ka sulnung leh gamtatna tengteng a hong dawk hiaihiai hi. Itna ziak a ngaihdam a ana om khinta himahle’ng itna ziakmah in ngaihdam in ka om gige zoulai diam?

Niangbawi mahtoh Christmas ana zangkhawm den himai le ung zaw… ahihlouhtawp a le nek-le-dawn kia bek toh! Bang dia ka pasal hihna ana hichi suang khaktel ka hia? Tu’n zaw ka mai ah lampi nih a om, ahi thum: Pa’ dinmun len ding maw, tualthat diing? Pa’ dinmun banah ka deihpen chan a, ka deihlouh khattoh innkuan tung diing maw? Deihlouhpi khat toh innkuan bawl ding pen meidil a om toh kibang ding hi.

Itna ziakin ngaihdam in om mahle’ng hiai mun ah zaw itna ziakin a hon ngaidam theikei! Niangbawi in amah ka deih ziak a tual ka that diing leh numei khat hinkhua manlouh a suah ding a phal diam? Phal in hon ngaidam bang himawk leleng ka zulhzau sanna nung ah lungnuam leh kipak in hinkhua hon zatpih ngam taktak diam? Poi hina maizen e…

Ahi, ka tuh bangbang at a, ka damsung at diing zaw ka hi mai ve… Numei-pasal kal ka thangtat ziak hia ahihke’h ka khamtheih-guihtheih hihte ziak chihtheikei mahleng ka damsung natna diing ka lasawn kha zo-mah hi. Ka lunggulh leh ut zaw ka deihpen khenna ding lel leh ka deihlouh leh utlouhpen neihna diing lel ana hi maw… Bang dia Christmas kichi le ana om sese ahia??!! Aw nang Christmas, na omna san leh na tup-le-ngimte mihingte’ atoh kigamla hina tel e. Sanggah zatam bawltu leh nuaizinmang’ henkol a tanna dia tuanghong tung zaw hikei niteh maw! Nuaizinmang’ henkol suuttu dia n’ong paini himahleh henkol tang za in tam e!

Niang hon ngaidam in aw…. Kum 2 val vingveng itna simthu khaubang sutkhawm hang a, anuam ahaksa thuakkhawm diing chi a tong i chiamte keiziaka theibang hutmai maw. Na paallut lai nite kei a dia zangbei chin a, na duang et-lawm leh na ningzu tawpnuam a, tangpal zatam in thangbang hongvil ni a kei ziak a nawlkhin chin a…. Kei ziak a haksatna chiteng na thuak nung a, tua kei ziak a lupnopna in hon melma bangkhop a hinkhua na zat diingpen gel ngamla’ng… Hehpihna toh hon ngaidam hamham mai in aw…. Simlei ah gibang kikhen mahle, Pialgal gamnuam ah khentuam omlou a dawnbang kituak dia ngaihdam a ka om theihna di’n thu honngetsak lai in aw Niang….

Hun mualliamsa te samkik theileng, nih gel lungtuak a Mang’ pianni lawmkhawm a, itna simthu sut a singdang englou nunnuam laitual vabang i lengkhawm lainite samkik nuam na’ng e. Houlung kum chimmanlou a gibang khenmai zaw na lua ee…

Eite tan dia hongpiang Mang Immanuel pian champha lawm, lungsim kihong tak a Toupa pahtawi a, nuamtak a zatni di ah maw ka leitung hinkhua bangmahlou ka suah. Tun-le-zua leh laizomte hiaini a maw lungkhamna kongpi sung a ka lutpih maimah!

Eite Tandia hongpai Toupa Jesu lawmlou a, eimah utdan leh nopsakdan – khovel’ thilte toh Christmas zat maimah pen ‘thring’ hina maizen e. Naupang’ lungsim siangthou taktoh hiam ahihke’h Niangbawi toh Toupa phat a ka zatkhawm laite uh thupi leh manpha hina maizen e. ‘Thring’ ka sakte hoih leh thupi a, hoih leh thupi a ka ngaihte laukha’ inn lam zuan dia honpitu ahi zaw hi. Aw Toupa, kei Tan dia n’ong paini’n maw nang a kipan ka na lampial maimah… Hon ngaidam in!

15 Dec., 2014

©Siamsinna leh Vakiangbu