An Elegy Upon The Death Of A Mother: For A Daughter Tuun Khakia

Written by: Vz Vualnam

( This might be the best Kahtam I can come up with... )

A gam vangla ah simthu hong thang ve’n Ka san in khamkha’n ka vei ding bang e Tong kisanglou a ka tuun pham mai aw Ka lai na e sul ah zui nuam ing e

Sunni kiat in khimkhua a ziing sa’ng e Ka tuun a pham in sunni taang hal a Kei a’n kiimkot khimkhua ziing tuam hi e Khimziing dai bang a then ni om diam chi’ng

Zaitha neem ve’n sungkial mel in thei maw’ng Sungneek-siktui baanzaal khaaklah ngawn ing Sen a ngaih teng’ kimna siang zong ta leng Tuun toh kotkawl a tuak nawnlou ding aw

Ka tuun in siinkuang a hon ngak mai aw Laidiip dap e sianglam zong ngam la’ng e Melmuh kaal ka ngaklah ka tuun lungdeih Dumpuan toh zalta mai aw veel ngam la’ng

Tuun pham tuak di’n vangkhua lah zong ngam la’ng Heina gam vangla ah lah vaitham maw’ng Kiim a senvual dahluat hon neemte aw Ke’n zong lengvan tuanglam zong nuam zaw’ng e

Ka tuun dit khapham ding mel in thei leng Siang zong in anglai ah tawi nuam ing e Lengvan tengkhawi zatamte lai ah aw Simthu hil ding khat zong omlou hiam aw

Sian aw zatam lai a tui bang na laak Kei ka tuun dit hi e khen ngam la’ng e Vualgen lengvan vangkhua a nuam hal a Simlei lungngaih sialkhawm nuam lai ve’ng e

Lengvan miza lai ah ka tuunlou in Sian aw lengvan sumtual a lumlah hiam? Laukha kholhna tungchiang vangkholai ah Ka tuunlou in ngaih teng a kimlah hiam?

Lengvan saumang zata’ tutkhawlna ah Haam bang huai ding von leh kiang omlou e Simlei sausuan tuangnung a siahsan ah Von leh kiang haam bang huai ding samlai e

Tuun toh lou in simlei sau daidam ah Zuapa leh von teng ham bang vai ung e Tuun toh lou in bualna mun inn nuamnou Gial bang dai e lou bang tul ding bang e

Sian aw na hawm naa e laidiip hawm e Simlei ah tuun’ tong sang nawnlou ding aw Sian aw na hawm sul a leh theihlouh hiam Tuai nihthum toh ham bang vailua ung e

Sian’ hawmsa luankhi’n lehlou ding hal a Tuun ngaih naa e nau bang kahlai baang maw’ng Kulsin tangsa thelthoulou ding hal a Khapham sun nau bang oih baan ni om diam

Lenkum tam kivei in khankhua dang zong Tuun ngaih dai bang then ni omlou ding aw Kulsin ah lumsuang khuam bang pou ding a Sinlai ah tuunnu vai bang thaam ding aw

Ngaihtamsial laan bang ngakna tuun tohlou Nuai simlei khosial zil sin dih ni e Simlei khosial leh tuun ngaih i lelh ni’n Sian aw nang ma’n sawnbaan hon kai ve aw!

-----------------------------------------------

Gam gamlapi ah thu a hong thang a, ka zaak in khakham vei ding ka bang hial. Kihou khalou a ka nu’n hon sihsan mai zaw a painalam ah ke’n le ka zui nuam zaw!

Ni a tum chiang kia a khua mial ka sakleh, ka nu a sih lai in khua vaak napi in mial in a hon tuam a, chikchiang in a theng mahmah dia!

Ka tha a neem a, gilkial-dangtaak leng ka phawkkei. An leh tui le ka duh mahmahkei. Tu in innlam paita leng, ka nu toh kongtual a kimu nawnlou tel ding zaw!

Ka nu’n hankuang a hon na ngak maimah zaw innlam ka pai ngam mahmahkei. Muh kaal ka ngaklah ka itpen ka nu puandum a kituamsa a hon ngak maitel zaw ka en ngamkei!

Ka nu sisa mu di’n inn lah ka zuan ngamkei a, ka omna gam gamla ah lah ka khawlden theikei a, hon hehnem ka kiim a ka lawmte aw, ke’n leng van lampi ka zuan utzaw!

Ka nu’ sih dinglam thei hi leng innlam pai in khatvei beek ka kawi nuam. Van a vansawltak tampite lak a thu hong theisak ding khat beek le omlou hia!

Pathian aw, nu na laak kei ka nu itluat ahi a, ka kikhenpih ngam mahmahkei. Mite’n vangam a nuam a chichi na ua, leitung ah lungkhamna thuakkhawm le ung ka utzaw lai.

Van a mi huaizahz zouzai omte’ lak a Pathian aw ka nu tellou vangam nuam theilou hia? Kha tampite’ omkhawmna vangam a ka nu tellou a it leh ngaih teng kim zoulou hia?

Vangam ah etkol ding pasal leh ta a neikei a, a nutsiatsa leitung ah a kep ding a pasal leh a tate a omlai ua, a poimohlai uh.

Nu tellou in innsung ah pa leh tate ka gentheilua uh. Nu tellou in nuamtak a khosakna innmun a dailua a, a tul hulhul hi.Pathian aw, na vaihawm a nalua, leitung a nu toh kihoukha nawnlou tel ding! Pathian aw, na vaihawmsa kheelkiik theihlouh hia!

Ka naute toh ka vaakvai lua uh!Mittui in Pathian’ vaihawmsa phel theilou ding hinapi in ka kap tawp theikei. Misite hong thoukiiklou ding hinapi in ka suun tawp theikei.

Kumte hong paizel dia, khan hong dang mahleh nu zaw mangngilh ni a omkei ding. Han ah hansuang a pou ding a, lungsim ah nu a thamden ding hi.

I lungkhamnate i tut zelna nu tellou in simlei lungkhamnate thuak kizilta ni. Leitung lungkhamnate leh nu ngaihna thuakzohlouh hun a hong tun chiang in Pathian aw nang ma’n hon baankaih in!

© Siamsinna leh Vakiangbu