TUNNU ITNA

Written by: Kattie Mawite

Bangmah theisiam kei mah leng, ka lawmte hon bawldan tuam ahihdan ka thei veve. Ka lawmte toh kibatlouha nei kahihlam bel ka thei a, himahleh, amau a neih ua ken ka neihlouh bang ahia chih ka theichian kei. Kei ah akimlou om ahihlam le ka theikei. Ngaihtuah zel sam mah leng, ka naupang lai luat ziak in bang diklou om ahia chih ka theisiam tuankei a, hichi di mah hi inte chi in ka pom suk zel mai hi.

Khatvei Pathianni Sunday Skul ka kai leh ka heutute'n Pathianni hong tung nawn di pen Pate' Ni ahihziak a naupanglam sunday skul omlou di ahihdan hon puang uhi. Hiai hun in banghiam khat ka lungsim hon kam om hi in ka thei a, himahleh bang pentak hi hiam chih ka theikhe tuankei. In ka tunkik in ka nu kiang ah ka heutute hon gen ka hilh pah hi.Ahihtheih liai leh kanu thu ka sel lam ka thei tadih kei. Kanu'n leng hon it in a hon deihthoh mahmah chih a omdan leh kampau ah ka theichiang huntawk mahmah.

Niteng ngeina bang in skul ka kai zel a, homework leh laisim dite lin hetlou in ka hih zel hi.Ka skul kaina a ka lawmte'n Pate' Ni chianga apate uh a piak di uh van lei asawmte khawng uh hong kikum ua, kei bel kana pau hetkei. Hiai hun in ken PA chi a ka sap di a omlouh lam tak ka phawkkhia hi.

"Kei pa kua hi di ahia? Tua koi a om? Bangziak a kei kapa toh omkhawm lou? Ka pa...... kei pa.... kua hi di ahia?............" Ka theibun kei.Ka lungsim ah ka pa theinopna lianpi a hong om a, himahleh skul a omlai kahihman in kuamah ka dong theikei. Ka insung uah leng kuaman pa nei kahihlam leng a hon hilh ngeikei ua, 'na pa' a hon chihna kammal uh leng ka za ngeikei. Banghiam a om chiang in 'na nu' chih kia a genkha zel uhi.Nitaklam in kapai in kanu ana omkei a, kapi in an ana huan hi. Ka homework tekhawng gelh in, ka zoh tak in kisilsiang in inkong a kimawl kalawmte lak ah kava tu teisam hi. Huaini in kimawl himhim ka lunggulh kei. Mi muh in kimawl en in kilang mah leng, ka lungtang tawng ah zaw, chikmah a ka muh ngeilouh leh ka theihngei louh ka pa muhnopna leh theihnopna in ka dim a, ka ngaihtuah kha den hi.Ka paunop tha le a suakkei a, nitak lai ka sim khit in kanu lum dia zawn in ka lum pah zaw uhi.

Ka nu kianga kapa' tanchin dot ka ut mahmah a, ahihhang in denchia thil nuamloupi hikha leh ka chizel a ka ki-ipip a, ihmu thei zoklou in ka kiheihei mai hi. Kanu'n mak honsa a hi ngei ding a, "Lal, bang chi e? Ihmu theilou maw?" Hon chi a. "Hmmm Nu, ka ihmu thei mahmah kei. Thilkhat kon dong aw Nu?""Bang e Bawi? Noplouhna nei maw?"

"Nu, kalawmte'n Pate' Ni chianga apate uh a thilpiak di khawng uh alei ua, apate uh gen in a suang thei mahmah ua. Ken lah pa ka neih lamlam le kana thei ngeikei a. Nu, ken pa neilou ka hi maw?"Kanu ka en kilkel a, a omdan lem chiahlou hi in ka thei. A hong mitsi khuaikhuai a, a chil bang hon valh zozen hi."Bawi, na pil lota. Na theihlouh ka deihkei a, himahleh hiai theisiam di khop a na pichin hon ngak ka hizaw. Tu in bel na gen bang ngei in, hiai theisiam thei ding nahi chih ka mu a, na hon dot bang ngei in ka hon hilh ding. Nang lam ah leng sinlai tampi a hon piak ka lamen. Pa bel na nei tham a, himahleh tu in amah a zi leh atate toh mundang ah a khosa uhi. Bangchidan a hiaibang teng hong tungthei hiam chih ka hon hilh ding.""Nidang chi leng, nungak nou kana hihlai in, tangval melhoih mahmah khat toh kana kingai ua. Ki-it mahmah in nuam kana sa mahmah uhi.

Huchih hunlai in, Pathian in numei-pasal kal a itna a hon piak zangkhial in kana khialkhawm kha uhi. A khonung sawtlou in, nau pai kahihdan ka hon theihkhiak chiang in, ka tangvalpa(na pa) kiang ah ka gen a, amah leng a lungkham mahmah hi. Huchia amah apan ta pai kahihchiang in, hon kitenpih mai ding in ka ngen hi. Abultung in chu hon kitenpih ding ahihdan a hon gen a, himahleh ataktak in a semsuah ngeikei. Nang lah kha khat bang hong valta nahihman in, hoihtak in aguk in ka honna kem a, damtak a na hong khang a, hoihtaka na hong pian theihna ding in damdawi khawng kana zang hi. Napa'n bel a hon theihpih kei.Huchia ka omlai un, napa'n hon kitenpih theilou ding, kivakna ding gina neilou banah piching nailou lua ihi chi in hon gen a, nang tuh hon lakkhiat mai ding thu a hon genpih hi.

Huaiban ah, kilang nailou ahihman in kuaman hon theilou na ding a hi chi in a hon zol hi.Kiteng lengle, nau a hong pian chiang a mi theih a akha chinglou di ahihchiang a min hon thei thouthou ding, zahlakna kituak veve di ahi. Huaiziaka eia dia naungek bangmah thei nailou, mihing le suak nailou tuh lakkhiak hoih pen ding ahi chi in hon genpih zel hi.Himahleh, nang ka hon ngaihtuah chiang in ka hon itlua a, na siat di ka hon phalkei. Ka ta, ka sung a ka vom ngoihngoih bangchin ka that thei mahmah dia chih kia ka lungsim ah a omden a, bangteng hong tung in, minsiatna teng thuak di ka hi zong in, nang hon humbit ding in thupukna kala hi.A gen bang ngei in napa'n a hon kitenpih nuamkei a, sawnman kipia in, na hong pian chianga leng napa'n a hon tan louh a, ken ka hon tan ding in ka kihoulem uhi.Huainung in napa toh ka kal uh a tan ta. Khosung leh vengsung ah zahlak tak in kha kua vingveng zawlgai hinkhua ka hon zang a. A poimoh alou theilou ahihkei ngal leh kongpua ka kan kei hi.

Ka omna lamlam ah mi'n hon gen uh a bang a, ka paina lamlam ah, thilsiam dang mihingte tenna a lutkha bang hial in a hon en duamduam uhi.

A chang in ka kingaise thei mahmah a, siamlouh kitan in zankhuakhua a ka kah hun a tam thei mahmah. Himahleh, nang kon it ziak in huaiteng thuak teitei in, na hon piankhiak chianga kipahna thupitak hon tuntu hi ding na hi chih lametna lianpi toh ka hon kemtou hi.Lamet bei leh beidong ka kisak hun a tam thei mahmah. A chang in, napa thugen ngaikhia a zui hileng zaw, zahlakna leh minsiatna hiaizah thuak lou di hi inga chi in ka ngaihtuah zel a. Himahleh, Pathian in a deihlouh tualthahna hih hi di kahihman in ka ngamkei. Huai hun in nang bangmah na thei naikei Bawi. Himahleh, ka hon itluat ziak in nang na phawkma natawm in ka hon enkol in ka hon kem a, kei hinkhua bang zanglou dinga damtak a piang a khangkhe ding in Pathian kiang ah ka honna laan khinta.Na pianni a ka nathuak dan bel genvual a hikei. Gen lengle na theisiam kei ding. Bawi, damtak a na hong piankhiak in ka natna dam a hi zenzen kei. Himahleh ka kipahluat ziak leh ka hon itluat ziak a ka natna phawk nawnlou ka hi zaw.

Ngek petmah, na mit inle khua a muhma apan ka honna kemtou a, nungak chi a mitheih khat in naungek ka hon kem chu maw, zahlakhuai chih inle a gen ban kei. Zahlakna tawpkhawk ahi. Himahleh, a nini in na hong khang hiaihiai a, kei ah kipahna a hong lian hiaihiai hi.Nang ziaka zan ka ihmutlouh hun leng a tam petmah. Na zun na ek siak a ngai a, nang leh nang a na kihihtheih bangmah omlou ahihman in, kei kizunna di hun omlou zen in nang kon na kem hi. Nang nopsakna dinga ken haksa ka thuak ngai ahi chih ka thei a, nang ziaka haksatna ka thuakte bangmah lou in ka sim hi.Sisa hingkik tuk na hi a, huaiziak in ka hon deihthoh in ka hon it petmah. Chikmah chiang in na siat di ka hon phal kei dia, bangteng tung mahleh, zahlakna tawpkhawk hi in, buaina haksatna tawpkhawk tuak mah le, kon itna chikmah chiang in a bei tuankei ding.Hon it lua ka hi Bawi. Kam a gen in kon itdan a genzou kei." Chi in a ang ah a hon kawibelh tuntun a, ka lu hon zawtsak hianhian hi.

Kanu'n siamlou chik in thil omdan a hon hilh limliam tuh ka theisiam mahmah.Pathian a zahtakna leh kei ata hon itna a letdan ka thei semsem hi."Nu, na hon itna a thupi lua. Keia dinga na thuakna a na lua. Hon din ding in hon phut lechin leng chikmah chiang a hon dinzou lou ding kahihkai in na hon phut kei lai a! Nu, nang bang nu ka hon neihkhak ka hampha lua. Kei non itna ziak liauliau a haksatna, minsiatna leh zahlakna na thuak tengteng, tunung chianga kei tungtawn a pahtawina na tanna suahsak ka sawm ding Nu. Kon ngailua. Na angsung mah bitpen in a muanhuai pen a, Na angsung a ihmut mah lim pen e Nu" chi kawm in ka Nu' angsung ah ka belh a. Huai nitak in pa neilou kahihlam leng ka phawk nawnkei. Ka Nu' itna in hon lungmuang sak huntawk in ka thei. Zahlakna, gensiatna leh simmohna, haksatna leh lunggimna tengteng zuam a, kei hon itna ziak liauliau a ana thuak mualsuah ka Nu' ang ah lungmuang tak in ka ihmu ta hi.

Nu' itna kan a itna thupi leitung ah a omkei. Nute aw, na khan kumkhua uh sawt in, tusawn khangsawnte adin vualzawlna hong hi lailai un aw.

© Siamsinna leh Vakiangbu