ZAAN KHAT PHEISAM IN HON THUHILH...!!
Written by: K Lianthansang
Halpuak
(crackers) bangzah hiam a-kizom a ging dumdum te’n ka lupna tung hon
khawng liing duldul zozen ua, moukha om hi di’n ka koihsuk pah mai..!!.
Ka innkiang ua lampi ah lah gari khawng hongtai luum vengvung zomah ua, a
khenchiang in buaina om hi di’n ka koih thepthup zel hi. Ka lupna apan
ka luu(head) ka phong tou geekgaak a, thawmging zaak di a tam
khopmai..!!. Ka kiang a lumsek, ka zi-le-tate leng ana omkei zomah ua,
Jesu hongpai a laaktouh a omkhalou hidi peuh in ka kikoih thepthup hi.
Ka manglam mah abang cheichuai a, ‘pengnawng’
a chih-te uh chu kahi peuhmah di. Huchia ka omlaitak in, nitaaklam a
kumlui (2014) khaakna dia kigou, bawng luu(head) ka doplai ka phawkkhe
guih hi. Fuhsim chiichiai kawm a, “Kg 17 leh gram 30” chinuam selua a, “Kg 17 leh glass 3” ka
chihkhak lai khawng hoihtak in ka theikhe dundun a, keikia ka lupna
tung ah ka tuike-nuih veivuai hi. Ka zi-le-tate leng vangam a laaktouh a
om hilou in, Biakinn a ‘Mid-Night Service’ zang dia hoh ahihdan uh ka
phawkkhe sawnsawn a, kalung anuam tuan mahmah hi..!!
Ka
zaalna laikhuntung a sambang ka zaal-zaal hang in, maimit siing a ihmut
thak hit-hit kichi thil hithei ahi nawnta kei..!!. Thilpuakging, hon
khanglousaktu bang leng moukhaakna a ging hilou in, Kumlui 2014 khaakna a
ging hi di’n ka gingta a-lah, Organisation tuamtuam in Crackers sukpuak
a khaam bikbek ziak un ka lungsim hon subuai mahmah zel hi. Himahleh,
Traffic Police-te’ omna kia a Helmet khuksawm-te ihihman un, Dan
enkaitu-te’ omlouhna ah Crackers apuak lah tuankei ding chih ka
theihkhiat thak ziak in, Crackers mah hiding in ka namkip suk mai hi..!!
Huchia,
thiltuam tuam ngaihtuah a ka-om laitak in, daak hong ging vongvong a, a
daikiik nawn vengveng hi. Minute 1 zawh in hong gingnawn a, ka veng ua
misi om nawn hingei di’n kakoih pah hi. Hoihtak a ka ngaihhoih leh a
ging pen Biakinn apan ahihdan kathei suah a, kum 2014 in hon beisan
taktak ta ahihdan ka chiang ngal hi. Daak ging-te hong dai a, zun beek
vanawn di chi a electric ka ‘ON’ dek leh a vaakthei mawngmawng kei..!!.
Tohlet(window) glass apan a ka innkiang-te’ uh inn ka et leh a vaak
phengphang a, Electric mitlou hial a ni 3 bang hongpai hial ziak a ka
socket un lamdsang sa a, ‘BP Stroke’ a ana buaisia ahihdan ka khawnung
theih hi.
Zun thazou, innsung a luut dia ka kisak leh
ka kongkhak uh ana kihong behlap ngiatngiat a, avom bilbel khat innsung a
luut dan in kamu hi. Ka light uh asiat ziak a innsung teng a-mial
bekbuk phetlouh, keikia om kahih zawkmah ziak in ka chimul hong thou
sungsung zozen hi. Kaal khat paisa a, ka inn kiang ua sappau(Over Dose) a
hong si om zawmah ahihman in ka gimneih deuhdeuh a, khawvot lam leng ka
phawkkei hial hi.
Bangtan hiam dai dide a, mabaan lah
sawn ngamlou a ka om nung in, ka ketli siin un hong keging balbal a,
atung a annek kuang kikoih te hong kitok ging nilouh ta hi. Ka
zi-le-tate hongpai ta mai le uh ka chi vungvung a lah, kineem thawn lel
kahihdan kaki haihkei. Atawp-tawp in singkhuah khat kala a, “Kua a innsung a luut, nong kigen keileh maituam natuak dia, singkhuah tawnkhat na neek a-ngai ding …” ka chih matmat leh leng agin ngei in a ging a, lawh ngaihna ka theikei.
Innsung
a lah va luutngam tuanlou ka hihchia, ka singkhuah tawi a ka inn-baang
uh ka vil(deng) ekh leh, Uipi gawng gemgom khat hong taipawt ngoungou a,
gate pawlam ah a-taipawt suak ngolngol hi. Innsung a lut a, ka phone a
torchlight om pen zang in, den a agin-gin na mun ka veel hoih leh, ka
bawngsa khing uh ui in ana luh ahihdan kathei suah hi.
Lupna
ah kintak in ka lumkiik nawn a, vot bang ka khawnung sak dek thepthup
hi. Huai nitaak ahihleh, ka omdan peuh a lemthei nawnkei. Ka thallup zel
a, a dikthei tuankei…ka light beek uh selou hileh suvaak di inga, adan
om deuh di hiven..!!. Ihmut theihlouh ziak in, Chrismass kuan a kava
gamvaakna a ka thiltuah khawng bang ka ngaihtuah kha thepthup a, puan ka
kilukhuh hial hi.
Sia in phaleh, MLA ka neih ziak in
Government Teacher khat kana hisaam a, himahleh ka postingna mun-te ka
muhkhaaklouh atam mahmah. Chrismass kuan a MLA pa’n abial vehna nei di a
chih ziak in, ka postingna khua a, aki lawm dan a a-na om teei ka ut
man in kisa tawm in kava pha hi. Ka postingna khua bel kon gen se dah
ding, ka hihna mah in honna heek di ua, sum tampi sung angai kha
dia..hehe..!!.
Ka posting na khua ka tun in, bial MLA
pa’n khawdang khawng hon vehkual masa lai a, kei omna hongtung pahlou di
ahihdan kathei hi. Nitaak bang kava kikhawm thepthup a, Biakinn ah Mess
Director’ pa’n, “Tutung Job Card lawh lah kilalou,
Chrismass van leidia Lamka zinman maimai a-lah sum hahseng mahmah vek
ahihman un, Chrismass leh Kumthak lopna di sum hongluut a tawm mahmah a,
I hondampa uh pian champha lah nuamtak a lawmnuam ihinman un,
zingchiang a saptuam mipi’n gamlak ah gamsa hawlna neih di chi’n Mess
Commettee ten thupuukna, tusuun meetingna ah kana bawl uhi. Huaiziak in,
zingchiang a aneu-alian zinglam dak 7:00 a khawmual a kingaak khawm a,
thau nei te’n leng hon tawi chiat ding in kon ngen hi. Kakipak” chi’n thupuan honnei hi.
Kei
leng vakuan tei ka sawm gu ngal a, ka zintunna te kiang ah leng ka
genngam naikei zozen hi. Ka pian apan ka sepna ka muhkhak patna ahih
banah, gamlak a gamsa beng a ka kuankhak patna di leng ahih zawkmah man
in hampha bang kakisa zozen hi. Zaan bang ihmu theilou zozen in,
aak-masa khuan in ka ihmu kha khonung a, zing-ann neek dek in hon phawng
ua, ann ne loklok in ka zintunna-te’ tangvalpa tawh khawmual a
kingaakna di lam ka man-oh vengveng uhi.
Khawmual ka
tun un mi ana tam mahmah ua, naupang neuchik chik tanpha om uhi. Thau
khat ka tawi tei a, gamlak lam ah kaki zui ngitngit mai ua, anuam
khopmai. Bangtan hiam ka tun un, thautawi teng hon samkhe tuam ua,
‘taangpang’ di in muntuam ah kapai uhi. Thautawilou teng in sa hong hawl
ua, alang-lang ah kikou in amau vengvung mai uhi.
Ka taang panna
mun a keikia om a, mipi’ kikou vengvung ging khawng ka ngaih kawm in ka
lungsim ah, ‘Government in gamsamat khawng khaam suk khaamtou leh leng a
zattheih taktak kei. Zoudawn a mizawng-gentheite’ adia khawsuahna di
teng government’ buhpang sawk-te’ chihtaklouhna ziak a hichimai ahih
cia, gamsa khawng peuh mankei leh uh lah neek sam theih hitel a’ chih
khawng kana ngaihtuah a, huaimun mah a ki musuah in ka halhthak kuau
zozen a, kum 2015 apan ka posting na mun a omden di’n kana ki chiam
thepthup hi.
Huchia ka om laitakin, ka mai a singkung
ah zawng khat hongtuang a, singteh khawng lou tautau zozen hi. Ka thau
tawi awl a kam kawm in, ka huu bang ka la kuaikuai zozen a, ngiim
vengveng a ka kap leh, kha hia khalou chih katheikei….kou in hong ki
koukhum tamai hi. A aw angaih mahmah mai a, a keek vomvom zozen hi. Ka
bil hum kawm a, ka mit siin leh thakhat in hong dai sipsip a, ka et leh
bangmah muh di a om nawnkei. A tuanna singkung nuai ah si neng om hiam
chi a ka va et leh, nahteh tung ah ka thautang ana om leulau a, ka
chimul athoh sungsung zozen lai khawng huai nitaak in ka ngaihtuah kha
nilouh a, huaiziak tak a leng ihmu thei di vual hinawnlou kahi hi.
Huchia,
kei kia lupna tung a om a, Chrismass kuan a gamlak a ka thiltuah khawng
ka ngaihtuah laitak in ka gate uh hong ging a, anung sawtlou in ka
kongkhak uh hong kihong hi. Ka zi-le-tate hongpai uh hita’n te chi in
kalung amuang mahmah a, honglup kal uh bang kana ngaklah zozen hi.
Bangtanhiam nung in, ka room lam ah ka tanu nu’ paiging hileh kilawm in
mi khat hongpailut gapgap a, “Bawi hongpaita umaw…miallou hia napaina di kon salhvaak sak diam?” chikawm a ka phone mekvaak a ka salh leh lupna nuai a, a-vom bilbel khat vaaklut chet ka muman hamham hi.
Hiaihun chiah in zaw, lauhlouh di vual ahi nawnkei..!!. “Bawi bang chi e, honglum nuamlou maw bawi..na nunu’n bang hon valawh a?” ka chih leh, “Papa, nang non deihlouh sa, na kiang ah le konglum nuamkei…” chi’n
aw ngaat chik khat hong paukhia a, naungek aw abang zozen hi. Jacob in a
pa Isau a kheem bangdan pian a ka tanu nu’n a aw bawltawm a hon
khemsawm a dia aw chih khawng ka ngaihtuah a, alangkhat lam ah lah a nu
tellou in kum 3 mi amah kia mialnuai ah hongpai mawk di’n ka gingtakei
hial hi.
Lupna nuai khawng hon khuat chiauchiau zel a,
kei lah puankawm ah tangngam nawnlou in ka om a, phalbi lai himahleh
khaw-ul in hon pumtuam hial hi. Huchia, kuamah pau zawsam omlou a
bangtan hiam ka-om zawh un,“Papa, deihlou a nonpaih leng
vulvul lai nathei hia..? Huailai a maw papa, kei ka diip khawng kaw
huaihuai zozen eive…? Ka nu leh naute tua koi a om uh a, amau le ka
munuam..?” hon chinawn hi. Hiaihun in zaw, ka ngaihtuahna a
paisau khopmai a, kum 6 paisa khawng ka ngaihtuah vungvung hial a, ka
dawn dek chiang in ka dangtawng a bing a, ka paukhe theikei.
Huchia, khasetak leh kingaihtuah vungvung a ka-om lai in,”
E maw papa ei..kon houpihna-te dawn taak le honsalou leh, ka nu leh
nau-te’ omna beek le honhilh nuamlou nahihleh, thu tamlou kongen dia,
katan dia non bawlsakna luiguam lam ah kana painawn mai di aw
papa……Papa, ka nau-te hoihtak in hon keemtou unla’n, kei tanchin zaw ana
theisak se dah in aw. December 31st 2008 nitaak in tuisik apan mihing
ding in a nu’ sung ah kana kisiam pan a, hoihtak a piangkhia a, Pathian’
thilsiam etlawmna-te mu leh nou tawh zarzou khawm dia kana kikoih gige
hi a…..” chi’n a dai dide a….!!
Sawtlou nung in,” Himahleh,
ka nu’n naupaai ahihdan honhilh a, na thilgen in kei hon thazoi sak in,
hon maimualsak mahmah eive papa…ka nunu sung ah ka thaneih teng suah in
ka kipeek a, a phatuam tuankei. March kha a Dansiangthou a kiteen a,
huai zawh chiang a mihing mitmuh a, a-siangthou bangbang a na omtheihna
ding ua, ABORTION bawl na sawm nitaak uh eive kagen papa…Kitenna
naneihlai un, mipi’n hon kipahpih dupdup mahle uh, kei bel ka nunu
sungah ka kipaak mahmah kei a…..”chi’n hong kidiik hithit zozen a, a ngaihkhiat a haksa khopmai. Ka diip, teipi zum a sut mah abang tonton hi.
Bangtanhiam nung in,”
Doctor pa’n a taiten a hon teh zaan sawmlai a maw papa, panpihna ngen a
kikou tuaituai inga, hon panpihtu di kuamah a-omkei. Doctor pan ka mit
hon dawt-duuk ngal a, kakhe langkhat leng honteh zaansak dimdem ziak in
PHEISAM in ka-om a,a-nung in ka nu’ sung apan hon laikhia a, ka nunu
leh nang mel munuam mahleng bangmah ka mutheikei. Papa, huai ni a vot
kasak luat ziak hia Polythene sung a non thun uh..? Huai a maw, kei
sideklou keive papa, kei khomkhom a kipeek a, kikou kou mai keive.
Luiguam a nonpaih lai in leng ui in hong nedek zomah a, hamphathuaitak
in kana suakta zenzen a, tua…..” chi’n a dai nawn hi.
Ki diik hithit kawm in, “
Papa, non paih na mun a kei bangbang midang le tampi ana om uh eive….!!
Nang bangbang a migum, 99 percent Christian kichihna gam a tam kasak
vanglak dan. Tu’ nitaak a, I inn ua kongpai dek in leng kong leenthawh
a, mun tuamtuam a nungak leh tangval omkhawm tampi kon tuakkha malam
zomah hi. Ut in utkei le ung, kou population le tunung kha bangzah hiam
chiang a hong kibehlap ngei di ahi chih kathei. Himahleh maw, papa…tua
kagen-te na mi deihsak sak kiang ah ana gensawn in aw, kei thuak
bangbang a-iithuai naupangneu leh naungek te’n athuak di un kaphalkei.
Kuamah kei paina ah hongpai mahmah kei le uh ka chi lua papa….” Chi’n kap ngoihngoih mai hi.
Huaizawh phet in, “
Papa, kon thuhilhna te hehna in lakei inla’n, kipahna in ana sim zaw
in lan, tuailai-te kiah ana gensawn teitei in aw papa. Aziak ahihleh,
hiai WARNING; 'Tuailaite aw, na tuailaini uh zangnuam un. Na tuailai
nite un kipak un. Na hih utte uh hih un, na lungtang un a deihlamte uh
zui un. Ahihziak in Pathian in na hih tengteng uah, THUKHENNA bawl ding
ahi chih bel theigige un'(Eklijiasti 11: 9) chih Bible a kigelh ahihtel
man in, lauhuailua eive papa…nang leng hong kingaihtuah in aw…” chi’n a dai vengveng hi.
Huai Bible chang hongenkhak in ka lungsim aluahdim ngal a, Pathianthu gen khenkhat in, “Thukhenna mai a I din chiang in I damsung a I thilhih teng Video bangmai a hong kilang vek di ahi..” a
chih uh adik nachiang om din ka gingta!! Ka biakinn ua, Pastor pa’n
hiai thu a sermonlai khawng Projector a kapkhiat bangmai in hong kilang
dun dun hi.
Ka Pastorpa un, “Tulai in,
Phone ahihkeileh Video Camera hoih taktak te bawlkhiat in hong omta a,
huaite zang in Video khawng i la ua, a khawnung in I laak bangbang uh I
enkik thei uhi. Ahihleh, huaite kua bawl eita? Chi’n kidong lehang,
‘Mipil-Misiam te bawl ahi’ chih I dawnna uh ahi vek ding. Tua ahihleh,
Mipil-Misiam te Pathian bawl ahi chih selvuallouh thudik, miteng in
itheih uh ahi nawn.
Pathian in hiai
vanzatte bawlthei dia mihingte' pilna apiak ahi cih thudik haih vuallouh
ahi. Huchi ahihleh, tua vanzatte bawlthei mihing-te bawlpa'n, I Damsung
hinkhua a Video hiam ahihkeileh facebook leh message khawng a, ‘lu leh
taw phawklou zen a’ i kihounate uh a thei mah di maw? Damsung a thil i
hih tengteng, i gen tengteng hon muhpih vek ding cih ginlelhna ding a
omkei. Pathian tuh a kha(spirit) a hong tel gige ana hi maimah hi.
Message i thot hiam, Video leh lim thanghuai pipi i et khawng ciang inle
i kiang ah om gige ahi cih I mangngilh khak di uh lauhuai hina maizen
ee..!! A Leak teng buaipih di leng ahikei a…!!
Tua
ahihman in, I Sihnung chiang a Pathian in I tung a Thukhenna nei di
ahihziak in, leitung a I damsung a I thilhih gah kipahman(?) I muh di
pen, bang chibang kipahman hiding hiam chih, Nung
Chiang In Thei Ni…..!! Bangteng hileh, I Laisiangthou uh Matthai 6:33 a
kigen, “ A gam leh a diktatna tuh zong masa zaw un, huchiin huai teng
tuh a honpiak behlap ding hi “ chi’a gen motmot a, zohna
a-bawllai khawng ka ngaihtuah sung in ka sungkuan-te hongpai ua, Lupna
nuai ka et leh bangmah muh di a om nawnkei. Ka zi’n bel,“Kongkhak kihongsa a om ahi. Gate kongtun dek un, naupang khat gate apan hongpawt a…khe baai laihlaih kawm a taai ka gaalmuh” chi’n
hongen hi. Ka tanu uh Pheisam In Hon Thuhilh na thu kia ka lungsim ah
om den ahihman in, ka zi kiang ah thil omdan kagen a, Kumthak ahihtawh
kiton a, ka thilhihlui-te uh nusia leh ngaihdam ngen a, hunthak-nithak a
pan lathak ding in kei mahmah leng kakichiam hi.
Laigelh-tu’ Lungsung pan:
Hiai
Tangthu, “ Zaan Khat Pheisam In Hon Thuhilh” kichi, Pathian in hon
vualzawl sak a, Simtute tengteng in Hinkhaw thak ineih theih ngei uh ka
lam-en hi.
1401 – KAKIPAK – 2015
©Siamsinna leh Vakiangbu
Comments
Post a Comment