ITNA IN HON NASAK AHI HIAM?

Written by:- "Liansuanthang H"

Mi tampi te’n itna in hon nasak, mi I it leh I khasiat nang tam, I lungtang nalua khawng chi ua, itna apan kihepkhiat sawm tam mahmah hi. A diktak pen ahih leh, itna in ei hon hih hatlou, lungsim natna hon tun ana hilou hi. Khat-tang kisak na in hon nasak a, Deihlouh a nawl khin a I om na un hon nasak hizaw a, I ngaih mahmah te I taan na pen in hon nasak ahi zaw hi.

Khovel ah mi tampi te’n hiai atung a I gen, khat-tang na, nawlkhin na, I ngaih te I hinkhua a pan i taan khak na te itna toh thei kukalh gawp uhi, a diktak leh ahi tak a gen in bel, khovel ah I haksatna te nuamtuam deuh leh zang deuh a hon thuaksak tu itna hi a, a kitamzan sa mi khatpeuh tungding thak a lametna pethak nawn thei tu pen itna ahi hi.

Khovel a hon suna lou omsunsun “itna” ahi.

Mi kiang a itna I piak pen hon ki nawlkhin sak chiang in na kisa a, ahih hang in itna liuliau pen ei hon nasak tu taktak hilou hi. Mi khatpeuh it ding, ngai ding a iki sak chiang in, hon sanglou thei ahi chih mohpuakna lakngam na toh amau kiang ah I ngaihdan hiam I itdan hiam ki genkhia hi.

I ngaihzawng I it mahmah te a pan in hiam, I innkuan te apan in hiam, I lawm-leh-gual te apan in hiam ahih kei leh, leitung mi ngaihsutna a it huai hi hetlou te I va it chiang in, nawlkhinna te ziak bang, deihlouna te ziak bang, phamoh hon sakpih louhna te ziak bang un leh, kipahna thu amau kam a pan bangmah I zak thuk louh man in, itna piak khiatna hinkhua I zat na ah tamvei pi mahmah I hinkhua ah lungtang natna I tuak kha a, hon vut suk chenchen ahih man in, I hinkhua kilamdang zou hial di khop in lungsim leh lungtang natna I taksa pum in ahah thuak mahmah hi. Hiai natna I hah thuak luat ziak in “it nawn” ding lauhna ki nei a, ki huphulh tuntun kha zeel hi. Ahih hang in I “itna” pen midang te dawntheih nawnlouh dia luan kangsak ahoihpen ahi diam?

Hoihtak a I ngaihtuah detdet chiang in, I itna I piak ziak a na kisa hilou in, I itna pen hon na nawlkhinsak ziak ua na kisa ahi zaw hi.

Gendan dang ah, “itna in hon nasak” achih theih tham a, himah leh aki lawmzaw leh dikzaw di pen bel, mi dang I itna apan in suknat theih ihi a, huai in lungsim leh lungtang natna hon tunthei hi.

Jesu khrist, bang in Cross ah kikhaisak hiam? Haih vual louh a I theih u tuh alungtang liantak leh ki ningching tak a pan itna ei a dia hong luangkhe te in huai Cross ah kikilh phalna lungtang neisak hi. Itna ziak ahi hia, a khut-leh-khe a sik-kilh khentum tu, itna ziak hilou in I khelhna te ziak a huai sik-kilh te kikhen lut ahi zaw hi. Itna in huaite thaukngap sak a, I khelhna In thuak sak hi.

Mi tengteng in it thuk a, athuak na thuakpih a, kipahpih a, sang kimlou ding ahi chih atheih sa ahi hi. Ahih hang in hon itna suklat tawp tuanlou a,thupukna haksa tak leh eite adia kipah huai mahmah, itna tawpkhawk Calvari ah akim in hon lakzou hi.

Huaiziak in, nawlkhin anatdan te thuak khin in, taan anatna te nakpi a thuakkha khin himah le hang le, itnawn ding laukei ni. Aziak pen bel ei hon it mahmah, itna naak van ah Pa nei ihih man in.

Hon nawlkhin thei uh ahi chih theisa ngoih ngoih a Jesu’n ei a di’n itna ki zousak teitei ahih man in en leng midang te it ding laukei ni. Na ngaih poimoh mahmah, na nungaknu, na tangval pa, na u-leh-nau te, na innkuan te, Toupa’n hon ngaihpoimoh sak hi. It ding pen ei sep ding ahi a, it thuk pen ei bawltheih hilou hi.

“I hinkhua ah, ei hun hongtung pah nailou kha maithei a, ahih hang in ei hun hongtung taktak pahta ding hi, a lampi ah kisakhol ni”.

©Siamsinna leh Vakiangbu