BLESSINGS AND LESSONS

By Anonymous Paite

Kum sangkhat zakua sawm kua leh guk in hiai khovel a nuam a haksa thuak a khosa ding in ka nu gilsung apan in kahong piang khia hi. Tuisik kahih apan in ka nule pan hon kem tou in tuni tan hon dampih lai uhi.

Ka hongkhanglet a khua ka hon theih nung a ka thil zak te apa in namkaal buai lai a vaak thei pen phet kana hi hi. Pathian panpih na toh Lamka tual kidenna in ka hong khosa toutou uhi. Nautum hihna toh nulepa deihsakna tang leh sanggam te duat tak a in ka om a, lai siam thei tak kn ka hong khang lian hi. Khovel khosak na lam ah nei zelzul in omkei mah le ung, mi kha nuai a dak a tasam zenlou in kang khosa uhi. Huchi a duat leh deihsak a om in pawl X bang sangtak in kahon zou khia hi.

Insung a nautum pen, naungek koih a koih hilai mah leng pawl X tan zou thei chiang zaw kaki tangval sak huntawk mahmah a, lawm leng ka hau bok hi. Khanvual dang te banglou tak in nungak leh ngaihzawng vai kana ngaihsak hetkei hi. Ahi a lah lawm thuah ten nei vek chiat sim uh ahih man in, a hel in bel ka kuan mun mahmah hi. Kamtam leh chiamnuih khah kahih ziak in lawmten leng hon ngaina mahmah uh hi in ka thei hi.

Nikhat chu lawmte nih in nungak toh kimu ding chi in a hong zonkhia uh hi. Eileng exam zou ki zalen sak in kava diang khe valval tei hi. Pawt khia a sau khop kong pai nung un ka hong kituak peetmah ua, khomial nuai ahih man in mi nih ahih tan kia uh ka hisap thei hi, numei tuak ahih uh bel ka lamen hi. A hong ki houhou ua, ka lawmte kimuh pih nun, hiai pam ah ka lawmte in ah iva tu zek di uh hon ci a, kaki zui phei ta uhi. Lampi a pai kahih man un, gari hong tai a, a light in hon salh tak a a mel uh ka et leh ka kimuh pih nu pen uh sang in a lawmnu hoih kana sa zaw daih hi. A muk nuh san chechauh ahih man in kichei na ngaina mi ahih ka man ngal hi, a duang ching ngihngiah ahih man in kilawm kasa vanglak hi. Kei leng ka pai kawm kawm un pautam chih mahtak a min uh ka ban dot leh, a muksan pen (cisukni), kikim ahi a a khat pen bel biabiak chi in hong ki gen uhi. Saulou kongpai nung un kikim te in ka hong tung ua, emergency light khat ana vaak keukau a, mial kasa mahmah hi. Thilteng ban gen, man di om ngellou dan in ka hong paupau ua, pai hong hun man hi. Ka pai kik lam un ka lawmpa kiah, 'lawm nang a nu sa a khat pen a hoih zaw voi' ka chih leh amah leng thumu kisa in, nang a din i bei di aw, awnglai ahi chih toh hon thuah suk hi. Ka nui khe buabua zozen a, min a hoih a chih leh huai di tan hial zaw ka ci thuk hi. A nitak nawn in kava hoh nawn ua, lawmpan hon hah sawl luat ziak in huai nitak tuh kikim number ka hon ngen suk thraps a, aman le hon pepah vanglak hi. A number neita kahih man in ka hong ki message ta ua, a mel hoih ahih man in a luck ding chu theih sa ahi. A chang a ki message zel a ka om nung un amah thu ka hon thei zawzek hi. Amah bel kei bang bang a nautum duat, unau sagih lak a a neu pen hi a, banah Lamka a skul kai a in hong luah ahih lam khong leng kahon thei hi. A nulepa bel singtang lam a lou nnasem a om ahi uhi.

A ngaihzawng deih le hilou, kikim ngai chih leng hisam lou, lawmte phut hat na ziak in iitna tellou in iitna thu ka hon gen suk mawk hi. Ka khonung ngaihtuah chiang in leng tuni tan in sah kaki sa mahmah hi. Aman le sawt diah lou in honna "yess" pah hi. Huchi in ka hong ki ngaitou neknak ua, ka kina zel ua, kaki nuisak zel ua, kou khom in bel nuam kasa mahmah uhi. Aman bel hon ngaithou hi in ka thei, himahleh ken bel kha khat vaal kaki ngaih nung unle ka ngai thei kei hi. Mel hoih ahih man in kaki ngaihsung vuak unla tamkhop reject man hi. Iitna bei a iitna thu ka gen khum ahih man in ka ngaituan kei a, kha thum khong kingaipan in ka khen suk lel hi. Bangteng hileh ex khat nei chu kahi phot peuhmah hi. Ka first love leng kachi utkei, ka first girlfriend ahi. Mel hoih ziak a ki ngaihtheih mawk ahih louh kahon thei khia hi.

Pawl X result hoih tak ngah nung in pawl XI sunzom ding in ka hong kisa a, admission zong in ka hong ki admit hi. Ngaihzawng leh nungak chih te ngaihsak hetlou in pawl XI pass in XII ah ka hon zom tou hi. Mi tampi hinna taan na iitna ziak ahi a, ken bel huchi bang a hih te hai uh khong kana sa maimai sek hi, huai numei khat ziak a hinna lak ding chih khong vuallelh huai hi in ka koih hi. Ken bel skul kai lai a neih din le ka koih kei bok, pautam man leh thuman thu in khat iva nei kha a hiven. Ken ka ngaihsak hetlouh hang in ka skul kaina a ka lawmthuah te nungak tampipi nei ngen ahi uhi, uang gen leng single lai a le thum kop chih te pawl ngen toh kaki thuah kha uhi. Mi theih natan in bel kei misia lua hi in kaki theikei, kham theih chih him ka hih hetkei a, zu kham leh khamtheih hih a kham nelnol khong kamuh chiang in ka ho peetmah a, vuak di khong in hoih kasa mawk2 hi. Banah nungak khen ziak a zukham sakham a om chih khong bang leng kana thulak louh lam tak ana hi hi.

Pawl XII apan lai hoih sim tum in insung ah kaki khum hi. December skul khawl hun hong tung ta a, pasal ki tangvaal hun sak tawk chihmahtak zalen ut tha hong suak hi. Nitak khat chu lawmten nungak hel ding khat kathei uh chi in hong zon uhi. Kei leng zalen ut na lungsim nei kawmtak in kansau sese lou a hong kisa pah vitvit in ka hon zui khe napnap hi. Lampi pai kawm in ka hoh na di mun uh ka hon dong sau zek a, a min hohoih hi a, hotel a a singpi dawnna ua a ngak tu hi dan in hon hilh uh hi. Houlim kawm a ka hong paipai uh leh, hiai lak di ahi chi in sing inn, a sawng nuainung pen ah hon lut pih uhi. Ka lut leh nupa hih tuak, nupi leh papi khat ana tu ua, banah amau tut louh nalam ah numei khat tu a, ka lawmte nungak gen pen hidin ka koih suk pah mai hi. Sawtlou ka tut nung unleng a pau zosam ka omkei uhi, zahtak ding a sungkuan te om ahihman un ka pau ngam phakei uhi. Hucia ka tut geugau nung un a inkuan ten hon lupsan hiau mawk ua, mak bang kana sa gu sim mawk a, lah pau ngam huai deuhta di chi in kana kipak gu sim thepthup zel hi. A lup nung un, pasal 4 leh numei khat tu chi mahtak chu, kanak chih kawt mahmah uhi. Dak 9 bang neh ta ahi man in phalbi nitak a dia sawt dekta ahih man in pai din ka hong ding kheta uhi. Ka hohna uhle in kikal lamkim khong paipan chih ding in ka fone hong vak kau2 a, message hong lut ana hi hi. Tu nungnung kua ahi dia aw ka chi sim a, ka et leh number vuak ana kigelh a, ka theih ngeilouh chu ahi peuhmah hi. Ka fone a button laitapen mek in ka message tuh kahon hongta hi. 'Uthang, tungta maw' chih teng hong lut leuhlauh mawk a, hiai kahi, huai kahi chih lah omtuan sam kei. Reply pahlou zozen in ka hon ngaihtuah a, kuan ka pawt hon mu ahi peuhmah dia, aike ka naute peuh in hon engbawl sawm uh hia chi peuh kachi hi. A bang a bang hileh chi in alai ka mek a reply din kahong kisa ta hi. 'Tung nailou, kua nahi, kahon theingei hia?' chih teng in ka hon thuk kik hi. Deliver panpan kasak leh hong lut kik ngal a, 'na pawt nate uh kahi' chih hong lut kik hi. Huai hong lut phet in kenleng lawmte kiang kon kan kualh leh khat in ka number a piak ana hi laizang a, ka heh gu mahmah hi. Bacia nana piak eita ka cih leh min hon ngen chu ipiak louh leh cihtan in hon dawngtan leuhlauh a,ken leng ka gen tam non tuankei hi.

Huchi in hohoih tawh message tungtawn in ka hong ki houtou jel ua, gen di dang omtuanlouh man in inkuan thu peuh ka hon gen uhi. A chang chiang a lawmta a vahoh jel in ka hong ki neel sim mahmah ta uhi. Amah bel inkuan khosak haksatak apan hong khanglian hi a, tua a omna te a nuneu te ahih banah, a hotel bawl uh panpih di leh a naute etkai pih dia a in ua om dan ana hi hi. Amah pianna nule pa bel singtang lam a khosa uh hi. Hichi dan khong in inkuan khosak na vai khong gen a houlim in ka hong ki thu jakjaknta uhi. Ahih hang in ken bel ngaihzawng didan et in kana en hetkei a banah tua ka gen te uh leng gen di bei man khong a ka gen khak uh hilim hi.

Nitak khat chu keikia hoh ding in hon nget ta mawk hi. Kenle mak kasa mahmah a, huchi bang a hon jot mawk, kinle buang in ka nial ngal hi. Himah leh zot a hon zot peetmah ziak in ka nial zou kei a, kei kia in kava kivei tou dang dang ta hi. A in uh katun in amah kia ana om a, tutphah sau amah tut louh na pen ah kava tu a, a sungkuan te hoh na kakan leh damlou veh a pawt uh ahih dan hon hilh hi. Kou geel kia hial ka hong tut chiang un zo pautam kichi tawp lengle gen di bang a bei hial hi, khoul khong bang hon kai dek mawk hi. Minute 30 kan tulou in ka ding khia a, pai ka hon sawm pah hi. Aman leng tulai lete hoih di hia chi kawm in hon kha din hon ding khia a, gate bul a kik di kasak leh hon zuizui lai mawk hi. Ken leng mak sa se lua leh zum kisa sim in 'koi a hoh dek oi?' Ka chih leng, 'jojen teh, hong kha ika, kakik maidiam leh' hon chi thuk hi. Kei leng ki suanglah se lua in 'nektheih hon leisak aw' ka chi kha phut mawk hi. Aman leng hon nial hetlou in hi e chi in dawr omna tan hong zui ta suak hi. Dawr ka hong tun tak un ka duh hon kan a, ken leng, 'na chih tei2 leh zalda hai leng ake' chi in ka dawng hi. Aman leng zarda nih bawl sak in 500 note hon dok khe jat in pe gaih hi. Sum 500 note hon lak khiak hial chiang in a inkuan khosa uh toh et in huai jahjah kacisim a lah kava kan sau tuan kei hi. A zarda bawl sak hon joh in khat hon pia a, khatpen tusak in ka sakhau ah hon guanglut zat hi. Hia pan kana kik di chi in hon lehkik san a, kei kia ka pai suk vavauh hi. Ka paisuk sung in chu ka lungsim ah thil tam a om telmai. Bang tup nei a keikia hon sam sese ahi dia aw, ah huai min a chim man a hon sap leh kachi suk zel hi. Amah chim man hileh keikia sese bang ziak a hon hi tentun tun a dia aw chih hong om suk zel hi. Hucia thil teng ban ngaihtuah a ka om laitak in ka fone hong ging kaukau a, hohoih ana hi hi. Ka et leh 'gennop tenge le ki gen manlou a na hon paisan pah a' hon chi ta mawk hi. Ken le reply in, 'Bang gennop na nei peuhset a eita, paulou a na tut belbul kha' ka chih thuk leh 'en hon ki ngailua a uthang' chih teng hon kha leuhlauh mawk hi. Ken leng kamsiam lua teh peuh chi in ka dawng a, himah leh amah ana thutak lokhin ana hihi. Numei chilou a hon pan mai kahi peuh chi in hong hahpan mahmah a, ken lah nungak neih ka lunggulh louh banah amah pentak leng kana ngai kholkei hi. Hon hah gen luat ziak in a tawp a loh ngaina theilou in ka 'yess' khong hi. Nungak nihna chu nei ka hong hi phot peuhmah tentan hi.

Kalkhat kal nih, khakhat khanih ka ki ngaih nung unleng ken ka ngai himhim kei, aman bel ngai a hon ngai ahi chih ka haih kei hial hi. Hotel bawl ahih man in sum bel a neithei mahmah hi. Amah toh kaki ngaih nung uh fone recharge na lam himhim ah ka buai ngeikei. A chang cia skul kaitawp a hotel peuh ua bang bang in ka kimu zel uhi. Huchi nung in leng nitak teng a pawt din a hon zon gige a, pawt louh ding lah ken nuam ka leh sak kei zel hi. A omna te, a nuneu te nupa a nih ua zukham a kina sek uh ahih man in aman nuam sa lou in, haksa sathei mahmah hi. Kava hoh kapai hong khak chiang in bang kik ding kihta tuntun sek khong in om thepthup hi.

Zan khat tuh a omna te kinak nak mahmah uh ahi ding a, amah inkong a pawt khia in kei hon call a, hon sam ahih man in keileng kisa in kava paitou hi. Insung a leng lut sese lou in kholai dung ah kaki zui uhi. Mun khat a mial na deuh a kapai uh leh a khut ka kong a hon koih phei hi. Keileng ki theih moh bawl in ka pai ngeingei in kapai a, a tawp in, nangleeng hon koi ngal sam ve chi in ka khut a liang ah hon koih sak hi. Huchia kikoi a saulou ka hong pai nung un mmun khat a mial na sim ah kahong tu uhi. Ka houlim ua 'uu, ka hon ngailua' a vangkim in hon chi chi a, ken bel ka ngaihlouh ziak in va chih thuk tei ding haksa kasa mahmah. Bang ziak a vaki ngaih pih himhim kahi dia aw khong kachi tuntun hi. Chithuk hetlou a ka om leh hon en dih chi in ka lu hon heisak a, a khut lang a ka mit hon hum in ka muk hon kiss sak chen chen hi. 'Uu hiai na mangngilh ngeiken, hon ngailua kahi' hon chi hi. Ken leng awle chi in bangmah ka genbeh tuankei hi. Kiss a ka om masak pen ahih ziak in keileng kana nervous gumahmah hi. Huchi in zan sawt kuan hita ahihnnung inleng pai a ut ngei mahmah kei. Ka ding khe nawn ua, mun thoveng zanglou lai ah ka hong tu ua, kuamah muh phak louh in ka hong om uhi. Ken ka ngaihlouh aman le mat na chiang nei din ka gingta mahmah hi. Huchia jan sawt sim nung natan a sawt pi ka hong tut khawm nung un 'uu non ngai hia' hon chi a, kenleng ahihi gen suk ding ngaihdan nei in kahon gen suk a, 'hon ngaidam in hoih, kahon ngaikei, ka sawm sawm a, hilele ka hon ngaithei mahmah kei' chiin ka hon dawng hi. Aman leng kankhut hon leen a, 'Uu bang chi leng na hon ngai di, sumlam a leh a naak khat nei sam ing a, non ngaitheih nang ahih le chi ing a balance lah hon ngawlsak manlou ing a, nektheih lah na duhduh hon leisak sam ing a, ahih ke lunggulh jawk dang nei namawleh' chi in a ka khut a ang ah hon koih sak hi. Kenleng kamkhat leng ka dawng kei hi. A hon sunjom nawn a, 'Uu na lungkim na bang hon loh in, ka hon ngai lua' chi in ka khut lang le la nawn in a ang ah ka khut nih in hon koih sak hi. Pasal sisan hatlai a din zo kideek a hak mahmah. Lungsim a om bang hih buching suk a, a zoh taisan moh la hilou a chih khong lungsim ah om hi. Himmah leh ka ngaihlouh toh zo chih lam ka lungsim a hong lut a, ka hehpih hang in khen suk din thupuk na kala hi. Ka khut tegeel lakhia in ka pum koi phei a 'hon ngaidam in hoih, ei geel di zo himahmah lou hiding ihi. Iitna non piak piak thuk sam ding nang ah ka nei kei' ka chi hi. Iitlouh ngaihllouh kiang ah zo iitna piak theih ahi kei hi. A gen khit in a mittui hong luang a, hehpih tawk mahleng sawt kaki ngaihpih khop leh sawt genthei sak kahih man in a hun lem a la in a khen suk chu kahi tamai hi. Aman zo iitna tak toh hon it hi in kathei, sum leh pai peuh in leh taksa utna peuh in kei iitna tang sawm hi in ka thei a....hileleng huai te ah iitna a omkei, iitna tak zo lungsim tawng a pan hong pawt mah ana hi dan ana hi hi. A mittui luang hial ka hon muh chiang in zo a hon gen tung penpen a ana uttlou teitei himai leng zo tua a mittui seng teng zo lakmang sak thei khamoh kou di hing a, himahleh amah ngaih sawm lou leng kahi kei, nakpi a ka sawm hang a hithei mah mahlou ahi zo. Leitung hun tom chik om sung a zi leh ta neih a inkuan a damsung khosak pih din zo i iit penpen leh i ngaih penpen mah hileh duhthu sam huai zaw hi.

Hohoih a ding in bel a iitpen a chaan ding ahi mai a, hun hong paitouh a hon mangngilh theih a midang kei sang mah amah iit zaw ding hon muh ngei ka deih sak mahmah hi. Kou geel zaw tunglam a te gawmlouh kahi mai uhi.

Dak 12 tan hial hong peel ta ahih man in innlam a va kha ding a ka hong kisa khia a, kih ta mahmah a, hon koi belh tonton zozen hi. A tawp in ka gen khe zou a hong ding khia in a inlam uh ka hong zuan ta uhi. A inn uh ka hong tun di kuan un hon koi nawn a, 'Uthang kon ngai lua, ka hon mangngilh ngeikei ding, mangpha manni mawleh, hiai tan non hun zatpih zkak in kaki pak' ci in ka hong ki kha uhi. Kei leng ka pai suk mengmeng a, ka pai kawm in lungsim a vaak vial vial hi, hohoih ngaithei hileng ka ut mahmah, bang ci tel kahi dia aw khong kaki leh chih maimah hi. Mi zaw ki ngai lawlou pi le hun hong pai zek cia it a ki kiit a om thei ua, kei bel ka huchih theihlouh mak kaki sa mahmah hi. Ka theihlouh kal in innlum ka hong tung a, inkuan te ana ihmu khin khipkhep ua,kei leng a dai thei tawp a lut a kong kalh in ka lum vengveng hi. Ka ihmut suak gawp chu ahi ngei dia, ka lup patpat leh ann ne din hong phawng maimah uhi.

Hohoih toh kaki khen nung uh a kha a sim a pai nung in ka veng te uh chingboi kichi khat toh ka hong ki neel mahmah uhi. Biakin kikhopna, laa zilna leh a tuamtuam a ka hong kimuh mun leh kihou mun ziak un ka hong ki maingal mahmah uhi. Mi hou nop mahmah ahih ziak in houpih nuam kasa hi. Mihing in zaw maban di aki theikei khop mai aka, kithei hi ngial leh zaw ki lawm bawl pih selou di hiveng in. Himah leh ei thu omkei, muh teng a kihou deihkhop nawnlou in ki message peuh ka hon pan ta uhi. Keinop sak ziak a diam ka theikei, himah leh aman le kei toh kithuah a kihou zel nuam sa hi in kathei hi.

Sunday nitak kikhop na ah khatvei ka khonung kuan sim leh ana dim khin a, usher ten huai lak awng lai ahi chih ana hilh ua, keileng lut vengveng a kava tut gaih leh chingboi kiang ana hi laizang a, kakipah na khat a om mawk a lah, kakih ta mahmah leuleu zel hi. Minute 5 khong tu pan in ka kho-ul khong in hon buak dek mawkmawk hi. A chang cia ki lau hileh kilawm a ki entuah gaugau in ka om ua, a chang cia lah kaki hou loplop zel uhi. Lungtang in zaw hon pei hai zou mahmah aka. A zum sim tuak lah kana hilim ua. A pautam leh mi maingal mahmah himahleng huai nitak zaw ka zah tak mahmah mawk, akihou ngeilou chih leng hilou, tutna kizom hial ah zaw ka chi a liing phetmah hi. Kikhop bang sawt khong kana sa maimah ve....himahleh kikhop tawp di kuan a hong hih tak in ka hon leh aam thepthup zel hi. Kikhop ka hong tawp ua ka hong ki message uh zaw, kikhop sung kia ka gengen mawk uhi, gen di bang kituh bawl dan pian in ka om maimah uhi. A nervous sim tuak lah kana hivmaimah ua….

Chingboi toh kaki nak thuzak mahmah ua, innkuan sungthu leh thuguk tanpha ki hilh thei di tan in ka hong kineel ta uhi. Amah bel neuchik ahih, a khuatheih ma in a pa'n damlouh na ziak in ana omlouh san hi. Huai nung a nu'n gimtak, leh kuhkal tak in ana vaak tou hi. A tanu tangkhat neih sun ahih hang in skul leng kai gina sak zoulou in amah tung a pasal om pen maban ding etpih zaw hi. Skul kai gina kei mah leh pawl sawm bel haksa pipi in ana zou khe sam hi. Pawl x a zoh in a nu sumzonna peuh ah panpih in a upa gamdang a koih khia uh a, a nuta ua pangkhawm in chawm uhi. A innkuan ua ding a khuam poimoh mahmah ana hi hi. Keibang bang a mi pautam hi a himah leh kei ngaihsang louh tuk in kichei na bel ngaina vanglak hi. Kichei na a ngaihnat tuk in a neih in daihlou ahih man in a phunna khop pha zel hi. A chang chiang in genthei leh vangsia kisa in phun numnum sek hi. Kei bang a chiamnuih khak leh pautam ahih vang in kei theih na chiang ah lungkhamna leh lungkim louhna gen mengmeng Lou mi hi a, a gen khiak theihte bel a vei mahmah te hi in ka thei hi. A haksat na kei kiang a hon gen mawk chiang in ei nautum lungsim in chu gen di tasam mahmah hi...a lehlam tak ah bel hon muang kei leh huchi bang hon gen khelou ding hia ka ci zel hi. ken bangmah theilou thilteng ka ban ngaihtuah lai in itna gui khaubang ana zam khin daihta hi. Nikhat ki thuzaklou a omleng haksa ka hon sata mawk hi. A buai zek chiangin leng kana om theikei mawk hi. A mel muh,a aw zak chih te nuam sak in kasa hi. Chik mah in kuamah hichi bang in kana vei ngeikei, himahleh chingboi bel vei in kahon vei mawk a, a ziak di ka theikei, ngaih in ka ngai mawk hi. Amah kiang a gen khiak ding tuh ka lungtup a hong hita…..

Chingboi kiang ah iitna thu gen din hunlem ka hon zong ta hi. Nitak teng in bel kaki sa a, ka tawp kik zel, haksa sak in kasa mawk. Tumalam khong in lah ka gen khe matmat thei a, tua bang chi ta kahi dia aw, ngaihlou kiang a ngaih le iitna thu gen zo haksa kei a, i hon ngaih taktak zo ana haksa lo phing dan ana hi hi. Ahi a, mi kamsiam houh ana kineem nilouh kahih khak ding bang ka lau zel hi. Ka lawmta kal uh dai sak tu le suse tu phet kahih khak di bang ka lau thepthup zel hi. Mi inkuan genthei tak a om a, huai va gen a va kingaih pih thei hileng le mi lungkham na nem thei di le ka hi peuhset diam a maw chih khong ka ngaihtuah tuah mawkmawk hi. A chang cia a hoih lam kipia in ka ngaihtuah na ka hon heikoi zel a, va gen hial taleng kuan a hon nial hial dia eita, hiai tan kithuzak a gen khiak ngamlouh neilou phial a kithuzak ung a chi in a hoih khong kaki pe suk pouhpouh zel hi. Kei kahih leh bang hikei mah leng laisim na di maban limchi tak nei lai kahi a, amah a ding a leng lamet huai leh muan huai pi khong hikha thei hing a chih khong ka ngaituah suk zel hi. Kei leh kei kisual sual in tawp kik ding bang tum zel lah hi sathei lou zel in ka kileh lak mahmah hi. Nitak bang ka ihmu thei zokzok kei a, ka ihmut sunsun chiang in lah ka mang lam peuh khong ah ka mu thepthup zel hi. Huchi a kei le kei kisual a nitak teng phial a ka omom kal in pawl 12 exam hong hun a, kithuzak louh phot hoih kasak ziak in ki thuzak louh ka hon tum ta hi. Haksa bang sak in kasa mawk thepthup hi. Bang tan hiam zo ka hong hi thei sam hi…

Exam akim khat khong zou in nikhat off ni in in ah keikia ka om kha a, vuah bang zu nilh nilh in om a, keileng lupna a lum in ka fone a earfone thuah in laa kon ngai hi. Kho omdan toh lunglen huai chih ding khong bang in, chingboi ka lungsim ah lian in hong lian a, ki message pih ut tha suak in hong suak mawk hi. A tawp in ka fone mek vak zok a message gelh ka hon gelh a ' i miss u' chih teng ka khak leuhlah leh sawt sim nung in ' miss u too' chi in hon thuk kik hi. Kei leng mood fuh huai huai in 'iki contact kei sawt lua a ka hon ngai loman' ka chih suk mawk ta hi. 'Na kamsiam lua' hon ci nalh a, kei leng kipasal sak a zum temtam sawm vet lou in ka iitna thu ka hon gensuk ta mai hi. Diip bang chu ki sai dutdut zozen hi. Khoul khong in hon buak dek mawk hi. Chingboi in zo kalungsim zou mahmah ana hidan eive ka chi maimah hi. Amah huchi bang kei a pan ana kinem khol hetlou ana hi a, lawm hoih bang a ka hon bawl ahi hon chihsan hi…. 

A koi a bang hileh ci in 'Tukaal ka hong ki ngaihtuah4 ding a, nang leng hong ki ngaihtuah inla, ka insung khosa uh na theih sa ahi a, tagah kahih leng na theih ahi. Midang bang a pa thuhilh na leng ana za khalou kahi a, kol hak mahmah ding kahi, hoih tak in hong ki ngaihtuah in' chi in hoih tak in hon dawng hi. Huchi khong a piching tak leh kamsiam tak a a hon dawng chiang in ken ka ngaihna a pung hulhul abang hi. Kal khat ngak ding chu a sawt mahmah, ka damsung tuni tan a kal khat ka ngaklah pen himah leh sawt kasa mahmah mai hi. Amah sang mah a le kei kingaih tuah dia hon hoih sawl zo ahih na ah amah lam houh ana ki min khin dimdem ahi di e, chi in a hoih peuh kana kipia hi. Numei dang lawm neisam mah leng chingboi toh zo midang a teh theih kei hi. Kal khat nung a a dawnna theih ding bang chu hon yess leh chih kia ka lungsim a omta hi. Nak ngaihtuah lua chu kahi peuhmah ding a, kamang lam nasan ah kana mu maimah hi. Ka bang chi muh ahia chi bel ka thei nawn kei. Chingboi pentak bangziak a ana hichi iit a ana hichi ngaih tel kahi dia aw, mel le puam a en leng lah mi bang a mel hoih vekvuk leh ki chei gige mi hilou a, sum le paai leh leitung khosak na lam ah lah kou sangmah a leng ana kisikhop zo ua...…

Kal khat bel hong bei khong ding abang ta hi, chingboi in dawnna hon pe ding a chih ni hong tung ding hita a, ama nitak bang chu ihmu thei lou in lupna tung ah ka lum kelkul maimah hi. Chingboi in a dawnna hon piak ni ding chu a hong tung peetmah ta a...

Zingkal khua hong vak a, zinkhe peetmah ding chu kahita mai hi. Ka ngaihpen muh nawn ding hun theilou in station lam zuan in diesel auto ah ka tuang daldal ta hi.... Nguai mahmah kawm in bus ah seat number 8 ah kong tu hi. Dak 7.30 vel ding in ka hong kipan khia ua, nitak ihmut khamlouh ziak a hi maithei, tuibuang tungsuk pan ka theih louh kal in ka hong ihmmu pah a, akal lak a khanglou zel in dak 10 ginma in Imphal ka tungsuk uhi. Nidang a nek theih hai mahmah pa nekthih nengchik mah leng kane kei, gari kham bel kahi kei, himah leh ka duh tha a suak him2 kei. Phai a sawt khawl lua kahih man un inlam kik ding bang ka lunggulh maimah hi. Kik mai di a dia aw chih ka ngaihtuah chiang in lah hi kasa khin kei deuh zel hi, maban di khual na mah hi a, tua thuak gim a den cia nop sak di hidi a chih ka ngaihtuah zel hi. Chingboii i zaw hon zou mahmah kasa, khat veivei ka lungsim in, lawmngaih chih le natna chikhat aka ka chi jojen hi. Natna ahi a, a damsak thei khat kia a om, chingboi kia ahi. Ka hah ngaituah lua a ka lu bang ana zozen hi. Bang ziak a hiai numei khat ziak maimai a hichi tel kahi dia aw, numei dang omlou le hilou a, khat va hichi thuaklah tuam se bang ka chih maimah hi. Hichi kawm pi a lai bang va chi sim di le kadiam maw chih khong ka ngaihtuah in ka lung lel in a lel peetmah zel hi. Huchia keile kei kaki ngaihtuah sung in ka bus uh ana tai a, Sekmai khua ah hotel a anne ding a kholna mun kana tungman lah uhi. Ka kum khia a, an ka duh mahmah kei a, himah leh nek louh hi kasak deuh louh ziak in kava ne tei sam hi. Ka nek leh ka gil kial tawk ahi ding a tam bang kava gai vanglak hi. Anne khin a kiang a dawr a zarda hai kawm a coca cola bottle khat lei in bus ah ka lut hi. Lamzang tak in kanhong pai suak char char a, sun nitum a bus tuang in nitak dak 11 lak vel in annek na nihna ka hong tung nawn uhi. Anne khin gilvah a gari sunglut in ka hong ihmu hit hit ta hi. Ka ihmut in mang ka hon nei a, kanmang in chingboi kana mu hi. Lampi haksa pi kense lak ah kana pai ua, a khut kalen a, ka kai a, himahleh aman, 'Uthang, ahaksa lua, kakik mai di' hon chi hi. Himahleh ken phallou a ka kaih teitei leh ka khut hon phel sak a, ka ngap nawn kei ci in hon leh kik san hi. Koi a hoh dek kahi ua chih bel ka theikei. Hucia mang nuamlou pi kaneih lai in bus conductor pan hon soi a, hiai tan di ahi, hon chi a, shillong tual tung chu kahi ta. Vuah a phin nilhnilh a, bag khat pua a khat khai a bus a pan ka kum leh papi khat in, 'Bhaya, where to?'hong ci a ka bag hong laksak dek pah a, ken leng ka dawng kei leh vaipau in hon gen thak a, ka tunna ding ka nite address ka gen leh 200 hon ci zat a, ka bag la in car tung eng (yellow) khat sung a guang zat hi. Ka theih thak leh taxi pu ana hu daih hi. Ken leng vaipau thei samlou kahih man in a dek cidan in sappau in '150' ka cih suk zat leh a lu hon pei khum a. Ka bag la khe dek dan a ka om khemkhem leh ok 150 hon ci a, keileng lut zat in taxi tung khak pat na din ka tung hi. A lampi uh a hoih mahmah a, ki tai hianhian hi. Eigam ten migam i phak louhdan uh ka ci phetmah hi. Minute 20 vel tai zoh in ka tunna ding mun ka tung a....ka nite ana siam mahmah uhi. Kaki sil khia a, chingboi ka call leh pickup kei a, a buai a hinte chi in awl a call thak din ka koih hi.

Bangtan hiam nung in message kamu kik a, 'Uthang, damtak a tungthei maw' hon ci in na gim hia chih khong hon kan in nem deuh in hon houpih hi. Kenleng damtak a tung kahih dan ka hilh a, zingcia admission sai zui ngal ding kahih dan ka hilh hi. A zingchiang a admission zong a vaak in kava sai fel thei ngal hi. Huchia ki thuzak tou kawmkawm in mualzatam hal iitna in kahong ki ngaitou zel uhi. Kaki ngaih luat man un thiikthusiat na hong lian in a chang cia ka hong ki sel zekzek uhi. Ki thuzak dan a chang cia a lemlouh hun a tam luat man in ning peuhkitel in ka hong ki na mun sim mahmah uhi. In lam a om a, ka zin ma sung zaw kinak chih neingei selou hing ung a, tua chu thil nengchik ah leng ki na, kisel in ka hong omta mawk uhi. Kina kisel chih vang in bel kikhen ding ki ngam lou tuak dan in ka om uhi. Himah leh nitak khat bel dak 10.30 lak vel in ka gen nop om, non call diam hon ci a, ken leng ka call pah hi. Ka hong kihou ua, a aw in dah mahmah ahih lam akithei mahmah hi. Bang a na gen nop om na ci pen chiin nem thei tawp ding in ka dong a, bang hikei thak peuh chi in hon dong thuk hi. Ken leng na lungkham na omle hon gen ve, kon panpih theihna bang hiam omsam lou di hia ci in ka gen thuk hi. Ka hah dot luat ziak in a tawp in hichin hon gen hi. 'Uthang, haksa kasa lua, na hon paisan nung ka thomhau tha ngen a suak mai, a tom tawp a kum thum bek na om ngai di hi a, haksa lodi ahi, nangle na laisim na kon subuai lodi, hiai tan in i kal i hun sak di mai i, mangpha himai heh aw' hon chi khe tamai hi. Ka zak phet in mak kasa mahmah hi. Bang ziak hihiam chih ka dot chiang in a dang a gen tuan kei, haksa kasa lua chih ahi mai. Kei leng ka ngaihtuah chiang a ngailaw mahmah kahih man in kaki dek zou kei a, ka aw a pawt thei nawnkei, kagawl a bing a, ka biang a mittui hong luang mawk hi. Numei khennziak a hichi chih mawk chi in mak khong kaki sa maimah hi. Nidang a kana hou ngaih te kei tung a hongtung hi. Kenleng ka aw suak thei nawnlou ahih man in ka off khum ta hi. Ka off nung minute 5 vel in number tuam khat a hon call a, ka pickup leh chingboi mah ana hi a, 'Na off maw, bang ci e, hon dawng ve, uthang bang ci e' chin hon kan tuantuan hi. Kenleng dawng thei zok lou in a tawp in ka dawng a, 'Na haksat tuah bangci tuk a haksa a bang ci puak suah nahia chih ka hon theih pih kei, himahleh itna tat sak nadi tan hial a haksa ahih leh ka theikei, kei a thuak kahi kei, hilelehon ngailua, hon itlua kahi, hichi bang non vaihawm zo kei ut kei lua' ka cita hi. Ka aw leng tuamta ahih man in a nehnou zak kahih hon thei leng ahi ngei ding a, 'Uthang ka juau ahi ka juau, ngaihdam, hon ngaidam in aw, keile kaki ngaihtuah khial a hi hon ci hi'. Ka lungsim bang hong zang huai abang hial hi. Huai nung sawt kuam tak kihou in sawt khop ka kihou nung un zan dak 12bang honnehta ahih man in ihmut limm kikhak in ka hong lum ta hi. 

Huai nitak nung ka ngaihnou toh ka kal uh smooth deuh in hong pai tou nawn hi. Ki muh nawn di hun ngaklah tak mai in, fone tungtawn in ka hong ki thujak tou zel uhi. A chang cia kinak kisel chang om zel sam mah leh ka hong hihi tou thei uhi.

Huchi bang kawm kal ah inlam ah meitei bill 3 ziak a buaina om peuh ka gal zak, a nuam khol hetkei hi. Lawm ittak ten ana omlouhsan thu peuh za in nitak ihmu thei lou in ka omom hi. Ka ngaihnou te bang a chi di ua aw, a lau lo duh e a nu toh kia om duh hi a, numei kia om a lau lo di uah aw chih khong toh lom ngaihtuah a ka om om hi. Huchi kawmkal ah inlam te internet hon khak sak zomah ua, kithuzak theilou in ka hong om zomah uhi. Kua theih pih louh in ka lungsim a gim mahmah hi. Lunghimoh na a kidim, a ki call zizeh na ding lah sum kineilou ahih man in, ka miss toh ka heh tha bang a suak maimah hi. Sihna thu lah kizaza zomah, theingei pipi khong in sihna hon tuah chiang un lungsim chu thawm hau mahmah hi. Ei hih theih lah om tuan kei, unau mizo te pau in chileng, 'ani toh lou' himai. Inlam buaina thu a lah ki lunggim, huchibang kawm kal a zawl ngai a banghiam kibang, kalai sim bang ka chauh loh hial hi. Kal khat veel kithuzak thei hetlou a ka om nung un internet hong hoih nawn a, gen ding chu a tam mahmah mai ve.... Buaipi in venglam hon nawt hiai hiai in lungsim leng hon zangkhai tuan zozek hi.

Kha khat kha nih hong pai in hun hong paitou zel a, theihlouh kal in december bang hong hitou manta hi. Chirstmas zang ding a paitheih kineem mahmah hi. Suty hun ding hisap chenchen in bus ticket kahon cut hi. Inlam pai d ngaklah mahmah in ka om nilouh louh a, paichiang a ka ngaihnou toh plan ka hau mahmah ua, ka pai di ngak lah ziak in nitak bang ka ihmu theikei zozen sek hi. Ka ihmut sunsun chiang in lah chingboi ka mangmat veu hi. Ka huchih chih sung in ka pai ni ding hong tung ding chu ahi ta. A ma nitak ngial houh ka ihmu theikei a, zingkal dak 2 ahih tan in leng ka hak kelkul lai hi. Ka ngaih mel muh ding chu ka phur ta mahmah mai hi. Khangmat khak a bus laplouh di peuh lau in ka hi bengbung zozen hi. Khangmat malak ah ka ihmut hak hang in zingkal dak 6 a phok in ka thou pah vitvit a, ka hong kisa a, bus dak 11 a kipan khe ding chu ka lap khop mai. Station dak 10 a tung in bus sung ah katu nilouh hi. Gari tai khiak ding ka ngaklah mahmah mai a, a chih hun a hong kipat khiak louh zawkmah chiang in ka lung a buai deuhdeuh a, buaina peuh hong om khonung houh ahi dia aw ka chi zozen hi. 

A tawp in dak 12 gin phial in bus tuh awl awl in shillong traffic buaitak lakna hong ki khin suk diahdiah hi. Inlam naih hiai hiai a ki om chiang in lungsim bang chu a nuam tuam mahmah mai hi. Dakkal guk vel ding tai khit nung in ka gari uh gamlak ah hong khawl mawk a, nitak dak 9 vel ding hita zunthak na hun hinteh chi a ka pawt khiak leh gari pute gari nuai ah meivaak a kisal in ana thal lup mawk uhi. Kenleng vaipau theihsun sun teng va lokhia in thil omdan kava kan leh gari sia ana hi laizang a, a bawl na ding a a van va lei tawm ngai ding hon chi nalai uhi. In tung kal hichituk a ki ngaklah a, nimnem mai ka chi maimah hi. Van va lei na dia tu zannung a hitheilou ding ahih man in zingkhovak ngak ngai ding hon chih behlap nalai hi. Zingkal a intung dia ki hisap pi tungzoulou ding dinmun chu kahi ta uhi. Huai mun a zan giak chu, ka damsung a dia zan sawt nitak pen chu ahimai, ka heh tha kia a suak tuntun hi. Ahi a lah, ei hih theih om tuanlou zel. Zing khua hong vaak a, ka khawl na kiang ua khota khat a auto hire in gari pu te gari part la ding in tai khia uhi. Hong tun kik ua thuah mengmeng in zingkal dak 8 veel ding in ka hong kipan kheta uhi. Ki lamzang hile zo tu khong a ka ngaihnou sakmel etlawm muta di hing a maw ka chi numnum maimah hi...…

Gari sia a aki bawl hoih nung chuh lamzang tak in ka hong tai khe thei ta uhi. Zingkal dak 8 dak 9 vel a in tung dia ki nem na zen pi nitak dak 8 in Lamka a zouveng station ka hong tung pan phet maimah uhi.Hong dawn man omlou ahih man in station akipan in intan khe in ka pai hi. In tun chu aki hi huai mai hi. Ka sung ten aksa sihzou toh pok (ka favourite) ana huan sak ua kipah huai mahmah.......kisil zokzok in ka favourite meh limtak ne in mei phu, tu phalbi a dia ka oi khak patna di ka hon oi chu nuam mahmah litlit mai hi. Ka pan thumna beek nei ni, damtak a hontung thei nahi a, chi in thusaulou hon gen in thumna hon nei in hon lupsan uhi. Lamdang tak in ka gari tuang na bangmah a veilou hileh kilawm in ka om mawk hi, inlam tun d hon ngaklah sak tu ziak a diam ka chi hial hi. Ka inkuan te lup nung in football pek na en ding in ka tulai hi. Huchi kawm kawm in Chingboi toh kaki message kawm uhi. Khokhat vengkhat a om khawmta, kipak mahmah in ka tawl a dam mahmah hi. Ki chiamnuih nalh kawm in kong ki message tou uhi. Zan sawt nung inleng ihmut suak tuansam omlou, kipak tuak in thil teng ban gen in ka om nilouh mawk uhi. 'Ka ngaiihnou ka mu ut lota' ka chih phut mawk le aman leng, 'kenleng kon mu ut' hon chi hi. 'Tu mahmah in leng kon mu ut' ka chih leh aman leng lem sa in zan nung a ki ngaih luat man in kimu din ka hong kisa mawk uhi. Keileng sungte theihlouh ding a a dai thei tawp a pawt khia in chingbou te inlam zuan in ka hong paitou khualkhual ta hi. A in mai uh ka tun in ka message cheuh a, amah le hong pawt khia a...lampi dung ah zankhang cilou in kong kizui uhi. Ki ngai mahmah a ki koi tonton zozen a om in ka om uhi. Ka try lai a hon dawng nitak a hon tutpih na mun ah kava tu ua nuam kasa mahmah uhi. Min hong mu leu bel a 'chance' muh sawm khong ka bang maimah di uh, himahleh huchi lam hilou kimuh kal ngaklah leh ki ngaih luat man kia hizo hi. Kipak selua, a mit a bang a mittui hong paw zozen hi. Kei ka lungsim ana sau pai in, ka zin nawn di ka ngaihtuah lah zel a, a hichih le zo ka zinkik ut nawnkei maimah di e khong ka chi maimah hi. Huchin ka tutu ua, nana chim thei hia, bang khong na hih zel, ken hon ngai theilua peuh kichi tuah a iitna simthu sut khawm in ka om nilouh louh uhi. Huai nitak zo kha le a vaak pha mahmah, nuam kasa mahmah mai hi, ka ngaihpen toh khataang nuai tukhawm, ahahai...… 

A huchih sung in jingkal dak 1 bang peel ta mawk, pai keile den cia inkuan ten hon thei khe leu nuam hetlou di ahih man in pai ka hon sawm ta uhi. A kelkong bul uh ka hong tung ua, goodnite kiss bawl chenchen in ka hong ki khah khe ta uhi. Kei leng in pai suk vengveng in ka tung suk pah a, ka tun a ka room a lut suak in ka lum ngal a, kuanman hon theikei vanglak ua, ka hi huai zozen hi.

Ka gari tuanna, ken ka phawk louh hang in ka gimlam ka taksa in phawk mahmah ahi ding a, lum panpan ka ihmu suk ngal hi. Zingkal ka khangma geet a, annek hun in ka thou khe luailuai hi. Zing thou, anne in morgue lam a hoh din kaki sa ngal a, chingboi ton tou himhim di chi in ka sam ka hon zuun zek a, chingboi te inlam ka hon zuan tou hi. A in uh ka tungtou a, 'Morgue lam va hoh leng cisim keive' ka chih leh biakin lam a program nei ahih dan kisuanglah mel tak in hon hilh hi. Nang kong zui zokei dia chih toh hon thuah a, ken leng biakin lam a poimoh zo, keikia ka hoh di chi in biakinn lam a tel din ka sawl hi. 'Ana khawl awleh huai pam tan bek iki ton di' chi in hong kisa mengmeng hi. Ken le a bench ua tu in ka ngak a, a huchih sung in a nu kholai pawt ahi ngei dia, kong a hon lut in hon muh phet in nuihmai tak in, 'Hong tung maw thang, chik a hong tung e' chih toh chibai hon thuah hi. Kenleng, 'zan a zannung a hong tung kahi' chi in ka nui themtham hi. Chingboi nu te khong hial in hon chibai chiang un zo nuam kasa mahmah mawk hi. Hon welcome mahmah bang kasa thepthup hi. Mi kamsiam maimai khong ahih di chu kalau gu mahmah hi.. 

Chingboi leng hong man siang a, hong kichei leh nidang teng sangsang in bang hoih kasa zo mawk hi. 'Na nalh lua' chin ka nui heuhau pah hi. Anu kia a hoh na di gen in ka hong ki zui pawt ta uhi. 'Zan nitak nanun hon theilou hia' cia ka dot leh, hon theikei vanglak, vangphat huai zozen chin in hong nui chemcham hi. Kenleng biakin gate tan va kha in a lut khit nung in diesel auto khat a tutou daldal in morgue lam ah sigaal din ka kuantou hi. Morgue tungtou in lengkhawm te lak a va tu in, lasak peuh nuam kava sa mawk mawk hi. A chang cia thungen khat le nih hong om zel a, a thugen te uh thupi kasa thei peetmah hi. Gamle nam neitu Pathian ahi a, thilteng gel gel a bang teng pan mah leng, a gam neitu Pathian i phawk kei leh a gam i ngah ngeikei ding uh, chih khong kava za hi. A thugen uh a tak thei mahmah hi. I gen bang tak in Pathian phawk le zo Pathian in amah phawk lou te nuai a hon koih din ka gingta kei hi. Thumkhawm na nei in program zoh di kuan in ka fone in hon vibrate duldul a, ka et leh chingboi apan call hong pai a, zun buk lam a va tai phei in kava pickup hi. 'Morgue a omlai maw, bazar hoh na di ka nei a iva pawt khawm diam' hon chi hi. Kenleng program beikuan hita, chi in ki ngaknna di mun ki houlem in ka bazar pawt khawm din ka hong kisa zui ngal uhi.

Program zoh in kenleng kingak na di ka chih na mun uh, New Bazar auto parking ah kava pai suk a ka tun suk chet leh amah leng auto apan hong kum khe chet a, ki entuah kha geih in ka nui chemcham kha jojen hi. 'Koilam a bang hih di ihia le' ka chih le hon zuizui le chin hon chi hi. Kenleng zui ringot in pawt khawm chu kahi mai uh. New Bazar puanzuak na kawm a lut in a puanak di hon ban et a, hiai toh kaki lawm hia chi in hon dongdong hi, kenlah a silh teng toh kilawm kana sa vek maimah hi.... Atawp in puanak khat chu kahon leikhe thei khong uhi. Kalei zoh ua meh di hon lei phei pih nawn a, bazar nupi te lak a hin meltheih om ziak in na zineih lam non hilh kei a chi peuh in honna chiamnuih uhi. Meh di lei zoh in Zolawi chow ah chow hon nek pih hi. Nektheih hai chih mahtak chu plate thum tak kava gai hi. Ka nek zoh ua inlam pai dia kisa in diesel auto tuang din hong kisa a, kenleng khe in ipai di chi in khe in ka pai pih daih hi. Khe in paileng bel kitung baih lodia maw chih toh ka thuah a ka nui nenalj hi. Ki hou kawmkawm in inlam juan in kapai uhi. A in ua va kha suak a neklim kichi in keileng in ah ka pai suak ngal hi. Mood bang chu fuh zak ahi mai, ka nui nilouhlouh maimah hi.

Hunte hongpaitou tou in a hek mahmah hi. Christmas leh kumthak hun nuam tak zang dia kinep lai in annek khawm na leh lengkhop na gamsung buai na ziak in sailouh in hong om maimah ah, plan chu bang tan hiam hong flop zek hi. Himah leh chingboi toh kikhop na teng a ki zui den thei in ka om ua, nuam kasa veve hi. Annek khawmna kisai louh hang in ka lawmte toh chingboi tel in dam lam ah picnic a annek khawmna sai in Christmas leh kumthak hunnuam ka zang veve uhi. Nuam isak leh zo hun a pai hat khop mai, kum thak zangzou january kha bang hong pailiam di abang ta. Ka skul kai ka sutzop nawn na ding hong nai hiai hiai nawntak toh kiton in ka pai di hun hong nai deuhdeuh mawk hi. Ka patsa bel ka va zil zoh a kul veve ta hi. Gen sese louh in len chingboi in leng thei mahmah a, aman leng ana huphurh khol mahmah hin ka thei hi. Niteng phial a va hoh ka hih man in ka paisan ding chu kenleng a thawm hau tuan mahmah ding chih ka haih kei hi. Himah leh pailouh theihlouh ahih man in kakisak chuh ngai veve ding abang hi. A chang chiang in pi suk mai ding chih peuh ka lungsim ah hong om a, ka gen khak chiang in aman leng hithei sa hial lou in honna nial zel hi. Kenleng kanngaih tuah chiang in hun nai mahmah lou ahih ka haih tuan sam kei. Ki it kingaih zo a haksa mahmah mai. Nidang a ponaa hetlou a ngaihzawng ka neih a ka khen toh hong ki khe mahmah ta mai hi. Nulepa apan leng thuhilh na ka hah zak khop mai. Ngaihzawng neih bel kon kham kei, hileleng na siamsinna pen amasa ding ahi, numei ziak khong in na hong bah mahmah kei di aww chin hon thuhilh ngutngut sek uhi. Alehlam tak ah lah kei lah iitna sal a tang kahi ta maimah. Nulepa hon hilh louh kal in chingboi tan in hong thu hilh sek a, laisim na graduate zoh chiang in ki ngaithak mai leng hilou maw chi peuh in hon gen kha zel.hi. Himah leh kei pen huchi dan hithei ding in ka koih hetkei hi. Aman leng muntuam a ka om zo keii haksa sak tuk in aman leng haksa sa veve ahi chih aki lang hi. Niteng a mel kimuh gige chu nuam kasa mahmah hi, huai hun lah hong bei hiai hiai ahi ta. Ka kik nawn di hun hong nai hiai hiai ta….

Hun chu a pai hat mahmah. February a school lut nawn ding hina pi ka inkuan te kiang ah march ding ahi ka chi a, February kha sung ka om suak lai hi. Chingboi toh nikhat kimu lou a le haksa sa maimah kahih man in kik nawn leng bang ka chi phet di aw, aike amah bang a chi do chih kia ka lungsim ah a lian den hi. Hun nuam zat a hun hek chih mahtak zo khakhat leng bang mah lou bang mai in hong beitou zulzul hi. A hun behlap na ding excuse ka ngaih tuah tuah hang in ka thei zou kei. Pai peetmah a ngai ding abang ta maimah hi. Ka pai ding hon neh hialtak in zo chingboi in khouh chih tak in hon khouta mawk hi. Pai dah maive maw chih ngen kia ka za za ta hi. Ken ka sungkuan te kiang a bang gen ta ding, lawmte kiang a bang genta ding, ka buai mahmah hi. Lungsim a bel pai nawnlouh mai ding kia a om ta mai hi, himah leh zawl ngaih ziak a lekha sim tawp pen maban neih huai sa lou zel dan in ka om a banah inkuan ten leng hon oi louh ding uh leng theihsa ahi bok. Nulepan inkuan haksa ta kawmkal a hiai tan hon tun pih ua, bang hikei leh leng guhtui kang zen a pang a state pua a hon koih khe sam a, en va hichi khawl san mawk ding hithei kasa hetkei hi. Numei bel a dang hong om thei zel sam hi a ka chi a lah chingboi kan a ka ngaih le hon ngaitu ding mu din kaki nem nawn hetkei a, kaki sualsual maita hi. Chingboi pen anu toh kia om ahih man un kei hunteng phial a a in uh ka hoh gige pen amau a dia a chim na kia uh leng vaa thoih dam zou mahmah kahih man in a nu natan in chiamnuih khong peuh in hon khou mawk mawk sek hi. Himah leh thutak a hon hou chiang in bel maban mah khual ding kia hon genpih sek a, alehlam a tha hon pe mahmah zel. Khovel zo a buaihuai mahmah aka. Tomkal hinsung bek nuamtak a ngaihpen toh hun zat khawmkhawm mai ding lunggulh huai maimah a, alehlam a ka ngaihtuah cia, chingboi kia hilou, anu tan a a kinep na dan in kaki koih mawk a, a chingboi mahmah leng insung haksa tak leh genthei tak a khangkhia a, maban a a hinkhua nuam tak a a khosak a, pucca building a tengsak a gari a nuamtak a kitholh sak henhen pen ka deihsak tuntun zel hi. Huai ka lungsim a om in laisim mah poimoh kasa kik zel. Lungsim buaitak a om kawmkawm in ka paina di ticket chu kava cut peetmah ta hi.

Keile kei kisual sual a om kawm kal in ka ticket lak ni chu hon neh hiai hiai ta. Nitak lah aam thei lua kahih man in zan sawt pipi tut kahon panta hi. Sawt tu thei sim chu kahi ngei ding ua, nikhat a nun a lup dek in, 'Ihmut khamlou zen in nong ki aam kei ding uh aw' chi in hon chiamnuih a, chingboi in dawngkik in, 'Taikhua a val leh val ta ve' chin hon jou geih mawk a, ka nui hemham maimah hi....

A vangkim a paidah mai ve hon chihchih chiang,in haksa ka sa mahmah a, nikhat chu kenleng loh ngaihna thei nawnlou in ki guk maiding thu ka hon genta mawk hi. Hichin omom leng ut le utlou a pai maimah ngai ding ahih chiang in, omkhawm theih na di lampi omsun hi in ka koih hi. Ka ki ngaihtuahtuah a, nitak khat chu ka gen ta hi. 'Kei lah ut in utkei leng kalai sim na lam sun zom a ka pai kik ngai teitei ding bang a, omkhawm det keile ka ut lua, nulepa te kiang ah pai nawnlouh mai di gen leng lah hon oi hetlou ding uh ahih man in lampi omsun tuh iki tai pih a iki teen ahi mai' ka ci suk tamai hi. Huai ka chih hial chiang in aman leng hi naupang lai toh hi sa hial lou ahi ding a nial peetmah in hon nial hi. 'Ka u lah a laisim na kum 2bek a sutzop touh ngailai a, ken kanu ka taisan di ka ngaingam kei, hilele nang kei non paisan di ka ut nai sam a uthang' chiin hong kap keuhkeuh hi. Haksa ka sa mah mah a, a thugen bel dik kasa zel, ahitak in zo aman a nu a kep phetlouh, a zi neih matan a kuan khiak lemlou kasak pih zel hi. Ka thil sawm ka tawp thak a, a bang a bang hileh zinnnawn mai ding in thupuknna kon la hi. Ahi thei dandan hong om na inteh chi in kaki hehnem sukmai hi. Nungak, numei hichi tuk a ngaihtheih ahi maw...a chang chiang in bang bang hon loh kha a hichi tel a ngai kahi dia aw, bang ka loh kha a hon hichi ngaih ahi dia aw khong ka chi a, iitna thu kava pat khak bang kaki sik hun khong a tam mahmah hi. Va pan lou hileng zo amah le hichi tuk a sugim lou di hi ing a ka chi hi. Hichi bang a haksat di lam thei leng zo, ngaihluat man genlouh, mabang patlouh mai ding hiven maw.

Ka pai ding ma nitak tuh sawtpi peetmah ki aam tak in kava kenkan hi. Himah leh huai nitak bel chingboi a dai mahmah a, a nguai mahmah hi. Bang ci e cia ikan ciang a lah bangmah cih teng kia dawnna ki mu. Nuam kasa hetkei hi. A chang chiang in kikhen den di lah hilou, kimu nawn zel di, suty hong pai zel di keivoi chi khong peuh in ka heh nem zel hi. Pau ngellou, kihou ngellou in ka hong tu nilouh ua, zan lah hong sawt hiai ta hi. Pau hetlou a ka tut lai un a tawp in hong paukhe khong hi. 'Uthang, damtak in nava pai dia, na laisim hoih tak in va hih in aww, zulesa khamtheih bang mah ah nava ki bual kei ding a, na lekha sim mah non pi bawl pen di. Kei ziak in leng bah loh jojen in om kenla, na laisimna kon suk buai leh kei bel hon koih khe lel le chin' chi in aw ling sim pilhpilh in hon gen hi. Ken leng hon deihsak na kammal te dawng thuk tei ka ut a, himah leh ka dawng kik theikei hi. Ka gawl a bing a ka ngaihna thu gen a, amah a dia ginom gige ding kahih dan thu ka gen ut mahmah hi. Dawng kik dia kaki saksak sung in aman a mittui hon nul siang in, ' Uthang na paita mai diam, na gari tuan na di toh na kham kha di' chi in aw neem tak in hon gen hi. Ken leng dawng jok theilou, hiai ban kimuh nawn di kha bang jah hiam ngak ngainnawn di ahih man in khelah kawm pipi a lu suk ngauh toh ding kon thuah hi. Ka ding khiak in aman leng ka ban a hon len in hon zui pawt hi. 'Kong kha di aw' chi in hon zui pawt a, a gate tan ua kik di kasak leh hong pawt suak hi. 'Koitan hong kha dek e?' ka chih le 'Na gate tan uh' chih teng in hon dawng hi. Kenleng mak sa sim mah leng nial tua sese lou in kaki zuih pawt pih hi. Aman leng ka khut hon letna khah in ka kawng ah hon koi phei a, keileng kisa in ka ban a liang ah ka nga teisam hi. Ka in uh ki gamla lou himah leh lamsau lamlam ton in dakkal khat phial mawngmawng kapai uhi. Ki aam mahmah, himahleh pau zosam omlou in ka pai diahdiah uhi. A tawp in ka gate bul uh kong tung khong uhi. 'Uthang ka gen thei inla chiamteh in aw, kei bel a poimoh masa kahi kei. Hilele hon ngailua kahi aw, damtak in nava pai di' hon chi hi. Kenleng dawngkik in, 'Nang a dia ginom di kahi, hon muang inla nang le ana ginom in aw. Kimuh nawn ma teng omnuam ni aw' ka chi thuk hi. 'Nangle omnuam' chin hon ki hei san a, hon byebye in a inlam hon zotsan hi. Himah leh hon dawnna piak bel ka lungtung zou chiah kei hi. Nangle ginom in aw ka chih pen dawng kha vak lou hi in ka thei hi. Hileleng bang thupi hikei, ki muang louh vai lua chi in kaki genmai suk hi.

Kei le lut pah a lum suak in sana ka et leh dak 2 bang ana ging manta hi. Zing thoh na di dak 5.30 a alarm set in ka mit ka sing suk hi. Theih louh kal in ka alarm hong ging in Lamka tual nuse peetmah din ka hong kisa khe ta. Chingboi ka message chiang in hon thuk hetkei mawk hi. Mak sa sim kawm in a buai a hi in te chi in ka ki hehnem suk hi. Station ka tung pah hang in ka gari tuanna uh dak 8pek in kipan khia hi. Gari hong tai panpan ta a, himah leh chingboi apan message ka mu hetkei mawk hi. Mak sakna hong lian hiai hiai ta hi. Nitak ihmut hak ziak in ihmut hong suak a, tuibuang pel suk panpan in kong ihmu pah hithit hi. Phai katun suk un ka khanglou pan phet hi. Ka phone ka en a himah leh ka kinep, chingboi apan message kamu nai tuankei hi. Mak chu kasa sim a, bang ci e ching chih teng ka thon hi. Dak11 di vel in gari hong kipan khe nawn a, ka lut nawn ta hi. Gari tai nawn in bang tan hiam ka tai nung in zing annek na ding mun ka hongtung uhi. Huai ah kum nawn in ka message nawn a, himah leh reply kamu tuankei hi. A tawp in ka call a, himahleh ring paipai in ki pickup tuankei hi. Keileng lunghimoh na toh pumdim in ka om hi. Bang ci ahi mawngmawng dia aw chi in ka lung sim chu a buai ta mahmah hi. Gari kipan khe nawn in hong tai nawn a, nitak lam khomui zul in Nagaland gam ka hong lut ua, dencia nagaland peel in Assam lut leng phone zat theih nawnlouh ding ahih man in a tawp in beidong gawp in anu call mai ding in ka hong kisa hi. Anu ka call a, a ring pai den in a paisuak zel hi. Ka call thak a, ama bangmah in paisuak nawnzel hi. Maksak na leh lunghimoh na toh pumdim chu kahi tamai hi. Aman a pickup louh tawp a le a nu bek in pick up leh kilawm chi in ka buai mahmah hi. Lungsim nuamlou pi a shillong tual tung maimah ding chu ka bang ta hi....

Lungnuam lou pi a shillong tung dia kiging khol in ka fone switch off dia kaki sak chet leh chingboi nu apan call hong pai chet hi. Kenleng sawt paisak manlou in ka pickup ngal hi. 'Thang, non call zenzen a bang di a, ka pawtkal tak ahi a, chingboi inlah ana pickup lou tel a' chi in hon gen hi. Kenleng gen suk pah miat in, ka call call leh la ngeilou a, message le hon thuk hetlou a ka lunghimoh a ka call ahih dan ka gen suk pah hi. 'Tuni nguai in nguai ve, hou le hou in houpih hak, kape diam leh' chin hon dawng kik a, kenleng awle chi in kihou din phur deuh in houpih din kaki sa hi. Himah leh kinep bang hetlou in apau gina utkei a, na tun lam cia kihou ni maw zo in chi in hon cut khum hiau lel hi. Kei leng ka khasiat tha lamlam bang suak maimah kawm in mak kasa mahmah hi. Kei leng ka hehtha suak ahih man in ka fone switch off in ka bag a guang in ihmu veng2 din kaki sa hi. Gari bel a tai ngeingei in tai mahleh kei bel ka lungsim a khol dedu a, ka ngaihnou kiang ngen ah a om mawk hi. Bang ziak a hong hichi phut zozen ahi dia aww chih kia ka lungsim ah a om ta hi. Kaki ngaihtuah tuah sung in gari hon khim ziak deuh leng ahi diam a, ka hong ihmu suk kha ta hi. Ka ihmu sung in mang ka nei a, kamang in lui lianpi pang ah chingboi toh kana ding uhi. Lui kan ding in kakisa ua, ka khut ah laibu bangjah hiam ka toi hi. Chingboi in, 'Kei hiai long ah kana tuang di aw uthang, a gaal khat lam ah kon ngak d, na laibu toi toh i kan khawm zoukei kha di' chi in long khat a tu gaih hi. Ken leng kham mah leng tu khinta ahih man in ka kham nawn tuan kei a, a long ah leng va tuang pih theih louh adiam chih le ka ngaihtuah sese kei. A long tuanna saupi paitaa, keileng ka lehkha bu toi lom toh tui pal suk din ka hong kisa a, tui ka hon sik suk patpat leh ka khanglou a, ka mai vuah tui in hon theh seseih hi. Kenleng window khak in ka mang om zia ka ngaihtuah a, mak kasa mahmah hi. Chingboi omdan tuam kasak toh ka hei tuah tuah chiang in ka diip peuh a hawm a, ka thawm hau tha a suak mahmah hi. Huchih lai in ka gari uh hong khawl a, ka sana ka et leh zan dak 11 ana gingta a, nitak annek na di mun a khawl kahi uh hi. Gari kham leng hituan lou in ka an duh tha a suah louh ziak in an kane kei a, kum khia a apple pum khat ve lei in huai in ka gilpi ka thoih hi. Gari sung a lut kik in mun khat en gegu in ka tu a, lungsim mumal le ka neithei kei hi. Ka nungak nu, ka iitpen lah tuam a tuam thut mawk, ka mang mat dan lah nuam kasak louh tha suak in a suak hi, ka gari tuanna sang mah a ka lungngaih na a gim zo maimah di ka bang hi. Iitna zo mi a nehsoh mahmah mai aka, tha bang hon zoi sak zou hithet hial in hon thazoh maimah a. Nidang a kana houh ngaih mahmah ngaih zawng thu khong a dinmun a i ding hial leh zo kitheisiam mai aka. Mihing in zo thil i tuah ma bangmah kithei siam lou mah ahi, i hon tuah chiang in bel a sau tung lua kihi ut mahmah hi, keileng kaki ngaihtuah tuah chiang in iitna sal a tang kana hi maimah hi. Suahtak zo haksa mahmah leh kilawm abang ta.

Huchia kaki ngaihtuah dedu laitak in ka gari uh hong ging dundun a, taikhe nawnta ding in hong kisa hi. Keileng kanlungsim thildang a hei sawm in a tuamtuam bang ka ngaihtuah tuah a, ka heikhe zou mahmah kei, ka lungsim bel ka lungtang kiang mah ah a om, ka iit chingboi kiang mah ah a om hi. Himah leh pang tentun thildang, nidang a ka neu lai a nuam kasak dan te khong, ka lawm thuah dan khong ngaihtuah kik a ka omom sung in ka ihmu suk a, zinglam dak 4.30 vel ding a khanglou in Shillong tual ka tung ta hi. Kenleng ka fone off on in ka tunna ding ka ni te call in ka tung lam ka hilh hi. Banah whatsapp lut zok in chingboi message in damtak a tung kahih ka hilh hi. Station a kum in taxi khat kala a, ka tunna ding mun ka ni te in tung in, ka tawl dam tuan mahmah hi. Kisil khe zok in ka gari tuanna ka gim lua chi in ka lumm suak ngal hi.

Zinglam dak 11 vel ding in ka khanglou a, ka fone ka et leh text message ka et leh chingboi apan message hong lut hi. 'Ka netpack a bei a ka online theikei, ka neih ma kithujak louh phot ngai di' chih teng hon khak leuhlauh hi. Ka lung ak vak kei a, na gim hia, bang a ci a na gari tuan, na gim lo di maw chih dan bang hiam bek chu kinem sam hing a ka lungsim in ka ci numnum hi. Lungkim mang lou kahih man in leh ki thujak poimoh sakna kawm toh ka diang khia a netpack ding kava thun sak chet lel hi. Ka thun sak nung hon message di ngak in ka fone ka en nilouh a, sawt khop ka ngak nung in leng hong lut tuankei hi. Ken ka message chiang a lah ki deliver lou ahih man in a tawp in ka call khong hi. Ka call chiang in lah a ring pai suak den, ka call lang lam a ana pickup di omlou ahih man in mak ka sa mahmah hi. Nitaklam khua mial ding kuan ahih in hon thuk khong a, 'ka fone le ka en kha sese kei a hi, sorry' chih teng in hon thuk hi. Kei leng heh sim mah leng pasal pipi va heh phunphun ka utlouh ziak in kaki dek tei tei hi. A omdan tuam sa kahih man in ka kan bawl a lah, bangmah kaci kei chih ngen ka mu kik hi. Kankan leng le a dawnna kibang mah kimu ahih man in kaan na kasa kei a, haksa bel kasa mahmah hi. Haksa kasak hang in thuak theih dandan a thuak tou mai ding in ka thupuk suk lel hi.

Haksa sa kawm pipi leh ki thu zak hoih ngellou in kha khat bang hong pailiam touta hi. Nikhat inlam a ka lawm hoih mahmah khat in hon message a, 'Dam zel maw bawi, na kal simthu uh bang a ci zel a?' hon ci hi. Bawi chih bel kou lawmta ki noutawi na dan a kaki sapna dan uh ahi. 'Fuh a diam, fuhlou adiam theih hak' ka ci thuk hi. 'Gennop sunggil sim khat nei veng aw, lungtang deng kha thei di thil' hon ci a, ken le mak sa sim mahmah heuhou in ka en a, bang thu adia aw ci kawm in, ' Bang ahia le bawi, hon phih khe dole' ka ci a, ka reply nung sawt pi 'typing' nung in ka lamet phak hetlouh in, 'Chingboi in tangval thak nei chih thu len khong kaza abanga, kihta pipi a kon gen ahi, na lawm kahih man a bangmah im sese lou a' chih hong lut tamai hi. Ka lungtang tuh hon deng ngut tak a, lamdang kasa mahmah mai, ka gingta thei keia, gintak leng ka gingta utkei hi. Ahi a lah ka kan thakthak chiang in lah a dik mah hi in gen hi. Kenleng a mi leng kan sau tuan sese lou in, 'Kipah huai lua maw bawi non hilh a, nop lua, leng jiahjiah di hitamai, haha' chin ka thuk kik hi. Ahi tak in ka lungtang tawng bel ana mahmah mai hi. Chingboi inr ka lungtang tawng a zungpi kha khinta ahih man in na kasa mahmah mai hi. Ka tha teng a dah gai a, ka laisim tha leng suak nawn kei hi.

Chingboi in ngaih thak nei ahi chih kazak mak kasa mahmah a, ka lawm pan hon gen hial gintak utkei mah leh juau bel hon hilh sam dia ka gingtak louh ziak in gingtak ngaimaimah ta hi. Huai thu kazak nung khat vei mah leng message ka thuk nawnta kei a, a call leng ka pickup nawn kei hi. Phetlou in ka whatsapp, fb, instangram account teng ka lakhe vek a banah ka number ka khek nalai hi. Thil omdan theichian ut mah leng ka hehna lungsim in hon zou peetmah ahih man in amah muhlouh vengveng le a thuzak theih hetlouh in ka om zota hi. Kingai mahmah hi a kaki theih man in hon hichih mawk din bel ka gingta theikei hi. A ziak hoih tak bel omkha inte, himahleh theihut na leng kannei zou nawnnke, ka tha teng a zoi dimdem ta. Ka exam uh la hunta, exam a leng bangmah ka gelh di ka theikei top hi, ka laisim sa teng le mang gai ta. Bang suak ta ding kahi peuhmah diam maw. Exam zou himah leng inlam pai ka sawm ta kei hi. Kà nuten bel pai ding in hon deih sim mah le uh ka ni te nasep kahon panpih zek ding skul suty sung bek ka chih khem khem hi.

Bang ziak pentak a ka iit chingboi in hon hichih theih a diam aw, hon ngai peetmah hi a ka theih zo hiven maw, hichi maimah zo gintak haksa kasa lua puak haksa kasa lua, bang doh ai hiam? Kaki ngaihtuah tuah laitak in inlam a lawmte khat exam di nei a hong zin khat in ka kiang hong pha hi. Lehkha them lianlou khat hon pia a, a polam ah bangmah kigelh lou ahih man in koi apan ahia chih bel ka theikei. Kankan chiang a lah hon hilh ut hetkei a, na sim chiang in na thei lel ding hon chih san lauh hi. Keileng lawmpa pai nung sawtlou a room a lut in lehkha them tuh ka hong ta hi....

Iitpen Uthang aw,Na dam zel maw, a nuam zel hia? Ken hon ngaithei lua.

Na thuzak tel zo a dik mah hi. Tangval dang kaneih thu a dik mah hi. Hon ngaidam in aw. Hih dingdan dang ka thei tuankei, kikhen ding cileng lah na utlouh ding theihsa ahi. Non khentheih na di omsun zo ngaihzawng dang honneih san hi a ka theih ziak in kana nei ahi. Kei ziak a na maban a bei ding ka deihkei a, kei ziak a nalai sim bahloh ding ka deih sam kei. Kei toh ki ngai toutou leng kon suk buai ding ka theihsa ahi, na suty teng alah hon khou di ing a, kon khouh zohlouh cia hon hehsan di ing a, nang lunggim na ding ngen kahi uthang hon ngaidam in aw. Nang na maban hoih tak in non sunzom ding a, honna ngak ding kahi. Ka ngaihzawng thak zo nang non khentheih na ding a kana neih mah ahi, but i dont share what we share with him, not my heart, not our kisses, not our hugs, not even a little touch. Huai toh leng tun kaki khenta uh. Nang ana ngak ding, lai hon sim mengmeng inla hon pang tou in aw, ka thilhih ziak in hehpihtak in hon ngaidam in aw. Kon ngaihluat ziak ahi aw...uthang kon ngai lua, kon miss gawpta, kon mu ut gawp. Na ngaihdam ka hon ngen.

Nang hon it gigeChingboi.

Hiai teng saulou in kigelh litlet a, ka hehna a puang mahmah hi. Huai a ka pai nitak a ka mangmat omzia tun katheisiam pan. Ka ngaih mahmah hang in amah a din bel kaki koih nawn kei. Keilou a tui gaal kai teelnahih man in kenleng agaal kakai hun chiang in ka phawk nawn sawm kei. Kei hon khual ziak ahi chih bel a lehkha gelh ah akilang, himah leh a thilhih dan dik kasa theikei hi, kei ngaihziak hileh kadam a hon gen mai lou ding a do, bang ziak a tangval dang neih sese teel ahi dia aw. Ka lungsim ah zo kaki khin dimdem ta. Ka iit chingboi aw, tuun le zua, chiin le tuai hal louh hihang a a, kikhen na di lampi na hichi geel tel theihsiam haksa kasa, mangpha man maini maw, damsung a din, nang a din ka lem thei nawnkei ding, a haksat hun a na hon kithuah pih ngap kei leh zo, tunung a kuahiam ka hong suah hun lamen tak a ka ngak, huai hun chiang a zo it pipi a hon phawk nawnlou ding kahi ka chi a, ka lungsim tuh aki khin dimdem ahi ta. Hiai laikhak ka kam ah ka guang a, ka haizan a, nin paih na ah ka lon lut chet hi. Keileng ka lungsim ki bawl thak in chingboi tuh mangngilh di lungsim ah kahon nei ta... Pasal khat hih ngal leh midang mulah kei ning chih kia ka lungsim ah a om ta. Himah leh in tum suaang thei ding a ka om matan ngaihzawng vai a ki diah louh ding mah ahi chih ka phawk khe thakthak hi. Eikia thuak ahi kei a, iki ngaihpih tute a ding a leng lunggimna tamtak kitun ahih man in mihing hinna suse tu kihi thei ahih na ah. Student life zo laisim na mah a masapen ahih ding ahi chih ka zil khia hi. Nidang a hohoih toh kaki ngaih lai uh bang ka phawk khe thak a, amah leng a life bangtan hiam suse phaban kahih na ah ka tuh gah chu at kahi ve chih khong ka ngaihtuah mawkmawk hi... Iit chingboi aw, iki ngaihtung a kaki pahpah maizen toh maw, ihun zat khawm sa hunte ka ngai ngei mai, nuam isaksak maizen toh maw. Kei hon ngaidam zo in aw, kei chitlouh man hi, kei siamlouh man hi, ken non ngaih diak hun tak in konhehsam kha nak a, non poimoh diak huntak in ka hon zinsan a, na theihsiam ding leh na lungnop dingdan tak in piching tak in kanhon khakhe kei a ahi, nang a ding a kisiam kahi kei a hinte maw...Chingboi aw, ahih theih le midang ana zong ta mai inla, kei zo hon lamen nawn dah in aw, nang a din ka hi thei nawn kei ding......

Khitna: Hiai thu kigelh phuahtawm peetmah a ki gelh ahi a, nang hinkhua toh kibang nasak leh leng nang hilou nahi chih ana kithei in, banah 'zenzen' ana chi in. Kuhkal tak leh dohzoutak a nana simsak ziak in kakipak. Zil theih laktaak om zen2 leh kidaam lou hial in ana zang ziah2 lel in...

BEITA

©Siamsinna leh Vakiangbu