THUAKSIAM ANA HAK NGEI

By ~ Bhyak Hawxel

Zankhat tuh khavak luat ziakin lungleng sim ka hi diamah, keikia in ka pawt khe khemkhem hi. Hoh na ding nei leh zawt na ding nei chi a pawt khia leng ka hi samkei. Huchia khepi muk in a kawk na lam zui a ka paipai lai in lampi siik a numei khat ana ki diik hiithiit a, lamdang kasa sim a bang thu leh la om a de aw? chih peuh ka lungsim ah hon lut zungzung a, tuahsiat tuak bang hikha leh chi'n panpih theihdan aom khak leh chi'n a kianglam kava naih phei hi. Akiang ka tung takin, ki suanglah kawm takin, "lawm bang chi e?" ka chih leh aki diik lai hon tawp guih in, lamdang sa sim takin hon en tou a, khavak in a mel hon sal vak ahihman in, keileng ka ki guihzawt zezen a, a paukhe zo sam ding ka omkei tuak mawk uhi. 

Huchi'n sawt lou nungin ka theih tawp suah in ka paukhe zou khong a, "Ching" ka chih toh "ULal" hon chih bang, hon ki ton kha chet hi. Kenleng "nang na gending gen masa in ka chihleh, a pau khe zawk theikeia, a gawl khong hon khuah masa in, "Ka iit leh ka ngaih, ka muan mahmah leh ka kinepna omsun in zi hon neihsan dek ahihlam kaza ahi" chi'n hon gen a, kenle ciamnuih thutak in, "Na Uthang in maw zi hon neihsan dek?" hehe...ka chihleh "Na bang Thangpu gige e na gen, huai toh ka kikhen nung ua le non muanmoh ziaka non khen ka puaknat na le bei nailou ahi. Sawt tak ngaihzawng leng nei ngam nonlou a ka om nung a, ka lunglen na leh gentheihna teng hon manghilh sak ding ka kisak lai in, tu'n huai in zi hon neihsan dek zomah lai" hon chi khe namnam hi. "Ching ken zaw tutan ale nang hon ngak a ngaihzawng leng ana nei ngam nailou ka hi, khatvei tei hon kik non dia honna lamen gige keive" chi'n ka dawng thuk ngal hi. Ka dawnna azak in, lamdang sak chi tuak takin, "ngaihzawng neilou taktak maw? hilele ULal honna ngai taktak hilechin huchi mai a, honna taisan lou di na hi" ahon chi thuk tei hi. Kenle "Ching na theisiam ngeikei di kon iitdan, hilele tunzaw hunlui mualliamsate gen nonlou phot in, huaisang in na kiangah gennop leh ngetnop hon nei keive" chi'n ka dawng non leh "ULal hon gen ve" hon chih zoh takin "Kon iit lo lai Ching, kon iit den zomah ding, khatvei tei ka kiangah non kik non ding chih ka lamet gige bangin, Ching hon kiik nawn in hon chileng ka zekai lota diam?" ka chihleh lamdang sak tuak tak a hon en kawm in, awl in nuailam a ensuk hi. Kenle "ka genkhelh leh na ngaihdan lou lampang daih genkha ka hihleh hon ngaidam in aw Ching, kon iitluat ziaka genlouh ding tan leng hon genkha ka hi ding" ka 

chihleh " Ulal ei, genkhelh leh ngaihdam ngetna ding bangmah aomkei, na kiangah kiik ut gige ka hi, na zekai ngeikei ding ULal". Hiaibang thu ka zakin kipahna in ka diim let a, gen masak ding pen le theilou in sawt ana dai sim kha ka hi ding a, Chingboi in "ULal bang chi e?" hon chihkawm in ka angah hon belh in, "ULal, kon ngailua" chi kawm in hon kawi a, kenle kiptak in kana kawi thuk ngal hi. "Nau" chi a ka sap leh hon entou in, a mit apan keiah lunggulh nei ahi chih ka haih kei, "Kenle kon ngailua Ching" chi kawm in, ka ki ngaih kik non uh kipak lua ka hi chih lat sak na'n, nidang a ka hih ngei dan un ka iittak muuk tuh deihthoh takin ka tawp ta hi, amanleng hon iitna latsak na in honna tawp thuk tei hi. Aki khah masa zaw ding bang ka omkei hial uhi. Huchia bangtan hiam ka om nung un, ka kikhah thei khong uhi. Ka phone mek vak a k etleh zan dak10 bang ana ging tou dek man ahihmanin, khelah lotel mahleng amah ka khual luat na ziakin, "Ching dak tam ana gingman sim a denchiah na innkuan te ana lung himoh kha ding ua, ki khelah lotel lai le hang le ki mu zel thei non ta ding I hi a, kon kha di aw?" chi'n ka omna mun uh tuh khelah takin, khut ki len kawm in, nidang a ka zuih gige na lampi te uh lungsim a kipahna tuak nei kawmin, midang te phok selou in ka hon ki tawn latlat uhi.

Huchia, ka pailai un ka gal ua pan gari khat hattak mai in hon tai a, "Ching hon hihkha ding uh" chi'n ka kai phei zawt kha zezen hi. Himahleh, huai gari tuh kou kiang hong tungin hon khol guih mok a, Chingboi toh lamdang sa takin ka ki entuah maimah uhi. Gari a tuang te tuh a hon pawt un, ka iittak toh ka ki letna khut uh tuh ahon kaih khen sak ua, aww khauh tak mai in, "Nang mihing pa zummoh na chia" chih toh ka mai ah hon su in, ka gil ah pek ek hon thuah non ngal a, kei ana ki ging hetlou adin tuh lei lak ki den na'n ka nei ngal hi, hon pek zialzial lai uh ahihman un, bahgawp ta ka hihlam Chingboi inle ana haih lou ahi ngei ding a. Kap kawm in, "hunsak ta un, bangmah loh nonkei un" ana chi khe zoihzoih a, kenleng ka aw suak zou sunsun in "hon theikhial na hi ding uh lawmte" ka chi khe zou hamham hi. Amauleng hon khoih non kei vanglak uh a, himahleh Chingboi tuh gari ah hon kaih lutsak maimah uhi. Chingboi in a lauh luat ziak a, a aw liing pelhpelh kawm in, kei ah kinepna liantak nei in, "ULal, ULal...." chi'n hon sam a himahleh kei bel ka iitpen adin kinepna tak lou ka suak ta mai ve, huai huntakin zo keileh kei leng ka ki mohsa lotel. Ka mit hak zou hamham ka hihman in, mittui luang kawm in leh ka aw suak zou sun in, "Ching, Ching, Ching......" chi"n ka sam a himahleh a hon zaa ban nonta kei d. Hichia mangbang taka ka omlai in, ka phone hon ging khe kelkel in hon ki guihsak in, ka khanglou zawt zezen a.Ka phone ke et ngal leh, ka lawmpa ana hi mawk a, kenle "Muan, zing tungtung in non call zenzen a" ka chihleh "Lal, Chingboi in tuni a pasal nei dek hilou maw? ana theikha mah niteh maw?" hiaibang thu ka zakin hamhaih sim ka hi diamah ka dawng zawk theikeia, huchin sawtlou nungin, "Aw, a hoihvoi ken bangmah ana theikha lou keive" ka chihleh nuikawm in "Na ex te khat hisam a chi a kon hilh ahi, Lal annek lim louh na in zang ken aw...hehe" chi'n hon chiamnuih thuk a, "hehe...nangle neklim" chi'n ka ki hou zou uhi. Ka kikhen nung uh kum3 hilhial bang mualliam ta in, kum2 bang ki houkha nonlou hithet himahle ung, kum2 val kana kingaihpih leh ka ki ngaihlai ua damsung adia kana teel sa gige ahihmanin ka thuzak in tuh ka dip a hawm sak mawk a, puaknat louh sawm mahleng ka lungtang in ana pona khinta hi. Manghilh ta ka kisa a, ngai nonlou leh iit nonlou ka kisa a, hunluite phok nonlou kana kisak tak himahleh ka thuzak in, ana manghilh nai lou, ana iit den lai leh singdang siangah a damsung zaal mai ding azo ana phal nai lou ka hi chih a lang khe sak ta a, kei adin thuaksiam ana hak in, a na lai ngei mai!!!

Hiaibang thiltung ding ka zak dek ziaka, zaalmang lamdang tak nei ka hi ding, chih ngaihtuah kawm in, ABBA te sak "The winner takes it all" chi laa ngai khe kawmin ka thou khe ta hi.

N.B: Phuahtawm pumlum ahi, kuamah kawk tuam nei a gelh ka hikei, keimah lungsim a hon piang khe bangbang gelh khia ka hilel. Hiaibang tuak kha taktak le ana om maithei himahleh kei moh louh hehehhe….

------BEITA-------

©Siamsinna leh Vakiangbu