KHIAKLAH LUNGDEIH : PHULOUH VANGNGAIH

 By: K Lianthansang

Phalbi khovot takmai dou pih dia Secondhand puan-aak beek leng lei ngamlou himahleng, ka lungdeih vangngaih’ a di’n zaw iit kaneikei..!!. Banah, Iitna in khovot phawklou taktak zaw hi’n teh, phalbi zaan khawsawt leh daai kaai nuai-ah, amin lel leng ka lawh ngamlouh, mite’n hon theihpih louhna ding ua, ‘Rose’ chi peuh a kasap ngaingai zel’ siang ah laitual vabang valeeng ding in kong ki thawi panta hi.

Kum 2014 bei dia kisa (31st nitaak) a, mi teng patau hile uh kilawm a a-om vengvung na kal uah kei leng kong ki ze ngiaungiau samta hi. Vangphathuai tak in, ka Lungdeih Rose toh kaki mu ua, midang kuamah phawklou in ka om hiuhiau lel hi. Lampi kiang a footpath ah ka tu a; mi hong mukha te’n ka omdan hon eng ngoihngoih di un ka gingta kei. Ka lunggulh leh deihpen toh omkhawm a, ka lungdeih Rose in ka duangtham gubang a hon zen ngiatngiat ahih man in, ken leng singdang kuamah ka-eng tuankei..!!

Ka ‘Luck’ ziak hia? Ka ‘Flirt’ ziak hia? ka theibun kei..!!. Kiphatna leng hituanlou in, om awl manlou zen a ngaihtuah di Lungdeih bangzah hiam kanei sam hi. Rose ngaihtuahna kia in kahun-te zang hileng adan omdeuh di hiven maw..? Ihmut hun di le phawklou zen in, ka lungdeih-te tanzawhna (ngahzawhna) di ahih nakleh, zum leh zah leng khuallou hial in kaki pei hehu sek hi. A khenchiang in khekol langkhat lam kia leptou sa a ka pan hun a om a, akhen chiang in vok-ann bel vom bembom khawng bang leng ka va sawk guigui hun a tam hi. Jacob in a pu Laban’ kiang a, a zi di lawh a nna asep lai a, a-om didan khawng bang hon ngaihtuah sak vungvung hi. Sap te’n “Love is Blind” a chih uh zaw, kei tung a dik khol abang…!!

Misi omna, Moukha omna, Moulawm omna, Christmas lopna, Kumlui khakna, Kumthak lopna chih khawng-te, kei a dia sa(meat) ka neekkhak hun omsun ahi sim mai di e. Huchih hun chiang a, meh limdeuh neek di khawng bang kaneih chiang in, Lungdeih leh ngaihnattuam dang ka nei a, ka neek ma ngeingei a kimuhpih a, amah tawh ki muuk-nuai khawm khawng ka utpen ahi sek hi. A nu’n khawlak pawt di phallou in, chiangpum tawh pangsek mahleh, a pa’ tungtawn in a inn uapan kava kaikhe thouthou sek a, huaiziak in ka uut leh tup bang ngei a ka omkhawm hun uh atamzaw hingei di’n ka gingta..!!

Hiai pen ahihleh Rose banglou tak in pau tuamtuam a zangthei a (siamkei mahleh), kei tawh bel sappau in kaki hou ziahziah sek uhi. Pau tuamtuam zangthei ahihman in, miteng in leng a neel mahmah mai ua, ama’ ziak in papi leh tangval hon bangzah hiam khomui zuul in a inn uah houlim khawm nainai ua, akhen-te tutnanuam kituh in, paikuan bang in kisual vengvung sek uhi. Luck lua ahihman in a min kon phoulaak dah vet di, midang kuamah aa din ka phalkei..!!. Hon Iit pih khavanglak le uchin a kamsiamna leh dangnaal na maimai in leng naki taalpai zungzung ding ua, nalla kuak peuh na bohkhak hun uh a omkha ding. Huaiziak in, hiai pen theih le sawm dah vet unla’n, na theihkhiat khak ua, nava zualluat khak di uh lauzaw un..!!

Ann neek ma a ka lungdeih (pau tuamtuam zangthei pen) toh omkhawm hun salou in, ann neek zawh chiang a di chi’n unau kituak mahmah 2(nih) dawpfel sa in ka koih sek hi. Hiai te unau tawh ka omkhawm chiang in, ‘mouth to mouth respiration’ ka hih zel ua, ka tuap leh sin (liver) tanpha hon zeelsuak hi. Cancer veilouh na di chi’n, kamsung ah haai (chew) kawm nei khempeuh mah leng a phatuam tuankei..!!. Hiai te unau a thumang ua, ei nopsakna di ahih naakleh kamsung a om leng poi salou uhi. I sunglam khawng a lut in laam liailiai ua, akhen chiang in I naak vang peuh ah hong pawtkhe hanhan uhi. Hiai te unau in, lawmhoih mahmah khat anei ua, huai pen ahihleh I kamsung ah chiltui tawh laamkhawm nainai ua, I pau ciang khawng in hong tawmpawt souhsouh uhi.

Lungdeih zatam vontawi lai ah, kei sanggah lungmawl in Vangngaih hichituk a kana hauh khak lamdang bang kaki sa zozen a, achang chiang in kaki ngaise thepthup hi. Chrismas dek kuan a, “Bawi aw tukum Christmas zaw hon guui ken aw?” chih laa ka zaak khaak khawng ka khawnung ngaihtuah chiang in, ken le ka Lungdeih te guui thei gige kahih dan kaki theisuah hi.

Kei, mibang a hau a, ut leh deih teng neizou zatzat le hilou pi in, Lungdeih Ngaihnou hiai zah tak neidia Phulou kahihdan kaki phawk thakthak a, Khelahtak in ka Lungdeih-te 1st January, 2015 apan ka taisan ta..!! Khiaklah Lungdeih aw, Phulou na Vangngai kha hizaw ing…..huaiziakin lungtuak a houlum kumkhawm thei ihi nawn takei….!!!. Khiaklah Lungdeih: Phulouh Vangngaih- Rose(RP), Zu, Kuva, Khaini, Laizial, Tuibuk te aw…, nuihmai tawh kumsawt tangbang ka damna di’n, Lung in kingilh ta ni..!!

0601 – Kakipaak - 2015

©Siamsinna leh Vakiangbu