TANGTUNG LOUDING

By ~Liana Ngaihtepa

“ Tangtung theilou ding ngaihsut gige na in, lungsim ngeina putzia mansuah theih ahi”.

Huaite ziakmah hilou ding amaw lungsim neu leh lungsim kawchiik non chih gige na uh. Paa lemtheilou paa peektawl chihdan deuhin a, ngaihtuahna gim huai pipi kana ngaihsut ziakmah adiam tawl demdum na’n hon tuum gige hi.

Panlading chi’n kal ihon suankhia a, kongkhak bulah dinkhawl guihin, “ kuate hiam hamphatna ding amaimah diam maw” chi’n thazawi takmai in kal kasuan khia hi. Banghiam ihih dek chiangin makaite gin omlouh leh neekguuk taakguukna mahin hon meekton sukzeel abang hi. Ken bawldi teng va bawl mahleng atawpna ah deihsakna mutuankei ning chi hina zeenpi lungliap pipi in vaki hih nuang sam hi. Mahni mit a niin mulou pi’n mite mit a niin kimupah sek hi.

Igam dinmun zaw hichilua hiveh, huaipek apan ibawlthak keileh paidik nawn kenteh kichisek hi. I makai diktat loute va buaipih luat bangle ei hinkhua hon sukha mahmah hin kathei hi. Makai hoih leh hoihlouhnate kithei mahmah hi. Atuam deuh ihon teelching alah, khantouhna ding khopin panla isa zoukei zeel hi. Pathian phawkmi makai dingin ideiha himahleh atamzawte adingin lungtunna a om tuankei hi. Mihing duhthusam nitengin akikhenga, makaite apan lunggulh leng nitengin kikheng hi. Hichibang kinepna lungtun huai tangtung ngeilou ding hi. Tangtung naaksangin hiai ngaihsutna in iitna kiamsaka, ken bangchileh hamphatna aguukin kalai suah theidia chih ngaihsutna hong pawtin hazaatna lungtang honglian hi.

“Sakhi apii asanleh anou leng asan” chih danin, eilak ah leng ahoihlam hi’n aselam hitaleh chii tuhsa tampi om hi. Tua idinmun uh khengding, paidan khengding I gengente uh tangtung theihna dingin khang hong kikheng nawnlam ahihkei ngal leh tangtung lou ding hi. Tui luanglai vahei kawi sangin aluang main aluang nading lampi sial masa leng, isial lampi ah hong luang nalou ding maw. Ei tate hi’n midang tate hitaleh siatna hong kipatdan theisiam ngen hita hanga, huai douzou dingin Pathian tawh pangle hang izou sam keidia hia. Hiaite idouzawh chiangin igam – inam adingin bitna, khantouhna, kideihsakna leh diktatna hongom mailou ding maw. Abul apat panlou hanga aleek apan ileh patziaka kileh zial khinvek ihih maimah ziaka buaivek ika hia. Pathian lauhna neilouin bel, a mihin pihte iit dingin gintaak huai lawmlawm lou hi. Ui in a kihtaakte a nak nakkhem chihdandeuh in enleng iva nak nakkhem hi.

Mihing lungsim tuamchiat himahle hang, zuu haite ziite sanga mifel zaw omkei phial leh kilawm. Amau kha, “ kapasal hongtun chiangin aki tomzaak louhna ding, ahon vuak louh nadingin bangchi bangin pan kala dia” chi’n mansa gige in om uhi. Tuamah bangin Igam – Inam makaite leng kiging gige in a om ua, en iva naihdan leh ei apan deihsak theihlouhna banghiam om ahi diam? Chih bang ngaih tuah mawkmawk ingh. Pathian muang taktak mihing nahih leh makaite tungtawn in vuakzawlna namu khamawh keidia hia. Nang nahoih zaw, napil zaw, natungnung zaw ichih theihma lemna omthei louding bang hi.

Kuapeuhmah in mihing pahtawina sangin Pathian pahtawina mah delh zawlehang hoihzaw ding hi. Nanglehkei panlakna ziaka isepkhiakte ki sialsial keini hang. Nang thilhoih hihte ziaka na damsung leh leitung na nutsiah zawhchiangin kipahman muding hiteh. Mihoih leh chitakte ei sungah sawt a omtheihlouh ziak mahtak adiam, sawtkuamtak omtheite bangtuh diktatna neidingin kikoih theilou bilbel maidan hi.

Gamdangah sepna hoih pipi sem tampi I omta a, lungdam huai hi. Kumtawp hunbi uapdingin I pianna gamlei nazuan ua, atamzaw te’n bang ageen ualeh? Maizen!!! Leivui khulua painawn louh ding hi. Mawkmawk huaibang chikei unla, idinmun namit mahmah a muu chinua, diik zawmah lai nahih manun nou loungal idinmun theisiam ding omkei hi. Nang honsuang tute tualniam taka omden ding phal nahiam? Nou banga chitna – siamna neite mahin igam nakep dinguh kingak lah lua ahi. Igam in nesethei ding kisam nawnlou, tungdingtu ding kisam hihang.

Siambang sinte’n igam – inam mah lunglaiah batin hong pang unla, tangtung louding gamlei ah haibang na ngak nung e. NOU VUALTUNG TUANNA, KOU DINGA HAATNA HI.

©Siamsinna leh Vakiangbu